10 Sosu aꞌi pe paꞌise lo taꞌuwe hereiyei soro maꞌe yaneye su, le aꞌi lai soro maꞌe eresene fareyare yaneye. Lu taune werese le ne siyesawi taꞌama. 11 Sosu taꞌuwe hereiyei henerai su, Juda lo lu owane Jisas nehiteye. Siye taꞌame su, lowe apou ei toweriye, “Jisas eiwerou maꞌe irosiya awere?” 12 Sosu lu taune werese le ne marepi orese aꞌi tote teꞌe tiyatiteye. Lu taune tamo apou aꞌi teꞌeye, “Meni ape yo seni waraꞌi aꞌi ne.” Ahowa, lu taune tereꞌe tamo apou aꞌi teꞌeye, “Ahowa, meni ape luwaru aꞌi ne. Le lu taune werese ne yo luwaru aꞌi tereꞌe maꞌe hene aiti.” 13 Lu taune werese Juda lo lu owane ne taweiru aꞌi ne. Serai lowe werese Jisas ne amerame aꞌi au teꞌe taꞌame.

14 Sosu aꞌi pe taꞌuwe hereiyei ape ponei i tepaꞌasiye su, Jisas lai Owane Sitewi lo wesi wiye. Owane Sitewi lo wesi papu wiye su, le lu taune werese maꞌe au teꞌe atuatuwe. 15 Jisas peri lo au teꞌe atuatuwe teꞌeye su, Juda lo lu owane marepi auseriyeye. “Sawi amou! Meni eite etiri werese ne wisere aꞌi ani soꞌoruwesiya. Piyene awere? Le skul maꞌe onu taꞌame.”^e 16 Sosu Jisas lowe maꞌe itiyaꞌu eiye, “Peri eite, ane au teꞌesiya ape, peri ape ano taꞌame ne. Peri ape Owane Sitewi Tai Pefine aꞌi ano lo ne, le ane, hi awei maꞌe eimawe arosai. Serai ane marepi lo au teꞌe fiyariye.^f 17 Lu taune Owane Sitewi lo marepi umasiyei su, lowe piye peri wiyeme aꞌi wanu soꞌoruweyei. Lu taune ta Owane Sitewi lo marepi umasiyei ne totesiya su, le apou fa totere, ‘Peri ape, ane au teꞌe fiyariye ape, piye peri wiyeme aꞌi awere? Peri ape Owane Sitewi maꞌe fai awere? Ane aꞌi lai marepi ano au teꞌe fiyarisiya awere?’ 18 Lu taune tamo peri topo lo ne au teꞌesiya su, le aꞌi lai iyape lo erasi aꞌi ei ani aroweyei ne totesiya. Ahowa, ane, Owane Sitewi lai ane eimawe arosai ape, Owane Sitewi lo iyape ei ani aroweyei ne totesiya. Le aꞌi lai wiyeme aꞌi ne. Le yo seni luwaru werese aꞌi marepi hepene papu lo irorowata. Le aꞌi lai yo seni waraꞌi aꞌi ironamisiya.^g 19 Tu naifa weriyei meni Moses fene werese maꞌe Owane Sitewi lo yo peri au leseye. Ahowa, fene werese Owane Sitewi lo yo peri eite mo ani towesisiya. Owane Sitewi lo yo peri apou eiye, ‘Fene meni ta owe aine teraꞌere.’ Fene apou totesiya. Meni eite Jisas Owane Sitewi lo yo peri towesiye. Serai nomo meni eite fa aine teraꞌere. Fene piyene ane maꞌe aine teraꞌeyei ne totesiya awere?”^h 20 Sosu lu taune werese itiyaꞌu eiye, “Ne sepei luwaru aꞌi papu irosiya. Eiwerai ne maꞌe aine teraꞌeyei ne totesiya awere?”ⁱ 21 Sosu Jisas lowe maꞌe itiyaꞌu eiye, “Ane wiyawi erasi taꞌi aꞌi nowe amou se au irowewe, serai fene werese ane maꞌe marepi luwaru aꞌi totesiya. 22-23 Ane meni taꞌi nowe amou se au taꞌane faraꞌuweye. Fene ai marepi ane ne owe ape totere. Fene werese yaꞌariyei fene lo aiwawe Moses lo yo peri wiyeme aꞌi umasisiya. Yaꞌariyei fene lo tahe touwe. Fene meni eime fene lo Owane Sitewi lo nowe se tahe au touwe. Serai fene wiyawi taꞌaneye. Ahowa, fene marepi fene lo apou toteye. Nowe amou eite se nomo wiyawi taꞌane taꞌame. Serai ane meni taꞌi nowe amou se au faraꞌuweye su, fene ane ne ai marepi totenamiteye. Marepi fene lo meremereye aꞌi ne.^j 24 Meni ta wiyawi taꞌi taꞌaneyei su, wiyawi eite wisere aꞌi awere? Luwaru aꞌi awere? Fene nihe se aꞌi owe ape au hesere. Fene wiyawi eite au heseyei su, fene wiyawi lo marepi si au heseyei. Fene marepi waraꞌi aꞌi se au hesete.”

25 Sosu aꞌi pe Jisas peri ape mo teꞌe tepaꞌasiye su, lu taune omo Jerusalem maꞌe fai ape apou eiye, “Meni eite lu owane nomo lo lai le maꞌe aine teraꞌeyei ne totesiya. 26 Siyere! Le lu taune werese maꞌe au teꞌe fiyarisiya su, lowe le maꞌe ai peri teꞌerowata. Owane Sitewi nomo lo piye marepi totesiya awere? Meni eite Owane Sitewi lo ariariye siye meni, Krais aiwawe aꞌi ne, totesiya awere? Piyete awere? 27 Ahowa, meni ape lo omo sitewi nomo soꞌoruwe tene! Ahowa, meni ape Krais heneraiyei su, omo lo sitewi lu taune werese soꞌoruwe taꞌama.”^k 28 Serai Jisas Owane Sitewi lo wesi sahe peri erasi apou uteye, lu taune werese maꞌe au atuatuweye, “Wanure, fene lai ane ne soꞌoruwe tene! Sosu aiwawe fene omo sitewi ano ne siye soꞌoruwesiya tene! Ahowa, Ane hi awei maꞌe itorai su, ane marepi ano umasi taꞌame. Owane Sitewi Tai Pefine aꞌi ane, hi awei maꞌe eimawesai ape, le aꞌi lai wiyeme aꞌi tene! Fene werese le ne soꞌoru taꞌama.^l 29 Ane Owane Sitewi Tai Pefine aꞌi ano maꞌe itorai. Serai ane le ne soꞌoruwe tene! Le aꞌi lai ane hi awei maꞌe eimawesai.” 30 Sosu Juda lo lu owane Jisas ereti anite tawesiyei ne toteye. Ahowa, lowe le maꞌe ereti anite tawesirowata. Marepi si apou aꞌi toteye, “Jisas lo nowe henerai taꞌame.” Serai lowe Jisas ereti anite tawesi taꞌame.^m 31 Sosu lu taune tomu neꞌese Jisas lo peri wanu tote tawesiye. Lowe apou eiye, “Meni eite lai Krais tene! Meni tereꞌe wiyawi erasi aꞌi taꞌaneyei awere? Ahowa, meni ape lo wiyawi lai wiyawi werese hi ani ararowe. Marepi nomo lo apou aꞌi toteye. Meni ape Krais tene!”

32 Sosu lu Farisi tamo le ne lu taune lo peri wanuwe su, au heseyei lu owane pefine aꞌi, Farisi aiwawe aꞌi, lowe ai atu siye lu owane Jisas maꞌe anite tawesiyei ne eimawesai. 33 Serai Jisas apou eiye, “Nowe oso aꞌi su, ane fene mase irosiya. Nowe i tepaꞌasiyei su, ane temeniyeyei sosu Owane Sitewi Tai Pefine aꞌi ano maꞌe ane si tame taꞌane norohuwe sinerowa. 34 Fene ane ne nehi siyeyei. Ahowa, fene ane siyerowata. Ane omo hire maꞌe iyei su, fene hire maꞌe umasirowata.”ⁿ 35 Sosu Juda lo lu owane lowe taꞌu teꞌe tiyati towerisiya. “Meni ape eiwerou maꞌe iyei awere? Serai nomo le maꞌe siyerowata. Le Juda lo lu taune maꞌe omo pani Grik sahe au teꞌe fiyariyei awere? Sosu aiwawe Grik lo lu taune maꞌe au teꞌe fiyariyei awere? 36 Le peri ape au teꞌeye su, piye marepi si au teꞌeye awere? ‘Fene ane ne nehiye siyeyei. Ahowa, fene ane siyerowata. Ane omo hire maꞌe wirowa. Ahowa, fene ane moꞌo aiyerowata.’”

37 Sosu aꞌi pe taꞌuwe hereiyei lo nowe yeꞌewi henerai su, Jisas lu taune werese maꞌe ponei tei irowe, sosu lowe maꞌe peri erasi apou uteye, “Lu taune tamo saꞌi ayei ne totesiya su, lowe ane maꞌe fa aiyere. Lowe ane aiyeyei su, ane saꞌi lowe maꞌe au ayei.^o 38 Lu taune tamo peri ano wanu tote tawesiyei su, sosu yo seni ano umasiyei, fene Owane Sitewi lo peri wanure.

40 Sosu Jisas peri ape au teꞌeye su, lu taune tamo marepi lowe lo apou toteye, “Meni eite Owane Sitewi lo au teꞌe siye meni wiyeme aꞌi ne.”^q 41 Ahowa, lu taune tereꞌe tamo apou toteye, “Meni ape Krais tene!” Lu taune tamo apou toteye, “Wawero aꞌi ne. Krais nomo lo omo pani Galili maꞌe aiyerowata. Meni ape omo Nasaret pani Galili maꞌe fai.^r 42 Tu naifa weriyei Owane Sitewi lo peri apou leseteye,

45 Sosu aꞌi pe ai atu siye lu ape, lowe au heseyei lu owane, lu Farisi aiwawe aꞌi lowe maꞌe si tame fi. Lowe Jisas hene aitai taꞌama. Sosu au heseyei lu owane lowe maꞌe ei toweriye, “Fene piyene Jisas henetai taꞌame awere?” 46 Sosu ai atu siye lu owane lowe maꞌe itiyaꞌu eiye, “Meni ape iyape se ne. Lu tereꞌe peri lowe lo aiwawe aꞌi au teꞌe taꞌame.”^s 47 Sosu lu Farisi apou aꞌi itiyaꞌu eiye, “Atu, fene aiwawe. Meni ape fene yo seni luwaru aꞌi sahe hene niꞌariye awere? 48 Juda lo lu owane werese yo seni lo ape umasi taꞌame. Nomo lu Farisi aiwawe aꞌi, nomo werese le ne umasi taꞌama.^t 49 Lu taune werese Moses lo yo peri soꞌoru taꞌama. Serai lowe Jisas lo peri wanu tote tawesiye. Lowe Jisas lo peri wanu umasiyei su, Owane Sitewi lai lowe maꞌe omo yehe eimawesawiyei.” 50 Meni taꞌi iyape Nikodemus, Tu naifa meni ape Jisas maꞌe pasi aꞌi fai. Juda lo meni owane ne. Le Jisas au pati aniyei ne toteye.^u 51 Le lowe maꞌe eiye, “Yaꞌariyei yo peri nomo lo apou au teꞌesiya, ‘Tu meni ape nomo maꞌe fa aiyere. Nomo peri lo wanuwei su, nomo yo seni lo faraꞌu au heseyei.’” 52 Lowe le maꞌe itiyaꞌu eiye, “Ne omo pani Galili maꞌe fai awere? Ne Jisas lo lu tewi aꞌi awere? Ne Owane Sitewi lo peri sahe nehi siyere. Marepi nomo lo apou aꞌi toteye. Owane Sitewi lo au teꞌe siye lu werese omo pani Galili heneraiyei taꞌama.”^v

Peri eite (7:53–8:11) piye meni lai leseye awere? Lu soꞌoru se tamo lowe soꞌoru taꞌama. Yaꞌariyei one towe tomu tamo sahe peri eite iro te taꞌame. One towe tereꞌe tamo sahe peri eite iroteye.

53 {Lu taune werese wesi towafi lowe lo maꞌe fi.