Jisas lu taune tomu neꞌese (5,000) au ene aye.
6
Jisas peri tepaꞌasiye su, le lu feni aiwawe, Hare Ite Galili feni eire maꞌe toneri. Hare ite lo iyape tereꞌe, Taiberias. 2 Lowe fi su, lu taune tomu neꞌese moꞌo umasiye. Lowe Jisas lo wiyawi erasi aꞌi siyeyei ne toteye. Lowe Jisas lu taune u tahe se faraꞌuweye ape siyeyei ne toteye. 3 Sosu Jisas omo ta yaneye. Omo ape le lu disaipel lo aiwawe onuwe. 4 Nowe ape se, taꞌuwe hereiyei erasi ataheyerai. Taꞌuwe hereiye iyape Pasova. 5 Lu taune tomu neꞌese Jisas maꞌe taꞌuwerai su, Jisas nihe se lowe werese siyeye. Sosu le Filip maꞌe apou ei toweriye, “Eiwerou maꞌe nomo ene nau eteyei awere? Serai nomo lowe maꞌe au ene ayei awere?” 6 Jisas Filip maꞌe eiye su, le marepi topo lo soꞌoruweye. Le aꞌi wiyawi, eiwerou taꞌaneye ape, soꞌoruwe tepaꞌasiye. 7 Sosu Filip itiyaꞌu eiye, “Eiwerou maꞌe maꞌaru tomu neꞌese aniyei awere? Nomo maꞌaru (200) aniyei su, nomo ayei tamo eterowata. Nomo ayei eteyei su, lu taune werese ayei oso aꞌi lire lowe lo temeꞌeriye taꞌame.” 8 Sosu meni tereꞌe iyape Andru, Saimon Pita lo paꞌise apou au teꞌeye, 9 “Siyere! Meni eime oso aꞌi nau taꞌase oso aꞌi ereti feni werese hare hesi aꞌi aitai. Etiri eite mo lu taune maꞌe au arowata.” 10 Sosu Jisas lu feni maꞌe eiye, “Fene lu taune werese maꞌe ei onure.” Omo ape sahe senarepe tomu neꞌese irowe. Lu taune werese senarepe sahe onuwe. Lu tomu neꞌese saro onuwe (5,000 aiwawe aꞌi).11 Lu taune werese onuwe su, Jisas nau taꞌase ereti feni werese ereti se aniye. Sosu le Owane Sitewi maꞌe au teꞌe wisereyeye su, le lu disaipel lo maꞌe auwe. Sosu lu disaipel lo lu taune werese maꞌe, onuwe ape noneti. Nonetinauwe, nonetainauwe, lu taune werese lire lowe lo temeꞌeriyeye. Sosu le hare hesi aꞌi ereti lo se aniteye su, le Owane Sitewi maꞌe au teꞌe wisereyeye. Sosu au ayei ne nonetiye. 12 Sosu lu taune werese a tepaꞌasiye, lire lowe lo werese temeꞌeriyeye. Sosu Jisas lu disaipel lo maꞌe eiye, “Fene ayei tewi aꞌi tewi aꞌi werese ani taꞌuweye. Sosu etiri tamo foruwe irorowata.” 13 Sosu lowe ayei tewi aꞌi tewi aꞌi taꞌuwe anirowawe, ipi erasi ani fuwe. Sosu nau taꞌase tewi aꞌi hare tewi poruwe iroteye ape, si ipi papu ereti feni hesi lowe hesi aꞌi (12) ani asi temeꞌeriyeye. 14 Serai lu taune werese Jisas lo wiyawi erasi aꞌi siyeye su, lowe apou eiye, “Etiri eite wiyeme aꞌi ne. Meni eite lai Owane Sitewi lo au teꞌe siye meni ape nomo ninawesiya ape, Owane Sitewi lai le awei maꞌe eimawe arosai.”
15 Sosu aꞌi pe Jisas lowe marepi ani soꞌoruweye. Marepi lowe lo apou aꞌi toteye. Lowe Jisas ereti tore niꞌari aniyei ne toteye. Sosu lowe le owane tutawe lowe lo hene ani irowei. Serai Jisas woto aꞌi omo hire maꞌe si tame yaneye.a
Jisas hare ite hire awesetaiteye.
16 Sosu aꞌi pe nowe pasiyeye su Jisas lo lu disaipel le omo sahe arunatiyewe, hare ite maꞌe si tame itori. Lowe hare ite feni eire maꞌe toneriyei ne totesiya. 17 Lowe wai papu wi onuwe su, lowe hare ite omo Kaperneam maꞌe toneriyei ne toteye. Sosu pasiyeye. Jisas lowe mase fi taꞌama. 18 Lowe hare ite ponei sahe iroteye su, fiyaru erasi, saꞌi ei aiwawe aꞌi henerai. 19 Lowe wai iyatunauwe, iyatunauwe ponei maꞌe iyatunauwe. Sosu iyatu fofoteye. Nihe siye aroweye su, sawi amou! Lowe Jisas saꞌi hire awesetaiteye siyeye. Lowe Jisas saꞌi hire awesetaite siyeye su, lu disaipel lo marepi taweiru erasi aꞌi toteye. 20 Sosu Jisas lowe maꞌe eiye, “Taweiru sawa! Ane lai ne.” 21 Sosu lowe marepi fetane aꞌi toteye su, lowe apou eiye, “Wai papu wira.” Sosu Jisas wai papu wirai su, lowe pereye aꞌi saꞌi feni eire omo Kaperneam maꞌe seni tewi sahe furi.
Lu taune tamo Jisas siyeyei ne nehiteye.
22 Nowe moꞌo su, lu taune werese Jisas au ene aye ape, saꞌi feni eite teiye. Liyewe lowe wai ta saꞌi tewi maꞌe siyeye. Lowe Jisas lo lu disaipel wai iyatuteyei siyesawi. Jisas lo lu disaipel lowe aꞌi lai wai papu wi ato ereye. Jisas wai papu wi taꞌame. 23 Lu taune tamo omo Taiberias maꞌe fai ape, lowe wai papu wiye, hare ite tonerai. Omo eite sahe liyewe Jisas nau taꞌase Owane Sitewi maꞌe au teꞌe wisereyeyewe, sosu lu taune werese maꞌe au nonetiteye. Lowe wai saꞌi tewi eite maꞌe furi. 24 Lu taune werese Jisas nau taꞌase au ene ateye ape, lowe Jisas nehiyei ne toteye. Lowe Jisas siye taꞌame su, lowe wai ape mo papu wi atowe. Sosu omo Kaperneam maꞌe saꞌi toneri. Lowe Jisas nehiyei ne toteye.
Jisas, le nau taꞌase, omo hire maꞌe itorai ape ne.
25 Sosu lowe Jisas omo Kaperneam sahe siyeye su, lowe le maꞌe eiye, “Atuatu siye meni, eiwerou su ne saro ahe fai awere?” 26 Sosu Jisas lowe maꞌe itiyaꞌu eiye, “Wiyeme aꞌi, ane fene au teꞌeyei. Piyene fene ane nehisiya awere? Fene nau taꞌase ene aye, sosu lire temeꞌeriyeye. Serai fene ane nehi siyesiya. Fene wiyawi erasi ano siyeye su, fene ane ne tote taꞌame. Fene lire fene lo ne erasi aꞌi toteye. 27 Nau taꞌase liyewe ane au nonetiye ape, ayei ape awei maꞌe fai. Awei lo ayei werese witane aꞌi uwaseyei. Fene ene ayei ape mo marepi erasi aꞌi owe ape totete. Ahowa, fene Owane Sitewi lo ene ayei marepi erasi aꞌi totete. Awei lo ene ayei witane aꞌi uwaseyei. Sosu Owane Sitewi lo ene ayei mi mi pasi pasi ironamirowa. Owane Sitewi lo ene ayei ane, meni hire maꞌe itorai ape, fene maꞌe auwei. Owane Sitewi Tai Pefine aꞌi ano aꞌi lai ane maꞌe au teꞌe wisereyesiya.”b 28 Serai lowe le maꞌe apou eiye, “Piye nomo irowei awere? Nomo Owane Sitewi lo wiyawi erasi aꞌi ani taꞌaneyei ne totesiya. Serai Owane Sitewi nomo maꞌe ayei wiyeme aꞌi lo auwei.” 29 Sosu Jisas lowe maꞌe apou itiyaꞌu eiye, “Fene Owane Sitewi lo wiyawi ani taꞌaneyei ne toteyei su, fene ane ne meni, Owane Sitewi lai hi awei maꞌe eimawe arosai ape, fene peri lo fa wanu tote tawesire.”c 30-31 Sosu lowe le maꞌe teꞌe, “Tu naifa weriyei yaꞌariyei nomo lo, omo pani ariye iroteye ape, Owane Sitewi lo nau taꞌase, iyape mana, ani taꞌuwe ateye. Serai Moses apou leseye,
‘Owane Sitewi lai lu taune werese lo maꞌe nau taꞌase hi awei se ito maꞌe aro ausai.’” Kis 16:15
Serai lowe le maꞌe eiye, “Ne piye wiyawi erasi aꞌi irowei awere? Nomo wiyawi erasi no siyeyei su, nomo faraꞌu peri no wanu tote tawesiyei. Ne piye wiyawi erasi aꞌi taꞌaneyei awere?”d 32 Sosu Jisas lowe maꞌe apou eiye, “Peri eite wiyeme aꞌi ne. Ane fene maꞌe eisiya, Moses nau taꞌase fene maꞌe hi awei maꞌe au aro sai taꞌama. Ahowa, Owane Sitewi Tai Pefine aꞌi ano fene maꞌe nau taꞌase wiyeme aꞌi hi awei maꞌe eimawe arosaisiya. 33 Nau taꞌase wiyeme aꞌi hi awei maꞌe eimawesaisiya ape, apou wou aꞌi teꞌeye. Nau taꞌase wiyeme aꞌi eite lu taune werese aꞌi maꞌe marepi hepene heꞌi aꞌi aurowa.” 34 Serai lowe le maꞌe eiye, “Meni Owane, ne nau taꞌase pefine aꞌi nomo maꞌe mi mi werese ene ayei ne aunamire.” 35 Sosu Jisas lowe maꞌe eiye, “Ane aꞌi lai nau taꞌase wiyeme aꞌi ne. Ane marepi hepene heꞌi aꞌi aurowa. Lu taune tamo ane maꞌe aiyeyei su, lowe mi mi pasi pasi lau mase irorowata. Sosu aiwawe, lu taune tamo peri ano wanu tote tawesiyei su, lowe mi mi pasi pasi saꞌi wawe irorowata.e 36 Ahowa, ane fene maꞌe teꞌe tepaꞌasiye, ‘Fene ane siye tepaꞌasiye. Ahowa, fene peri ano wanu tote tawesi taꞌame.’ 37 Lu taune werese, Owane Sitewi Tai Pefine aꞌi ano ariariyeye ape, lowe werese ane maꞌe aiyeyei. Sosu lu taune tamo ane maꞌe aiyeyei su, ane mi mi pasi pasi lowe werese maꞌe meꞌiyeni atati awetorowata. 38 Owane Sitewi lai ane hi awei maꞌe eimawe arosai. Ane hi awei maꞌe itorai su, ane Owane Sitewi Tai Pefine aꞌi ano lo marepi umasiyei. Ane marepi ano umasirowata. 39 Owane Sitewi Tai Pefine aꞌi ano, ane hi awei maꞌe eimawe arosai ape, lo marepi apou wou aꞌi ne. Lu taune werese, Owane Sitewi lai ane maꞌe auwe ape, ane lowe werese aweraꞌiyenati taꞌame. Serai nowe yeꞌewi su, ane aꞌi lai lowe werese si taꞌane norohuwe hene anirowa. Sosu marepi hepene heꞌi aꞌi aurowa. Lowe werese mi mi pasi pasi weriyei tei ironamirowa.f 40 Owane Sitewi Tai Pefine aꞌi ano lo marepi apou wou tote teꞌeye, lu taune werese, eime lo siyeyei ape, sosu peri lo wanu tote tawesiyei ape, Owane Sitewi lai lowe werese maꞌe marepi hepene heꞌi aꞌi aurowa. Sosu ane lai nowe yeꞌewi se, lowe werese aꞌi si taꞌane norohuwe hene anirowa. Serai lowe mi mi pasi pasi weriyei tei ironamirowa.”
41 Sosu aꞌi pe Jisas apou au teꞌeye su, “Ane aꞌi lai Owane Sitewi lo nau taꞌase hepene se ne,” Juda lo lu owane tamo Jisas ne ai marepi tote teꞌe tiyatiye. 42 Sosu lowe apou teꞌeye, “Meni ape lai Jisas tene! Josep lo meni eime, nomo tai lo mai lo soꞌoruwe tene! Peri lo wanure! ‘Ane lai Owane Sitewi mase hi awei maꞌe itorai.’ Wawero tene!”g 43 Sosu Jisas lowe maꞌe itiyaꞌu eiye, “Fene ai marepi owe ape tote teꞌe tiyatire. 44 Owane Sitewi lai meni ta ariariye ei ani taꞌame su, meni ape ane maꞌe aiyerowata. Ahowa, ane Owane Sitewi lai, hi awei maꞌe eimawe arosai ape, serai Owane Sitewi lai meni ta ei aniyei su, meni ape ane maꞌe aiyeyei. Sosu ane nowe yeꞌewi se le si taꞌane norohuwe hene anirowa.h 45 Tu naifa weriyei Owane Sitewi lo au teꞌe siye lu tamo apou leseye,
‘Owane Sitewi lai lu taune werese maꞌe au atuaturowa.’ Ais 54:13
Sosu aiwawe aꞌi lu taune werese Owane Sitewi Tai Pefine aꞌi ano lo peri wanuwe su, sosu ani soꞌoruweyei su, lowe werese ane maꞌe aiyeyei. 46 Lu taune werese Owane Sitewi Tai Pefine aꞌi ano siye taꞌame. Owane Sitewi lai meni ape hi awei maꞌe eimawe arosai. Serai meni ape ne, ane aꞌi lai Tai Pefine aꞌi ano siyeye.i 47 Peri eite wiyeme aꞌi tene! Ane fene maꞌe eiyei, lu taune tamo peri ano wanu tote tawesiyei su, lowe mi mi pasi pasi weriyei tei ironamitorowa.j 48 Ane aꞌi lai Owane Sitewi lo nau taꞌase wiyeme aꞌi ne. Ane lai lu taune maꞌe marepi hepene heꞌi aꞌi aurowa.k 49 Yaꞌariyei fene lo pani ariye aꞌi sahe lowe nau taꞌase Owane Sitewi hi maꞌe eimawe arosai ape, a tepaꞌasiye. Nau taꞌase ape lowe maꞌe marepi hepene heꞌi aꞌi aurowata. Serai nowe meꞌiye su, lowe werese temeniyeye. 50 Ane aꞌi lai Owane Sitewi lo nau taꞌase, hi awei maꞌe eimawe arosai ape ne. Serai lu taune tamo nau taꞌase eite ene ayei su, ane lowe maꞌe marepi hepene heꞌi aꞌi aurowa. Sosu mi mi pasi pasi weriyei tei ironamitorowa. 51 Ane aꞌi lai Owane Sitewi lo nau taꞌase hepene se hi awei maꞌe eimawe aro sai. Lu taune tamo nau taꞌase ape ayei su, lowe mi mi pasi pasi weriyei tei ironamirowa. Nau taꞌase ape tahe paꞌare ano ne. Lu taune werese omo omo werese sahe, ane lowe ne tahe paꞌare ano au temeniyeyei. Serai lowe mi mi pasi pasi weriyei tei ironamirowa.”
52 Sosu aꞌi pe lu Juda lo lu owane taꞌu ai peri erasi aꞌi teꞌe tiyatiye. Lowe apou teꞌe tiyatiteye, “Meni eite nomo werese maꞌe tahe paꞌare lo auwei ne ayei awere? Wawero aꞌi tene!” 53 Sosu Jisas itiyaꞌu eiye, “Peri wiyeme aꞌi ne. Ane fene maꞌe eisiya, fene, meni ape itorai ape, lo tahe paꞌare a taꞌame su, sosu fisaꞌi lo a taꞌame su, fene marepi hepene heꞌi anirowata. 54 Lu taune ta tahe paꞌare ano ani ayei su, sosu fisaꞌi ano ani ayei su, lowe mi mi pasi pasi weriyei tei ironamitorowa. Sosu nowe yeꞌewi se, ane lowe maꞌe si hene anirowa. 55 Pefine tahe paꞌare ano ayei wiyeme aꞌi ne. Sosu aiwawe fisaꞌi ano saꞌi wiyeme aꞌi ayei. 56 Lu taune ta tahe paꞌare ano ayei su, sosu fisaꞌi ano ayei su, ane meni eite papu wi ironamisiya. Sosu aiwawe le ane papu wi ironamisiya. 57 Owane Sitewi Tai Pefine aꞌi ano hepene se ne. Le lai ane hi awei maꞌe eimawe arosaiyewe, ane maꞌe hepene se auwe. Serai lu taune ta tahe paꞌare ano ayei su, ane le maꞌe marepi hepene heꞌi auwei.l 58 Yaꞌariyei fene lo nau taꞌase Owane Sitewi lowe maꞌe eimawe arosai ape, ateye. Nau taꞌase ape marepi hepene heꞌi aꞌi au taꞌame. Ahowa, nowe meꞌiye su, lowe werese temeniyeye. Sosu ane lai Owane Sitewi lo nau taꞌase wiyeme aꞌi, hi awei maꞌe eimawe arosai ape, lu taune ta nau taꞌase wiyeme aꞌi ayei su, lowe mi mi pasi pasi weriyei tei ironamisiya.” 59 Jisas peri werese eite au teꞌe fiyariye su, le taꞌuwe wesi omo Kaperneam sahe au atuatuwe.
Lu taune neꞌese Jisas ne meꞌiyeni maꞌe atati arunati.
60 Sosu lu feni lo tomu neꞌese peri ape mo wanuwe su, lowe marepi orese aꞌi toteye. Lowe apou toteye, “Peri eite orese aꞌi ne. Eiwerai faraꞌu wanusiya awere?” 61 Ahowa, Jisas lu feni lo marepi orese aꞌi ani soꞌoruweye su, le lowe maꞌe eiye, “Fene peri ano wanuwewe, marepi fene lo orese aꞌi ne. Serai fene apou eiye, ‘Nomo peri ape lo wanu aniyei wou taꞌame.’ 62 Peri ano wanure! Fene meni, hi awei maꞌe itorai ape, hire maꞌe si tame wiyei siyeyei su, fene peri ano wanu tote tawesirowata awere? Fene marepi luwaru aꞌi toteyei awere? 63 Lu taune werese taꞌu marepi hepene heꞌi anirowata. Sosu mi mi pasi pasi teinamirowata. Owane Sitewi lo Hepene Waraꞌi lai marepi hepene heꞌi aunamisiya. Peri ano, fene maꞌe au teꞌeye ape, fene peri ano Owane Sitewi lo Hepene Waraꞌi ne wanuwei su, fene marepi hepene heꞌi aꞌi aniyei. Serai fene mi mi pasi pasi ironamirowa. 64 Ahowa, lu taune tamo peri ano wanu aniye taye. Meni eite Jisas ai atu siye lu tamoꞌama.” Jisas piyene peri apou teꞌeye awere? Le lu taune werese lo marepi siye soꞌoruwe tepaꞌasiye. Jisas tu naifa weriyei weriyei lu taune werese siye soꞌoruweteye. Lu taune tamo wanu aniye. Lu tamo wanu ani taꞌame. Jisas lai lowe siye soꞌoruweye. Meni eite Jisas ai atu siye lu tamo maꞌe hene areareye. Jisas tu naifa weriyei meni ape lo yo seni siye soꞌoruweye.m 65 Sosu Jisas apou eiye, “Ane fene maꞌe eiye su, ‘Tu naifa weriyei ane lu taune werese lo marepi siye soꞌoruwe tepaꞌasiye.’ Peri eite wiyeme aꞌi tene! Peri eite lo marepi si apou aꞌi totesiya. Owane Sitewi Tai Pefine aꞌi ano lu taune tamo ei ani ariariye taꞌame su, le ane maꞌe aiyerowata.”n 66 Sosu aꞌi pe lu feni lo tomu neꞌese peri eite wanuwe su, lowe Jisas meꞌiyeni maꞌe atati ani arunati. Serai lowe le aiwawe uwei te taꞌame.
Pita lai Jisas ne au teꞌe areiyeye.
67 Serai Jisas lu disaipel lo maꞌe, ereti feni hesi lowe hesi aꞌi (12) ei toweriye, “Fene aiwawe ane ne meꞌiyeni maꞌe atati arunatiyei awere? Sosu wesi towafi fene lo si tame iyei awere?” 68 Sosu Saimon Pita le maꞌe itiyaꞌu eiye, “Owane, nomo si tame iyei su, eiwerou maꞌe nomo si tame iyei awere? Ne aꞌi lai peri wiyeme aꞌi au teꞌesiya. Peri no eite se nomo mi mi pasi pasi ironamirowa. 69 Nomo werese peri no wanu tote tawesi umasiteye. Sosu aiwawe nomo ne aꞌi Owane Sitewi lo meni waraꞌi soꞌoruwe tene!”o 70 Sosu Jisas lowe maꞌe itiyaꞌu eiye, “Ane aꞌi lai fene werese (12) ariariyeye. Ahowa, meni taꞌi, fene mase irosiya ape, meni luwaru aꞌi tene!” 71 Serai Jisas lo marepi si apou aꞌi toteye, meni iyape Judas, Saimon Iskariot lo meni eime, meni eite Jisas lo lu disaipel (12) lowe aiwawe aꞌi iroteye. Moꞌo su meni ape lai Jisas ai atu siye lu maꞌe hene arearerowa.