Lasarus temeniyeye.
11
Sosu aꞌi pe meni ta iyape Lasarus, omo Betani iroteye ape, u tahe erasi aꞌi yaꞌoreye. Omo Betani sahe Lasarus, einei hesi aiwawe aꞌi iroteye. Lowesi lo iyape Maria, taune paꞌise lo Marta.a 2 Tu naifa Maria, Jisas lo lowe saꞌi heneri se au ani teineye. Sosu le mato towe lo Jisas lo lowe au ani teine foroꞌoweye.b 3 Sosu Lasarus u tahe erasi aꞌi su, taune einei hesi Jisas maꞌe peri ta ausawi. Lowesi apou eiye, “Meni Owane, kaiyemo no u tahe erasi aꞌi lai yaꞌoresiya. Ne le ne marepi erasi aꞌi tote wawesiyesiya.” 4 Sosu Jisas peri eite wanuwe su, le apou eiye, “Lasarus lo u tahe au temeniyerowata. U tahe se ape Owane Sitewi lo iyape ei ani aroweyei. Sosu aiwawe Owane Sitewi lo meni eime lo iyape ei ani aroweyei.”c 5 Sosu Jisas lai taune einei hesi Maria, Marta, Lasarus aiwawe aꞌi marepi erasi aꞌi tote wawesiyenamiteye. 6 Sosu Jisas Lasarus lo u tahe ne wanuwe su, le nowe poweiye hesi aꞌi omo ape sahe onuteye. 7 Nowe poweiye hesi aꞌi i tepaꞌasiye su, le lu disaipel lo maꞌe apou eiye, “Nomo omo Betani pani Judia sahe tame iyei.” 8 Lu disaipel lo le maꞌe eiye, “Atuatu siye meni, lu Juda ne maꞌe tapiye se ani fusawiyei ne totesiya. Ne si tame iyei awere?” 9 Sosu Jisas itiyaꞌu eiye. “Nomo le maꞌe iyei ne. Nowe tewi aꞌi ereti feni hesi lowe hesi aꞌi (12) poweiye taꞌi sahe irosiya. Lu taune tamo poweiye lo mi aꞌi uweisiya su, lowe ato ninapunerowata. Lowe poweiye lo mi siyeye su, serai lowe ninapunerowata. Ane awei sahe irosiya su, ane Owane Sitewi Tai Pefine aꞌi ano lo wiyawi pei anite. 10 Ahowa, lu taune tamo pasi aꞌi iteyei su, mi werese ariye. Serai lowe ato ninapune winetaiyei. Ane aꞌi lai mi pefine aꞌi ne. Lu taune tamo ane maꞌe umasiyei su, ane lowe maꞌe mi pefine aꞌi auwei. Sosu lu taune ta ane ne wanu tote tawesiyei taꞌama su, lowe ato ninapuneyei. Lowe temeniyeyei aiwawe aꞌi ne.” 11 Sosu le peri ape tepaꞌasiye su, moꞌo le lu disaipel lo maꞌe apou eiye, “Kaiyemo nomo lo Lasarus nihe howei tepaꞌasiye. Sosu ane le maꞌe iyei. Serai ane le maꞌe ani eisowe sineyei ne iyei.” 12 Lu disaipel lo le maꞌe teꞌeye, “Meni Owane, le nihe howeisiya su, le aꞌi faraꞌu eisowe sineyei. Sosu u tahe lo faraꞌu heneraiyei.” 13 Jisas lo marepi si apou aꞌi toteye, “Meni ape Lasarus, temeniye tepaꞌasiye.” Ahowa, lu disaipel lo marepi sitewi apou toteye, Lasarus lai nihe howeisiya. 14 Sosu serai Jisas lowe maꞌe au teꞌe areiyeye. “Lasarus temeniyeye. 15 Lasarus temeniyeye su, nomo sato ahe onusiya. Ane fene ne marepi wisere aꞌi ne. Serai fene ane ne fu tote tawesire. Meni Lasarus temeniye taꞌame su, fene kairefiyeyei ano siye taꞌame. Sosu nomo le maꞌe iyei ne.” 16 Sosu Tomas, iyape tereꞌe Didimus, lu feni tereꞌe tamo maꞌe eiye, “Nomo le mase iyei. Sosu le temeniyeyei su, nomo le mase aiwawe aꞌi temeniyeyei.”dKrais marepi hepene lo sitewi ne.
17-18 Sosu aꞌi pe Jisas lu disaipel lo aiwawe aꞌi omo Betani maꞌe fi. Omo Betani, Jerusalem maꞌe atahe aꞌi ne. Lowe omo Betani heneri su, Lasarus fisiye yo papu poweiye hesiyo hesiyo i tepaꞌasiye. 19 Sosu Juda lo lu taune tomu neꞌese einei hesi aꞌi maꞌe taꞌuwerai. Lowe lowesi maꞌe metare lowesi lo ne marepi fetane aꞌi auwei ne fai. 20 Sosu menitani Marta apou aꞌi wanuwe, “Jisas aiyesiya.” Serai le Jisas maꞌe yo mai sahe siyeri. Sosu menitani Maria wesi papu onunamiteye. 21 Sosu Marta Jisas maꞌe eiye, “Owane, ne tu fai su, metare ano temeniye taꞌame. 22 Etiri eite ane soꞌoruwe tepaꞌasiye. Ne Owane Sitewi maꞌe etiri ta au ei toweriyei su, Owane Sitewi lai ne maꞌe marepi no auwei.” 23 Sosu Jisas le maꞌe eiye, “Metare no si tame taꞌane norohuwe hene ani sinerowa.” 24 Sosu Marta le maꞌe eiye, “Wiyeme aꞌi ne. Nowe yeꞌewi su, le si tame taꞌane norohuwe hene ani sinerowa. Ane soꞌoruwesiya!”e 25 Sosu Jisas itiyaꞌu eiye, “Ane aꞌi lai lu taune werese maꞌe hene anirowa. Sosu aiwawe ane aꞌi lai lowe maꞌe marepi hepene heꞌi aꞌi aurowa. Lu taune tamo ane ne marepi tote tawesiyei su, ane lowe maꞌe marepi hepene heꞌi aꞌi aurowa. Lowe tahe paꞌare lowe lo temeniyeyei su, ane lowe maꞌe marepi hepene heꞌi aꞌi aurowa. Serai lowe mi mi pasi pasi weriyei ironamitorowa. 26 Serai lu taune werese ane ne marepi tote tawesiyei, sosu yo ano umasiyei su, lowe mi mi pasi pasi temeniyerowata. Ne peri ano ape wanu tawesi tepaꞌasiye awere?” 27 Sosu menitani eite le maꞌe itiyaꞌu eiye, “Ei, Meni Owane, ane ne ne marepi tote tawesi tepaꞌasiye. Ne aꞌi lai Krais nomo lo ne. Owane Sitewi lo meni eime tene! Ne aꞌi lai meni eite hi awei maꞌe itorai.”f
Jisas meni Lasarus ne marepi erasi aꞌi lu ewiteye.
28 Sosu aꞌi pe menitani peri ape teꞌe tepaꞌasiye su, le wesi topo lo fi. Sosu le Maria maꞌe eresene aꞌi apou eiye, “Atuatu siye meni erasi henerai tepaꞌasiye. Le ne maꞌe ei anisiya.” 29 Sosu le peri eite wanuwe su, le witane aꞌi sineyewe, le maꞌe fi.
30 Sosu aꞌi pe Jisas omo Betani heneri se taꞌama. Marta Jisas arunati su, le yo tewi sahe onuwe. 31 Juda lo lu taune wesi lowesi lo iroteye ape, lowe taune hesi maꞌe marepi fetane aꞌi au teꞌe fetaneyeyei ne fai. Sosu Maria witane aꞌi sineyewe fi su, lowe le siyesawi. Marepi lowe lo apou aꞌi toteye, Maria, Lasarus lo fisiye yo maꞌe uruwei ne fi. Sosu lowe werese le maꞌe moꞌo umasiye. 32 Serai Maria Jisas maꞌe heneri su, le Jisas siyeye. Le Jisas lowe maꞌe apeꞌi onuwe sosu eiye, “Owane, ne tu fai su, metare ano temeniye taꞌame.” 33 Serai Jisas Maria lo uruwei siyeye. Le Juda lo lu taune werese aiwawe aꞌi siyeye su, hepene lo orese aꞌi irowe. Sosu marepi lo tote luwe. 34 Sosu Jisas apou eiye, “Lasarus lo fisiye yo eiwerou maꞌe irosiya awere?” Sosu lowe le maꞌe itiyaꞌu eiye, “Ne siyenara.” 35 Sosu Jisas luteye. 36 Lu Juda Jisas siyeye su, lowe apou eiye, “Siyere! Le meni eite maꞌe marepi erasi aꞌi tote wawesiyenamiye.” 37 Ahowa, lu tamo apou eiye, “Meni eite meni ta, nihe pokowe tawesi ape, nihe petaneye. Le tu fai su, le meni eite u tahe lo au taꞌane faraꞌuweye awere? Serai le temeniye taꞌame.”g
Jisas lai Lasarus si tame taꞌane norohuwe sineye.
38 Serai Jisas marepi orese erasi aꞌi irowe. Sosu le fisiye maꞌe fi. Fisiye lo tapiye yo tepi owe. Lowe tahe paꞌare papu fuwe su, tapiye erasi yo maꞌe noweri aine heꞌeye. 39 Sosu Jisas lowe maꞌe eiye, “Tapiye nowerisawire.” Sosu Marta Lasarus lo einei, le maꞌe eiye, “Owane, arure! Meni eite poweiye hesiyo hesiyo temeniye tepaꞌasiye. Tahe paꞌare lo uwase tepaꞌasiye. Heneri luwaru aꞌi heneraiyei.” 40 Sosu Jisas le maꞌe eiye, “Tu ane ne maꞌe au teꞌe tepaꞌasiye. Ne ane ne marepi tote tawesiyei su, ne Owane Sitewi lo kairefiyeyei siyerowa.” 41 Sosu lowe fisiye yo sahe tapiye ani nowerisawi. Sosu Jisas niꞌarawe hire maꞌe aute siyeye. Le apou eiye, “Owane Sitewi Tai Pefine aꞌi ano ne peri ano wanu tepaꞌasiye. Serai ane ne maꞌe au teꞌe wisereyesiya. 42 Wiyeme aꞌi. Ne mi mi pasi pasi werese peri ano wanunamisiya. Ane soꞌoruwesiya! Owane Sitewi Tai Pefine aꞌi lu taune tomu neꞌese saro ahe teisiya. Serai ane ne maꞌe au teꞌe wisereyesiya. Lowe wiyawi ano siyeye su, lowe ane ne tote tawesiyei. Sosu ne ane maꞌe hi awei maꞌe eimawe arosai. Lowe etiri werese eite mo siye soꞌoruweyei.” 43 Sosu Owane Sitewi maꞌe teꞌe tepaꞌasiye su, le peri erasi aꞌi uteye, “Lasarus, ne nowe maꞌe aiya.” 44 Sosu meni ape, temeniyeye ape, hepene lo norohuwe sineyewe, fisiye yo nowe maꞌe henerai. Le ipari tahe se ereti lowe tahe paꞌare werese ani noweri ti tawesiye mase fai. Nihari lo ipari tahe se noweri napetuwe.
Lu owane tamo Jisas ne aine teraꞌeyei ne teꞌe naneiye.
45 Sosu aꞌi pe Juda lo lu taune tamo, Maria maꞌe marepi fetaneyeyei ne fai ape, lowe Jisas lo wiyawi erasi pefine aꞌi siyeye su, lowe le ne tote tawesiye.h 46 Ahowa, Juda lo lu tamo lu Farisi maꞌe si tame fi. Sosu lowe lu Farisi maꞌe etiri werese, lowe siyeye ape, au teꞌeye.i
47 Sosu aꞌi pe au heseyei lu owane tamo, lu Farisi tamo lowe werese taꞌuwerai. Sosu lowe taꞌu apou aꞌi teꞌe tiyatiteye. Nomo piye irowei awere? Meni ape wiyawi erasi ironamisiya. 48 Le wiyawi erasi pefine aꞌi lo taꞌaneye su, lu taune werese le maꞌe marepi tote tawesi umasirowa. Sosu le lu taune werese lo meni owane wiyeme aꞌi heneraiyei. Sosu Rom lo lu owane ai atu tomu neꞌese Jerusalem maꞌe eimawesaiyei. Sosu lowe Owane Sitewi lo wesi aine tapeti towesiyei. Serai lowe kairefiyeyei nomo lo hi ani ararowei. 49 Sosu meni ta iyape Kaiafas, le nowe eite sahe au heseyei meni owane tutawe aꞌi ne. Le lowe maꞌe au eiye, “Marepi fene lo meremereyeye. 50 Nomo meni ape aine teraꞌeyei su, Rom lo ai atu lu tomu neꞌese Juda lo lu taune werese maꞌe aine teraꞌeyei taꞌama. Meni ape temeniyeyei su, le nomo werese maꞌe au pati aniyei. Serai nomo faraꞌu aꞌi teinamiyei.” 51 Peri eite meni Kaiafas au teꞌeye ape le marepi lo se au teꞌeye taꞌama. Nowe ape se le au heseyei meni owane tutawe iroteye su, le Owane Sitewi lo marepi se lowe maꞌe au teꞌeteye. Owane Sitewi lo marepi si apou aꞌi toteye. Jisas lu taune werese ne au temeniyeyei. 52 Sosu Jisas temeniyeyei su, le Juda lo lu taune werese ne au temeniyeyei. Sosu aiwawe aꞌi le lu taune werese ne omo tereꞌe tereꞌe maꞌe au temeniyeyei. Sosu le Owane Sitewi lo eime werese aꞌi le maꞌe ani taꞌuwerai.j 53 Sosu Juda lo lu owane taꞌu teꞌe tiyatiteye. Lowe Jisas maꞌe aine teraꞌeyei ne toteye.k
54 Serai Jisas peri lowe lo wanuwe su, le Juda lo lu taune mase amerame aꞌi uwei taꞌame. Ahowa, le omo tereꞌe maꞌe fi. Le omo pani ariye aꞌi atahe maꞌe iyape omo Efraim. Omo eite sahe le lu feni aiwawe ironamiteye. 55 Sosu Juda lo taꞌuwe hereiyei wiyeme aꞌi iyape Pasova henerai. Sosu lu taune tomu neꞌese, omo tereꞌe tereꞌe maꞌe fai ape, omo Jerusalem maꞌe taꞌuwerai. Lowe taꞌu werese aseyaro irowei ne fai. Serai lowe faraꞌu taꞌuwe hereiyei ene ateye. 56-57 Serai lu Farisi, sosu au heseyei lu owane marepi lowe lo apou aꞌi toteye, nomo Jisas siyeyei su, nomo le maꞌe ereti se anite tawesiyei. Sosu lowe lu taune werese maꞌe, omo Jerusalem maꞌe taꞌuwerai ape, apou eiye, “Lu taune tamo Jisas siyeyei su, fene witane aꞌi nomo maꞌe au teꞌera.” Sosu lu taune werese Owane Sitewi lo wesi sahe Jisas maꞌe nehitiye. Lowe apou teꞌe toweriye, “Jisas taꞌuwe hereiyei aiyeyei awere?” Marepi nomo lo apou aꞌi toteye, Ahowa, le taꞌuwe hereiyei maꞌe aiyerowata.