9 Samaria lo menitani Jisas lo peri wanuwe su, serai le Jisas maꞌe apou ei toweriye, “Ne Juda lo meni tene! Ane Samaria lo menitani. Ne piyene saꞌi ausaiyei ne ei toweriye awere?” Menitani peri ape apou teꞌeye. Piyene awere? Juda lo lu taune Samaria werese maꞌe ai marepi totenamiteye.^c 10 Sosu Jisas menitani maꞌe itiyaꞌu apou eiye, “Ne saꞌi tereꞌe Owane Sitewi ne maꞌe auwei ape soꞌoru taꞌama. Aiwawe aꞌi, ne meni eite, saꞌi ausaiyei ne ei toweriyei ape soꞌoru taꞌama. Ne peri ape wanu soꞌoruweyei su, ne meni eite apou ei toweriyei, ‘Owane Sitewi lo saꞌi ausa.’ Serai ane Owane Sitewi lo saꞌi ne maꞌe aurowa. Serai ne mi mi pasi pasi weriyei ironamitorowa.”^d 11 Sosu menitani ape apou eiye, “Meni Owane, wahu no ariye. Pitomuwe hi yaro aꞌi tene! Ne saꞌi tamo saꞌi pitomuwe sahe anirowata. Ne piye maꞌe Owane Sitewi lo saꞌi aniyei awere? Serai ane ayei su, ane mi mi pasi pasi ironamitorowa. 12 Tu naifa weriyei Jekop yaꞌariyei nomo lo saꞌi pitomuwe eite horuseye. Le meni eime lo aiwawe aꞌi saꞌi pitomuwe aro aniye, sosu saꞌi aye. Le fe bulmakau, fe sipsip werese lo saꞌi pitomuwe maꞌe fai ape au aye. Nomo pereye saꞌi hi aro ani anamisiya. Jekop meni owane erasi aꞌi ne. Serai ne meni owane wiyeme aꞌi henerai awere? Ne aꞌi lai Jekop hi ani ararowe awere? Wawero tene!”^e 13 Sosu Jisas itiyaꞌu apou eiye, “Jekop lo saꞌi ne, lu taune werese lai saꞌi eite ayei su, lowe saꞌi si tame anamirairowa. 14 Ahowa, lu taune tamo Owane Sitewi lo saꞌi, ane lowe maꞌe auwei ape, lowe ayei su, lowe si tame arowata. Ahowa, lowe mi mi pasi pasi weriyei arowata. Ahowa, Owane Sitewi lo saꞌi, ane auwei ape, peri apou wou aꞌi saꞌi pitomuwe lowe papu saꞌi teisainamisiya. Sosu marepi hepene wisere aꞌi mi mi pasi pasi weriyei ironamitorowa.”^f

15 Sosu menitani le maꞌe eiye, “Owane, ne ane maꞌe saꞌi eite ausa. Serai ane saꞌi wawe tame teriterowata. Aiwawe aꞌi, ane saꞌi pitomuwe maꞌe saꞌi hi aro anirowata.” Menitani peri apou aꞌi teꞌeye, serai le Jisas lo marepi soꞌoru taꞌama. 16 Jisas le maꞌe apou eiye, “Menitani ire! Ne meni no ei hene aiserirowawe si tame aiye.” 17 Sosu menitani ape le maꞌe itiyaꞌu eiye. “Ane meni se taꞌama.” Sosu Jisas le maꞌe eiye. “Peri no wiyeme aꞌi ne. ‘Ane meni se taꞌama!’ 18 Wiyeme aꞌi ne. Lu ereti feni werese ne naituwe. Sosu meni ape, ne mase irosiya ape, le meni no taꞌama. Peri no wiyeme aꞌi tene!” 19 Sosu menitani le maꞌe itiyaꞌu eiye, “Owane Sitewi, marepi ano apou aꞌi totesiya, Ne aꞌi lai Owane Sitewi lo peri au teꞌe siye meni. 20 Yaꞌariyei nomo lo omo eire sahe Owane Sitewi maꞌe au teꞌe nineꞌi wisereyenamisiya. Ahowa, fene Juda lo lu werese apou teꞌesiya, ‘Lu taune werese omo Jerusalem aꞌi sahe Owane Sitewi maꞌe fa au teꞌe wisereyere.’”^g 21 Sosu Jisas itiyaꞌu eiye, “Menitani, peri ano wanu tote tawesire! Nowe ta aiyeyei su, lu taune werese omo eire maꞌe, sosu omo Jerusalem sahe Owane Sitewi Tai Pefine aꞌi maꞌe au teꞌe wisereyerowata. 22 Fene omo Samaria lo lu taune etiri ape maꞌe au teꞌe wisereyesiya ape, fene le soꞌoru taꞌama. Nomo Owane Sitewi wiyeme aꞌi soꞌoruwesiya. Serai nomo le maꞌe au teꞌe wisereyesiya. Serai Owane Sitewi lai marepi hepene heꞌi aꞌi le lu taune werese maꞌe aurowa. Marepi hepene heꞌi aꞌi lai Juda lo lu tewi maꞌe fai.^h 23 Wiyeme aꞌi ne. Nowe ta aiyeyei. Ahowa, nowe eite henerai tepaꞌasiye. Lu taune werese Owane Sitewi Tai Pefine aꞌi maꞌe wiyeme aꞌi au teꞌe wisereyesiya ape, lowe peri wiyeme aꞌi au teꞌe wisereyesiya. Sosu marepi lo se Owane Sitewi maꞌe au teꞌe wisereyesiya. Lu taune Owane Sitewi maꞌe apou au teꞌe wisereye irosiya su, Owane Sitewi Tai Pefine aꞌi lai lowe ne marepi wisere aꞌi totenamisiya. 24 Owane Sitewi aꞌi lai hepene ne. Lu taune werese le maꞌe umasisiya ape, lowe le ne hepene se lowe lo pei au ei ani arowere. Sosu peri wiyeme aꞌi se au teꞌe wisereyesiya.”ⁱ

25 Sosu aꞌi pe menitani eite le maꞌe eiye, “Meni ape, Owane Sitewi lai ariariye ape, aiyerowa! Ane peri wiyeme aꞌi eite soꞌoruwesiya tene! Meni ape aiyeyei su, le etiri werese nomo maꞌe au teꞌe areiyeyei.” Meni ape lo iyape Krais. 26 Sosu Jisas le maꞌe itiyaꞌu eiye, “Ane meni ape, ne maꞌe au teꞌesiya ape, ane meni ape tene!”^j 27 Sosu aꞌi pe Jisas peri tepaꞌasiye su, lu disaipel lo henerai. Sosu lowe hepene se suꞌariye. Piyene awere? Jisas Samaria menitani teꞌe tiyatiteye. Ahowa, lu disaipel lo peri se taꞌama. Marepi lowe lo apou toteye, “Ne piye nehisiya awere? Ne piyene menitani ape maꞌe au teꞌe tiyatisiya awere?” 28 Sosu menitani saꞌi paꞌare arunatiyewe, omo topo lo maꞌe fi. Sosu le lu tamo maꞌe Jisas ne au teꞌeye.

29 Sosu aꞌi pe Samaria lo menitani omo lo maꞌe heneri. Sosu le lu tamo maꞌe apou eiye, “Peri ano wanure. Fene ane mase aiya. Meni ta yo seni werese ano ane maꞌe au teꞌeye. Meni ape Krais awere? Piyete awere?” 30 Sosu lowe menitani lo peri wanuwe su, lowe omo lo arunatiyewe, Jisas maꞌe heneri. 31 Menitani omo maꞌe arunati su, Jisas lo lu disaipel le maꞌe apou ei toweriye, “Atuatu siye meni, Ne etiri ta are.” 32 Ahowa, Jisas itiyaꞌu apou eiye, “Ane ayei tereꞌe irosiya, fene ayei ape soꞌoru taꞌama.” 33 Serai lu disaipel lo lowe taꞌu aiwawe teꞌe tiyati toweriye, “Meni ta ayei le maꞌe au ene aye awere?” 34 Sosu Jisas lowe maꞌe eiye, “Ayei ano apou wou aꞌi. Ane Owane Sitewi lo marepi fa umasi irowei. Le aꞌi lai ane hi awei maꞌe eimawe arosai. Serai ane wiyawi lo pei ani tepaꞌasiyei.^k 35 Jisas lu taune werese ne, peri lo wanu tote tawesi umasiyei ne toteye ape, toteye. Fene marepi fene lo apou totesiya, ‘Nowe yame hesiyo hesiyo i tepaꞌasiyei su, serai nomo kewi so foroꞌo aꞌi tou ani towesiyei.’ Fene siyere! Ane fene maꞌe apou eisiya, nihe fene lo ei ani arowere! Kewi so werese foroꞌo tepaꞌasiye.”^l 36 Sosu Jisas lowe maꞌe tame eiye, “Meni ta peri ano au teꞌe fiyariyei su, le apou aiwawe aꞌi teꞌesiya. Le kewi so yehe sameyei ne fi. Meni ta peri au teꞌe fiyariyei su, lu taune tamo peri lo wanu tote tawesiyei, sosu yo ano umasiyei. Serai lowe marepi hepene heꞌi aꞌi teinamirowa. Meni ta Owane Sitewi lo peri lowe maꞌe au teꞌesiya. Sosu meni tereꞌe ta lowe Jisas lo ereti ani fusiya su, lowesi Owane Sitewi maꞌe au teꞌe wisereyesiya. Apou aiwawe aꞌi, awei lo wiyawi siye lu kewi so tou ani towesiyei su, lowesi marepi wisere aꞌi totesiya. Nowe yeꞌewi se tepaꞌasiyei su, Owane Sitewi lowesi maꞌe etiri wisere aꞌi aurowa. 37 Peri eite wiyeme aꞌi tene! Meni ta kewi so yehe sameyei. Sosu meni tereꞌe kewi so foroꞌo aꞌi tou ani towesiyei, wesi maꞌe ani fuwei. 38 Lu taune tereꞌe wiyawi erasi aꞌi se lu taune maꞌe peri ano au teꞌe fiyariye. Sosu ane fene lowe ane maꞌe henetaiyei ne eimawesawi. Lowe ane maꞌe aiyeteye su, ane lowe maꞌe marepi hepene heꞌi aꞌi auwe. Serai wiyawi lowe lo ape ne, fene wiyawi lowe lo tewi aꞌi henerai.”

39 Serai omo Saika lo lu tomu neꞌese Jisas lo peri wanuwe. Menitani ape lowe maꞌe peri apou teꞌeye su, “Fene aiya! Meni ta yo seni ano ane maꞌe au teꞌeye ape siyerai.” Lu tomu neꞌese menitani lo peri wanu tote tawesiye. Serai lu taune tomu neꞌese Jisas lo yo umasiye. 40 Sosu aꞌi pe Samaria lu tamo le maꞌe henerai. Sosu lowe werese le maꞌe apou teꞌe toweriye, “Ne lu disaipel no aiwawe faraꞌu nomo mase irote.” Serai lowe Samaria lo lu taune mase poweiye hesi aꞌi iroteye. 41 Jisas lu taune mase iroteye su, le lu taune tomu neꞌese Jisas lo peri wanu tote tawesi umasiye. 42 Sosu lu ape mo menitani maꞌe eiye, “Ne peri no au teꞌeye su, nomo meni ape maꞌe siyeyei ne fai. Wiyeme aꞌi ne! Pereye aꞌi nomo lai peri ape lo wanuwe su, nomo peri lo wanu tote tawesiye. Etiri ape nomo soꞌoruwesiya tene!” Meni ape lai lu taune werese maꞌe marepi hepene heꞌi aurowa. Serai lowe marepi hepene waraꞌi aꞌi mi mi pasi pasi ironamirowa.^m

43 Nowe hesi aꞌi i tepaꞌasiye su, Jisas lu disaipel lo aiwawe omo Saika arunati, sosu omo pani Galili maꞌe heneri. 44 Tu naifa Jisas apou au teꞌeye, “Owane Sitewi lo peri au teꞌe siye lu werese omo pani towafi lowe lo sahe lu taune lowe maꞌe teꞌe naruwe.”ⁿ 45 Tu naifa Jisas lu disaipel lo aiwawe Jerusalem sahe iroteye su, lowe Juda lo taꞌuwe hereiyei onu ene aye. Jisas sato iroteye su, le wiyawi wisere aꞌi au ani ironamiye. Lu taune, omo pani Galili maꞌe fai ape, taꞌuwe hereiyei sahe iroteye. Lowe Jisas lo wiyawi erasi pefine aꞌi siyeye. Serai Jisas omo pani Galili maꞌe henerai su, lu taune werese le maꞌe marepi wisere aꞌi eriteye.^o

46 Sosu aꞌi pe Jisas omo Kana, pani Galili sahe, maꞌe heneri. Tu naifa Jisas lai saꞌi waraꞌi atati ani awetowe. Serai wain saꞌi henerai. Sosu omo tereꞌe iyape omo Kaperneam pani Galili sahe, meni owane erasi aꞌi ta iroteye. Meni eime lo u tahe erasi aꞌi yaꞌorenamiteye. Temeniyeyei ne ataheyeteye.^p 47 Sosu meni owane ape Jisas pani Judia arunatiyewe, omo pani Galili maꞌe henerai ape wanuwe su, le Jisas maꞌe siyerai. Sosu le apou eiye, “Meni Owane, meni eime ano temeniyeyei ne ataheyesiya. Ne wesi ano maꞌe aiya. Sosu meni eime ano u tahe au faraꞌuwere.”^q 48 Serai Jisas itiyaꞌu le maꞌe eiye, “Atu, fene werese wiyawi erasi siyeyei su, fene peri ano faraꞌu wanu tote tawesiyei. Fene wiyawi erasi siye taꞌame su, fene peri ano aweraꞌiyenatiyei.” Jisas peri apou aꞌi teꞌeye. Serai le meni lo marepi ani siye soꞌoruweye.^r 49 Meni owane erasi ape le maꞌe eiye, “Owane wiyeme, wesi ano itora. Meni eime ano temeniyeyei ne ataheyesiya.” 50 Sosu Jisas meni owane maꞌe eiye, “Wesi no ire! Meni eime no u tahe tepaꞌasiye.” Jisas peri tepaꞌasiye su, meni ape Jisas lo peri wanu tote tawesiye. Serai le wesi topo lo maꞌe fi.^s 51 Meni owane ape yo sahe iteye su, wiyawi yahowaꞌi siye lu tamo lo meni ape henerai. Lowe apou eiye, “Owane, meni eime no hepene se. U tahe lo tepaꞌasiye.” 52 Sosu meni owane lowe maꞌe apou ei toweriye, “Nowe eiwerou su u tahe tepaꞌasiye awere?” Sosu lowe itiyaꞌu eiye, “Liyewe neriwei, nowe poweiye po aꞌi (1 klok) meni eime no u tahe tepaꞌasiye.” 53 Meni eime lo tai wanuwe su, le nowe ape ani soꞌoruwe tepaꞌasiye. Nowe ape aiwawe aꞌi Jisas apou eiye, “Meni eime no u tepaꞌasiye.” Serai meni owane eite Jisas lo yo umasiye. Sosu noweripi awaripi lo aiwawe aꞌi Jisas lo marepi umasiye. 54 Jisas omo pani Judia arunati, pani Galili maꞌe henerai. Le wiyawi erasi toꞌuresi au aniye. Tu le saꞌi waraꞌi wain saꞌi maꞌe ani awetowe. Nowe ta se i tepaꞌasiye su, le meni owane erasi lo meni eime u tahe au faraꞌuweye.^t