4 Sosu Jisas itiyaꞌu eiye, “Ne wiyawi eite ane irowei ne owe ape ei towerire. Nowe ano henerai taꞌama. Nowe ape se ane wiyawi ano irorowata.”^a

5 Sosu Jisas lo mai wiyawi yahowaꞌi taꞌane siye lu maꞌe eiye, “Etiri werese, Jisas fene maꞌe teꞌeyei ape, fa irore.”

6 Sosu aꞌi pe tapiye paꞌare ereti feni werese feni taꞌi (6) sato iroteye. Juda lo lu lowe taꞌu tapiye paꞌare saꞌi se ereti lowe au huteye. Tapiye paꞌare taꞌi (100 lita) saꞌi se iroteye.

7 Sosu Jisas wiyawi yahowaꞌi ani taꞌane siye lu maꞌe au teꞌeye, “Fene saꞌi waraꞌi tapiye paꞌare sahe teroso asi aiwawe ere.” Sosu lowe saꞌi waraꞌi teroso asi aiwawe temeꞌeriye fuwe. Ahi taꞌo temeꞌeriyeye.

8 Sosu le lowe maꞌe eiye, “Fene saꞌi tewi aꞌi saꞌi paꞌare sahe anire. Ayei meni owane maꞌe aiti.” Sosu lowe saꞌi tewi aꞌi saꞌi paꞌare sahe aro aniye, ayei meni owane maꞌe aiti. 9 Sosu ayei meni owane a tepaꞌasiye su, saꞌi waraꞌi wain saꞌi wisere aꞌi henerai. Le wain saꞌi ape soꞌoru taꞌama. Ahowa, wiyawi yahowaꞌi taꞌane siye lu, saꞌi aniye ape, wain saꞌi henerai soꞌoruweye tene! Sosu ayei meni owane meni naituwei feni yaro ei aniye. Sosu eiye, 10 “Wain saꞌi eite wisere aꞌi tene! Lu taune werese lowe maꞌe wain saꞌi wisere aꞌi tu au none isafiyeye. Sosu lowe wain saꞌi anamiteye su, lowe meremereye aꞌi henerai. Sosu lu taune meremereye aꞌi ironamiye su, ayei meni owane werese wain saꞌi luwaru aꞌi au none isafiyeye. Ahowa, ne lai wain saꞌi wisere aꞌi moꞌo au nonetiye.”

11 Sosu aꞌi pe wiyawi erasi pefine aꞌi ape Jisas lai tutawe taꞌaneteye. Wiyawi erasi pefine aꞌi tereꞌe ape Jisas lai wiyawi lo se Owane Sitewi lo kairefi aꞌi se au atuatuteye. Le yaru ape omo Kana, pani Galili sahe taꞌaneteye. Serai le taꞌaneye su, le mi erasi lo au atuatuteye. Sosu lu disaipel lo le ne tote tawesiteye.

12 Sosu nowe moꞌo Jisas, mai lo, paꞌise tamo, lu disaipel lo aiwawe omo Kana arunatiyewe, omo Kaperneam oweirai. Omo ape sahe lowe nowe oso aꞌi tamo howeiteye.^b

13 Sosu aꞌi pe nowe Juda lo taꞌuwe hereiyei tutawe atahe aꞌi heneraiyei, iyape Pasova. Sosu Jisas omo Jeusalem maꞌe yaneye.^c 14 Lowe Owane Sitewi lo wesi awei wonopu wiye su, le lu tamo, etiri tomu neꞌese ani hese eteteye ape, siyeye. Lu tamo fe bulmakau, fe sipsip, irowe sapuwe au hese eteye. Lu tereꞌe tamo metei sahe onuwewe, maꞌaru erei aniteye. 15 Serai le wafei wisu taꞌaneye su, le lu werese fe sipsip, fe bulmakau aiwawe naꞌari fiyari heneye. Le maꞌaru werese lo ani teroso fiyarisawi. Sosu metei werese lo ani awetosawi. 16 Sosu le lu, irowe sapuwe au hese eteye ape, maꞌe eiye, “Fene irowe werese hene naꞌari fiyarire! Fene Owane Sitewi Tai Pefine aꞌi ano lo wesi owe ape au hese eterowata.”

17 Jisas lo lu disaipel yo seni lo ape siyeye su, lowe Owane Sitewi lo one towe peri marepi tote tawesiye, apou leseye,

18 Sosu aꞌi pe lu Juda le maꞌe apou teꞌe toweriye, “Piye wiyawi ta ne nomo maꞌe au atuatuwei awere? Eiwerai ne maꞌe kairefiyeyei ape auwe awere? Serai ne etiri werese au sasarisawi.”

19 Sosu Jisas itiyaꞌu eiye, “Fene Owane Sitewi lo wesi eite tapeti towesiyei su, ane poweiye hesi heta si tame sine taꞌaneyei.”^d

20 Sosu Juda lo lu itiyaꞌu apou ei toweriye, “Sawi amou! Owane Sitewi lo wesi eite nowe iyu menei lu hesi werese ereti feni werese feni taꞌi aꞌi (46 iyu menei aiwawe aꞌi) taꞌanenamiteye. Sosu ne wesi eite poweiye hesi heta sine taꞌaneye awere? Ahowa.” 21 Ahowa, Jisas lo marepi apou aꞌi toteye, “Wesi eite apou wou aꞌi tahe paꞌare lo si tame sinerowa.”^e 22 Jisas moꞌo temeniyeyei su, lu disaipel lo etiri werese ape mo, Jisas teꞌeye ape, tote tawesirowa. Sosu lowe, Owane Sitewi lo peri leseye ape, sosu Jisas lo peri wanu tote anite tawesiteye.^f

23 Sosu aꞌi pe Jisas omo Jerusalem sahe Juda lo taꞌuwerai hereiyei tutawe onuwe su, lu taune tomu neꞌese etiri wisere aꞌi tereꞌe wiyawi siyeye. Serai lowe iyape lo se tote tawesinamiye.^g 24 Ahowa, Jisas lu taune werese lo marepi soꞌoruweye tene! Serai le marepi lowe lo maꞌe anite tawesirowata. 25 Jisas lu taune lo marepi siye soꞌoruweye. Serai lu taune ta lu lo yo seni au teꞌe areiye su, le peri lowe lo wanurowata.