Jisas meni nihe pokowe tawesiyei au taꞌane peteneye.
9
Sosu aꞌi pe Jisas lu disaipel lo aiwawe Owane Sitewi lo wesi arunati fi. Sosu lowe yo sahe iteye su, lowe meni taꞌi, nihe pokoweyei tawesinamiteye ape, siyeye. Mai lo auteiye su, meni ape nihe pokoweyei tawesinamiteye. 2 Lowe meni ape siyeye su, lu disaipel lo Jisas maꞌe teꞌe toweriye, “Atuatu siye meni, eiwerai yo seni luwaru aꞌi irowe awere? Meni eite lai awere? Tai mai yo seni luwaru aꞌi irowe awere? Serai mai meni eite pokowe se auteiye.”a 3 Sosu Jisas lowe maꞌe itiyaꞌu eiye, “Ahowa, meni ape, aite mai aiwawe, yo seni luwaru aꞌi irowe taꞌama. Serai meni eite nihe pokoweyei se auteiye. Meni eite nihe pokoweyei se lo marepi si apou aꞌi totesiya. Serai Owane Sitewi lai meni eite se wiyawi erasi pefine aꞌi amerame aꞌi au taꞌane atuaturowa.b 4 Nomo hepene se irosiya su, nomo Owane Sitewi lo wiyawi au taꞌanete. Nowe oso aꞌi su, ane awei sahe arunatirowawe, omo hire maꞌe wiyei. Serai ane omo hire maꞌe wiyei su, ane, meni hi awei maꞌe eimawe arosai ape, ane Owane Sitewi lo wiyawi ani taꞌanerowata. Fene aiwawe aꞌi, fene hepene se irosiya su, fene Owane Sitewi lo wiyawi pei taꞌanete. 5 Ane hi awei maꞌe irosiya su, ane aꞌi lai awei lo mi au tewi mitaiye fiyarisiya.”c 6 Sosu le peri tepaꞌasiye su, le peperi sahe pisaꞌi topohowewe, sosu le peperi ani tapowewe, nihe sahe ani teineye.d 7 Sosu le meni eite maꞌe eiye, “Ne ire! Pitomuwe sahe, iyape Siloam nihe no saꞌi au hure!” Siloam lo marepi si apou aꞌi toteye, “Eimawesawi.” Serai meni ape pitomuwe Siloam maꞌe fi. Meni ape nihe saꞌi au huwe su, nihe lo petane siyeye. Sosu le wesi topo lo maꞌe si tame fi. 8 Lu taune tamo meni ape lo omo irosiya ape, lowe le siyeye apou eiye, “Nomo meni ta, nihe pokoweyei tawesiye ape, iroteye. Le yo sahe maꞌaru onu ei towerinamiteye. Meni ape lai awere?” 9 Lu taune tereꞌe apou teꞌeye, “Ei meni ape lai ne.” Lu tereꞌe tereꞌe apou teꞌeye. “Ahowa, meni ape nihari aiwawe aꞌi ne.” Ahowa, meni ape lowe maꞌe eiye, “Ane lai meni ape ne.” 10 Serai lu taune werese le maꞌe ei toweriye, “Ne lai meni eite irowe su, eiwerai nihe no au taꞌane petaneye awere?” 11 Sosu le itiyaꞌu eiye, “Meni ape, iyape Jisas, penare ani tapowewe, sosu nihe ano ani teineye. Nihe ani teineye su, le ane pitomuwe Siloam saꞌi au huwei ne eimawesawi. Serai ane nihe ano saꞌi au huwewe, sosu nihe ano au peteneye.” 12 Serai lowe le maꞌe teꞌe toweriye, “Meni ape eiwerou maꞌe fi awere?” Le itiyaꞌu eiye, “Ane soꞌoru taꞌama.”13 Sosu aꞌi pe lu owane meni ape, tu nihe pokowe tawesiye ape lu Farisi maꞌe heneti. 14 Sosu Jisas penare ani tapowe su, nowe amou eite se. Nowe amou se le meni, nihe pokowe tawesiye ape, au taꞌane faraꞌuweye. 15 Sosu serai, lu Farisi le maꞌe teꞌe toweriye, “Eiwerai nihe no au petaneye awere?” Sosu le lowe maꞌe itiyaꞌu eiye, “Meni ape penare nihe ano teineye su, ane nihe ano saꞌi au huwewe, serai ane faraꞌu siyesiya.” 16 Serai lu Farisi peri lo wanuwe su, lowe le maꞌe eiye, “Meni ape nowe anou ape towesiye. Serai le Owane Sitewi maꞌe fai taꞌama.” Ahowa, lu Farisi tereꞌe apou teꞌeye, “Meni ta wiyawi erasi pefine aꞌi irowei su, le meni luwaru aꞌi taꞌama.” Serai lu Farisi werese Jisas ne marepi hesi aꞌi hesi aꞌi toteteye. 17 Sosu lowe meni nihe pokoweyei maꞌe tame teꞌe toweriye, “Meni ape nihe no au petaneye su, piye marepi no meni ape ne totesiya awere?” Sosu le lowe maꞌe itiyaꞌu eiye. “Meni ape Owane Sitewi lo au teꞌe siye meni tene!”e 18 Meni ape peri tepaꞌasiye su, Juda lo lu owane le ne wawero aꞌi toteye ne! Marepi lowe lo apou aꞌi toteye, “Meni ape tu nihe pokoweyei tawesi taꞌame.” Serai lowe meni ape nihe pokowe lo tai mai ei aniye. 19 Sosu lowesi fai su, lu owane lowesi maꞌe teꞌe toweriye, “Meni ape meni eime fenesi lo awere? Fenesi auteiye su, le nihe pokoweyei tawesiye awere? Eiwerai nihe ape lo au petaneye awere?” 20 Sosu meni eite lo tai mai lowe maꞌe itiyaꞌu eiye, “Ei, wiyeme aꞌi. Meni eite meni eime notosi lo tene! Notosi auteiye su, le nihe pokowe tawesinamiye. 21 Eiwerai nihe lo au petaneye awere? Notosi soꞌoru taꞌama. Piyene le nihe se siyesiya awere? Notosi soꞌoru taꞌama. Le meni erasi henerai tepaꞌasiye. Fene le maꞌe teꞌe towerire. Serai le aꞌi lai fene maꞌe au teꞌeyei.” 22 Meni eite lo tai mai Juda lo lu owane ne taweiru aꞌi ne. Juda lo lu owane werese marepi taꞌi aꞌi toteye, “Lu taune tamo Jisas ne meni Krais au teꞌe fiyarisiya su, lu owane lowe maꞌe Owane Sitewi lo wesi nowe hene ani fusawiyei.” 23 Sosu lowesi lo marepi si aiwawe aꞌi toteye. Serai lowesi apou eiye, “Meni eime notosi lo meni erasi henerai tepaꞌasiye, fene le fa teꞌe towerire.”
24 Sosu lu owane meni eite nihe pokoweyei tawesiye ape, nowe hesi aꞌi tame ei aniye. Sosu lowe le maꞌe eiye, “Ne Owane Sitewi maꞌe au teꞌe wisereyere! Ne peri wiyeme aꞌi nomo maꞌe au teꞌere. Meni eite, nihe no petaneye ape, le aꞌi lai yo peri nomo lo towesinamisiya. Le meni luwaru aꞌi ne.” Nomo peri eite wiyeme aꞌi soꞌoruwesiya. 25 Sosu le lowe maꞌe itiyaꞌu eiye, “Meni eite yo peri fene lo towesinamisiya su, ane soꞌoru taꞌama. Ahowa, wanure! Ane etiri ta soꞌoruwesiya. Iyu menei tomu neꞌese i tepaꞌasiye su, ane nihe pokoweyei tawesinamiye. Serai pereye ane etiri werese siye areiyenamisiya.” 26 Sosu lowe le maꞌe teꞌe toweriye, “Meni eite lai piye ne maꞌe au irowe awere? Piye yo se nihe no petaneye awere?” 27 Le lowe maꞌe itiyaꞌu eiye, “Ane fene maꞌe au teꞌe tepaꞌasiye. Fene peri ano wanu se taꞌama awere? Fene piyene peri ano tame wanureme awere? Marepi ano aꞌi totesiya. Fene aiwawe lu feni lo heneraiyei ne totesiya.” 28 Sosu lowe le maꞌe ai marepi totenamiteye. Le maꞌe teꞌe naruwe. Lowe apou eiye, “Ne lai meni eite lo lu feni aꞌi ne. Nomo werese aꞌi lai Moses lo lu feni aꞌi ne. 29 Owane Sitewi, Moses maꞌe au teꞌeye. Nomo peri eite wiyeme aꞌi soꞌoruweye tene! Owane Sitewi meni eite maꞌe au teꞌesiya awere? Ahowa, nomo, omo lo maꞌe henerai ape, soꞌoru taꞌama.” 30 Sosu meni ape lowe maꞌe itiyaꞌu eiye. “Wiyeme aꞌi tene! Fene etiri eite soꞌoru taꞌama awere? Meni eite lai nihe ano petaneye. Sosu fene, omo lo ape maꞌe fai ape, soꞌoru taꞌama awere? 31 Peri ano wanure! Owane Sitewi lai lu taune werese, yo seni luwaru aꞌi ironamisiya ape, le peri lowe lo wanu taꞌame. Ahowa, lu taune tamo Owane Sitewi lo iyape ei ani arowei su, sosu marepi lo umasiyei su, le aꞌi lai peri lowe lo wanuwei.f 32 Mai meni ta ape auteiye su, sosu nihe lo pokoweyei tawesiye su, lu taune werese nihe lo au petanerowata. Tu naifa weriyei sosu pereye aꞌi lu taune meni, nihe pokoweyei tawesiye ape, nihe lo au petanerowata. Ahowa, Jisas aꞌi lai meni nihe pokowe tawesisiya ape au petaneye. 33 Owane Sitewi meni eite hi awei maꞌe eimawe arosai taꞌama su, le nihe ano au petanerowata.” 34 Sosu lowe ai marepi se itiyaꞌu le maꞌe eiye, “Mai no ne auteiye su, yo seni luwaru aꞌi marepi hepene no papu temeꞌeriyeye. Serai ne nomo maꞌe au atuatuwei ne totesiya awere? Marepi owe ape totere!” Sosu lowe le taꞌuwe wesi nowe maꞌe hene ani fusawi. Sosu apou eiye, “Ne taꞌuwe wesi si tame owe ape aiyete.”g
Meni ta tote tawesi taꞌame su, le nihe pokowesiya.
35 Sosu aꞌi pe lowe meni eite taꞌuwe wesi nowe maꞌe hene ani fusawi su, lu tamo au teꞌe tiyatiteye. Sosu Jisas peri lowe lo wanuwe su, le meni eite nehiyei ne fi. Le meni ape siyeye su, le meni eite apou ei toweriye, “Meni hire maꞌe itorai ape, ne le ne wanu tote tawesisiya awere?” 36 Sosu le Jisas maꞌe itiyaꞌu eiye, “Meni ape eiwerai awere? Ane meni ape ne wanu tote tawesiyei ne totesiya.” 37 Sosu Jisas le maꞌe eiye, “Ne meni eite siye tepaꞌasiye. Aiwawe aꞌi le ne maꞌe au teꞌesiya. Ane aꞌi lai meni eite tene!” 38 Sosu meni eite apou eiye, “Meni Owane Pefine aꞌi ne! Ane peri no wanu tote tawesisiya.” Serai le lowe uporo apeꞌi onuwewe, le maꞌe au teꞌe wisereyeye. 39 Sosu Jisas apou au teꞌeye, “Ane hi awei maꞌe itorai su, marepi si apou aꞌi toteye. Ane lu taune werese lo yo seni au heseyei ne fai. Lu taune, yo seni luwaru aꞌi irowe ape, lowe meni nihe pokoweyei tawesiye aiwawe aꞌi ne. Serai ane nihe lo petaneyei. Lu taune tamo, marepi waraꞌi aꞌi toteye ape, ane lowe nihe pokoweyei au iro heneraiyei aiwawe aꞌi ne.” 40 Sosu lu Farisi tamo peri lo wanuwe su, lowe le maꞌe teꞌe toweriye, “Ne nomo maꞌe au teꞌesiya, ‘Nomo nihe pokoweyei tawesiye.’”h 41 Sosu Jisas lowe maꞌe eiye, “Fene apou teꞌesiya su, ‘Nomo yo seni luwaru aꞌi irorowata.’ Owane Sitewi lai fene au ferafereirowata. Ahowa, fene apou eiyei su, ‘Owane Sitewi ane yo seni luwaru aꞌi ironamiteye, Owane Sitewi lai yo seni luwaru aꞌi fene lo au sasari pamoweyei.’”