Maria Jisas lo lowe sahe saꞌi heneri aꞌi au huwe.
12
Poweiye ereti feni werese feni taꞌi aꞌi (6) iroteyei su, sosu moꞌo taꞌuwe hereiyei Pasova heneraiyei. Nowe eite se Jisas omo Betani maꞌe fi. Saro ahe Jisas Lasarus, temeniyeye ape, si tame taꞌane norohuwe hene sineye.a 2 Le lu feni aiwawe taune hesi lo wesi si tame fi. Lowesi Jisas ne ene a au taꞌuwe naneiteye. Lasarus Jisas mase ene ateye. Menitani Marta ayei werese lowe maꞌe au nonetaiye.b 3 Sosu Jisas onuwe su, menitani Maria saꞌi heneri wisere aꞌi Jisas lo lowe sahe ani teroso fuwe. Saꞌi heneri wisere aꞌi maꞌaru tomu neꞌese eteye. Sosu Jisas lo lowe ani teroso fuwe su, menitani lo mato towe ani teineye. Sosu saꞌi heneri ape wesi papu werese au perati fiyariye.c 4 Ahowa, Jisas lo meni disaipel ta iyape Judas Iskariot. Nowe meꞌiye su, le Jisas ne Juda lo lu Owane maꞌe henetiyei. Le Jisas maꞌe ei toweriye, 5 “Saꞌi eite maꞌaru tomu neꞌese eteye. Nomo maꞌaru (300) faraꞌu aniyei. Serai nomo maꞌaru eite lu taune maꞌaru ariye aꞌi se lowe maꞌe au nonetiyei.” 6 Serai le peri eite au teꞌeye su, marepi sitewi lo apou toteye, le lu taune werese maꞌaru ariye aꞌi se ne marepi tote taꞌame. Ahowa, le taꞌarei siye meni ne. Le maꞌaru paꞌare ereti lo se au noweinoweiye. Le eresene aꞌi maꞌaru tamo taꞌarei aninamiteye. 7 Serai Jisas apou eiye, “Aru! Ne le ne owe ape teꞌere! Ne saꞌi eite owe ape etere. Ahowa, menitani eite ane ne marepi erasi aꞌi tote wawesiyenamisiya. Le saꞌi heneri ape lowe ano maꞌe ani terosowe su, le temeniyete ano marepi totesiya.d Serai tahe paꞌare ano tu ani fu tepaꞌasiye. 8 Fene maꞌaru ta lu taune maꞌaru ariye aꞌi se auwei ne totesiya su, lowe mi mi werese sato irosiya. Fene ane maꞌe etiri ta au irowei su, fene witane se fa au irore. Piyene awere? Ane nowe oso aꞌi su, omo hire maꞌe wiyei. Serai fene ane siyerowata.”eLu owane tamo meni Lasarus aine teraꞌeyei ne toteye.
9 Sosu aꞌi pe Juda lo lu taune tomu neꞌese, omo Betani maꞌe fai ape, Jisas ne wanuwe. Sosu lowe werese Jisas, Lasarus aiwawe, siyeyei ne fai. Lasarus temeniyeye su, Jisas le hepene se si tame hene ani sineye. 10 Ahowa, au heseye lu owane tamo Lasarus ne teꞌe tiyatiyei ne taꞌuwerai. Lowe Jisas, Lasarus aiwawe aꞌi aine teraꞌeyei ne toteye. 11 Piyene awere? Juda lo lu taune tomu neꞌese Lasarus lo peri ne wanuwe su, serai lowe Juda lo yaꞌariyei lo yo seni arunatirowawe, Jisas lo yo seni umasinamiteye.f
Jisas fe donki hire sahe omo Jerusalem papu onu wiye.
12 Nowe taꞌi meꞌiye su, lu taune tomu neꞌese Jerusalem maꞌe taꞌuwe hereiyei ne taꞌuwerai. Lowe Jisas ne Jerusalem maꞌe heneri ape, wanuwe su, 13-15 Lowe siye towe patiye aine tou aniye. Sosu Jisas fe donki lo yene siye nehiye su, le fe donki hire maꞌe onuwe. Tu naifa weriyei meni taꞌi apou leseye,
“Jerusalem lo lu taune werese taweiru sawa! Siyere! Meni Owane tutawe fene lo fe donki hire maꞌe onutaisiya.” Sng 118:25-26
Serai lu taune werese, Jerusalem maꞌe taꞌuwerai ape, lowe Jisas yo sahe siye tiyatiye. Lowe Jisas siyenarai su, lowe siye towe patiye ani fayatoweye. Sosu peri erasi uteye.
“Nomo werese meni owane tutawe lo iyape ei ani arote. Le aꞌi lai Owane Sitewi wiyeme aꞌi lo iyape se aiyesiya. Owane Sitewi wiyeme aꞌi lai le maꞌe au pati anire. Le aꞌi lai Israel lo meni owane tutawe tene!” Sek 9:9
16 Sosu aꞌi pe Jisas lo lu disaipel werese siyeteye su, lowe eti werese soꞌoru taꞌama. Sosu meꞌiye su, Jisas temeniyeyei, sosu si tame norohuwe hene aniyei su, lowe etiri eite mo marepi tote tawesiye. Peri werese le ne tu naifa weriyei leseteye ape, le wiyeme aꞌi iroteye. Sosu lowe marepi tote tawesiyei. Lowe Jisas maꞌe, etiri eite mo au irowe ape, lowe marepi tote tawesiyei.g 17 Jisas meni Lasarus fisiye yo maꞌe au sineye su, lu taune tomu neꞌese Jisas ne au teꞌe fiyariye. Lu taune ape mo Jisas maꞌe yo sahe taꞌuwerai. 18 Lu taune werese Jisas lo wiyawi erasi pefine aꞌi ape ne wanuwe su, serai lowe Jisas yo sahe siye tiyatiyei ne fai. 19 Lu Farisi taꞌu apou teꞌe tiyatiye, “Siyere! Lu taune werese Jisas lo iyape ei ani arowesiya. Sosu le maꞌe umasisiya. Nomo peri lowe lo einamirowata.”
Grik lo lu tamo lai Jisas siyereme.
20 Sosu aꞌi pe lu tewi tereꞌe pani Grik maꞌe fai ape, lowe omo
Jerusalem maꞌe taꞌuwe hereiyei irowei ne taꞌuwerai. Lowe Owane Sitewi maꞌe au teꞌe wisereyeyei ne fai. 21 Lu eite mo lu feni ta iyape Filip maꞌe teꞌe toweriyei ne fai. Filip lo omo sitewi Betsaida pani Galili maꞌe fai. Lowe le maꞌe teꞌe toweriye, “Kaiyemo, nomo meni Jisas siyeyei ne fai. Le sato irosiya awere?” 22 Sosu Filip peri lowe lo wanuwe su, le Andru maꞌe au teꞌeye. Sosu lowesi Jisas maꞌe peri eite teꞌeyei ne fi. 23 Sosu Jisas lowesi maꞌe itiyaꞌu eiye, “Nowe ano ane temeniyeyei ne ataheyewa. Owane Sitewi lai iyape ano ei ani aroweyei. Ane meni hire maꞌe itorai ape ne.h 24 Peri ano wiyeme aꞌi ne. Wanure! Fene kewi so yehe sameyei ne iyei su, kewi so eite hi awei papu maꞌe uwaseye. Kewi so uwaseye su, wamu lo awei perati wiye. Sosu loꞌu tomu neꞌese taꞌerowa. Sosu kewi so uwase taꞌame su, so ape aiwawe aꞌi ironamitorowa. Serai ane lai pei temeniyete. Kewi so aiwawe aꞌi ne. Ane temeniyeyei su, ane lu taune tomu neꞌese Owane Sitewi maꞌe hene taꞌuwerairowa.i 25 Lu taune tamo marepi towafi lowe lo erasi aꞌi tote wawesiyenamiyei su, lowe mi mi pasi pasi teinamirowata. Sosu lu taune tamo yo seni ano umasiyei. Sosu etiri werese, awei iroteye ape, meꞌiyeni atati arunatiyei su, lowe marepi hepene heꞌi aꞌi mi mi pasi pasi weriyei teinamitorowa.j 26 Lu taune tamo wiyawi ano taꞌaneyei su, lowe yo seni ano fa umasite. Lowe yo seni ano umasiyei su, ane lowe mase iroteyei. Ane omo hire maꞌe iyei su, lowe ane aiwawe aꞌi iroteyei. Lu taune tamo wiyawi ano taꞌaneyei su, Owane Sitewi Tai Pefine aꞌi ano iyape lowe lo maꞌe ei ani aroweyei.”
Lu taune werese lai Krais ne ei ani arowete.
27 Sosu aꞌi pe Jisas peri teꞌenamiye, “Pereye hepene ano orese aꞌi tene! Ane marepi hesi aꞌi totesiya. Piye yo ane umasi awere? Owane Sitewi Tai Pefine aꞌi ano, ne ane nowe eite se fa aweraꞌiyenatire. Serai ane fofowei erasi owe ape teriteyei. Ahowa, Owane Sitewi Tai Pefine aꞌi ano maꞌe owe ape ei towerirowata. Ane hi awei maꞌe fofowei erasi teriteyei ne fai.k 28 Owane Sitewi Tai Pefine aꞌi ano, ane fofowei erasi teriteyei su, ne lai iyape no ei ani arore.” Sosu Jisas peri eite au teꞌeye su, peri noꞌu hire maꞌe fai ape apou eiye, “Ane mi mi pasi pasi weriyei iyape ano ei ani aronamiteye. Sosu aiwawe aꞌi ane mi mi pasi pasi weriyei iyape ano ei ani arorowa.” 29 Lu taune werese peri noꞌu wanuwe su, lowe apou teꞌe tiyatiye. Lu tamo apou aꞌi teꞌeye. Owane Sitewi lo Hepene wisere aꞌi le maꞌe au teꞌeye. Lu tereꞌe tamo apou eiye, “Ahowa, nomo pesiyei noꞌu erasi aꞌi wanuwe.” 30 Sosu Jisas itiyaꞌu eiye, “Peri noꞌu fene wanuwe ape, ane maꞌe teꞌe taꞌame. Ahowa, Owane Sitewi lai marepi fene lo au kairefiyeyei ne totesiya. Serai fene Owane Sitewi lai ane, ariariyeye ape, siye soꞌoruweyei. 31 Nowe ape se Owane Sitewi lai lu taune werese lo yo seni au heseyei. Serai Owane Sitewi lai awei lo meni owane tutawe aꞌi au ani sasari fusawirowa. 32 Sosu lowe ane awei hire maꞌe hene ani wiyei su, lowe me tapeꞌi ereti lowe ano niꞌari se aine tawesi tawererowa. Sosu ane temeniyeyei su, ane lai lu taune werese ane maꞌe ei taꞌuwe aniyei.”l 33 Sosu Jisas peri ape au teꞌeye su, marepi si lo apou aꞌi toteye, le lu taune werese maꞌe temeniyete lo ne au teꞌe fiyariye.m 34 Sosu lu taune werese le maꞌe itiyaꞌu teꞌe toweriye, “Nomo Owane Sitewi lo yo peri leseye ape, apou wanuwe, ‘Krais mi mi pasi pasi tei ironamirowa.’ Serai ne apou eiye, ‘Meni eite omo hire maꞌe fai ape, lowe le me tapeꞌi sahe hire maꞌe ani sine wiyei.’ Eiwerai meni ape omo hire maꞌe fai awere? Nomo soꞌoru taꞌama.”n 35 Serai Jisas lowe maꞌe itiyaꞌu eiye, “Nowe oso aꞌi iroteyei su, ane aꞌi lai mi erasi aꞌi ne. Ane mi erasi aꞌi su, fene yo seni ano fa uweite. Fene yo seni ano umasiyei su, yo seni luwaru aꞌi werese fene maꞌe napeturowata. Pasi aiwawe aꞌi ne. Lu tamo pasi aꞌi uweiyei su, lowe yo sahe siye uweirowata.o 36 Sosu ane mi erasi aꞌi su, fene ane ne marepi fa tote tawesire. Fene ane ne marepi tote tawesiyei su, ane fene aiwawe nomo werese sato irorowa. Fene lu taune mi erasi aꞌi ironamitorowa ape, heneraiyei.”p
Lu taune tomu neꞌese Jisas ne tote tawesiteye.
Sosu aꞌi pe Jisas peri eite au teꞌe tepaꞌasiye su, le eresene aꞌi aru fareyare natiyewe fi. 37 Jisas wiyawi pefine tomu neꞌese au teꞌe atuatu areiyeye. Ahowa, lu taune tomu neꞌese le ne marepi tote tawesinamirowata. 38 Tu naifa weriyei meni ta iyape Aisaia, Owane Sitewi lo au teꞌe siye meni, le lu ape mo ne apou leseteye,
“Meni Owane Pefine, eiwerai peri nomo lo wanu tote tawesiye awere? Ne wiyawi erasi aꞌi irowe su, lowe wiyawi no siyeye. Ahowa, lowe ne ne marepi tote tawesiye taꞌama.” Ais 53:1
Peri eite ne wiyeme aꞌi ne. 39 Meni Aisaia apou leseye, serai lu taune Jisas ne marepi tote tawesirowata. Sosu meni Aisaia le ne apou tame leseye.
40 “Owane Sitewi lai lu taune tamo nihe pokoweyei tawesi irowe. Le marepi lowe lo tawesi irowe. Serai lowe nihe se siyerowa, lowe siye soꞌoruwerowata. Aiwawe aꞌi lowe marepi se toteyei. Sosu lowe marepi sitewi siye soꞌoruwerowata. Lowe Owane Sitewi lo marepi umasiyei su, Owane Sitewi lai lowe au faraꞌuweyei. Ahowa, lowe Owane Sitewi lo marepi umasi taꞌame. Serai Owane Sitewi lai lowe au faraꞌuwerowata.” Ais 6:1
41 Sosu meni Aisaia peri eite au leseye su, Owane Sitewi Jisas lo kairefiyeyei le maꞌe au atuatuwe. Le aꞌi lai Jisas ne au teꞌeye. 42 Ahowa, lu taune tomu neꞌese Jisas lo peri wanu tote tawesinamiteye. Aiwawe Juda lo lu owane tamo peri lo wanu tote tawesi umasiteyei. Juda lo lu owane, Jisas umasiteye ape, Jisas ne au teꞌerowata. Ahowa, lowe lu Farisi taweiru aꞌi ne. Lowe Jisas ne au teꞌeyei su, lu Farisi lai lowe taꞌuweyei wesi nowe maꞌe ani fusawiyei.q 43 Lu owane ape lo marepi apou aꞌi toteye. Nomo lu werese iyape nomo lo ei ani aroweyei ne toteteye. Owane Sitewi lai iyape nomo lo ei ani arowe taꞌame.r
Jisas lo peri ape lu taune lo yo seni au hese ereirowa.
44 Sosu aꞌi pe Jisas peri erasi uteye, “Wanure! Lu taune ta ane ne marepi tote tawesiyei su, lowe ane ne tote tawesiyei su, lowe ane ne tote tawesiyei taꞌama. Ahowa, lowe Owane Sitewi Tai Pefine aꞌi ano aiwawe aꞌi, ane hi awei maꞌe eimawe arosai ape, lowe le ne marepi tote tawesi umasiyei. 45 Lu taune ta ane siyeyei su, le Owane Sitewi Tai Pefine aꞌi ano aiwawe aꞌi, ane hi awei maꞌe eimawe arosai ape, siyeyei.s 46 Ane, omo hire maꞌe itorai ape, mi erasi pefine aꞌi aiwawe aꞌi itorairowa. Lu taune werese ane ne marepi tote tawesiyei su, lowe pasi aꞌi ironamirowata. 47 Lu taune peri ano wanuwei su, sosu peri ano umasiyei taꞌama. Ane yo seni lowe lo au heseyei taꞌama. Ahowa, ane lu taune werese lo yo seni au heseyei ne fai taꞌama. Ane lu taune werese maꞌe marepi hepene heꞌi aꞌi auwei ne fai.t 48 Lu taune ta ane ne meꞌiyeni maꞌe atati aruwei. Sosu peri ano wanu aniyei taꞌama su, nowe yeꞌewi se peri ano lai yo seni lowe lo maꞌe au heserowa. 49 Ane fene maꞌe au teꞌeye su, ane marepi ano umasi taꞌame. Ahowa, ane peri au teꞌeye su, ane Owane Sitewi Tai Pefine aꞌi ano lo marepi pefine aꞌi au teꞌeye. Le aꞌi lai ane hi awei maꞌe eimawe arosai. Sosu le peri lo ane maꞌe au teꞌeye. Serai ane Tai Pefine aꞌi ano lo peri wanuwe su, ane fene maꞌe peri lo au teꞌe areiyeye. 50 Lu taune tamo Owane Sitewi lo peri wanu tawesiyei su, Owane Sitewi lai lowe maꞌe marepi hepene heꞌi aꞌi mi mi pasi pasi ironamiteyei ape aurowa. Serai ane fene maꞌe au teꞌeyei su, peri ano ane au teꞌesiya ape, Owane Sitewi Tai Pefine aꞌi ano ane maꞌe auwe.”