3 Lowe fisiye yo papu wiye su, Meni Owane Jisas lo tahe paꞌare siye ariye. 4 Lowe hepene se suꞌariye. Lowe marepi erasi aꞌi toteye. Lowe fisiye yo siye ariye su, siyere! Lu hesi papu siyeye. Ipari tahe lowesi lo mi erasi aꞌi aiwawe tewi mitaiyeye. 5 Taune ape mo lu hesi ape siyeye su, lowe marepi atoweiye tote auseriyeteye. Lowe awei sahe lowe uporo apeꞌi onuwe. Sosu lu hesi ape lowe maꞌe teꞌe toweriye, “Fene piyene meni hepene se, ironamisiya ape, fisiye yo papu nehisiya awere? 6 Jisas sato ariye. Le si tame norohuwe sineye. Tu naifa fene le mase omo pani Galili sahe iroteye su, le fene maꞌe peri ta au teꞌeteye, fene peri ape marepi tote eti tawesisiya awere?^a 7 Le fene maꞌe apou eiye, ‘Lu tamo ane, meni hire maꞌe itorai ape, lowe ane lu luwaru aꞌi maꞌe henetiyei. Lowe ane me tapeꞌi sahe aine tawere teraꞌerowa. Sosu nowe hesi heta ane si tame norohuwe sinerowa.’” 8 Owane Sitewi lo ipari hesi ape peri ape au teꞌeye su, taune ape mo Jisas lo peri marepi anite tawesinamiteye. 9 Serai lowe Jisas lo tapiye fisiye yo arunatiyewe fi. Lowe Jisas lo lu disaipel ereti feni hesi lowe taꞌi aꞌi (11) maꞌe lu taune tereꞌe tereꞌe aiwawe aꞌi peri ape au teꞌeyei ne fi. 10 Taune ape mo iyape lowe lo apou aꞌi ne. Maria, le omo Makdala maꞌe fai. Menitani tereꞌe Jona, menitani tereꞌe Maria, Jems lo mai. Taune tereꞌe tamo lowe mase Jisas lo lu disaipel ereti feni hesi lowe taꞌi aꞌi (11) maꞌe peri ape au teꞌeye. 11 Jisas lo lu disaipel peri lowe lo wanuwe su, lowe apou toteye, “Taune werese eite mo meremereye aꞌi henerai. Nomo peri lowe lo soꞌoru taꞌama.” Lowe taune lo peri tote tawesi taꞌame. 12 {Ahowa, Pita sineteyewe, tapiye fisiye yo maꞌe iteroti. Le tapiye fisiye yo maꞌe heneri su, le meꞌiyeni epeꞌe arowe. Fisiye yo papu siyeye. Le Jisas lo ipari tahe, lowe tahe paꞌare lo noweri tawesiye ape, siyeye. Le wesi topo lo maꞌe si tame fi. Le hepene se suꞌariye. Eiwerou irowe awere?}^b

13 Sosu aꞌi pe nowe ape se, Jisas lo lu feni hesi aꞌi omo ta iyape Emeus maꞌe iyei ne toteye. Lowe omo Jerusalem arunatiyewe, omo Emeus maꞌe heneri. Omo ape eyeri atahe aꞌi iroteye (11 kilomita). 14 Lowesi yo sahe iteye su, lowesi etiri werese iroteye ape, teꞌe teꞌe tiyatiteye. 15 Lowesi teꞌe tiyatiteye su, Jisas lai lowesi maꞌe henerai. Le lowesi mase iteye. 16 Lowesi meni ape siye soꞌoru taꞌama. Nihe lowesi lo aworu aꞌi ne. 17 Sosu Jisas lowesi maꞌe ei toweriye, “Fenesi itiye su, piye peri teꞌe teꞌe tiyatiteye awere?” Sosu lowesi tei fetaneye su, lowesi marepi orese aꞌi teriteye. 18 Meni taꞌi iyape Kliopas, le maꞌe ei toweriye, “Ne omo Jerusalem heꞌi aꞌi fai awere? Ne etiri werese, heneraiteye ape ne, soꞌoru taꞌama awere?” 19 Sosu Jisas lowesi maꞌe itiyaꞌu eiye, “Piye etiri ta heneraiteye awere?” Lowesi le maꞌe itiyaꞌu eiye, “Etiri werese Jisas ne, omo Nasaret maꞌe fai ape, le Owane Sitewi lo au teꞌe siye meni tutawe ne. Peri werese lo wiyeme aꞌi ne. Le wiyawi erasi pefine aꞌi lu taune werese ne taꞌaneteye. Owane Sitewi lo nihe se meni ape waraꞌi aꞌi tene! 20 Au heseyei lu owane tamo, awei lu owane aiwawe aꞌi lowe Jisas etiyei ne heneti. Lowe apou eiye, “Le fa temeniyere. Serai lowe le me tapeꞌi sahe aine tawere teraꞌeye. 21 Nomo werese marepi apou aꞌi toteye. Meni ape pani Israel lo lu taune werese si tame eteyei. Ahowa, pereye le temeniyeye. Etiri werese ape mo henerai su, pereye nowe hesi heta i tepaꞌasiye.^c 22-23 Pereye esi pasi taune tamo Jisas lo fisiye yo maꞌe fi. Lowe tahe paꞌare lo siye ariye. Sosu lowe si tame iterotaiyewe, nomo maꞌe peri teꞌe ausai. Lowe apou eiye, ‘Nomo suwou se Owane Sitewi lo ipari wisere hesi aꞌi siyeye. Lowesi nomo maꞌe teꞌeye. Meni ape fene nehisiya ape, le si tame norohuwe sineye. Nomo werese hepene se suꞌariye.’ 24 Lu tamo lowe lo peri wanuwe su, lowe fisiye yo maꞌe siyeyei ne fi. Lowe fisiye yo maꞌe heneri su, lowe apou aiwawe aꞌi siyeye. Taune ape lo peri wiyeme aꞌi teꞌeteye. Lowe tahe paꞌare lo le siye taꞌame.”^d 25 Sosu Jisas lowesi maꞌe itiyaꞌu eiye, “Marepi fenesi lo meremereye aꞌi ne. Tu naifa weriyei, Owane Sitewi lo au teꞌe siye lu werese Jisas ne au teꞌenamiteye. Fenesi etiri werese ape mo siyeye su, fenesi peri lowe lo marepi tote anite tawesi taꞌame awere? Marepi fenesi lo kairefi luwaru aꞌi ne. Fenesi peri lowe lo wanu tote tawesi taꞌame. 26 Peri ano wanure! Meni ape Jisas, Owane Sitewi lai meni ape hi maꞌe fofowei erasi teriteyei ne eimawesai. Le aꞌi lai Owane Sitewi lo marepi umasiteye. Aiwawe aꞌi le etiri werese teriteye su, le omo hire maꞌe wirowa. Serai Owane Sitewi lai le maꞌe etiri werese si tame aurowa. Etiri werese fa henerairowa.”^e 27 Tu naifa Moses, Owane Sitewi lo au teꞌe siye lu aiwawe aꞌi lowe one towe sahe peri ta Jisas ne leseye. Sosu Jisas lowe lo peri lo eti werese lowesi maꞌe au teꞌe atuatu areiyeteye. Le tu Moses lo peri au atuatuteye. Sosu moꞌo Owane Sitewi lo au teꞌe siye lu werese lo peri au teꞌeteye.^f 28-29 Sosu lowe omo Emeus maꞌe atahe aꞌi heneri su, nowe pasiyeye. Jisas omo ape aweraꞌiyenatiyei ne toteye su, lowesi le maꞌe eiye, “Weiya! Nowe pasiyewa. Ne notosi aiwawe aꞌi wesi sahe howeira.” Sosu Jisas wesi lowesi lo maꞌe aiwawe aꞌi fi. 30 Lowe wesi papu wiye su, le lowesi mase metei sahe ene ayei ne onuri. Le nau taꞌase ereti aniteyewe, Owane Sitewi maꞌe au teꞌe wisereyeye. Le nau taꞌase tewi pa tewi aꞌi ani topotowe su, le lowesi maꞌe nonetiye. 31 Le nau taꞌase nonetiye su, nihe lowesi lo amerame aꞌi siyeye. Lowesi Jisas amerame aꞌi siye wiyemeyeye. Pereye aꞌi lowe Jisas saro siye nehi poꞌutenati. Jisas teꞌi fi. 32 Jisas poꞌutenatiyewe fi su, lowesi teꞌe teꞌe tiyatiye. Lowesi apou teꞌeye, “Meni ape notosi yo sahe uweitai su, le Owane Sitewi lo peri au teꞌe atuatu areiyeye su, marepi notosi lo erasi aꞌi totenamiteye. Le Owane Sitewi lo peri werese notosi maꞌe au teꞌe atuatu areiyeteye.” 33 Sosu pereye aꞌi lowesi omo Jerusalem maꞌe si tame iteroti. Jisas lo lu disaipel ereti feni hesi lowe taꞌi aꞌi (11) lu taune tereꞌe aiwawe aꞌi wesi sahe taꞌuwerai. Lowesi lowe werese nehiyei ne fi. Lowesi lowe siyeye su, lowesi apou teꞌeye, 34 “Meni Owane nomo lo, le si tame norohuwe sineteye tene! Le Saimon maꞌe heneri.”^g 35 Sosu lowesi lowe maꞌe peri lowesi lo au teꞌeteye. Jisas lowesi mase yo sahe iteye. Le Owane Sitewi lo peri lowesi maꞌe au teꞌe areiyeteye. Sosu lowe omo Emeus heneri su, le wesi lowesi lo ene ayei ne onuri. Le nau taꞌase tewi pa tewi aꞌi lowesi maꞌe ani topotowewe, none ene aye su, nihe lowesi lo amerame aꞌi siyeye. Serai lowesi Jisas siye soꞌoruweye.

36 Sosu aꞌi pe lowesi peri lowesi lo au teꞌe tepaꞌasiye su, Jisas lai lowe ponei sahe teiteye. 37 Lowe le siyeye su, lowe werese atoweiye auseriyeteye. Lowe apou toteye, “Nomo sepei luwaru aꞌi siyesiya.”^h 38 Ahowa, Jisas lowe maꞌe eiye, “Fene piyene marepi papu atoweiye auseriyesiya awere? Fene piyene marepi hesi aꞌi totesiya awere? 39 Ereti lowe ano siyere! Lowe ereti lowe ano niꞌari se aine tawereye. Fene enite niyame yaru ano siyere! Ane lai ne. Ereti fene lo enite niyame yaru ano sahe fa isawe hete siyere! Fene ane siyere! Ipari werese tahe paꞌare ariye. Ane lai tahe paꞌare ironamisiya. Fene ane siyere!” 40 {Sosu Jisas peri tepaꞌasiye su, le ereti lowe lo lowe maꞌe au atuatuwe.}ⁱ 41 Lowe werese ereti lowe lo siyeye su, marepi lowe lo wisere erasi aꞌi nineꞌiteye. Lowe werese marepi hepene se suꞌariye. Sosu Jisas lowe maꞌe ei toweriye, “Fene ayei ta irosiya awere?” 42 Lowe itiyaꞌu eiye, “Ei, hare ta tetisisiya, ne hare eite ani are.” 43 Sosu le nihe lowe lo se hare ape ani ene aye.

44 Sosu aꞌi pe le hare a tepaꞌasiye su, le lowe maꞌe eiye, “Ane tu fene mase iroteye su, ane peri ano fene maꞌe au teꞌe areiyeteye. Moses, Owane Sitewi lo au teꞌesiye lu werese, lowe ane ne one towe sahe leseteye. Lu ape mo, one towe sahe leseteye ape, lowe ane ne aiwawe apou leseteye. Etiri werese ape mo nowe meꞌiye se fa heneraire.”^j 45 Sosu le marepi lowe lo amerame aꞌi heneraiyei ne au irowe. Serai lowe Owane Sitewi lo peri werese lo eti siye soꞌoruwe tepaꞌasiye. 46 Sosu le lowe maꞌe eiye, “Tu naifa meni ta Owane Sitewi lo peri one towe sahe apou leseye. ‘Nowe meꞌiye su, meni ta ane ariariyeye ape, le etiri fofowei luwaru tomu neꞌese aꞌi teriterowa. Lowe meni ape aine teraꞌerowa. Sosu nowe hesi heta i tepaꞌasirowa su, le si tame norohuwe sinerowa. 47 Jisas si tame norohuwe sineteye su, serai nomo Jisas lo iyape se lu taune werese maꞌe fa au teꞌe fiyarirowa. Nomo tu omo Jerusalem sahe fa au teꞌe fiyarirowa. Moꞌo omo omo pani werese sahe Jisas lo peri fa au teꞌe fiyarirowa. Lowe werese yo seni luwaru aꞌi meꞌiyeni maꞌe atati arurowa. Serai Jisas lai yo seni luwaru werese aꞌi lowe lo ani pamowerowa.’ 48 Etiri werese, Jisas iroteye ape, fene lai siye soꞌoruwe tepaꞌasiye. Aiwawe Jisas lo peri werese, le au teꞌeteye ape, fene lai wanuteye. Etiri werese, fene siyeteye ape, sosu etiri werese, fene wanuteye ape, fene lu taune werese maꞌe au teꞌe fiyari areiyete.^k 49 Ane fene maꞌe au teꞌesiya. Wanure! Ane hire maꞌe wiyei su, ane lai Owane Sitewi lo teꞌe naneiyei fene maꞌe si tame eimawe arosairowa. Owane Sitewi lo teꞌe naneiyei ape Owane Sitewi lo Hepene Waraꞌi aꞌi ne. Le fene papu wiyei su, fene Owane Sitewi lo kairefiyeyei anirowa. Weiya! Fene omo Jerusalem sato irore. Nowe ape se Owane Sitewi lo Hepene Waraꞌi aꞌi fene papu wiyei.”^l

50 Sosu aꞌi pe Jisas peri ape teꞌe tepaꞌasiye su, lowe omo Jerusalem nowe maꞌe heneti. Le lowe omo Betani maꞌe heneri. Lowe omo Betani maꞌe heneri su, le ereti lo ani aroweyewe, Owane Sitewi maꞌe au teꞌeye, “Tai ano, ne lowe maꞌe au pati ferafereite. Ne lowe maꞌe au noweinoweite.” 51 Sosu le Owane Sitewi maꞌe lowe ne au teꞌeteye su, le niꞌarawe papu hire maꞌe wiye. 52 Sosu Jisas niꞌarawe papu wiye su, lowe omo Jerusalem maꞌe si tame fi. Lowe marepi wisere erasi aꞌi nineꞌinamiteye. Sosu lowe Jisas maꞌe lowe uporo apeꞌi onuwewe, le maꞌe au teꞌe wisereye nineꞌiteye. 53 Lowe mi mi werese Owane Sitewi lo wesi tutawe papu witeye su, lowe Owane Sitewi maꞌe au teꞌe wisereyenamiteye.