3 Sosu aꞌi pe sepei luwaru aꞌi tutawe, Satan, meni Judas papu wiye. Meni ape lo iyape tereꞌe Iskariot. Le Jisas meni lu disaipel aiwawe aꞌi iroteye.^a 4 Le au heseyei lu owane tamo, sosu ai lu tamo, Owane Sitewi lo wesi au noweinoweiteye ape, le lowe maꞌe au teꞌeyei ne fi. Le lowe maꞌe apou ei toweriye, “Fene meni Jisas aine teraꞌeyei ne totesiya awere? Ane meni ape fene maꞌe henetaiyei su, fene maꞌaru eiwerou aꞌi ane maꞌe auwei awere?” 5 Au heseyei lu owane werese Judas lo peri wanuwe su, lowe marepi wisereye nineꞌiteye. “Wiyeme aꞌi ne! Nomo ne maꞌe maꞌaru tomu neꞌese auwei.” 6 Sosu Judas lowe maꞌe itiyaꞌu eiye, “Ei, ane Jisas fene maꞌe henetaiyei.” Sosu le lowe arunatiyewe fi. Le Jisas aine teraꞌeyei lo yo ape ne ani nehiti. Le apou toteye, “Jisas woto aꞌi iroteyei su, ane faraꞌu lowe maꞌe henetiyei. Lu taune tomu neꞌese Jisas siyeowata.”

7 Sosu aꞌi pe taꞌuwe hereiyei, iyape Pasova, henerai tepaꞌasiye. Juda lo lu taune werese nau taꞌase aꞌi ene aye. Nowe ape se Juda lo meni owane fe sipsip taꞌi aine teraꞌeyewe, Owane Sitewi maꞌe au heseye.^b 8 Sosu Jisas lu hesi Pita, Jon ei aniye. Le lowesi maꞌe teꞌeye, “Fenesi wesi ta Pasova lo ene ayei ape taꞌuweyei ne ire! Sosu nomo Pasova lo taꞌuwe hereiyei ene arowa.” 9 Lowesi le maꞌe itiyaꞌu teꞌe toweriye, “Eiwerou maꞌe nomo taꞌuwe hereiyei taꞌuweyei awere?” 10 Sosu le lowesi maꞌe itiyaꞌu eiye, “Wanure! Fenesi omo Jerusalem maꞌe wiyei su, fenesi meni ta saꞌi paꞌare suteyei ape siyerowa. Fenesi meni ape moꞌo umasire. Meni ape wesi lo wiyei su, wesi ape sahe nomo taꞌuwe hereiyei ene ayei. 11 Fenesi wesi ape papu wiyei su, fenesi wesi ape lo meni owane ape maꞌe apou eire, ‘Meni Owane notosi lo, ne maꞌe ei towerisiya, wesi eite tewi wesi ta irosiya awere? Serai ane lu disaipel ano mase taꞌuwe hereiyei Pasova ene ayei. Wesi tewi ta irosiya awere?’ 12 Meni ape fenesi maꞌe wesi tewi ta erasi aꞌi hire maꞌe au atuatuwei. Wesi yaru tewi ape etiri werese saro iroteyei, metei, me tutoꞌu saro iroteyei. Fenesi ayei etiri werese au taꞌuwere.” 13 Sosu lowesi Jisas arunati fiyewe, omo Jerusalem maꞌe heneri. Etiri werese, Jisas lowesi maꞌe au teꞌeye ape, wiyeme aꞌi henerai. Lowesi meni taꞌi saꞌi paꞌare suteti siyesawi. Lowesi meni ape moꞌo umasiti. Lowesi wesi tewi ape maꞌe wiye su, lowesi ayei werese ene ayei ne ani taꞌuwe naneiye.

14 Nowe ape henerai su, Jisas lu disaipel lo mase wesi tewi ape sahe aiwawe taꞌuwerai. Lowe werese metei sahe onuri. 15 Sosu Jisas lu feni maꞌe eiye, “Ane aꞌi lai marepi erasi aꞌi se taꞌuwe hereiyei ape fene aiwawe ene ayei ne totesiya. Nomo Pasova ape ene a tepaꞌasiyei su, ane fofowei erasi aꞌi teriteyei. 16 Wanure! Ane taꞌuwe hereiyei ape ene a tepaꞌasiyei su, ane Pasova tereꞌe si tame arowata. Ahowa, ane si tame itoraiyei su, ane faraꞌu tame arowa. Nowe ape se Owane Sitewi lu taune au noweinoweirowa ape taꞌuwe hereiyei Pasova lo eti wiyeme aꞌi henerairowa.” 17 Sosu le peri teꞌe tepaꞌasiye su, le siye auwe wain saꞌi mase ereti se aniye. Le Owane Sitewi maꞌe hire maꞌe au teꞌe wisereyeye. Sosu le lowe maꞌe eiye, “Siya auwe eite anitere! Fene werese tewi are! 18 Wanure! Ane wain saꞌi tereꞌe tame arowata. Nowe ape se Owane Sitewi lai lu taune au noweinoweirowa ape, henerairowa su, ane faraꞌu wain saꞌi tame arowa. Nowe ape se ane Meni Owane Pefine aꞌi henerairowa. Ane lu taune werese au noweinoweirowa.” 19 Lu feni werese wain saꞌi a tepaꞌasiye su, le nau taꞌase ereti se aniye. Le Owane Sitewi maꞌe nau taꞌase ape au teꞌe wisereyeye su, le nau taꞌase tewi pa tewi ani topoto lotowe. Le lowe maꞌe eiye, “Nau taꞌase tahe paꞌare ano wou aꞌi ne. {Ane tahe paꞌare ano fene maꞌe auwei. Fene nau taꞌase ene anamiteyei su, fene ane ne tote etire.” 20 Sosu lowe nau taꞌase ene a tepaꞌasiye su, le aiwawe aꞌi siye auwe ereti aniye. Le Owane Sitewi hire maꞌe au ei teꞌe wisereyeye su, le lowe maꞌe eiye, “Wain saꞌi ape lai fisaꞌi ano wou aꞌi ne. Nowe meꞌiye su, ane fisaꞌi ano fene ne ani teroso arowei. Serai ane fene maꞌe peri teꞌe naneiyei heꞌi auwei. Apou aꞌi au teꞌeyei. Fisaꞌi ano ani teroso arowei su, ane yo seni luwaru werese aꞌi fene lo au sasari poꞌutesawirowa.”}^c 21 Ahowa, weiya! Meni ta, ane ai lu maꞌe areare henetiyei ape, le metei sato nomo aiwawe onusiya.^d 22 Peri ano wiyeme aꞌi ne! Wanure! Ei, ane, meni hire maꞌe itorai ne. Nowe meꞌiye su ane temeniyerowa. Owane Sitewi lai wiyawi ano ape ariariyeye. Ahowa, meni ape ne weiyai! Meni ape ane ai lu maꞌe henetirowa su, le marepi orese erasi aꞌi teritenamirowa.” 23 Lu feni werese Jisas lo peri wanuwe su, lowe aꞌi lai teꞌe tiyatiteye. “Eiwerai meni ape ai lu maꞌe henetirowa awere? Ane lai awere? Ahowa, ane lai taꞌama.”

24 Lowe aꞌi lai teꞌe tepaꞌasiye su, lowe ai peri ta au teꞌeye. Lowe apou teꞌe toweriye, “Nomo lo meni tutawe eiwerai henerairowa awere?”^e 25 Sosu Jisas peri lowe lo wanuwe su, le lowe maꞌe itiyaꞌu teꞌeye, “Lu tewi tereꞌe lowe meni owane tutawe irosiya. Meni owane tutawe, le lu taune topo lo maꞌe wiyawi erasi au none ereisiya. Lu taune topo lo lowe maꞌe apou eisiya, ‘Meni Owane lowe kaiyemo mo nomo lo ne.’”^f 26 Ahowa, fene aiwawe aꞌi taꞌama. Meni ta meni owane heneraiyei ne totesiya ape, le meni yoꞌorei aiwawe aꞌi heneraiyei. Meni ta meni owane tutawe heneraiyei ne totesiya ape, le wiyawi yahowaꞌi aꞌi ani siye meni wou heneraiyei.^g 27 Ane fene maꞌe ei toweriyei, eiwerai meni owane irosiya awere? Meni ta metei sahe onusiya awere? Meni yahowaꞌi aꞌi ta ayei ene a nonetisiya awere? Eiwerai meni iyape se irosiya awere? Meni ta metei sahe onusiya awere? Le aꞌi lai iyape se irosiya awere? Weiya, siyere! Ane aꞌi lai fene maꞌe ayei au nonetisiya.^h

28 Lu tamo ane maꞌe au luwaruweye su, fene ane mase ironamiteye. Ahowa, fene ane mase teinamiteye. 29 Tai ano kairefi heꞌi aꞌi ane maꞌe au noweinoweiyei ne auwe. Serai ane fene maꞌe kairefiyeyei ape aurowa. Fene ane mase lu taune au noweinoweirowa. 30 Nowe yeꞌewi se, ane lu tewi heꞌi aꞌi ape mo au noweinoweiyei ne itorairowa su, fene ane mase ironamitorowa. Fene ane mase ene arowa. Sosu wain saꞌi ane mase aiwawe arowa. Fene lu taune werese au noweinoweisiya. Fene Juda lo lu tewi werese ape mo peri lowe lo wanu au hese eti ereirowa.”ⁱ

31 Sosu aꞌi pe Jisas Pita maꞌe eiye, “Saimon, Saimon, ne weiyai! Sepei Satan Owane Sitewi maꞌe tote tawesiyei no ape ne ei toweriye. Le apou ei toweriye, ‘Ane Saimon Pita lo tote tawesiyei au hese siye etiyei. Tote tawesiyei lo meremereye aꞌi awere? Apou wou aꞌi menitani ta oroꞌoru kewi so maꞌe au sasarisiya.’ 32 Ahowa, ane lai Owane Sitewi maꞌe ne ne au ei toweriye. Serai tote tawesiyei no kairefi aꞌi teinamiteyei. Aiwawe aꞌi tote tawesiyei no ani fu aro luwaruwerowata. Sosu sepei Satan lai tote tawesiyei no au siye hese eti tepaꞌasiyei su, ne tame tei kairefiyerowa. Ne tame tei kairefiyeyei su, ne lu feni ano au pati tei kairefiyete.”^j 33 Sosu Saimon Jisas maꞌe itiyaꞌu eiye, “Meni Owane, peri ano wanure! Ane ne mase kalabus wesi maꞌe aiwawe iyei. Lu tamo ne aine teraꞌeyei ne toteyei su, ane ne mase temeniyeyei.” 34 Jisas le maꞌe itiyaꞌu eiye, “Pita, ane ne maꞌe eisiya. Wanure! Nowe mitaiyeyei su, irowe Kakaruk aite peri uteyei taꞌama su, ne ane ne meꞌiyeni maꞌe atati aruwei. Nowe hesi heta ne ane ne meꞌiyeni maꞌe atati aruwei.”

35 Sosu aꞌi pe Jisas lu disaipel lo maꞌe teꞌeye, “Tu naifa ane fene Owane Sitewi lo peri au teꞌeyei ne eimawesawi su, fene maꞌaru ipi, lowe tahe, niye fene lo aiti taꞌama. Ahowa, fene lau mase iroteye awere? Fene wesi sahe nihe howeiteye awere?” Lowe le maꞌe itiyaꞌu eiye, “Ahowa, nomo wisere aꞌi teinamiteye. Etiri werese poꞌute se taꞌame.”^k 36 Sosu le lowe maꞌe eiye, “Ahowa, weiya! Ane fene Owane Sitewi lo peri tame au teꞌe fiyariyei ne eimawesawiyei. Fene iyei su, fene maꞌaru niye irosiya ape, fene faraꞌu aitire. Aiwawe aꞌi fene niye irosiya ape, fene faraꞌu aitire. Fene ipari meneꞌe pite aꞌi ariye su, fene ipari tahe fene lo meni ta fa etere. Sosu maꞌaru aniyei su, fene ipari meneꞌe pite aꞌi etere. 37 Ane fene maꞌe eisiya. Wanure! Tu naifa Owane Sitewi lo au teꞌe siye meni ta, le ane ne apou leseye,

39 Sosu aꞌi pe Jisas wesi nowe maꞌe fi. Le Omo Oliv maꞌe yaneye. Lu disaipel lo moꞌo umasiye. Le pasi pasi werese omo ape maꞌe yaneteye. 40 Le omo hire maꞌe yaneye su, le lowe maꞌe teꞌeye, “Fene Owane Sitewi maꞌe au teꞌere. Serai fene yo seni luwaru aꞌi lo marepi owe ape umasite.” 41 Jisas peri tepaꞌasiye su, le lowe arunatiyewe, eyeri oso aꞌi maꞌe fi. Le awei sahe lowe uporo apeꞌi onuwewe, Owane Sitewi maꞌe au teꞌe tiyatiteye. 42 Le Owane Sitewi maꞌe apou au teꞌeteye, “Tai ano, ane temeniyeyei wou taꞌama. Ne aiwawe totesiya su, ane faraꞌu temeniyeyei aweraꞌiyenatiyei. Ahowa, ane marepi ano umasiyei taꞌama. Ane marepi no fu umasiyei.” 43 {Jisas peri lo au teꞌe tepaꞌasiye su, Owane Sitewi lo ipari wisere aꞌi ta hi maꞌe Jisas lo marepi au kairefiyeyei ne itorai. 44 Le marepi orese aꞌi teriteteye, le tahe luꞌawi erasi henerai, fisaꞌi wou aꞌi awei sahe teroso itowe.}^l 45 Jisas Owane Sitewi maꞌe au teꞌe tepaꞌasiye su, le sineyewe, lu disaipel lo maꞌe si tame fi. Lowe werese marepi orese aꞌi teriteye. Serai lowe werese nihe howeiteye. 46 Sosu Jisas lowe maꞌe eiye, “Fene piyene nihe teisiya awere? Sinere! Fene Owane Sitewi maꞌe tame au teꞌere! Serai fene yo seni luwaru aꞌi lo marepi owe ape fa umasire.”

47 Sosu aꞌi pe Jisas lu disaipel lo maꞌe au teꞌeteye su, lu tomu neꞌese Jisas maꞌe henerai. Meni ape Judas, lu werese tu henerai. Le Jisas maꞌe henerai su, le Jisas lo ahi tahe weniwe sahe eriteyei ne ani teineye. 48 Ahowa, Jisas le maꞌe eiye, “Judas, ne ane meni hire maꞌe itorai ape, ahi tahe weniwe ano sahe ariariyeyei ne ani teineye awere? Serai lu werese notosi siyeyei su, lowe ane kalabus wesi maꞌe heneti.” 49 Sosu lu disaipel lo etiri ape siyeye su, lowe Jisas maꞌe teꞌe toweriye, “Meni Owane, nomo faraꞌu ipari meneꞌe se lowe maꞌe ani tewiyei awere?” 50 Ahowa, meni ta ipari meneꞌe ereti se aniye su, le meni ta apaniye ai feni se aine laꞌeye. Meni ape au heseyei meni owane lo wiyawi yahowaꞌi aꞌi taꞌane siye meni. 51 Ahowa, Jisas itiyaꞌu eiye, “Aru, faraꞌu papa.” Sosu le meni ape lo apaniye ereti se aniyewe, si tame fuwe. Apaniye ape au taꞌane faraꞌuweye. 52 Sosu Jisas au heseyei lu owane tutawe mo owane tereꞌe aiwawe, le lowe maꞌe ei toweriye, “Fene me au, ipari meneꞌe se ane maꞌe anite tawesiyei ne aitai awere? Taꞌarei siye meni wou aꞌi ne. Ahowa, ane taꞌarei siye meni taꞌama. 53 Mi mi werese ane Owane Sitewi lo wesi tutawe sahe peri au teꞌenamiteye. Nowe ape se fene ane anite tawesiye taꞌama. Ahowa, nowe ano henerai tepaꞌasiye. Fene sepei Satan lo marepi fa umasire.”

54 Sosu aꞌi pe ai lu werese Jisas lo ereti wafei se anite ti tawesiye. Lowe Jisas omo Jerusalem maꞌe heneti. Lowe au heseyei meni owane tutawe lo wesi maꞌe heneti. Lowe Jisas heneti su, Pita lowe moꞌo eyeri oso aꞌi umasiti.^m 55 Ai lu tamo Jisas wesi maꞌe hene wiye su, lu tereꞌe nepawe amerame sahe yehe ani lei etineteye. Pita lowe mase aiwawe aꞌi onuteye. 56 Lowe yehe sahe onuteye su, wiyawi yahowaꞌi aꞌi taꞌane siye menitani lai Pita siye etiye. Sosu le lowe maꞌe apou teꞌeye, “Meni ape Jisas mase iroteye.” 57 Ahowa, Pita itiyaꞌu eiye, “Wawero aꞌi ne! Menitani, ane meni ape soꞌoru taꞌama.” 58 Nowe oso aꞌi su, meni tereꞌe Pita siyeye. Le Pita maꞌe eiye, “Ne lai Jisas lo meni disaipel tene!” Ahowa, Pita le maꞌe itiyaꞌu eiye, “Ahowa, wanure! Ane taꞌama.” 59 Nowe tewi i tepaꞌasiye su, meni tereꞌe Pita ne au teꞌeye, le apou eiye, “Ane soꞌoruwesiya tene! Meni eite Jisas mase ironamiteye. Peri teꞌeyei lo ape wanure! Le Jisas lo omo pani Galili aiwawe maꞌe fai.” 60 Ahowa Pita apou itiyaꞌu eiye, “Meni peri ano wanure! Ane peri no ne soꞌoru taꞌama.” Sosu Pita peri au teꞌe tepaꞌasiye su, irowe kakaruk aite peri erasi uteye. 61 Sosu Jisas Pita maꞌe atati siye etiye. Sosu Pita Jisas lo peri tu au teꞌeye ape marepi tote tawesiye. Apou aꞌi toteye, “Ne irowe kakaruk peri uteyei wanuwei su, ne nowe hesi heta ane ne meꞌiyeni maꞌe atati aruwei.” 62 Sosu Pita Jisas lo peri tote tawesiye su, le nowe maꞌe heneye. Le marepi orese aꞌi luwei erasi irowe.

63 Sosu aꞌi pe ai lu tamo Jisas ereti lowe wafei se anite ti tawesiye ape, lowe Jisas ne peri teꞌe naruwe. Lowe le maꞌe me au se aineye. Lowe Jisas ne paꞌeyei erasi irowe. 64 Lowe ipari tahe se nihe lo ti tawesiye. Lowe nihe lo ti tawesiye su, lowe le maꞌe teꞌe toweriteye, “Ne Owane Sitewi lo peri au teꞌe siye meni lai su, ne peri nomo maꞌe au teꞌe areiyere. Eiwerai ne maꞌe aineye awere?” Sosu lowe niyeyei erasi aꞌi irowe. 65 Lowe werese peri wawero tomu neꞌese le maꞌe teꞌe etiye. Aiwawe aꞌi lowe le se peri teꞌe naruwe.

66 Nowe esi mitaiyeye su, Owane Sitewi lo wesi yaꞌariyei lu taꞌuwerai. Au heseyei lu owane tutawe, Owane Sitewi lo peri lese siye lu tamo, lowe Jisas taꞌuweyei wesi maꞌe teꞌe toweriyei ne heneti. 67 Lowe Jisas maꞌe apou teꞌe toweriye, “Ne peri nomo lo itiyaꞌu au teꞌere! Ne meni ape Owane Sitewi lai hi awei maꞌe eimawe arosai awere?” Ahowa, Jisas itiyaꞌu eiye, “Ane peri apou eiyei su, ‘Ei, ane meni ape tene!’ Fene peri ano tote tawesiyei taꞌama.ⁿ 68 Sosu aiwawe ane fene maꞌe peri ta ei toweriyei su, fene peri ano itiyaꞌu au teꞌeyei taꞌama. 69 Nowe pereye eite se, sosu mi mi pasi pasi weriyei se ane, meni hire maꞌe itorai ape, ane Owane Sitewi, Meni Owane kairefiyeyei pefine aꞌi lo ereti eyate feni maꞌe onunamitorowa.”^o 70 Sosu lowe werese le maꞌe teꞌe toweriye, “Wanure! Ne Owane Sitewi lo meni eime awere?” Sosu Jisas lowe maꞌe itiyaꞌu eiye, “Ei, ane lai tene! Fene peri wiyeme aꞌi ape teꞌeye.” 71 Lowe Jisas lo peri wanuwe su, lowe itiyaꞌu eiye, “Wanure! Nomo peri tereꞌe tamo le ne wanu taꞌame. Nomo peri topo lo wanu tepaꞌasiye. Le apou eiye, ‘Ane lai Owane Sitewi lo meni eime!’ Nomo le fa etire.”