Jisas meni lowe afofo aꞌi au faraꞌuweye.
5
Sosu aꞌi pe nowe moꞌo su Juda lo taꞌuwe hereiyei erasi iyape Pasova, henerai. Serai Jisas lu disaipel lo aiwawe aꞌi omo Jerusalem maꞌe yaneye. 2 Sosu omo Jerusalem sahe saꞌi fisiye erasi saro iroteye. Saꞌi fisiye ape fe sipsip lo umaruwe yo atahe iroteye. Umaruwe yo ape fe sipsip si witiye, sosu si tame nowe maꞌe henerai. Saꞌi fisiye erasi ape Juda lo peri iyape eiye, Betesda. Saꞌi fisiye ahi paꞌo ereti feni werese iroteye. 3 Ahi paꞌo ape sahe lu taune tomu neꞌese u tahe yaꞌorei onuteye. Lu tamo nihe pokowe tawesiye. Lu taune tamo lowe luwaru aꞌi ne. {Lu tamo paꞌare lowe lo foroꞌoweye tahe lowe lo haroharoweye. 4 Nowe tase Owane Sitewi lai ipari wisere aꞌi lo hi sato eimawe arosai. Le saꞌi ani auseriye irowe. Saꞌi auseriyeyei su, lu taune werese apou toteye, “Meni, menitani taꞌi aꞌi tu saꞌi papu wiyei su, u tahe lo faraꞌuweyei.”}a 5 Meni ta ahi paꞌo saro howeinamiteye. Le iyu menei tomu neꞌese (38) u tahe lo yaꞌoreinamiteye. 6 Sosu aꞌi pe Jisas saꞌi fisiye ape maꞌe henerai. Le meni eite, howeiye ape, siyeye su, le meni ape ne u tahe lo se iyu menei tomu neꞌese soꞌoruweye. Serai le meni ape maꞌe apou ei toweriye, “Ne u tahe no henerai tepaꞌasireme awere?” 7 Sosu meni u tahe se itiyaꞌu eiye, “Meni Owane, saꞌi auseriyeyei su, ane piye meni ta lai saꞌi papu henetirowata. Saꞌi auseriyeyei su, meni tereꞌe tu saꞌi papu wiyei. Ane saꞌi papu wirowata.” 8 Sosu Jisas le maꞌe eiye, “Sinere! Mesiye no anirowawe ire!”b 9 Sosu Jisas peri tepaꞌasiye su, meni ape lo u tahe poꞌuteye. Sosu le mesiye lo, noweriye ape, aniyewe fi. Jisas meni u tahe se au faraꞌuweye su, nowe amou (Sabat) iroteye. 10 Serai Juda lo lu owane meni u tahe se ape siyeye su, lowe le maꞌe ei toweriye, “Ne mesiye no suteyei amou ne. Nowe amou (Sabat) nomo lo ne.”c 11 Ahowa, le itiyaꞌu eiye, “Meni ape, u tahe ano au taꞌane faraꞌuweye ape, le apou eiye, ‘Mesiye no anirowawe suteti.’” 12 Sosu lowe le maꞌe teꞌe toweriye, “Meni ape eiwerai ne maꞌe apou eiye awere? ‘Ne mesiye no suterowawe ire.’ Meni iyape eiwerai awere?” 13 Ahowa, le meni ape soꞌoru taꞌama. Jisas u tahe au taꞌane faraꞌuweye su, le eresene aꞌi lu taune ponei uweitiye. Lu taune tomu neꞌese saro tei iroteye.14 Sosu moꞌo su, Jisas meni u tahe se Owane Sitewi lo wesi sahe siyeye. Le meni ape se apou eiye, “Siyere! U tahe no poꞌuteye. Ne seni luwaru aꞌi owe ape irote! Yo seni luwaru aꞌi owe ape umasite. Ne etiri luwaru aꞌi owe ape irote. Yo seni luwaru aꞌi umasiyei su, etiri luwaru erasi aꞌi ne maꞌe yaꞌorenamirowa.” 15 Sosu meni ape fi. Le Juda lo lu owane siyeye su, le lowe maꞌe eiye, “Jisas lai u tahe ano ane au taꞌane faraꞌuweye.” 16 Jisas nowe amou (Sabat) se meni au taꞌane faraꞌuweye su, Juda lo marepi apou aꞌi toteye, “Jisas lai nowe amou (Sabat) towesiye.” Serai Juda lo lu owane Jisas maꞌe ai marepi toteye, sosu le maꞌe au luwaruweyei ne toteye. 17 Ahowa, Jisas itiyaꞌu eiye, “Wanure! Owane Sitewi Tai Pefine aꞌi ano wiyawi lo taꞌanenamisiya. Sosu le ane wiyawi lo taꞌaneyei ne eimawesai. Serai ane lai wiyawi lo ani taꞌanenamisiya.” 18 Jisas peri ape apou eiye su, “Owane Sitewi Tai Pefine aꞌi ano ne,” Juda lo lu owane le maꞌe ai marepi erasi totenamiteye. Lowe Jisas aine teraꞌeyei ne toteteye. Lowe marepi apou aꞌi toteye. “Jisas nowe amou (Sabat) towesiye. Etiri ape luwaru aꞌi ne. Amou aꞌi ne.” Sosu Jisas apou eiye su, “Owane Sitewi Tai Pefine aꞌi ano ne. Owane Sitewi Pefine aꞌi sosu Jisas lowesi aiwawe aꞌi ne.” Serai lowe ai marepi luwaruweyewe, lowe le maꞌe aine teraꞌeyei ne toteteye.d
Owane Sitewi Jisas lo Tai Pefine aꞌi ne.
19 Sosu aꞌi pe Jisas lowe maꞌe itiyaꞌu apou eiye, “Wiyeme aꞌi! Ane fene maꞌe eisiya. Kairefiyeyei ano se ane etiri ta irorowata. Ane Owane Sitewi Tai Pefine aꞌi ano lo wiyawi siyeyei su, ane lai meni eime lo wiyawi ape ane lai faraꞌu ani taꞌaneyei. Tai Pefine aꞌi ano etiri ta wiyawi taꞌanesiya su, ane le maꞌe umasirowawe, sosu wiyawi lo aiwawe pati taꞌaneyei.e 20 Peri eite wiyeme aꞌi. Owane Sitewi Tai Pefine aꞌi lai meni eime lo ne marepi erasi aꞌi tote wawesiyenamisiya. Etiri werese, Owane Sitewi Tai Pefine aꞌi ironamisiya ape, le ane maꞌe au atuatu areiyesiya. Le wiyawi erasi aꞌi taꞌanerowa, sosu le ane maꞌe au atuaturowa. Fene wiyawi erasi aꞌi lo eite, ane taꞌaneyei ape, siyeyei su, fene marepi hepene se suꞌariyei. 21 Serai Owane Sitewi Tai Pefine aꞌi ano lu tamo, temeniyeyei ape, si tame taꞌane norohuwe hene aniyei. Sosu lowe maꞌe hepene aurowa. Sosu aiwawe ane meni eime lo lu taune tamo maꞌe marepi hepene heꞌi aurowa. Marepi ano aꞌi ne. 22 Peri eite wiyeme aꞌi. Owane Sitewi Tai Pefine aꞌi ano lu taune werese au hese etiyei taꞌama. Ahowa, le meni eime lo maꞌe yo seni werese, au heseyei ape, ane maꞌe auwe.f 23 Owane Sitewi Tai Pefine aꞌi wiyawi eite meni eime lo maꞌe auwe. Serai lu taune werese meni meni eime lo iyape ei ani arowesiya. Pereye aꞌi lu taune werese lowesi lo iyape ei ani arowesiya. Lu taune tamo meni eime lo au teꞌe wisereye taꞌame su, lowe Owane Sitewi Tai Pefine aꞌi eime lo, hi awei maꞌe eimawesai ape, lowe Tai Pefine aꞌi aiwawe aꞌi au teꞌe wisereye taꞌame.g 24 Wiyeme aꞌi ane fene maꞌe eisiya. Peri ano wiyeme aꞌi ne. Lu taune tamo peri ano wanuwei su, sosu le maꞌe ane hi awei maꞌe eimawe sai ape, lowe peri lo wanu tote tawesiyei su, Owane Sitewi lai lowe maꞌe marepi hepene heꞌi aꞌi aurowa. Lowe Owane Sitewi lo marepi umasiyei su, Owane Sitewi lai yo seni lowe lo au hese ereiyei taꞌama. Lu taune ape mo temeniye aweraꞌiyenatiyei, sosu mi mi pasi pasi weriyei ironamitorowa.h 25 Wiyeme aꞌi ne! Ane fene maꞌe eiwa. Peri ano wiyeme aꞌi ne. Nowe ta ataheye heneraiwa. Ahowa, nowe eite henerai tepaꞌasiye. Lu taune werese yo seni luwaru aꞌi ironamisiya. Lowe Owane Sitewi lo meni eime lo peri noꞌu aꞌi wanuwei. Lu taune tamo peri noꞌu lo wanuwei su, lowe mi mi pasi pasi weriyei marepi hepene heꞌi anirowa. 26 Peri eite wiyeme aꞌi ne. Owane Sitewi Tai Pefine aꞌi lai hepene se ironamisiya. Serai aiwawe aꞌi le meni eime lo maꞌe hepene se auwe. Serai meni eime lo lu taune werese maꞌe hepene heꞌi aꞌi aurowa. 27 Sosu aiwawe aꞌi le aꞌi lai meni eime lo maꞌe kairefi lo se auwe. Serai meni eime lo yo seni werese aꞌi au hese erei ironamisiya. Ane aꞌi lai meni ape, hire maꞌe itorai ape ne. 28-29 Fene marepi tomu neꞌese owe ape totere. Nowe ta ataheyeraiwa. Lu taune werese, fisiye yo sahe irosiya ape, Owane Sitewi lo meni eime lo peri ahi wanuwei su, lowe werese marepi hepene aniyei, sosu fisiye nowe maꞌe heneraiyei. Lu taune werese yo seni wisere aꞌi iroteye ape, Owane Sitewi lai lowe maꞌe si tame norohuwe hene aniyei. Sosu mi mi pasi pasi weriyei tei ironamirowa. Sosu aiwawe lu taune werese, yo seni luwaru aꞌi iroteye ape, Owane Sitewi lai lowe maꞌe si tame hene aniyei. Sosu yo seni werese lowe lo au hese ereirowa. Serai lowe werese mi mi pasi pasi weriyei temeniye ironamitorowa.i
Lu tereꞌe tamo, Jisas ne au teꞌe areiyeteye.
30 Sosu aꞌi pe Jisas Juda lo lu owane maꞌe au teꞌeye. Wiyawi ape, ane aniye ape, ane marepi ano umasi tote taꞌame. Ahowa, Ane lu taune lo yo seni au hese ereiyei su, ane Owane Sitewi Tai Pefine aꞌi ano lo peri wanuwei. Serai yo seni lowe lo werese, ane wisere aꞌi au hese ereiyei. Ane marepi ano umasi taꞌame. Ahowa, Owane Sitewi ane hi maꞌe eimawe arosai ape, ane marepi lo umasinamirowa.j 31 Ane taꞌi aꞌi yo seni werese ano ne au teꞌe fiyariyei su, fene marepi ano wawero aꞌi toteyei. Serai fene ane umasirowata. 32 Ahowa, meni taꞌi tereꞌe yo seni ano ne au teꞌe fiyariye. Sosu peri ape, le au teꞌe fiyariye ape, wiyeme aꞌi tene. Ane lai soꞌoruwesiya tene! Serai fene peri lo fa wanure. 33 Tu naifa fene lu tamo Jon saꞌi au hu siye meni maꞌe eimawesawi. Lowe Jon maꞌe henerai su, le yo seni ano wiyeme aꞌi au teꞌe fiyariye. 34 Ahowa, marepi ano apou aꞌi tote taꞌame, ‘Lu tamo yo seni ano au teꞌe fiyariyei.’ Ahowa, ane fene maꞌe peri eite mo au teꞌesiya, serai fene wanu tote tawesiyei su, ane fene maꞌe marepi hepene heꞌi aurowa. 35 Meni ape Jon yehe erei wou aꞌi ne. Pasi aꞌi su, yehe erei fu etineyei su, etiri oso oso yehe erei taꞌuwerai. Jon apou wou aꞌi ne. Jon peri au teꞌe fiyariye su, lu taune tomu neꞌese taꞌuwerai, peri lo wanuwe. Nowe oso aꞌi su, fene Jon lo peri marepi wisere aꞌi toteye. Pereye fene Jon arunatiyewe, ane moꞌo umasisiya. 36 Wiyawi ano ne, Owane Sitewi Tai Pefine aꞌi ano ane hi awei maꞌe wiyawi lo taꞌaneyei ne eimawe arosai. Le wiyawi lo ane maꞌe auwe. Wiyawi ape mo, ane ani taꞌaneye ape, wiyawi ape yo seni ano ne au teꞌe fiyariteye. Fene wiyawi ano siyesiya su, sosu peri ano wanusiya su, fene etiri ape soꞌoruwesiya tene! Apou aꞌi Owane Sitewi lai ane hi awei maꞌe eimawe arosai. Wiyawi ape lai ane ne au teꞌe fiyariye ape, Jon lo peri maꞌe hi ani fu arowe.k 37 Sosu Owane Sitewi Tai Pefine aꞌi ano, ane hi maꞌe eimawe arosai ape, le ane ne peri au teꞌeye. Mi mi werese werese fene peri noꞌu lo wanu taꞌame. Sosu aiwawe fene nihari tahe paꞌare lo siye taꞌame.l 38 Sosu aiwawe peri lo ape lai marepi fene lo papu iro taꞌame. Piyene awere? Fene meni ape, le eimawe arosai ape, wanu tote tawesi taꞌame. Sosu fene meni eime lo umasi taꞌame. 39 Fene Owane Sitewi lo peri, one towe sahe leseye ape, siyeye ne nehinamisiya su, marepi fene lo apou aꞌi toteye, ‘Ane Owane Sitewi lo peri siye etinamisiya su, serai ane mi mi pasi pasi weriyei tei ironamisiya.’ Wiyeme aꞌi Owane Sitewi lo peri, leseye ape, peri ape ane ne au teꞌe areiyesiya. Fene marepi hepene heꞌi aꞌi anireme su, fene ane ne fa tote tawesiyei.m 40 Sosu fene ane maꞌe aiyeyei su, ane fene maꞌe marepi hepene heꞌi aꞌi aurowa. Ahowa, fene ane maꞌe aiyeyei wou taꞌama. 41 Marepi ano apou aꞌi totesiya, ‘Lu taune werese iyape ano teꞌe ani aroweyei wou taꞌama.’ 42 Ahowa, ane marepi fene lo soꞌoruwesiya. Fene marepi hepene papu Owane Sitewi maꞌe marepi erasi aꞌi tote taꞌame. 43 Ane lai Owane Sitewi Tai Pefine aꞌi ano lo iyape se fai. Ane fai su, fene ane maꞌe wisere aꞌi erite taꞌame. Ahowa, meni ta iyape yahowaꞌi se irowei ape, le iyape topo lo se aiyeyei su, fene meni ape wisere aꞌi eriteyei. 44 Fene taꞌu taꞌi taꞌi aꞌi iyape fene lo ei ani aroweye. Fene iyape erasi aꞌi siye nehi taꞌame. Iyape erasi aꞌi ape Owane Sitewi woto aꞌi maꞌe fai. Serai fene peri ano wanu tote tawesiyei taꞌama. 45 Fene marepi apou owe ape totere, ‘Ane fene lo yo seni Owane Sitewi Tai Pefine aꞌi ano maꞌe fu teꞌerowa awere?’ Ahowa, ane fene fu teꞌerowata. Meni taꞌi ta yo seni fene lo Tai Pefine aꞌi ano maꞌe fu teꞌerowa ape, meni ape iyape Moses. Fene Moses lo yo peri umasisiya su, fene apou totesiya. Nomo marepi hepene heꞌi aꞌi anirowa. Fene Moses lo yo peri se marepi hepene heꞌi aꞌi anirowa awere? Piyete! Wawero aꞌi ne. Moses lo yo peri yo seni werese fene lo ape ne au hese ereirowa. Serai fene mi mi pasi pasi temeniye ironamitorowa. 46 Wiyawi aꞌi ne, fene Moses lo yo peri wanu tote tawesi umasi taꞌame. Fene Moses lo peri wanu tote tawesiye su, fene ane ne aiwawe aꞌi tote tawesiyei. Piyene awere? Tu naifa weriyei Moses ane ne apou leseye.n 47 Ahowa, fene peri, Moses leseteye ape, wanu tote tawesi taꞌame su, fene peri ano aiwawe aꞌi wanu tote tawesirowata.”