Nikodemus pasi aꞌi Jisas maꞌe ei toweriyei ne fai.
3
Sosu aꞌi pe meni taꞌi, Farisi lo meni owane, iyape Nikodemus. Le Juda lo meni owane ne.a 2 Pasi aꞌi su, le Jisas maꞌe sewiyeyei ne fai. Le Jisas maꞌe apou eiye, “Atuatu siye meni, Nomo ne ne teꞌe atuatu siye meni, Owane Sitewi maꞌe fai ape, soꞌoruweye. Wiyeme aꞌi! Owane Sitewi lai lu mase iro taꞌame su, lowe wiyawi erasi pefine aꞌi eite mo irorowata.”3 Sosu Jisas itiyaꞌu apou eiye, “Ane peri wiyeme aꞌi ne maꞌe au teꞌesiya. Lu taune tamo eimane heꞌi tame wou henerai taꞌama su, lowe Owane Sitewi lo omo hire maꞌe siyerowata.”b
4 Sosu Nikodemus itiyaꞌu eiye, “Ahowa, lu tamo yaꞌariyei irosiya su, lowe eimane heꞌi henerairowata. Wiyeme aꞌi! Le mai lo lire papu si tame wirowata. Serai mai lai meni yaꞌariyei tame auteirowata.”
5 Jisas itiyaꞌu eiye, “Ane peri wiyeme aꞌi ne maꞌe au teꞌesiya. Mai tamo lai eimane autei taꞌame su, sosu aiwawe, Owane Sitewi lai le maꞌe marepi hepene heꞌi au taꞌame su, le Owane Sitewi lo omo hire maꞌe wirowata.c 6 Menitani ta eimane lo auteiyei su, eimane ape tahe paꞌare heneraiyei. Owane Sitewi lo Hepene Waraꞌi meni ta papu wiraiyei su, meni ape marepi hepene heꞌi aꞌi aniyei. Le Owane Sitewi lo Hepene Waraꞌi aꞌi maꞌe auteiyei.d 7 Ne peri ano wanuwe su, ne eimane heꞌi tame heneraiyei. Ne hepene se owe ape suꞌari hemirehemiye. 8 Lu tamo Owane Sitewi lo Hepene Waraꞌi aꞌi ne totesiya. Le eiwerou maꞌe fai awere? Owane Sitewi lo Hepene Waraꞌi aꞌi, fiyaru aiwawe aꞌi ne. Fiyaru lai marepi topo lo isiya aiyesiya. Sosu ne fiyaru noꞌu wanusiya. Sosu fiyaru eiwerou maꞌe fi awere? Eiwerou maꞌe fai awere? Serai lu taune apou aꞌi Owane Sitewi lo Hepene Waraꞌi aꞌi auteisiya. Lu lai lowe ne apou totesiya, Eiwerou maꞌe fai awere?”
9 Sosu Nikodemus itiyaꞌu ei toweriye, “Etiri ape mo eiwerou piye heneraiyei awere?”
10 Jisas itiyaꞌu eiye, “Ne Juda lo atuatu siye meni tene! Serai ne etiri ape mo wanu soꞌoruwe taꞌama awere? 11 Ane ne maꞌe peri wiyeme aꞌi au teꞌesiya. Nomo peri ta au teꞌe fiyarisiya su, etiri werese, nomo au teꞌeyei ape, nomo ani soꞌoruwesiya tene! Sosu etiri ta nomo siyeye ape, nomo au teꞌeyei. Ahowa, fene werese peri nomo lo wanu tote tawesi umasiyei wou taꞌama. 12 Ane ne maꞌe etiri werese, awei sahe irosiya ape, au teꞌesiya su, ne peri ano ape wanu anite tawesi wou taꞌama. Serai etiri tamo, hire maꞌe irosiya ape, ane ne maꞌe au teꞌesiya su, ne eiwerou tote eti aniyei awere? Ahowa. 13 Lu taune werese Owane Sitewi lo omo maꞌe wi taꞌame. Ahowa, meni taꞌi Owane Sitewi mase ironamiteye. Meni ape omo hire maꞌe itorai. 14 Tu naifa weriyei Moses lai haru aimesi lo nihari se metei sahe ape leseye. Le haru ape ipo yahowaꞌi aꞌi maꞌe ani sineye. Apou aiwawe aꞌi meni omo hire maꞌe itorai ape, lu tamo le me tapeꞌi sahe fa ani sineyei.e 15 Serai lu taune werese meni ape ne tote wanu tawesisiya su, Owane Sitewi lai lowe maꞌe marepi hepene heꞌi aurowa. Serai lowe mi mi pasi pasi weriyei ironamirowa.f
16 Sosu aꞌi pe Owane Sitewi lai lu taune werese, awei irosiya ape, marepi erasi aꞌi tote wawesiyenamisiya. Serai le meni eime taꞌi topo lo aꞌi hi awei maꞌe nomo ne au temeniyeyei ne eimawesai. Lu taune tamo le ne tote tawesi umasiyei su, Owane Sitewi lai lowe maꞌe mi mi pasi pasi weriyei marepi hepene heꞌi aurowa. Sosu lowe temeniyenamirowata.g 17 Owane Sitewi lai meni eime topo lo aꞌi hi awei maꞌe eimawesai su, eime lo lu taune werese omo yehe maꞌe eimawesawiyei ne aiye taꞌame. Ahowa, le meni eime topo lo lu taune werese maꞌe marepi hepene heꞌi ne auwei ne eimawesai.h 18 Lu taune werese le ne tote tawesi umasiyei su, le yo seni luwaru aꞌi lowe lo au heserowata. Lu taune werese le ne tote tawesi taꞌame su, lowe aꞌi lai marepi towafi lowe lo umasiyei. Serai lowe omo yehe maꞌe irowa.i 19 Lu taune tomu neꞌese yehe maꞌe irowa. Marepi sitewi apou aꞌi teꞌesiya, ‘Ane aꞌi lai mi erasi aꞌi ne.’ Ane hi awei maꞌe itorai su, lu taune tomu neꞌese lowe ane meꞌiyeni maꞌe atati tei awetowe. Serai lowe yo seni luwaru aꞌi mi mi werese ironamiteye! Lowe werese pasi aꞌi uweitereme.j 20 Lu taune werese yo seni luwaru aꞌi irowei ape, lowe mi erasi ai marepi ironamiyei. Lowe ane maꞌe, mi erasi ape, aiye taꞌame. Lowe mi erasi aiyeyei su, lowe apou toteyei, ‘Mi erasi ape yo seni luwaru werese nomo lo amerame aꞌi au atuatuwei.’ 21 Sosu lu taune tamo peri wiyeme aꞌi umasinamiyei su, lowe ane, mi erasi ape maꞌe aiyerowa. Lowe ane maꞌe aiyeyei su, Owane Sitewi lai yo seni waraꞌi werese aꞌi lowe lo lu taune maꞌe au atuatu fiyariyei. Lu taune yo seni waraꞌi aꞌi lowe lo siyeyei su, lowe apou au teꞌeyei, ‘Lu taune ape mo lowe Owane Sitewi maꞌe fai.’”
Jon saꞌi au hu siye meni Jisas ne au teꞌe areiyeye.
22 Sosu aꞌi pe etiri ape mo teꞌe tepaꞌasiye su, Jisas lu feni aiwawe aꞌi, lowe omo pani Judia maꞌe si tame fai. Lowe henerai su, Jisas lu feni mase iroteye. Le lu taune tamo saꞌi se au huteye.k 23 Sosu Jon saꞌi au hu siye meni, le lu taune tamo saꞌi au huteye. Le saꞌi Ainon omo Salim atahe aꞌi ne, saꞌi au huteye. Omo ape sahe saꞌi tomu neꞌese iroteye. Lu taune tomu neꞌese Jon maꞌe saꞌi au ani huwei ne fai. 24 Nowe ape se meni owane Herot lai Jon kalabus wesi maꞌe heneti taꞌame.
25 Sosu aꞌi pe Juda lo meni ta Jon lo lu feni maꞌe ai peri teꞌe tiyatiyei ne fai. Lowe apou ai peri teꞌe tiyatiye, “Meni saꞌi au ani huteyei su, le marepi amerame aꞌi heneraiyei awere? Piyete awere?” 26 Sosu lowe Jon maꞌe ei toweriyei ne fai. Lowe apou ei toweriye, “Atuatu siye meni, meni ape ne mase, Saꞌi Mai Jordan yaro maꞌe iroteye ape, ne le ne au teꞌe fiyariye. Siyere! Lu taune tomu neꞌese le maꞌe aiyesiya. Sosu le lowe saꞌi au husiya.” 27 Sosu Jon lowe maꞌe itiyaꞌu eiye, “Owane Sitewi lai meni ta maꞌe wiyawi ta hire maꞌe fai ape, auwei taꞌama su, le wiyawi lo anirowata. 28 Fene peri ano wanu tepaꞌasiye. Ane peri ape apou au teꞌe fiyariye, ‘Ane aꞌi lai Krais se taꞌame ne. Ahowa, Owane Sitewi lai ane tu le ne au teꞌe fiyariyei ne eimawesai.’l 29 Peri anowe ano wanure. Meni ta lai menitani lo naituwei su, meni ape menitani lo hene aniyei. Yereme lo meni ape lo peri noꞌu wanuwei su, le lowesi ne marepi wisere aꞌi au toteyei. Ane aiwawe aꞌi ne. Ane Jisas lo peri wanuwe su, ane le ne marepi wisere aꞌi au toteye. Marepi wisere aꞌi ano erasi pefine aꞌi ne. 30 Meni ape iyape erasi aꞌi fa heneraiyei. Ane aꞌi lai iyape ano hi ani ararore.”
31 Jon Jisas ne apou teꞌeteye, “Meni ape, hire maꞌe itorai ape, le lu taune werese hi ani ararowe. Ane, awei maꞌe fai ape, ane awei sato ironamiye. Sosu ane awei lo peri ne au teꞌenamiye. Meni ape, hire maꞌe itorai ape, le lu taune werese hi ani araronamiye.m 32 Etiri werese meni ape lai siyeye, sosu wanuwe. Etiri ape mo le lu taune werese maꞌe au teꞌe fiyariye. Sosu lu taune werese peri lo wanuwe su, lowe peri eti lo soꞌoru taꞌama.n 33 Lu taune werese peri lo wanu tote tawesi umasiye su, lu taune tereꞌe yo seni lowe lo siyeyei. Yo seni lowe lo siyeyei su, lowe apou au teꞌe fiyariyei, ‘Owane Sitewi aꞌi lai wiyeme aꞌi tene.’ 34 Serai Owane Sitewi lai meni ape hi maꞌe eimawe arosai. Le aꞌi lai Owane Sitewi lo peri werese au teꞌe fiyarisiya. Meni ape hi maꞌe itorai su, Owane Sitewi lai le maꞌe Hepene Waraꞌi aꞌi lo auwe. Sosu Owane Sitewi lo Hepene Waraꞌi meni ape lo marepi temeꞌeriye ironamiyei. 35 Owane Sitewi Tai Pefine aꞌi meni eime lo marepi erasi aꞌi au totenamisiya. Le aꞌi lai etiri werese meni eime lo maꞌe auwe. Serai meni eime lo etiri werese ape mo au noweinoweinamiyei.o 36 Lu taune tamo meni eime lo peri wanu tote tawesi umasiyei su, le lowe maꞌe marepi hepene heꞌi aꞌi auwei. Sosu lowe mi mi pasi pasi weriyei ironamitorowa. Sosu lu taune tamo Owane Sitewi lo meni eime lo peri wanu umasi taꞌame su, lowe marepi hepene heꞌi aꞌi anirowata. Ahowa, Owane Sitewi lo ai marepi lowe maꞌe ironamirowa.”p