3 Sosu meni Pailat peri lowe lo wanuwe su, le Jisas maꞌe ei toweriye, “Ne Juda lo meni owane tutawe awere?” Jisas le maꞌe itiyaꞌu eiye, “Ei, ne peri wiyeme teꞌe tepaꞌasiye.” 4 Sosu meni Pailat Jisas lo peri wanuwe su, le au heseyei lu owane maꞌe, sosu lu taune werese maꞌe apou eiye, “Wanure! Ane yo seni luwaru aꞌi ta meni ape sahe siye taꞌame.” 5 Ahowa lowe le maꞌe si tame itiyaꞌu eiye, “Meni ape lu taune werese lo marepi au luwaruweye. Le peri luwaru aꞌi tu omo Galili sahe au teꞌeye. Sosu moꞌo le omo pani Judia sahe au teꞌe fiyariye. Serai le omo omo werese sahe lu taune maꞌe au teꞌe atuatu fiyariteye.” 6 Ahowa, meni Pailat peri lowe lo wanuwe su, le lowe maꞌe ei toweriye, “Meni eite lo omo sitewi, Galili irosiya awere?” Lowe itiyaꞌu eiye, “Ei, le pani Galili maꞌe fai.” 7 Sosu meni Pailat peri ape wanuwe su, le apou toteye, “Meni eite pani Galili maꞌe fai. Awei meni owane Herot le meni eite fa etire. Le Herot lo pani maꞌe fai. Serai Herot meni eite fa etire!” Nowe ape se awei meni owane Herot omo Jerusalem sahe onuteye.^a

8 Sosu aꞌi pe meni Herot peri eite wanuwe su, “Pailat Jisas ane maꞌe etiyei ne eimawesawi.” Le marepi wisere aꞌi toteye. Le Jisas lo wiyawi werese ne wanuwe. Serai yame tomu neꞌese se le Jisas siyereme. Le wiyawi erasi aꞌi Jisas taꞌaneye ape, le siyereme. 9 Sosu Jisas Herot maꞌe heneri su, le peri tomu neꞌese Jisas maꞌe ei toweriye. Ahowa, Jisas peri werese itiyaꞌu ei taꞌame. 10 Au heseyei lu owane tamo, Owane Sitewi lo peri lese siye lu tamo sato iroteye. Lowe werese peri erasi se peri wawero teꞌe etiteye. 11 Meni Herot ai lu werese lo aiwawe aꞌi Jisas maꞌe au luwaruweye. Lowe le maꞌe peri teꞌe naruwe. Lowe ipari tahe loꞌu aꞌi au ani asiye. Ipari tahe loꞌu aꞌi apou aꞌi toteye. Meni Owane tutawe lo ipari tahe wou aꞌi ne. Lowe le ne paꞌeyei au irowe. Sosu Herot Jisas meni Pailat maꞌe si tame eimawesawi. 12 Lowesi Pailat Herot aiwawe tu lowesi ai peri tiyati aꞌi iroteye. Pereye lowesi pinasu weri henerai.

13 Sosu aꞌi pe lowe Jisas meni Pailat si tame henetai su, Pailat lai, au heseyei lu owane werese awei lu owane werese, lu taune werese, le lowe werese taꞌuweyei wesi maꞌe ei aniye. 14 Sosu le lowe maꞌe teꞌeye, “Peri ano wanure! Fene meni eite ane maꞌe etiyei ne henetai. Fene le ne peri etiyei apou aꞌi teꞌeye. ‘Meni eite lu taune werese marepi luwaru aꞌi tatai aniteye. Serai lowe awei lo yo peri arisiye.’ Ahowa, ane meni eite lo yo seni werese nihe fene lo siye eti hese ereiye. Serai ane yo seni luwaru aꞌi lo siye taꞌame. Peri fene lo, fene le ne teꞌe etiye ape, wawero aꞌi ne. 15 Aiwawe meni owane Herot le meni eite lo yo seni luwaru aꞌi siye taꞌame. Serai le nomo maꞌe si tame eimawesai. Yo seni werese lo aseyaro aꞌi ne. Serai ane le aine teraꞌerowata. 16 Serai ane le maꞌe tahe lo sahe wafei se aineyei. Tahe lo sahe aine tepaꞌasiye su, ane nowe maꞌe ani arosawiyei.” 17 {Iyu menei taꞌi taꞌi werese aꞌi, nowe taꞌuwe hereiyei se, awei meni owane, meni taꞌi kalabus sahe iroteye ape, le kalabus nowe maꞌe ani arosawiyei. Serai Pailat lu taune werese maꞌe apou ei toweriye, “Ane taꞌuwe hereiyei fene lo se meni taꞌi kalabus sahe nowe maꞌe ani arosawiyei. Ane faraꞌu meni eite Jisas kalabus nowe maꞌe ani arosawiyei awere?”}^b 18 Ahowa, lu taune werese peri erasi itiyaꞌu uteye, “Ahowa! Meni eite aine teraꞌere! Meni ape Barabas kalabus nowe maꞌe ani arosawire!” 19 Meni ape Barabas le lu tewi lo aiwawe awei meni owane lo ai lu maꞌe ai atu tiyatiteye. Le lu tamo aine teraꞌeteye. Serai ai lu tamo le kalabus sahe fu arosawi. 20 Sosu Pailat Jisas nowe maꞌe ani arosawireme. Serai le lu taune werese tame teꞌeye, “Ane yo seni luwaru aꞌi lo siye taꞌame. Serai ane le nowe maꞌe ani arosawiyei.” 21 Lu taune werese peri erasi aꞌi si tame uteye, “Ahowa, meni eite me tapeꞌi sahe aine teraꞌere! Me tapeꞌi sahe aine teraꞌere!” 22 Ahowa, Pailat lowe maꞌe tame teꞌeye, “Fene piyene meni eite aine teraꞌeyei ne toteyei awere? Le piye yo seni luwaru aꞌi irowe awere? Ane yo seni luwaru aꞌi, meni eite sahe irosiya ape, siye taꞌame. Meni eite yo seni luwaru aꞌi irowe su, ane faraꞌu le me tapeꞌi sahe aine teraꞌeyei. Ahowa, ane yo seni aseyaro lo siye eti ereisiya. Serai ane meni eite lo tahe wafei se aineyei su, ane le nowe maꞌe ani arosawiyei.” 23 Ahowa! Lu taune werese peri erasi si tame uteye, “Ne meni eite me tapeꞌi sahe aine teraꞌere! Le me tapeꞌi sahe aine teraꞌere! Le me tapeꞌi sahe aine teraꞌere!” Pailat peri noꞌu erasi aꞌi wanuwe su, le marepi lowe lo maꞌe tote atati aruwe. 24 Serai meni Pailat lowe maꞌe eiye, “Faraꞌu aꞌi ne. Ane ai lu tamo maꞌe eiyei, fene meni eite henetire! Fene le me tapeꞌi sahe aine teraꞌere.” 25 Pailat peri teꞌe tepaꞌasiye su, le ai lu tamo maꞌe apou eiye, “Fene meni Barabas, kalabus wesi sahe irosiya ape, fene le nowe maꞌe ani arosawire.” Meni Barabas, meni luwaru aꞌi ne. Le ai lu tamo maꞌe ai atuwe. Sosu le lu tamo aine teraꞌeye. Serai lowe meni ape kalabus wesi sahe ani fu arosawi. Meni ape Pailat lai kalabus wesi nowe maꞌe hene ani arosai. Sosu le Jisas ai lu tamo maꞌe heneti. Serai le lu taune werese lo marepi umasiye.

26 Sosu aꞌi pe ai lu tamo Jisas nowe maꞌe heneti. Lowe me tapeꞌi ta taꞌane tepaꞌasiye su, lowe meni ta iyape Saimon ereti aniteye. Meni ape Saimon, le omo pani Sairini maꞌe fai. Lowe Jisas lo me tapeꞌi meni ape lo iyoꞌo sahe au sutetiteye. Sosu Jisas omo nowe maꞌe tututiteye. Meni ape, Saimon, Jisas lo me tapeꞌi au sutetiye ape, moꞌo umasiti.

27 Jisas, ai lu werese, Saimon, lowe omo Jerusalem nowe maꞌe itori. Lu taune tomu neꞌese taꞌuwerai. Lowe werese moꞌo umasitiye. Taune werese le ne marepi orese aꞌi lu ewiteteye. 28 Sosu Jisas luwei erasi aꞌi wanuwe su, le taune werese maꞌe atati siye etiye. Le lowe maꞌe eiye, “Jerusalem lo taune werese, fene ane ne owe ape lu ewitere! Fene towafi fene ne aꞌi lu ewitere. Piyene awere? Owane Sitewi lai fene maꞌe etiri luwaru erasi aꞌi eimawe arosairowa. Aiwawe aꞌi fene eimane werese fene lo lu ewitere. 29 Wanure! Nowe ape se, lu tamo apou eiyei, ‘Taune werese waiyari aꞌi ape, taune werese moꞌu fi foroꞌo aꞌi taꞌame ape, fene werese marepi wisere aꞌi nineꞌiteyei.’^c 30 Nowe ape se lu taune werese omo ta maꞌe eiyei,

33 Ai lu werese Jisas lu hesi aiwawe omo hire maꞌe yaneye. Omo ape iyape lo sitewi, “Mato Paꞌare lo Omo.” Omo ape sahe lowe Jisas me tapeꞌi sahe niꞌari se ereti lowe aine tawereye. Sosu lowe me tapeꞌi hire maꞌe au ani sineteye. Lowe meni luwaru aꞌi taꞌi ereti eyate feni maꞌe me tapeꞌi sahe aine tawereyewe, au ani sineteye. Sosu meni luwaru aꞌi tereꞌe ereti opi feni maꞌe me tapeꞌi sahe aine tawereyewe, au ani sineteye. 34 Lowe Jisas lo me tapeꞌi sineye su, Jisas Owane Sitewi maꞌe peri ta apou teꞌeye, {“Tai ano, lu eite mo, lowe etiri, lowe irowe ape, lowe soꞌoru taꞌama. Ne faraꞌu yo seni luwaru aꞌi lowe lo marepi no papu owe ape tote anite tawesire.”}^d Jisas Owane Sitewi maꞌe au teꞌeye su, ai lu tamo Jisas unahi awei sato tapiye oso aꞌi ani fu arosawi. Tapiye taꞌi aꞌi ai lu ta Jisas lo ipari tahe aniyei ne ariariyeye. Ai lu tereꞌe tereꞌe ipari tahe tereꞌe tamo lo erei noneye.^e 35 Lu taune tomu neꞌese eyeri oso aꞌi sahe etiri werese ape mo tei siyeteye. Awei lu owane tamo Jisas maꞌe teꞌe naruteye. Lowe apou eiye, “Le lu taune tereꞌe tamo au pati aniteye.” Ahowa, le apou eiye, “Owane Sitewi lai ane hi awei maꞌe eimawe arosai. Peri lo ape wiyeme aꞌi su, le topo le eiwerou pati anirowata.”^f 36 Ai lu tamo aiwawe Jisas teꞌe naruteye. Lowe Jisas wain saꞌi, uwaseye ape, au aye.^g 37 Lowe apou eiye, “Ne Juda lo meni owane tutawe su, ne topo ne aꞌi lai hi ani erau itora.” 38 Meni ta metei tewi oso aꞌi sahe peri ta leseye. Peri ape apou aꞌi leseye.

39 Meni luwaru aꞌi ta, me tapeꞌi sahe iroteye ape, le aiwawe Jisas peri luwaru aꞌi teꞌe naruwe. Le apou eiye, “Ne Meni Owane Sitewi ariariyeye ape awere? Ne Meni Krais su, ne hi maꞌe itore. Ne notosi aiwawe aꞌi ani eraure. Serai notosi aiwawe itoraiyei.” Le Jisas maꞌe peri pisaꞌi teꞌe naruteye. 40 Ahowa, meni luwaru aꞌi tereꞌe ape le pinasu lo maꞌe eiye, “Peri titanere! Ne Owane Sitewi Pefine atoweiye siye taꞌama awere? Wanure! Ne yo seni luwaru aꞌi ironamiteye su, lowe ne aiwawe aꞌi aine teraꞌeyei. 41 Ei, notosi yo seni luwaru aꞌi tomu neꞌese ironamiteye. Serai notosi me tapeꞌi sahe temeniyeyei. Ne meni ape siyere! Meni ape yo seni werese aseyaro aꞌi ironamiteye. Piyene lowe le aine teraꞌeyei awere?” 42 Sosu le Jisas maꞌe atati eiye, “Jisas, ne si tame itorairowa su, ne marepi no papu ane tote anite tawesire.” 43 Sosu Jisas le maꞌe itiyaꞌu eiye, “Peri ano wanure! Wiyeme aꞌi, pereye, ne ane aiwawe omo hire maꞌe ironamiteyei.”

44 Sosu aꞌi pe nowe poweiye ponei teiteye su, nowe pasiyeyei wou aꞌi henerai. Pasiyeyei awei pani werese napetu tawesi poꞌuteteye. Poweiye wati se nowe pasiyeyei ape tepaꞌasiye. 45 Poweiye hire maꞌe Owane Sitewi lai ereti se fu tawesiye. Aiwawe Owane Sitewi lo wesi tutawe sahe ipari tahe, wesi papu heriteye ape, Owane Sitewi lai ipari tahe ape tewi aꞌi tewi aꞌi ani erauwiye.^h 46 Sosu Jisas peri erasi uteye, “Tai ano! Ane hepene ano ereti no maꞌe auwei.” Sosu Jisas peri ape teꞌe tepaꞌasiye su, le temeniyeye.ⁱ 47 Sosu ai lu lo meni owane Jisas lo peri wanuwe su, le Owane Sitewi maꞌe au teꞌe wisereyeye. Le apou eiye, “Wanure! Meni ape lo yo seni luwaru se taꞌame.” 48 Lu taune werese etiri ape mo siyeteyei ne taꞌuwerai ape, lowe werese marepi orese erasi aꞌi totenamiteye. Lowe wesi towafi lowe lo si tame fi. Lowe ereti neme lo tepi pi se tomuteye. 49 Jisas lo lu feni tomu neꞌese omo pani Galili maꞌe fai ape, taune tomu neꞌese Jisas aiwawe moꞌo umasiye. Lowe etiri werese ape mo eyeri oso aꞌi sahe tei siyeteye.

50-51 Meni ta iyape Josep aiwawe iroteye. Meni ape Juda lo omo ta iyape Arimatea maꞌe fai. Le nowe ape se, Owane Sitewi lai lu taune au noweinoweirowa ape, ninaweteye. Tu naifa au heseyei lu owane teꞌe taꞌuwerai su, meni ape aiwawe iroteye. Lowe tereꞌe werese apou eiye, “Ei, nomo Jisas fa aine teraꞌere.” Ahowa, meni ape apou eiye, “Ahowa, nomo Jisas aine teraꞌeyei taꞌama. Meni ape meni wisere aꞌi ne. Le Owane Sitewi lo marepi umasinamiteye.” 52 Meni ape Jisas lo tahe paꞌare aniyei ne toteye. Serai le awei meni owane Pailat maꞌe ei toweriyei ne fi. 53 Pailat apou eiye, “Faraꞌu aꞌi ne. Ne tahe paꞌare lo ani itoraire!” Sosu le Jisas lo tahe paꞌare ani itorai. Le ipari tahe wapo aꞌi se Jisas lo tahe paꞌare ani worone ti tawesiye. Sosu le tapiye fisiye yo papu au howeiye. Tapiye fisiye yo ape heꞌi aꞌi taꞌaneye. 54 Meni ape Jisas lo tahe paꞌare fisiye yo sahe au howeiye su, nowe erese iroteye. Juda lo lu taune werese nowe amou (Sabat) au taꞌuwe naneiteye. Poweiye amou ape ataheyerai. 55 Taune tamo Jisas Pani Galili maꞌe aiwawe fai ape, lowe meni ape moꞌo umasitiye. Lowe Jisas lo fisiye yo siyeyei ne umasitiye. Eiwerou maꞌe iroteye awere? Sosu tahe paꞌare lo eiwerou fuwe awere? 56 Lowe fisiye yo siyeye su, lowe wesi towafi lowe lo maꞌe si tame fi. Lowe etiri saꞌi tamo heneri aꞌi tomu neꞌese taꞌuwe naneiteye. Lowe etiri saꞌi werese taꞌuwe nanei tepaꞌasiye su, lowe Moses lo yo peri umasiteye. Lowe poweiye amou ape tei fetaneyeteye. Sosu lowe Owane Sitewi maꞌe au teꞌe wisereye nineꞌiteye.^j