8
Lu taune werese wesi towafi lowe lo fi su, Jisas Omo Oliv hire maꞌe yaneye. 2 Nowe mitaiyeye su, le taꞌuwe wesi maꞌe si tame wiye. Taꞌuwe wesi wiye su, lu taune tomu neꞌese le maꞌe taꞌuwerai. Le lu taune werese siyeye su, le saro onuwewe, lowe maꞌe Owane Sitewi lo peri werese au teꞌe atuatuwe. 3 Sosu Owane Sitewi lo yo peri soꞌoruwe siye lu tamo lu Farisi aiwawe, lowe menitani ta, naituwei towesiye ape, siyeye. Serai lowe menitani ape Jisas maꞌe henetai. Sosu lowe menitani eite lu taune werese ponei maꞌe tei irowe. 4 Sosu lowe le maꞌe apou eiye, “Atuatu siye meni, menitani eite naituwe towesiye. Nomo aꞌi lai nihe nomo lo se siyeye. 5 Serai Moses lo yo peri apou teꞌeye, ‘Menitani ta, naituwe ape, le tafaꞌe yo seni luwaru aꞌi irowe ape, fene le maꞌe tapiye ani fusawi aine teraꞌere.’ Ne piye peri teꞌesiya awere?”a 6 Sosu lowe le maꞌe teꞌe toweriye su, lowe Jisas au areareyei ne totesiya. Marepi si lowe lo apou aꞌi toteye, “Jisas lai Moses lo yo peri towesiyei su, nomo faraꞌu le etiyei.” Ahowa, Jisas peri se taꞌame. Le lowe uporo apeꞌi awei sahe onuwewe, sosu peperi sahe etiri ta leseye. 7 Sosu lu owane le maꞌe tame teꞌe towerinamiye. Sosu Jisas sineteye su, le lowe maꞌe itiyaꞌu eiye, “Meni ta fene mase yo seni luwaru aꞌi ariye su, le faraꞌu tapiye tutawe menitani maꞌe fa fusawire.”b 8 Peri teꞌe tepaꞌasiye su, le lowe uporo si tame apeꞌi onuwe. Sosu peperi sahe ereti tepi se leseye. 9 Sosu lu owane Jisas lo peri wanuwe su, lowe taꞌi taꞌi arunatiyewe fi. Yaꞌariyei owane lu tu fi. Sosu moꞌo lu tereꞌe tereꞌe arunatiyewe fi. Lowe werese fi su, Jisas menitani ape, lowesi aꞌi irowe. 10 Sosu Jisas si tame sineye su, le menitani maꞌe ei toweriye, “Lu owane werese eiwerou maꞌe awere? Lu tamo ne maꞌe eti taꞌame awere?” 11 Sosu le itiyaꞌu eiye, “Meni Owane, lu werese ariye.” Sosu Jisas itiyaꞌu eiye, “Ane aiwawe aꞌi ne maꞌe etirowata. Ne wesi no ire! Mi mi werese yo seni luwaru aꞌi owe ape irore!”}cJisas lai taiyeyei mi pefine aꞌi ne.
12 Sosu aꞌi pe Jisas lowe maꞌe eiye, “Ane aꞌi lai lu taune werese lo mi tene! Lu taune tamo ane maꞌe umasiyei su, lowe pasi aiwawe aꞌi uweirowata. Ahowa, lowe mi aꞌi se uweiyei. Sosu lowe mi mi pasi pasi ironamiyei.”d 13 Sosu lu Farisi le maꞌe eiye! “Wawero! Ne aꞌi lai ne ne au teꞌe fiyariye. Peri eite wawero aꞌi ne. Eiwerai ne pati teꞌesiya awere?” 14 Jisas lowe maꞌe itiyaꞌu eiye, “Ane peri ano ne au teꞌe fiyariye su, peri ano wiyeme aꞌi tene! Aiwawe aꞌi Owane Sitewi Tai Pefine aꞌi ano peri ano ne au pati teꞌesiya. Ane lai, omo sitewi maꞌe fai ape, soꞌoruwesiya. Sosu aiwawe ane omo maꞌe iyei ape soꞌoruwerowa. Ahowa, fene omo sitewi ano soꞌoru taꞌama. Aiwawe aꞌi ane omo maꞌe iyei su, fene omo ape soꞌoru taꞌama.e 15 Fene werese lu taune lo yo seni werese awei lo marepi aꞌi se au hesesiya. Ahowa, ane lai lu taune werese lo yo seni au heserowata.f 16 Ane lu taune lo yo seni au heseyei su, ane yo seni au heseyei ape wiyeme aꞌi tene! Ane taꞌi woto aꞌi au heserowata. Ahowa, Owane Sitewi Tai Pefine aꞌi ano ane hi maꞌe wiyawi lo aniyei ne eimawesai. Serai ane Tai Pefine aꞌi ano aiwawe aꞌi notosi lu taune werese lo yo seni au heserowa.g 17 Wanure! Yo seni fene lo apou eiye, ‘Lu hesi aꞌi peri taꞌi au teꞌe fiyariyei su, peri lowesi lo wiyeme aꞌi tene!’h 18 Ane aꞌi lai ane ne au teꞌe fiyarisiya. Sosu aiwawe aꞌi Owane Sitewi Tai Pefine aꞌi ano ane ne au pati teꞌe fiyarisiya. Notosi aꞌi ane ne au teꞌe fiyarisiya su, serai peri ano wiyeme aꞌi tene!”i 19 Sosu lu owane le maꞌe teꞌe toweriye, “Owane Sitewi Tai Pefine aꞌi no eiwerou maꞌe irosiya awere?” Sosu Jisas itiyaꞌu eiye, “Fene ane ne soꞌoru taꞌama. Aiwawe aꞌi fene Owane Sitewi Tai Pefine aꞌi ano ne soꞌoru taꞌama. Fene ane ne soꞌoruweyei su, serai fene Tai Pefine aꞌi ano ne aiwawe aꞌi soꞌoruweyei.” 20 Peri eite Jisas au teꞌe fiyariye su, le Owane Sitewi lo tewi wesi sahe maꞌaru ani fusiya ape, au teꞌe fiyariye. Lu owane werese Jisas ereti anite tawesirowata. Marepi si aiwawe aꞌi toteye. Jisas lo nowe henerai taꞌama.j
Jisas iyei su, owe meni ta le umasirowata.
21 Le lowe maꞌe apou itiyaꞌu tame eiye, “Ane omo tereꞌe iyei. Fene ane ne siye nehiyei ne toteyei. Ahowa, fene ane siyerowata. Ane omo iyei su, fene ane omo maꞌe moꞌo umasirowata. Serai fene yo seni luwaru aꞌi fene lo se temeniyeyei.”k 22 Serai Juda lo lu owane apou teꞌe tiyatiye. “Jisas le topo aine teraꞌeyei awere? Le apou eiye, ‘Ane omo iyei su, fene ane moꞌo umasirowata.’ Serai marepi nomo lo apou aꞌi toteye. Jisas topo le aine teraꞌeyei tene!” 23 Sosu Jisas lowe maꞌe eiye, “Fene lai hi awei maꞌe fai. Ane lai omo hire maꞌe fai. Fene lai hi awei maꞌe irosiya. Ane lai hi awei maꞌe fai taꞌama.l 24 Ane tu apou eiye, ‘Fene werese yo seni luwaru aꞌi fene lo se temeniyerowa. Fene peri ano ne meꞌiyeni maꞌe atati ani awetowei su, sosu ane meni eite Krais tote tawesi taꞌame su, wiyeme aꞌi fene werese yo seni luwaru aꞌi fene lo se temeniyerowa.’” 25 Sosu lowe itiyaꞌu teꞌe toweriye, “Ne eiwerai awere?” Jisas lowe maꞌe eiye, “Ane mi mi werese fene maꞌe au teꞌe tepaꞌasiye. 26 Ane etiri tomu neꞌese fene maꞌe au teꞌe fiyariyei. Sosu aiwawe ane yo seni werese tomu neꞌese fene lo se au heserowa. Ahowa, le, ane hi awei maꞌe eimawesai ape, le aꞌi lai wiyeme aꞌi tene! Le peri tomu neꞌese ane maꞌe teꞌeyei ne auwe. Serai peri werese ane wanuwe su, ane lu taune werese omo werese sahe au teꞌe fiyariyei.” 27 Lowe werese wanuwe su, marepi lowe lo apou aꞌi toteye, “Le meni tereꞌe ne au teꞌeye.” Ahowa, le Owane Sitewi Tai Pefine aꞌi lo ne au teꞌeteye. 28 Serai Jisas lowe maꞌe eiye, “Nowe ta su pe, meni hire maꞌe itorai ape, fene hire maꞌe ani aroweyei su, serai fene ane Krais siye soꞌoruweyei. Ane marepi ano umasirowata. Ahowa, Owane Sitewi Tai Pefine aꞌi ano ane maꞌe etiri ta au teꞌeye su, ane peri lo au teꞌe fiyariyei.m 29 Sosu aiwawe aꞌi. Le ane, hi awei maꞌe eimawesai ape, le ane mase irosiya. Le ane woto aꞌi maꞌe arunati fi taꞌama. Wiyeme aꞌi! Etiri werese ane taꞌaneyei su, ane Owane Sitewi maꞌe au teꞌe wisereyeyei. Serai Owane Sitewi ane ne au teꞌe wisereyeyei.” 30 Serai lu taune tomu neꞌese le ne tote tawesiyewe. Sosu le maꞌe umasiye.
Peri wiyeme aꞌi lai marepi fetane aꞌi au irosiya.
31 Sosu aꞌi pe Jisas Juda lo lu taune, le moꞌo umasiteye ape, le lowe maꞌe eiye, “Fene peri ano umasinamiyei su, sosu fene werese lu feni ano wiyeme aꞌi heneraiyei tene! 32 Sosu aiwawe aꞌi fene peri wiyeme aꞌi wanu soꞌoruweyei. Sosu peri wiyeme aꞌi eite se fene marepi fetane aꞌi au heneraiyei.” 33 Sosu lowe le maꞌe itiyaꞌu eiye, “Nomo meni Abraham lo lu tewi aꞌi ne. Lu owane werese mi mi werese nomo tote tawesi taꞌame. Marepi no piye totesiya awere? ‘Fene marepi fetane aꞌi heneraiyei.’”n 34 Sosu Jisas lowe maꞌe itiyaꞌu eiye, “Peri ano wiyeme aꞌi ne. Ane fene maꞌe eisiya. Lu taune werese yo seni luwaru aꞌi irowe su, yo seni luwaru aꞌi lowe lo lai lowe maꞌe anite tawesiye.o 35 Lu taune werese, yo seni luwaru aꞌi, yaꞌorei anite tawesiye ape, lowe Owane Sitewi mase iro taꞌame. Ahowa, Owane Sitewi lo meni eime mi mi pasi pasi weriyei ironamitorowa. 36 Ane yo seni luwaru aꞌi fene lo au sasari pamoweyei su, ane fene maꞌe marepi fetane aꞌi au irorowa. Serai fene marepi fetane aꞌi mi mi pasi pasi weriyei ironamitorowa. 37 Peri no wiyeme aꞌi. ‘Nomo Abraham lo lu tewi ne.’ Ahowa, peri ano marepi hepene fene lo papu ai marepi irosiya. Serai fene ane maꞌe aine teraꞌeyei ne totesiya. 38 Ane Owane Sitewi Tai Pefine aꞌi ano mase iroteye su, notosi etiri tomu neꞌese aꞌi siyeteye. Serai ane etiri ape mo fene maꞌe au teꞌe fiyariyei. Fene aiwawe aꞌi. Fene tai fene lo mase iroteye su, etiri werese, tai fene lo irowe ape, fene aiwawe irowei. Serai fene ane aine teraꞌeyei ne totesiya.” 39 Sosu lowe le maꞌe itiyaꞌu eiye, “Meni Abraham yaꞌariyei meni owane nomo lo ne.” Sosu Jisas lowe maꞌe eiye, “Fene Abraham lo lu tewi aꞌi su, serai fene werese Abraham lo wiyawi fa taꞌanere.p 40 Ahowa, fene ane aine teraꞌeyei ne totesiya. Owane Sitewi lai ane maꞌe peri wiyeme aꞌi au teꞌeye. Serai ane fene maꞌe peri wiyeme aꞌi eite au teꞌe fiyariye. Serai fene ane maꞌe aine teraꞌeyei ne totesiya. Meni Abraham fene aiwawe se taꞌama. Abraham yaꞌariyei owane fene lo, le Owane Sitewi lo au teꞌe siye lu au luwaruwe taꞌame. 41 Fene werese tai fene lo yo seni luwaru aꞌi umasinamiteye.” Sosu lowe le maꞌe eiye, “Mai nomo lo yo seni luwaru aꞌi irowe taꞌama. Serai moꞌo nomo auteiye. Ahowa, nomo tai taꞌi aꞌi irosiya. Tai nomo lo Owane Sitewi wiyeme aꞌi ne.”q 42 Sosu Jisas lowe maꞌe eiye, “Ahowa, Owane Sitewi wiyeme aꞌi Owane Sitewi Tai Pefine aꞌi fene lo se taꞌame. Tai Pefine aꞌi ano wiyeme aꞌi ne. Sosu aiwawe tu ane le mase ironamiteye. Serai le ane hi awei maꞌe eimawe arosai. Ane marepi ano umasi taꞌame. Ahowa, ane Owane Sitewi lo marepi aꞌi umasiye. Serai Owane Sitewi Tai Pefine aꞌi fene lo aꞌi su, fene werese ane maꞌe marepi erasi aꞌi fa tote wawesiyete. 43 Fene peri sitewi ano wanu soꞌoru taꞌama. Marepi fene lo apou aꞌi toteye, ‘Nomo peri lo wanuwei wou taꞌame.’ Serai fene apaniye teꞌene tawesiye. 44 Tai fene lo, sepei luwaru aꞌi Satan. Serai fene Satan lo yo seni umasiyei ne totesiya. Tu naifa weriyei le aꞌi lai aine teraꞌe siye meni wiyeme aꞌi tene! Peri wiyeme aꞌi marepi lo ironamirowata. Peri wiyeme wanure! Le aꞌi lai etiri werese wawero aꞌi au teꞌenamiye. Le peri wawero aꞌi au teꞌeyei su, le marepi topo lo umasiyei. Serai Satan peri wawero aꞌi iro siye meni. Peri wawero werese aꞌi le maꞌe fai. Satan peri wawero lo aite tene.r 45 Ahowa, ane peri wiyeme aꞌi au teꞌe fiyariyei. Fene ane ne wanu tote tawesirowata. 46 Lu taune werese ane ne apou au teꞌeyei taꞌama, ‘Meni ape yo seni luwaru aꞌi irowe.’ Ahowa, lu taune apou wou aꞌi teꞌerowata. Ane peri wiyeme aꞌi au teꞌe fiyariyei su, fene piyene peri ano wanu anirowata awere?s 47 Lu taune, Owane Sitewi lo marepi taꞌi aꞌi iroteye ape, lowe Owane Sitewi lo peri wanu umasisiya. Fene werese Owane Sitewi maꞌe fai taꞌama. Serai fene Owane Sitewi lo peri wanu umasirowata.”t
Abraham iroteye su, Jisas tu naifa ironamiteye.
48 Sosu aꞌi pe Juda lo lu tamo le maꞌe eiye. “Wanure! Wiyeme aꞌi tene! Marepi nomo lo apou aꞌi toteye, ‘Ne omo Samaria lo meni tene! Ne sepei luwaru aꞌi marepi hepene papu irosiya.’”u 49 Sosu Jisas itiyaꞌu eiye, “Ane sepei luwaru aꞌi papu ariye. Ahowa, ane Owane Sitewi Tai Pefine aꞌi ano lo iyape ei ani arowsiya. Sosu ate fene ane maꞌe au teꞌe narusiya. 50 Peri wiyeme aꞌi. Ane iyape ano ei ani arowerowata. Owane Sitewi Tai Pefine aꞌi wiyeme aꞌi iyape ano ei ani aroweyei ne totesiya. Lu taune tamo iyape ano ei ani aroweyei su, Owane Sitewi lai yo seni werese lowe lo au heseyei. 51 Peri ano wiyeme aꞌi tene! Wanure! Lu taune tamo peri ano wanu tote tawesiyei su, lowe temeniyerowata.”v 52 Sosu Juda lo lu owane tamo le maꞌe eiye, “Peri nomo lo wiyeme aꞌi tene! Sepei luwaru aꞌi marepi hepene no papu irosiya. Nomo soꞌoruwe tepaꞌasiye. Yaꞌariyei owane nomo lo, Abraham, tu naifa weriyei temeniyeye. Sosu aiwawe Owane Sitewi lo au teꞌe siye lu werese temeniyeye. Nomo peri no wanuwe, ‘Nomo peri no wanu tote tawesiyei su, nomo mi mi pasi pasi weriyei temeniyerowata.’ Peri wawero tene! 53 Wiyeme aꞌi ne aꞌi lai yaꞌariyei owane nomo lo Abraham, hi ani ararowe taꞌama. Ahowa, yaꞌariyei owane nomo lo temeniyeye. Sosu aiwawe aꞌi Owane Sitewi lo au teꞌe siye lu werese temeniyeye. Marepi no piye totesiya awere? Ne aꞌi lai hepene se mi mi pasi pasi weriyei teinamirowa awere? Wawero! Ne aiwawe temeniyerowa tene!” 54 Sosu Jisas itiyaꞌu eiye, “Ane aꞌi lai iyape ano ei ani aroweyei su, iyape ano yahowaꞌi ne. Ahowa, Owane Sitewi Tai Pefine aꞌi ano iyape ano ei ani arowenamisiya. Fene apou eiye, ‘Owane Sitewi wiyeme aꞌi Owane Sitewi Tai Pefine aꞌi nomo lo tene!’ Peri no wawero aꞌi tene! 55 Fene werese Owane Sitewi ne soꞌoru taꞌama. Sosu ate ane aꞌi lai le ne wiyeme aꞌi soꞌoruwesiya. Aiwawe ane apou eiyei su, ‘Ane Owane Sitewi wiyeme aꞌi soꞌoru taꞌama.’ Ane peri wawero siye meni tene! Ahowa, ane le ne soꞌoruwe tepaꞌasiye. Sosu ane peri werese lo wiyeme aꞌi umasinamisiya. 56 Tu naifa weriyei yaꞌariyei lu owane fene lo ane siyereme. Sosu le apou toteye. Wiyeme aꞌi, le aiyerowa tene! Sosu le Owane Sitewi maꞌe au teꞌe wisereyeye.” 57 Serai Juda lo lu tamo le maꞌe eiye, “Ne iyu menei lu hesi tawerese ereti feni hesi siye taꞌame. Serai ne apou eiye, ‘Ane Abraham siye tepaꞌasiye.’ Wawero!” 58 Sosu Jisas lowe maꞌe eiye, “Peri ano wiyeme aꞌi tene! Wanure! Tu naifa weriyei Abraham lo mai le auteiye su, ane ironamiteye.”w 59 Sosu lowe Jisas lo peri wanuwe su, lowe ai marepi erasi totenamiteye. Lowe tapiye le maꞌe ani fusawiyei ne totesiya. Ahowa, Jisas lu taune werese papu fareyareye. Serai lowe le siyerowata. Sosu le Owane Sitewi lo wesi nowe maꞌe arunati fi.