3 Sosu Jisas lowe maꞌe itiyaꞌu eiye, “Ane peri ta fene maꞌe ei toweriyei. Fene peri ano itiyaꞌu au teꞌeyei su, ane faraꞌu peri no itiyaꞌu au teꞌeyei. 4 Fene peri ano itiyaꞌu au teꞌere. Jon lu taune saꞌi se au huwe su, saꞌi se huwe ape, Owane Sitewi lai ausai awere? Lu tamo ausai awere?” 5 Lowe peri ape wanuwe su, lowe taꞌu teꞌe tiyatiteye. Lowe apou toteye, “Nomo itiyaꞌu apou au teꞌeyei su, Owane Sitewi lai Jon lo saꞌi se au huwei ape ausai. Serai le nomo itiyaꞌu eiyei, ‘Fene piyene Jon lo peri wanu umasi taꞌame awere?’ 6 Sosu nomo itiyaꞌu apou au teꞌeyei su, ‘Awei lu owane lai Jon lo saꞌi se au huwei ape ausai.’ Nomo peri ape au teꞌeyei su, lu taune werese nomo maꞌe ai marepi toteye. Lowe nomo maꞌe tapiye ani fu teraꞌeyei. Lu taune werese apou aꞌi totesiya, Owane Sitewi lai Jon eimawesai.” 7 Sosu lowe Jisas maꞌe itiyaꞌu eiye, “Ahowa, nomo soꞌoru taꞌama. Jon eiwerou maꞌe fai awere?” 8 Sosu Jisas lowe maꞌe eiye, “Ane aiwawe aꞌi. Wiyawi erasi pefine aꞌi ano ne, ane irowe ape, ane fene maꞌe ei toweriyei fene lo au teꞌerowata.”

9 Sosu Jisas peri ei toweriyei lowe lo au teꞌe tepaꞌasiye su, le lu taune maꞌe peri anowe ta au teꞌeye. Le apou eiye, “Meni ta taꞌaneyei awei erasi aꞌi taꞌaneye. Sosu le lu tereꞌe tamo lo ereti se au noweinoweiyei ne auwe. Sosu le lowe maꞌe eiye, ‘Me so werese foroꞌoweyei su, ane si tame aiyerowawe, me so tewi aꞌi aniyei.’ Sosu meni owane ape pani eyeri maꞌe fi. Le mi mi tomu neꞌese pani ape iroteye.^a 10 Nowe meꞌiye su, awei ape sahe me so tomu neꞌese taꞌeye. Serai meni owane wiyawi yahowaꞌi aꞌi taꞌane siye meni ta me so tewi aꞌi aniyei ne eimawesawi. Lu ape mo wiyawi yahowaꞌi aꞌi ani siye meni siye aniye su, lowe meni ape me au se aineyewe, si tame eimawesawi. Le me so tewi aꞌi tamo meni owane maꞌe si aiti taꞌama. 11 Wiyawi yahowaꞌi aꞌi taꞌane siye meni, meni owane lo maꞌe si tame au teꞌeri. Serai meni owane wiyawi yahowaꞌi aꞌi taꞌane siye meni tereꞌe taꞌaneyei awei lo maꞌe eimawesawi. Lu ape mo, awei au noweinoweiteye ape, wiyawi yahowaꞌi aꞌi taꞌane siye meni ape siye aniye. Lowe le maꞌe tahe lo au luwaruweye. Lowe meni ape me au se aine luwaruweye su, lowe lai le etiri ta ariye aꞌi se eimawesawi. 12 Meni ape meni owane lo maꞌe peri ape ne si tame au teꞌeri. Sosu meni owane wiyawi yahowaꞌi aꞌi ani siye meni naiteꞌe lowe maꞌe eimawesawi. Lu ape mo meni ape siye aniye su, lowe tahe lo eine se tewiye. Lowe le taꞌaneyei awei nowe maꞌe ani fu arosawi. 13 Awei ape lo meni owane marepi erasi aꞌi apou toteye. Ane lowe ne piye irowei awere? Ane meni eime ano lowe maꞌe eimawesawiyei. Lowe meni eime ano au luwaruwerowata. 14 Sosu taꞌaneyei awei ape lo meni owane lai meni eime lo lowe maꞌe eimawesawi. Sosu meni eime taꞌaneyei awei maꞌe heneri su, lu ape mo le ne apou toteye. ‘Siyere! Meni owane lo meni eime aiyesiya. Meni owane nomo lo temeniyeyei su, taꞌaneyei awei ape meni eime lo maꞌe auwei. Weiya! Nomo meni eime ape aine teraꞌeyei su, sosu taꞌaneyei awei ape nomo lo heneraiyei.’ 15 Lu tewi ape mo meni eime aniteyewe, taꞌaneyei awei nowe maꞌe ani fu arosawi. Sosu lowe meni eime aine teraꞌeye, taꞌaneyei awei ape lo meni owane le piye lu tewi ape mo maꞌe irowei awere? 16 Wanure! Le taꞌaneyei awei lo maꞌe iyei. Le lu tewi ape mo anite tawesiyewe, lowe werese maꞌe aine teraꞌeyei. Lowe werese aine teraꞌeyei su, le taꞌaneyei awei lo ape lu tewi tereꞌe maꞌe au noweinoweiyei ne auwei.”

Lu owane werese peri lo wanuwe su, lowe apou toteye, “Weiya! Le nomo ne au teꞌeye. Owane Sitewi lai nomo maꞌe aine teraꞌerowata.” Sosu lowe peri erasi uteye, “Ahowa, etiri ape henerairowata!” 17 Serai Jisas lowe siye etiyewe, lowe maꞌe eiye, “Peri ano eite wanure! Tu naifa weriyei meni ta apou leseye,

18 “Lu taune werese tapiye tutawe sahe winetaiyei su, lowe paꞌare werese towafi lowe lo towesi fiyariyei. Ahowa, tapiye tutawe lai lu taune ta sahe winetaiyei su, tapiye ape lai lowe aine tapo poꞌuteyei. Awei peperi wou aꞌi aine tapoti fiyariyei. Ane aꞌi lai tapiye ape ne.”^b

19 Jisas peri anowe ape au teꞌe tepaꞌasiye su, au heseyei lu owane, Owane Sitewi lo peri lese siye lu aiwawe aꞌi, lowe Jisas ne ai marepi erasi toteteye. Lowe peri anowe ape ne apou toteye, “Peri anowe eite nomo ne au teꞌesiya.” Serai lowe Jisas ereti wafei se ti anite tawesiyei ne toteye. Ahowa, lowe lu taune werese ne atoweiyeye.

20 Lowe Jisas ne tote tawesi taꞌame su, lowe Jisas lo yo seni werese siye etiye. Lowe lu tamo Jisas ne siye etiyei ne eimawesawi. Lowe yo seni lowe lo aseyaro areareye. Lowe Jisas lo peri werese siye etiye. Jisas lo peri luwaru aꞌi awere? Lowe apou toteye, “Jisas peri ta luwaru aꞌi au teꞌeyei su, nomo le faraꞌu awei lo lu owane maꞌe henetiyei.”^c 21 Sosu lowe Jisas maꞌe peri ta teꞌe toweriyei ne fai. “Meni Owane, peri no wiyeme aꞌi ne. Sosu ne lu taune maꞌe au atuatuwei su, peri no wisere aꞌi ne. Nomo soꞌoruwesiya tene! Ne yo hesi se umasi taꞌame. Ahowa, ne Owane Sitewi lo marepi wiyeme aꞌi se lu taune maꞌe au teꞌe atuatusiya. 22 Ne peri nomo maꞌe itiyaꞌu eire. Nomo awei meni owane tutawe maꞌe takis maꞌaru ta faraꞌu auwei awere? Piyete awere?” 23 Jisas peri lowe lo wanuwe su, le apou toteye, “Lowe ane ne areareyei ne totesiya.” Sosu le lowe maꞌe eiye, 24 “Maꞌaru tau ane ausa. Siyere! Nihari ape ne, eiwerou lo sato irosiya awere? Piye peri lowe maꞌaru tau sahe lesesiya awere?” Lowe itiyaꞌu eiye. “Awei lo meni owane Sisar lo nihari sato irosiya.” 25 Sosu le lowe maꞌe itiyaꞌu eiye, “Wiyeme! Meni owane Sisar lo etiri werese ne fene le maꞌe si tame aure. Sosu aiwawe aꞌi Owane Sitewi lo etiri werese ne, fene le maꞌe si tame aure!” 26 Lowe Jisas lo peri wanuwe su, lowe hepene se su ariye. Lowe Jisas ne lu taune werese lo nihe se au arearerowata. Ahowa, lowe peri tereꞌe ta teꞌe taꞌame.

27 Sosu aꞌi pe Jisas peri teꞌe tepaꞌasiye su, au heseyei lu owane tereꞌe le maꞌe teꞌe toweriyei ne fai. Lu tewi ape mo iyape Sadyusi, marepi lowe lo apou toteye. “Lu taune temeniyeyei su, lowe si tame sineyei taꞌama.” 28 Lowe Jisas maꞌe apou teꞌe toweriye, “Meni Owane, tu naifa weriyei, meni Moses apou leseye,

41 Sosu le lowe maꞌe apou ei toweriye, “Lu owane tamo apou teꞌesiya, ‘Krais Devit lo lu tewi maꞌe fai.’ Lowe piyene apou teꞌesiya awere? Devit tu henerai. Krais nowe moꞌo henerai. Serai piyene le Krais lo meni eime awere? 42 Owane Devit, tu naifa weriyei one towe sahe apou leseye,

45 Lu taune werese Jisas lo peri wanuwe su, le lu disaipel lo maꞌe apou eiye, 46 “Owane Sitewi lo peri lese siye lu tewi ape ne, fene lowe ne weiyai! Lowe ipari tahe pitase aꞌi ani asisiya. Lowe omo pani amerame aꞌi uweisiya. Lu tamo lowe ne apou eiyei, ‘Lu tewi ape wisere aꞌi ne.’ Lowe peri lowe lo wanuwe su, lowe iyape towafi lowe lo ei ani aroweyei. Lowe Owane Sitewi lo wesi sahe me tutoꞌu tutawe onuriyei ne totesiya. Lowe taꞌuwe hereiyei ene ateyei su, lowe me tutoꞌu tutawe onuriyei ne totesiya! Lowe iyape towafi lowe lo ei ani aroweyei. 47 Lowe taune weiname lo wesi maꞌe wiyei su, lowe weiname areareyewe, etiri werese lo taꞌarei aniyei. Lowe Owane Sitewi maꞌe au teꞌeyei su, lowe peri pitase aꞌi lu taune lo nihe se au teꞌeyei. Peri werese lowe lo ahi yahowaꞌi aꞌi teꞌesiya. Lu tewi ape Owane Sitewi lai lowe maꞌe orese erasi pefine aꞌi au luwaruweyei.”