Jisas fe sipsip au noweinowei siye meni pefine aꞌi ne.
10
Sosu aꞌi pe Jisas apou eiye, “Peri ano wanure! Wiyeme aꞌi ne. Taꞌarei lu tamo fe sipsip taꞌarei aniyei su, le tapiye se ti yose umaruwe yo wirowata. Ahowa, le tapiye sahe wirowawe, fe sipsip aine teraꞌe taꞌarei aniyei. Le aꞌi lai taꞌarei siye meni tene! 2 Fe sipsip au noweinowei siye meni, le tapiye se ti yose umaruwe yo papu wiyei. 3 Meni ape lai tapiye se ti yose aiyeyei su, umaruwe yo au noweinowei siye meni umaruwe yo le ne ani tosowei. Meni ape fe sipsip lo iyape ote aniyei. Fe sipsip peri noꞌu lo wanuwei. Serai fe sipsip werese lo tapiye se ti yose nowe maꞌe le moꞌo umasiyei. 4 Sosu le fe sipsip werese nowe maꞌe ei aniyei su, le tututeye. Sosu fe sipsip werese moꞌo umasiyei. Lowe peri noꞌu lo wanu soꞌoruweyei su, serai lowe le maꞌe umasiyei. 5 Sosu meni ta tereꞌe fe sipsip ei aniyei su, lowe peri lo wanu taꞌame. Serai lowe le maꞌe umasirowata. Lowe peri noꞌu lo wanuwei su, lowe itero fiyariyei. Lu tamo tereꞌe lo noꞌu, lowe wanu soꞌoruwe taꞌame.” 6 Sosu Jisas peri anowe eite au teꞌeye su, Juda lo lu owane werese peri lo eti wanu soꞌoruwerowata.7 Serai Jisas lowe maꞌe tame eiye, “Peri ano wiyeme aꞌi. Wanure! Ane fene maꞌe au teꞌe areiyesiya. Ane aꞌi lai fe sipsip lo umaruwe yo ne. 8 Lu tamo, tu fai ape, lowe fene maꞌe eiye, ‘Ane aꞌi lai meni eite Owane Sitewi ariariyeye ape tene!’ Lowe fai su, lowe eresene aꞌi yo tereꞌe se wiyei ne totesiya. Lowe lo marepi sitewi apou aꞌi toteye, ‘Nomo lu taune werese lo marepi au luwaruweyei ne totesiya.’ Lowe werese taꞌarei siye lu aiwawe aꞌi ne.a 9 Ane aꞌi lai umaruwe yo aꞌi ne. Lu taune tamo ane wiraiyei su, ane lowe maꞌe marepi hepene heꞌi aꞌi aurowa. Serai lowe ane maꞌe si wiraiyei. Sosu ane lowe maꞌe yo seni luwaru aꞌi lowe lo au sasari pamowerowawe, lowe maꞌe marepi hepene heꞌi aꞌi aurowa. 10 Taꞌarei meni aiyeyei su, marepi lo apou aꞌi toteyei. ‘Ane fe sipsip tamo taꞌarei aniyei, sosu au luwaruweyei, sosu lowe aine teraꞌeyei. Ahowa, ane lu taune maꞌe marepi hepene heꞌi aꞌi auwei ne fai. Ane marepi hepene heꞌi erasi aꞌi auwei ne fai. 11 Ane aꞌi lai fe sipsip lo au noweinowei siye meni wisere aꞌi ne. Fe sipsip lo au noweinowei siye meni wisere aꞌi ne. Le fe sipsip maꞌe marepi erasi tote wawesiyesiya. Serai le fe sipsip lo ne temeniyeyei ne au atoweiye taꞌame. Ane lu taune werese maꞌe aiwawe aꞌi marepi erasi aꞌi tote wawesiyesiya. Serai ane lai lowe ne au temeniyeyei.b 12-13 Meni ta maꞌaru se wiyawi ani siye meni, le fe sipsip lo au noweinowei siye meni taꞌame ne. Le fe sipsip werese lo ariye. Serai le maꞌaru se wiyawi taꞌaneyei. Sosu le fe sipsip au noweinoweiyei su, le fe sipsip marepi erasi aꞌi tote taꞌame. Sosu you erawe tamo fe sipsip aine teraꞌeyei ne aiyeyei su, maꞌaru wiyawi meni atoweiye iterotiyei. Serai you erawe tamo fe sipsip werese ani umasi fiyarirowa. Sosu you erawe lai fe sipsip tamo tomu teraꞌe tou ene arowa.c 14-15 Ane aꞌi lai fe sipsip lo au noweinowei siye meni wisere aꞌi ne. Ane Owane Sitewi Tai Pefine aꞌi ano siye soꞌoruwesiya. Aiwawe aꞌi Tai Pefine aꞌi pefine aꞌi ano ane ne siye soꞌoruwesiya. Serai ane lu taune werese ne, yo seni ano umasisiya ape, siye soꞌoruwesiya. Aiwawe aꞌi lu taune werese ano ane ne siye soꞌoruwesiya. Serai ane lu taune werese ano ne au temeniyeyei.d 16 Ane fe sipsip tereꞌe, tapiye ti yoseye ape, nowe maꞌe irosiya. Ane lowe werese ane maꞌe ei anirowa. Lowe werese peri noꞌu ano wanu umasisiya. Ane lowe werese taꞌuweraiyei. Serai lowe werese werese lu feni taꞌi aꞌi heneraiyei. Sosu ane taꞌi aꞌi lowe werese au noweinoweiyeie 17 Owane Sitewi Tai Pefine aꞌi ano wiyeme aꞌi ane ne marepi erasi aꞌi totesiya. Sosu aiwawe ane lu taune werese ano marepi erasi aꞌi totesiya. Serai ane lowe werese maꞌe temeniyeyei no ape auwei. Ane temeniyeyei su, ane hepene se si tame hene aniyei.f 18 Ane temeniyeyei su, meni ta ane aine teraꞌerowata. Ahowa, ane marepi ano umasisiya. Serai ane temeniyeyei ano ape auwei. Kairefiyeyei ano se, temeniyeyei ano ape, ane faraꞌu auwei. Sosu aiwawe kairefiyeyei ano se ane faraꞌu marepi hepene ano si tame hene aniyei. Peri wiyeme eite ane Owane Sitewi Tai Pefine aꞌi ano maꞌe wanu aniye.”
19 Sosu aꞌi pe Jisas peri ape lo au teꞌe tepaꞌasiye su, Juda lo lu taune werese marepi hesi aꞌi toteye. 20 Lu taune tamo le ne apou teꞌeye, “Meni ape sepei luwaru aꞌi papu irosiya. Marepi lo meremereye aꞌi ne. Fene piyene peri lo wanusiya awere?”
21 Sosu lu taune tereꞌe apou eiye, “Wanure! Meni ta sepei luwaru aꞌi papu irosiya ape, peri eite au teꞌerowata. Sepei luwaru aꞌi lai meni pokoweyei tawesiye ape, nihe lo au petanerowata.” 22 Sosu aꞌi pe taꞌuwe hereiyei ta iyape, Owane Sitewi lo wesi tosowe. Taꞌuwe hereiyei ape lo nowe henerai tepaꞌasiye. Lu taune werese Owane Sitewi lo wesi maꞌe Jerusalem sahe nowe ape marepi tote tawesiyei ne taꞌuwerai.g 23 Nowe ape se naretei aꞌi ne. Sosu Jisas Owane Sitewi lo wesi sahe Solomon lo aise perei maꞌe uweiye. 24 Juda lo lu owane tamo Jisas maꞌe siyeyei ne taꞌuwerai. Sosu lowe le maꞌe teꞌe toweriye, “Ne nomo maꞌe amerame aꞌi fa au teꞌere! Ne meni, Owane Sitewi lai hi maꞌe eimawe arosaiyei ne ariariyeye ape, apou aꞌi Krais awere? Ne peri amerame aꞌi nomo maꞌe itiyaꞌu au teꞌere!” 25 Sosu Jisas lowe maꞌe itiyaꞌu eiye, “Ane fene maꞌe au teꞌe tepaꞌasiye. Fene peri ano wanuwe awere? Ahowa, fene peri ano wanu tote tawesirowata. Wiyawi erasi pefine aꞌi, ane irowe ape, Owane Sitewi Tai Pefine aꞌi ano lo iyape se ane lai irowe. Wiyawi erasi pefine aꞌi ape ano ane ne amerame aꞌi au teꞌe areiye tepaꞌasiye. 26 Ahowa, fene werese fe sipsip ano taꞌame ne. Serai fene wiyawi erasi pefine aꞌi ano siyeye su, fene ane ne tote tawesi taꞌame. 27 Fe sipsip werese ano peri noꞌu ano wanuwewe, ane maꞌe umasisiya. Ane fe sipsip werese ano siya soꞌoruwesiya tene! 28 Sosu ane lowe werese maꞌe marepi hepene heꞌi aꞌi aurowa. Serai lowe mi mi pasi pasi weriyei ironamitorowa. Lowe mi mi pasi pasi temeniyerowata. Lu tamo lowe ereti ano sahe ani tepaꞌasi anirowata.h 29 Owane Sitewi Tai Pefine aꞌi ano lu taune werese ano ane maꞌe au tepaꞌasiye. Le aꞌi lai lu werese hi ani fu araro tepaꞌasiye. Lu tamo lu feni ano Tai Pefine aꞌi lo ereti sahe ani tepaꞌasi anirowata. 30 Ane sosu Owane Sitewi Tai Pefine aꞌi ano notosi taꞌi aꞌi henerai ne. Notosi marepi taꞌi aꞌi ne. Notosi wiyawi taꞌi aꞌi taꞌanesiya.”
31 Sosu aꞌi pe Juda lo lu peri ape lo wanuwe su, lowe tapiye le maꞌe ani fusawiyei ne toteye. 32 Sosu Jisas itiyaꞌu eiye, “Ane fene maꞌe wiyawi erasi pefine aꞌi tamo Owane Sitewi Tai Pefine aꞌi ano maꞌe fai ape, au atuatuwe. Piye wiyawi ano fene ane maꞌe tapiye se ani fusawiyei awere?” 33 Sosu Juda lo lu le maꞌe itiyaꞌu eiye, “Wiyawi erasi no nomo tapiye ne maꞌe ani fusawiyei taꞌama. Ahowa, ne meni aꞌi ne. Marepi no apou aꞌi totesiya, ‘Ane Owane Sitewi aiwawe aꞌi ne!’ Ne Owane Sitewi maꞌe au teꞌe naruwe. Serai marepi sitewi ape nomo ne maꞌe tapiye ani fusawiyei.”i 34 Sosu Jisas itiyaꞌu eiye, “Tu naifa weriyei, lu tamo Owane Sitewi lo peri wanunamiteye. Yo peri fene lo sahe lowe ne apou leseteye,
‘Owane Sitewi lowe maꞌe eiye, fene ane aiwawe aꞌi ne.’ Sng 82:6
35-36 Owane Sitewi lai ane maꞌe ariariyeye, sosu le ane hi awei maꞌe eimawe arosai. Serai ane lai Owane Sitewi lo meni eime au teꞌesiya su, marepi fene lo apou aꞌi totesiya. ‘Le Owane Sitewi maꞌe au teꞌe naruwe.’ Owane Sitewi lo peri wawero aꞌi au teꞌerowata. Ahowa, Owane Sitewi lo peri wiyeme aꞌi tene! Fene Owane Sitewi lo peri wanure! Owane Sitewi lai apou eiye, ‘Lu eite mo Owane Sitewi aiwawe aꞌi ne.’ Serai ane apou eiye su, ‘Ane Owane Sitewi lo meni eime ne.’ Fene marepi ape owe ape totere! ‘Ane Owane Sitewi maꞌe au teꞌe naruwe.’ Ane Owane Sitewi maꞌe au teꞌe naru taꞌame. 37 Peri ano wanure! Wiyawi erasi pefine aꞌi ano ne, ane Owane Sitewi Tai Pefine aꞌi ano lo wiyawi taꞌane taꞌame su, fene ane ne owe ape wanu tote tawesire. 38 Ahowa, ane Owane Sitewi Tai Pefine aꞌi lo wiyawi taꞌaneyei su, sosu fene ane ne fa wanu tote tawesire. Fene peri ano tote tawesi taꞌame su, fene wiyawi erasi ano fa siyere. Fene wiyawi ano siyeyei su, serai fene etiri ape siye soꞌoruwe tepaꞌasiye. Apou aꞌi soꞌoruweyei ape ne, Tai Pefine aꞌi ano lai ane papu irosiya. Sosu aiwawe ane lai Tai Pefine aꞌi ano papu irosiya.”j 39 Serai Juda lo lu Jisas maꞌe ai marepi totenamiteye. Sosu lowe le maꞌe ereti tame anite tawesiyei ne toteye. Ahowa, le eresene aꞌi lu taune werese mase fareyare fi. Sosu lowe le siye taꞌame.
40 Sosu aꞌi pe Jisas Owane Sitewi lo wesi arunati fiyewe, le Saꞌi Mai Jordan feni eire maꞌe fi. Saro ahe tu naifa meni Jon lu taune tamo saꞌi au huteye. Pani ape sahe Jisas saro iroteye.k 41 Sosu lu taune tomu neꞌese le maꞌe taꞌuwerai. Lowe le ne apou teꞌeye. “Meni ape Jon lai wiyawi erasi pefine aꞌi aiwawe aꞌi iro taꞌame. Ahowa, Jon lo peri werese Jisas ne wiyeme aꞌi tene!” 42 Sosu omo ape sahe lu taune tomu neꞌese Jisas lo peri wanu tote tawesi umasiye.