3 Owane Sitewi awei etiri werese au taꞌaneyei ne toteye su, le meni eime lo maꞌe apou eiye, “Meni eime ano, ne etiri werese au taꞌanere.” Serai le etiri werese au taꞌaneye. Etiri werese taꞌaneye ape, peri pefine lai au taꞌaneye. Owane Sitewi tereꞌe lai etiri werese au taꞌane taꞌame.^b 4 Le papu marepi hepene sato ironamisiya. Sosu marepi hepene ape lu taune maꞌe mi erasi Jisas wou aꞌi tewi mitaiye fiyarisiya.^c 5 Mi erasi ape pasi aꞌi maꞌe tewi mitaiye fiyariye. Ahowa, pasi aꞌi mi erasi hi ani fu ararorowata.^d

6 Sosu aꞌi pe mi erasi ape ne, Owane Sitewi lai meni taꞌi au teꞌe fiyariyei ne eimawesai. Owane Sitewi Pefine aꞌi meni ta eimawesai, iyape Jon.^e 7 Le mi erasi ape au teꞌe areiyeyei ne fai. Le mi erasi ape au teꞌe areiyeyei su, lu taune tamo mi erasi ape ne wanu tote tawesiyei. 8 Meni ape lai mi erasi taꞌame ne. Ahowa, le mi erasi siyeyei su, sosu le lu taune maꞌe au teꞌe fiyariyei.

9 Sosu aꞌi pe mi erasi pefine aꞌi, lu taune werese maꞌe au tewi mitaiye fiyarisiya ape, hi awei maꞌe itorai. Lu taune ape mo, mi erasi pefine aꞌi ape aniyei su, lowe Owane Sitewi lo marepi pefine aꞌi siye soꞌoruwerowa.^f 10 Mi erasi pefine aꞌi ape, le hi awei sato iroteye. Le aꞌi lai etiri werese lu taune aiwawe aꞌi, awei sahe irosiya ape, taꞌaneye. Ahowa, lu taune werese lai, awei sahe iroteye ape, lowe le ne siye soꞌoru taꞌama. 11 Le Juda lo lu tewi topo lo ape maꞌe itorai, sosu lu tewi lo ape le ne wanu tote tawesi taꞌame. 12 Ahowa, lu taune werese, peri lo wanu toteyei ape, sosu iyape lo ne tote tawesi umasiyei su, le lowe werese maꞌe kairefiyeyei lo auwe. Serai lowe Owane Sitewi lo eimane heneraiyei. 13 Lu taune Owane Sitewi lo eimane heneraiyei su, Owane Sitewi lai lowe eimane lo au iro heneraiyei ne. Mai eimane auteiyei su, lowe Owane Sitewi lo eimane henerai taꞌame. Mai tai auteiyei ne toteyei su, eimane lowesi lo Owane Sitewi lo eimane henerai taꞌame. Sosu lu lo marepi eimane ne toteyei su, lowe Owane Sitewi lo eimane henerai taꞌama. Ahowa, Owane Sitewi lo eimane werese marepi lo se heneraiyei.^g

14 Peri wiyeme aꞌi ape lai tahe paꞌare henerai. Sosu le nomo aiwawe ironamiteye. Nomo mi erasi lo siyeye. Mi erasi ape eime taꞌi aꞌi lo ne. Le aꞌi lai Owane Sitewi Tai Pefine aꞌi maꞌe fai. Le aꞌi lai Owane Sitewi lo ferafereiyei, sosu peri pefine aꞌi marepi hepene lo temeꞌeriyenamiye.

15 Meni ape Jon, le ne au teꞌe fiyariye. Le peri erasi apou hare uteye, “Meni ape ne ane lai, le ne tu au teꞌeye ape, apou eiye, ‘Meni ape ane moꞌo aiyerowa. Wiyawi ano ani tepaꞌasiyei su, le wiyawi lo heneraiyei. Le aꞌi lai ane hi ani ararosiya. Piyene awere? Le tu mi mi pasi pasi weriyei ironamiteye.’” 16 Le marepi wisereye temeꞌeriyesiya. Serai le aꞌi lai nomo maꞌe ferafereiyei taꞌi taꞌi aꞌi aunamisiya. 17 Sosu Moses lai, ereti topo lo se, Owane Sitewi lo yo peri leseyewe, nomo maꞌe auwe. Sosu aꞌi pe Owane Sitewi lo ferafereiyei ape, peri pefine lo etiri ape mo Jisas Krais sahe henerai.^h 18 Lu taune werese werese aꞌi Owane Sitewi maꞌe siye taꞌame. Ahowa, Owane Sitewi lo meni eime taꞌi aꞌi, le aꞌi lai Owane Sitewi Tai Pefine aꞌi nomo maꞌe au atuatuwe. Le Tai Pefine aꞌi wiyeme eyate feni maꞌe onunamisiya.ⁱ

19 Sosu aꞌi pe Juda lo lu owane tamo, lowe au heseyei lu owane tamo, sosu Livai lo lu tewi tamo Jon maꞌe eimawesawi. Lowe le maꞌe apou ei toweriyei ne fi, “Ne eiwerai awere?” 20 Sosu lowe le maꞌe apou ei toweriye su, le mi mi werese itiyaꞌu au teꞌeteye, “Ane lai Krais taꞌama.”

21 Serai lowe le maꞌe ei toweriye, “Ne aꞌi lai eiwerai awere? Ne meni Elaija, tu naifa weriyei temeniyeye ape, ne meni ape awere?” Sosu le itiyaꞌu eiye, “Ahowa, ane Elaija taꞌama.” Lowe si tame ei toweriye, “Sosu ne Owane Sitewi lo peri au teꞌe siye meni tutawe nomo ninawesiya ape, ne meni ape awere?” Sosu le itiyaꞌu eiye, “Ahowa.”^j 22 Sosu lowe si tame ei toweriye, “Ne eiwerai awere? Ne peri ta nomo maꞌe itiyaꞌu au teꞌere. Serai nomo peri no lu owane nomo lo maꞌe si tame au teꞌeyei. Ne taꞌu piye peri au teꞌeyei awere?”

23 Sosu Jon lowe maꞌe Owane Sitewi lo au teꞌe siye meni Aisaia lo peri itiyaꞌu eiye,

29 Nowe moꞌo su, Jon Jisas siye aniye. Sosu le lu taune maꞌe apou eiye, “Siyere! Owane Sitewi lo fe sipsip yene aiwa. Le lu taune werese lo yo seni luwaru aꞌi au sasariyei.^l 30 Meni ape ne, ane le ne totesiya. Ane fene werese tu apou teꞌeye su, ‘Meni taꞌi ane moꞌo fai. Ahowa, ane meni yahowaꞌi aꞌi ne. Serai ane lowe tahe lo wafei ani eraurowata.’ Ane peri eite au teꞌeye su, ane le ne toteye.^m 31 Ane taꞌu meni ape siye soꞌoru taꞌama. Ahowa, serai ane lu taune maꞌe saꞌi se au huwei ne fai. Piyene awere? Sosu Israel lo lu taune meni ape, Owane Sitewi lai ariariyeye ape, siye soꞌoruwerowa.”

32 Sosu aꞌi pe Jon peri ape apou au teꞌeye, “Ane Owane Sitewi lo Hepene Waraꞌi aꞌi niꞌarawe maꞌe itorai siyeye. Irowe sapuwe wou aꞌi itorai. Sosu iyoꞌo lo hire maꞌe onurai.ⁿ 33 Meni ape ne Owane Sitewi lai ariariyeye. Ane etiri ape soꞌoru taꞌama. Ahowa, Owane Sitewi lai ane saꞌi se au huwei ne eimaweye ape, le ane maꞌe apou eiye, ‘Meni eite, ne Owane Sitewi lo Hepene Waraꞌi aꞌi le maꞌe siye itonamirai. Meni eite lai lu taune maꞌe Owane Sitewi lo Hepene Waraꞌi se au huwei.’ 34 Serai ane Owane Sitewi lo Hepene Waraꞌi aꞌi itorai siye tepaꞌasiye. Sosu le meni ape lo iyoꞌo hire sahe onuteye. Sosu ane lu taune werese maꞌe le ne au teꞌe areiyesiya. ‘Le aꞌi lai Owane Sitewi lo meni eime taꞌi pefine aꞌi ne. Sosu le lowe maꞌe mi mi pasi pasi ironamirowa.’”^o

35 Nowe moꞌo su, Jon lu feni hesi lo aiwawe saro ahe teiteye. 36 Sosu le Jisas siye aniye su, le apou eiye, “Siyere! Owane Sitewi lo fe sipsip yene aiwa.”^p 37 Sosu aꞌi pe Jon lo lu feni hesi peri ape wanuwe su, lowesi Jon arunatiyewe, Jisas moꞌo umasiye. 38 Sosu Jisas lowesi maꞌe atati siye ei toweriye, “Fenesi piye aniyei ne totesiya awere?” Sosu lowesi itiyaꞌu eiye, “Rabai! Ne eiwerou maꞌe howeisiya awere?” Rabai lo peri eti apou aꞌi, teꞌe atuatu siye meni. 39 Sosu Jisas itiyaꞌu eiye, “Fenesi siyera.” Sosu lowesi le maꞌe moꞌo fiyewe, wesi sahe le howeisiya ape, siyeye. Saro ahe lowesi le mase poweiye ape ironamiye. Nowe poweiye neriwei iroteye. 40 Sosu aꞌi pe lu hesi Jon lo peri wanuwe ape, meni taꞌi iyape Andru, Saimon Pita lo paꞌise, le Jisas moꞌo umasiye.^q 41 Sosu le Jisas arunati su, le airu lo Saimon nehiyei ne fi. Le Saimon siyeye su, le Jisas ne au teꞌeye, “Nomo meni ape Owane Sitewi lai wiyeme aꞌi ariariyeye ape siyeye.” Peri eti apou aꞌi Krais. 42 Sosu aꞌi pe le Saimon Jisas maꞌe henetai. Jisas meni Saimon siyeyewe, apou eiye, “Ne iyape no Saimon, Jon lo meni eime poto. Pereye ane lai ne iyape heꞌi aꞌi au eiyei, apou aꞌi Sifas.” Iyape lo eti apou aꞌi Pita. Peri nomo lo lo eti, tapiye.^r

43 Nowe moꞌo su, Jisas omo pani Galili maꞌe iyei ne toteye. Le fi su, le meni Filip siyeye. Sosu le maꞌe eiye, “Ne ane moꞌo umasire.” 44 Meni ape Filip, Andru, Pita lo omo sitewi Betsaida aiwawe maꞌe fai. 45 Sosu Filip meni Nataniel nehiyei ne fiyewe, le maꞌe eiye, “Nomo meni ape, Moses tu naifa weriyei Owane Sitewi lo yo peri one towe sahe leseteye ape, siyeye. Sosu aiwawe Owane Sitewi lo peri au teꞌe siye lu le ne apou aꞌi leseteye. Meni ape Jisas, Josep lo meni eime omo Nasaret maꞌe fai.”^s

46 Nataniel itiyaꞌu ei toweriye, “Omo Nasaret maꞌe fai awere? Etiri wisere aꞌi omo Nasaret maꞌe heneraisiya awere? Piyete!” Sosu Filip itiyaꞌu eiye, “Weiya! Ne siyenara!”

47 Sosu aꞌi pe Jisas meni Nataniel siye aniye su, Jisas le ne eiye, “Siyere! Israel lo meni wiyeme aiyesiya. Meni ape peri wawero marepi lo se ariye.” 48 Sosu Nataniel Jisas maꞌe ei toweriye, “Ne ane ne soꞌoruwe awere?” Sosu Jisas itiyaꞌu eiye, “Ane tu ne me owarape unahi sahe siye onuwe. Moꞌo, Filip lai ne ei aniye.” 49 Sosu Nataniel le maꞌe eiye, “Atuatu siye meni, ne Owane Sitewi lo meni eime tene! Ne Israel lo meni owane tutawe tene!”^t

50 Sosu Jisas itiyaꞌu apou eiye, “Ne peri ano wanu tote anite tawesiye. Piyene awere? Ane ne me owarape, unahi sahe onuteye ape, siye soꞌoruweye. Wiyawi ape erasi pefine aꞌi ne. Nowe moꞌo su, ne etiri pefine aꞌi tomu neꞌese siyerowa.” 51 Sosu le tame teꞌeye, “Ane ne maꞌe peri wiyeme aꞌi au teꞌesiya. Ne niꞌarawe werese tou erauwiyei siyerowa. Serai ne Owane Sitewi lo ipari wisere aꞌi tamo meni hire maꞌe itorai ape, maꞌe hire wirowa, sosu hi itorairowa. Ane lai meni hire maꞌe itorai ne.”^u