3 Jisas menitani weiname siye aniye su, le lu disaipel lo maꞌe teꞌeye, “Peri ano wanure! Menitani weiname maꞌaru werese ariye ape, le maꞌaru erasi Owane Sitewi maꞌe auwe. Le lu taune tereꞌe werese hi ani ararowe.^a 4 Lu taune tereꞌe werese maꞌaru tewi oso poꞌo siye feri papu fu loto arowe. Lowe maꞌaru tomu neꞌese wesi towafi lowe lo iroteye. Ahowa, menitani weiname ape maꞌaru werese topo lo ariye. Le maꞌaru werese topo lo Owane Sitewi maꞌe auwe. Le maꞌaru tau oso hesi aꞌi siye feri papu fu loto arowe su, maꞌaru werese topo lo poꞌuteye. Le ayei ta eterowata.”

5 Lu feni tamo Owane Sitewi lo wesi tutawe siye eti etiteye. Lowe tapiye wisere aꞌi siye etiteye. Lowe tapiye wisere se, leseye ape, siyeteye. Owane Sitewi lo wesi tutawe wisere aꞌi tene! Lu taune tomu neꞌese tapiye werese Owane Sitewi maꞌe auwei ne aitai. Lowe Owane Sitewi lo wesi siyeteye su, Jisas apou eiye, 6 “Tapiye werese siyere! Nowe ta se heneraiyei su, lu tamo Owane Sitewi lo wesi tapiye werese aine tapeti fiyari arosawirowa. Tapiye werese fiyari poꞌuterowa.”^b

7 Jisas lo lu disaipel le maꞌe apou teꞌe toweriye, “Meni Owane, eiwerou su etiri ape henerairowa awere? Piye etiri tu henerairowa awere? Sosu nomo etiri tutawe siyeyei su, nomo nowe ape atahe aꞌi siye soꞌoruwerowa.” 8 Le lowe maꞌe itiyaꞌu eiye, “Weiyai, lu tomu neꞌese fene areareyei ne toteyei. Lu taune tomu neꞌese iyape ano se aiyerowa. Lowe apou teꞌe arearerowa, ‘Ane lai meni ape, Owane Sitewi hi awei maꞌe eimawe arosai ape ne! Owane Sitewi lai meni ape hi awei maꞌe eimawe arosai. Nowe ape se henerai tepaꞌasiye.’ Peri lowe lo ape wawero ne! Fene peri lowe lo owe ape wanu umasite. 9 Nowe meꞌiye tase, fene ai atuwei lo peri heneruwe wanuwei su, pani tereꞌe tereꞌe ai erasi atu tiyatiteyei. Fene atoweiye sawa! Etiri ape mo tu henerairowa. Ahowa, nowe yeꞌewi ataheye henerai se taꞌama.”

10 Sosu aꞌi pe Jisas lowe maꞌe tame eiye, “Awei pani ta awei pani tereꞌe maꞌe ai atu tiyatirowa. Omo ta omo tereꞌe maꞌe ai atu tiyatirowa. Lu owane ta ai lu werese lo lu owane tereꞌe maꞌe ai atu tiyatirowa. 11 Fene auwe erasi tamo auseriye teriteyei. Awei pani tereꞌe tereꞌe ayei werese ariye poꞌuterowa. Lu taune werese lau erasi teriterowa. Lu taune tomu neꞌese u tahe tereꞌe tereꞌe yaꞌoreteyei. Fene etiri luwaru aꞌi niꞌarawe maꞌe siyerowa. Sosu fene etiri ape siyerowa su, fene atoweiye erasi aꞌi irorowa. 12 Nowe ape se aiwawe aꞌi henerairowa. Etiri werese ape mo henerai se taꞌama. Lu ape lai fene, yo ano umasisiya ape, lowe fene wafei se ereti ti tawesirowa. Lowe fene maꞌe au luwaruwerowa. Fene fofowei erasi aꞌi teriterowa. Lowe fene Owane Sitewi lo wesi maꞌe etiyei ne henetirowa. Lowe fene kalabus sahe fu arorowa. Fene, peri ano umasinamisiya ape, lowe fene awei lu owane maꞌe etiyei ne henetirowa. Lowe fene awei meni owane tutawe maꞌe etiyei ne henetirowa. 13 Lowe fene awei meni owane maꞌe etiyei su, fene lowe maꞌe peri ano fa au teꞌe areiyere. 14 Lowe fene etiyei ne toteyei su, fene marepi erasi aꞌi owe ape totere. Ahowa, fene apou owe ape totere, ‘Lowe ane etiyei su, piye peri ane au teꞌeyei awere?’^c 15 Wanure! Ane aꞌi lai fene maꞌe marepi wisere aꞌi auwei. Ane lai fene maꞌe peri farere aꞌi au teꞌeyei. Serai fene fu teꞌe etiyei lowe lo faraꞌu itiyaꞌu au teꞌeyei. Lowe peri fene lo wanuwei su, lowe fene etirowata. Lowe peri fene lo teꞌe narurowata.^d 16 Nowe ape henerairowa su, tai mai fene lo fene awei meni owane maꞌe etiyei ne henetiyei. Lu tewi, nairipi fene lo aiwawe aꞌi ne. Lowe fene etiyei ne. Lowe fene eti tepaꞌasiyei su, lowe fene tamo aine teraꞌeyei.^e 17 Fene, iyape ano umasinamisiya ape, lowe fene ne ai marepi erasi aꞌi totenamiyei. 18 Lowe fene ne ai marepi toteyei su, lowe fene aine teraꞌeyei ne toteyei. Ahowa, lowe fene aine teraꞌerowata. 19 Nowe luwaru aꞌi henerairowa su, fene kairefi aꞌi teinamiyei su, Owane Sitewi lai hepene fene lo ani tepaꞌasi anirowa. Serai fene mi mi pasi pasi ironamitorowa.

20 Nowe meꞌiye su, ai lu tomu neꞌese omo Jerusalem sahe tei yose tepaꞌasirowa. Fene ai lu ape mo siyerowa su, fene nowe yeꞌewi ape se siye soꞌoruwerowa. Omo Jerusalem atahe aꞌi aine tapeti towesi fiyarirowa. 21 Lu taune pani Judia sahe iroteyei ape, lowe omo hire maꞌe fa itero yane fareyarere. Lu taune omo Jerusalem saro iroteyei ape, lowe omo nowe maꞌe iterotiyei. Lu taune, pani tereꞌe sahe iroteyei ape, lowe omo Jerusalem papu owe ape wire. 22 Piyene awere? Etiri luwaru tomu neꞌese omo ape maꞌe henerairowa. Tu naifa weriyei, lu tamo etiri ape ne apou leseye. Serai etiri werese ape mo pei henerairowa.^f 23 Nowe ape se Owane Sitewi lo ai marepi lu taune werese maꞌe irotorowa. Serai taune werese eime tahe se marepi orese aꞌi henerairowa. Taune werese eimane moꞌu au arowa ape, lowe aiwawe aꞌi, marepi orese aꞌi teritenamirowa. Owane Sitewi lai awei pani werese fene lo maꞌe au luwaruwerowa. 24 Nowe ape se ai lu tomu neꞌese lu taune tamo, omo Jerusalem sahe iroteyei ape, ipari meneꞌe se aine teraꞌeyei. Lu tewi tereꞌe lai lu taune tamo wafei se ti tawesirowa. Sosu pani tereꞌe tereꞌe kalabus eyeri maꞌe henetirowa. Lu tewi tereꞌe lowe maꞌe hi ani ararorowa. Lowe omo Jerusalem lo lu taune werese mi mi werese au luwaruwerowa. Lowe mi mi neꞌese au luwaruwerowa su, nowe meꞌiye su, Owane Sitewi lai lowe au sasari fiyari tepaꞌasirowa.^g

25 Nowe ape henerairowa su, etiri luwaru aꞌi tomu neꞌese poweiye, yame, eiwariyemi sahe henerairowa. Lu taune werese awei sahe irorowa ape, lowe etiri ape mo siyerowa su, lowe marepi erasi aꞌi atoweiyerowa. Lu taune saꞌi ei erasi siyerowa su, sosu saꞌi ei noꞌu erasi wanurowa su, lowe eiwerou maꞌe atoweiye irowata.^h 26 Lu werese etiri luwaru aꞌi ape mo siye anirowa su, lowe marepi taweiru aꞌi ne. Lowe etiri werese, lowe maꞌe henerairowa ape, toterowa su, lowe atoweiye erasi aꞌi totenamirowa. Lowe nihe lowe lo awetu awetorowa. Lowe awei sahe tahe pereꞌeyeyei se winetairowa. Etiri werese, hire maꞌe irotorowa ape, lowe auseriyerowa. 27 Lu taune etiri ape mo siyerowa su, nowe ape se lowe ane meni tu hire maꞌe itorai ape, ane niꞌarawe mase itoraiyei ape, lowe siyerowa. Ane Owane Sitewi lo kairefiyeyei Owane Sitewi lo mi erasi aiwawe aꞌi itorairowa.ⁱ 28 Serai fene etiri werese henerairowa ape, siyerowa su, fene nihe fene lo hire maꞌe siye arowere. Nowe ataheyerowa su, Owane Sitewi lai fene werese witane aꞌi hene wirowa.”

29 Sosu aꞌi pe le peri tepaꞌasiye su, le lu fene lo maꞌe peri anowe ta apou au teꞌeye. “Me owarape siyere, me werese aiwawe aꞌi siyere. 30 Nowe ta se me owarape sahe towe werese winetaiyei. Towe werese winetai tepaꞌasiyei su, fene etiri ta siye soꞌoruwesiya. Me nei heꞌi nowe meꞌiye su heneraiyei. Fene me nei heꞌi aꞌi siyeyei su, fene etiri ta siye soꞌoruwesiya. Me so ape mo taꞌeyei lo nowe ataheyeraiwa. 31 Fene totere. Etiri werese awei sahe henerairowa ape fene siye soꞌoruwerowa su, fene aiwawe aꞌi Owane Sitewi lo nowe ape ataheyewa. 32 Ane peri wiyeme aꞌi fene maꞌe au teꞌesiya. Wanure! Lu tewi werese awei sahe irorowa ape, lowe werese etiri werese ape mo siyerowa. Lu taune tamo temeniyerowata. Ahowa, etiri werese henerai tepaꞌasirowa su, lowe taꞌi taꞌi aꞌi temeniyerowa. 33 Etiri werese hire maꞌe irorowa ape, awei sahe irorowa ape, etiri werese towesi fiyari poꞌuterowa. Ahowa, peri werese pefine aꞌi ano mi mi pasi pasi ironamitorowa. Peri werese ano poꞌuterowata. Peri werese ano wiyeme aꞌi henerairowa.

34 Fene werese weiyai! Fene saꞌi luwaru aꞌi owe ape ene a meremereyete. Fene awei lo marepi owe ape totenamite. Fene yo seni luwaru aꞌi eito eite irowei su, Owane Sitewi lo nowe ape fene maꞌe witane aꞌi heneraiyei. Fe laꞌinau aiwawe aꞌi ne. 35 Ane si tame itoraiyei su, nowe ape lu taune werese omo omo werese maꞌe witane aꞌi henerairowa. 36 Serai fene mi mi pasi pasi siye etire. Fene Owane Sitewi maꞌe apou teꞌe towerinamite, ‘Owane Sitewi, ne nomo maꞌe kairefiyeyei no aure. Serai nomo etiri werese luwaru aꞌi, henerairowa ape, aweraꞌiyenatirowa. Sosu aiwawe aꞌi Jisas, meni ape tu hire maꞌe itorai ape, le lai yo seni nomo lo au hese eti ereirowa su, nomo le maꞌe neritase aꞌi se teirowata.’”

37 Sosu aꞌi pe le peri ape au teꞌe tepaꞌasiye su, le nowe mi werese Owane Sitewi lo wesi tutawe sahe lu taune werese maꞌe Owane Sitewi lo peri au teꞌe areiyeteye. Nowe neriwei su, le Owane Sitewi lo wesi tutawe arunatiyewe, omo ta iyape Oliv maꞌe fi. Le pasi aꞌi omo ape maꞌe iroteye. 38 Nowe mitaiyeye su, le Owane Sitewi lo wesi tutawe sahe si tame wiye. Lu taune tomu neꞌese Owane Sitewi lo wesi sahe peri lo wanuwei ne fai.