5 Sosu meni taꞌi iyape Tomas apou ei toweriye, “Meni Owane, nomo omo ne iyei ape soꞌoru taꞌama. Sosu aiwawe aꞌi yo eite ne umasiyei ape, nomo soꞌoru taꞌama. Ne faraꞌu nomo maꞌe yo no ape au teꞌe areiyere.” 6 Sosu Jisas le maꞌe itiyaꞌu eiye, “Ane aꞌi lai yo eite ne. Sosu ane aꞌi lai peri wiyeme aꞌi lo sitewi ne. Sosu ane aꞌi lai marepi hepene wiyeme aꞌi ne. Lu taune ta Owane Sitewi omo hire maꞌe wireme su, le aꞌi lai yo wiyeme aꞌi ano fa umasire. Owane Sitewi maꞌe wiyei su, yo tereꞌe ariye.^b 7 Fene ane ne siye soꞌoruweyei su, fene Owane Sitewi Tai Pefine aꞌi ano ne aiwawe aꞌi siye soꞌoruwe tepaꞌasiyei. Pereye aꞌi fene le ne soꞌoruwe tepaꞌasiye. Sosu fene le siye tepaꞌasiye.”^c

8 Sosu Filip le maꞌe ei toweriye, “Meni Owane, ne Tai Pefine aꞌi no ne nomo maꞌe au teꞌe atuatu areiyere! Serai nomo faraꞌu aꞌi ironamisiya.” 9 Sosu Jisas le maꞌe eiye, “Filip, ne ane ne siye soꞌoru taꞌama awere? Ne ane siye tepaꞌasiye su, ne Owane Sitewi Tai Pefine aꞌi ano ne siye soꞌoruwe tepaꞌasiye. Ane ne mase nowe pitase aꞌi ironamiteye. Ne piye marepi totesiya awere? Ne nomo maꞌe Tai Pefine aꞌi no ne au teꞌe atuatu areiyere!^d 10 Ane fene maꞌe tu naifa au teꞌe areiyeye. Ane Owane Sitewi Tai Pefine aꞌi ano papu ironamisiya. Sosu aiwawe Tai Pefine aꞌi ano ane papu ironamisiya. Fene marepi eite tote tawesisiya awere? Ane fene maꞌe au teꞌesiya su, ane marepi ano umasi taꞌame. Ahowa, ane Tai Pefine aꞌi ano lo marepi wanu umasisiya. Serai ane fene maꞌe Owane Sitewi lo marepi au teꞌesiya. Tai Pefine aꞌi ano ane papu ironamisiya su, le aꞌi lai wiyawi lo ane se au taꞌanesiya.^e 11 Fene ane ne apou fa tote tawesire. Ane Owane Sitewi Tai Pefine aꞌi ano papu ironamisiya. Sosu aiwawe aꞌi Tai Pefine aꞌi ano ane papu ironamisiya. Fene peri eite marepi tote tawesi taꞌame su, fene Owane Sitewi Tai Pefine aꞌi ano lo wiyawi siyeyei su, fene ane ne marepi fa tote tawesire.^f 12 Peri ano wiyeme aꞌi ne. Wanure! Ane fene maꞌe au teꞌesiya. Ane Owane Sitewi Tai Pefine aꞌi ano maꞌe wiyei. Ane Tai Pefine aꞌi ano wiyei su, ane fene maꞌe kairefiyeyei lo auwei. Lu taune tamo ane ne marepi tote tawesiyei su, lowe wiyawi erasi pefine aꞌi, ane taꞌaneye ape, lowe aiwawe aꞌi taꞌaneyei. Ei, le wiyawi erasi pefine aꞌi taꞌaneyei. Wiyawi lo, wiyawi ano hi ani ararowei. Piyene awere? Ane Tai Pefine aꞌi ano maꞌe kairefiyeyei lo fene maꞌe ausaiyei ne wiyei.^g 13 Fene etiri ta iyape ano se ane maꞌe teꞌe toweriyei su, ane etiri ape fene maꞌe auwei. Serai ane lai Owane Sitewi Tai Pefine aꞌi ano lo iyape ei ani aroweyei.^h 14 Fene etiri ta iyape ano se ane maꞌe teꞌe toweriyei su, ane lai etiri ape fene maꞌe aurowa.

15 Fene ane ne marepi erasi aꞌi tote wawesiyenamisiya su, fene peri ano wanu umasiyei.ⁱ 16 Sosu ane Owane Sitewi Tai Pefine aꞌi ano maꞌe fene ne ei toweriyei. Serai le aꞌi lai Hepene Waraꞌi lo fene maꞌe hi awei maꞌe eimawe itoraiyei. Le fene maꞌe ani pati aniyei ne itoraiyei. Le itoraiyei su, le fene mase mi mi pasi pasi weriyei ironamirowa.^j 17 Le lai peri werese werese wiyeme aꞌi ne. Lu taune werese, awei lo yo peri umasisiya ape, lowe Owane Sitewi lo Hepene Waraꞌi aꞌi anirowata. Serai lowe le maꞌe siye anirowata. Ahowa, le fene papu ironamisiya. Serai fene le ne siye soꞌoruwesiya tene!^k

18 Ane fene arunatiyei su, fene atauwe aiwawe aꞌi henerairowata. Ane fene maꞌe si tame aiyeyei. 19 Nowe meꞌiye oso aꞌi su, ane fene arunatiyei. Serai lu taune awei lo yo umasiye ape, lowe ane ne si tame siyerowata. Ahowa, fene ane siyenamiyei. Ane temeniyeyei su, Owane Sitewi lai ane ne si tame taꞌane norohuwe hene ani sineyei. Serai ane mi mi pasi pasi hepene se ironamiyei. Sosu aiwawe aꞌi fene hepene se mi mi pasi pasi weriyei ironamirowa. 20 Nowe ape sahe fene apou ani soꞌoruweyei, ane aꞌi lai Owane Sitewi Tai Pefine aꞌi ano papu ironamisiya. Fene lai ane papu ironamiyei. Sosu aiwawe aꞌi ane fene papu ironamiyei.^l 21 Lu taune ta peri werese ano wanu umasiyei su, le ane ne marepi erasi aꞌi tote wawesiyenamisiya. Lu taune ta ane ne marepi erasi aꞌi tote wawesiyenamisiya su, Owane Sitewi Tai Pefine aꞌi ano le ne marepi erasi aꞌi tote wawesiyenamisiya. Serai ane lai le ne marepi erasi aꞌi tote wawesiyenamisiya. Sosu ane le maꞌe marepi ano au teꞌe atuatuwei.” 22 Sosu meni tereꞌe Judas, meni ape Judas Iskariot taꞌame, le maꞌe ei toweriye, “Owane ne peri no nomo maꞌe amerame aꞌi au teꞌe atuatuwei. Sosu nomo ne siyeyei. Lu taune, awei lo yo umasiye ape, ne piyene ne lowe maꞌe amerame aꞌi au teꞌe atuatu taꞌame awere?” 23 Sosu Jisas le maꞌe itiyaꞌu eiye, “Lu taune ta ane ne marepi erasi aꞌi tote wawesiyenamisiya su, lowe peri werese ano wanu umasiyei. Sosu Owane Sitewi Tai Pefine aꞌi ano lowe ne marepi erasi aꞌi tote wawesiyenamiyei. Notosi lowe maꞌe aiyeyei su, notosi lowe mase ironamiteyei. 24 Lu taune ane ne meꞌiyeni maꞌe atati arunatiyei su, le peri ano ape umasi taꞌame. Peri ano eite fene wanusiya su, peri ano ape se taꞌame. Ahowa, Owane Sitewi Tai Pefine aꞌi ano, ane hi awei maꞌe eimawe arosai ape, peri lo ape ne.^m

25 Ane fene mase irosiya su, ane peri eite fene maꞌe au teꞌesiya. Nowe meꞌiye su, ane fene arunatirowawe, omo hire maꞌe wiyei. 26 Owane Sitewi lo au pati taꞌane siye meni, Owane Sitewi lo Hepene Waraꞌi, Owane Sitewi lai iyape ano se hi awei maꞌe eimawe arosaiyei. Fene maꞌe itoraiyei su, le fene maꞌe etiri werese au teꞌe atuatuwei. Peri werese, ane fene maꞌe au teꞌeye ape, le marepi fene lo maꞌe si tame au teꞌerowa. Serai fene peri werese ano marepi tote tawesiyei. 27 Ane hire maꞌe wiyei su, peri ano, ane fene maꞌe au teꞌeteye ape, lowe fene maꞌe marepi fetane aꞌi auwei. Marepi fetane aꞌi ano heꞌi aꞌi ne. Awei lo lu werese marepi fetane aꞌi areare au teꞌeteyei. Ane fene maꞌe marepi fetane wawero aꞌi auwei wou taꞌame. Fene marepi orese aꞌi owe ape totere! Sosu aiwawe aꞌi fene marepi owe ape atoweiyere. 28 Ane fene maꞌe apou au teꞌeye su, ‘Ane feni yaro iyei, sosu ane si tame aiyeyei,’ Fene peri ano wanuwe. Fene ane ne marepi erasi aꞌi tote wawesiyeyei su, fene marepi apou aꞌi totesiya. ‘Le Owane Sitewi Tai Pefine aꞌi lo hire maꞌe wiyei.’ Fene marepi apou aꞌi totesiya su, fene marepi se au teꞌe nineꞌisiya. Fene etiri eite mo siye soꞌoruwesiya. Owane Sitewi Tai Pefine aꞌi ano erasi aꞌi ne. Ane kairefi erasi lo unahi irosiya.ⁿ 29 Peri ape ane fene maꞌe au teꞌesiya ape, peri ape henerai taꞌama. Nowe meꞌiye su peri ape wiyeme aꞌi heneraiyei su, fene peri ape marepi wanu tote tawesiyei.^o 30 Nowe ano atahe aꞌi heneraiyei, awei meni owane pefine aꞌi, iyape sepei Satan, aiyesiya. Serai ane fene maꞌe peri tomu neꞌese au teꞌerowata. Awei meni owane pefine aꞌi ane maꞌe ai marepi totenamisiya, sosu ane maꞌe aine teraꞌeyei ne toteyei. Le lai etiri ta marepi lo se ane maꞌe irorowata. 31 Ahowa, ane Owane Sitewi Tai Pefine aꞌi ano lo marepi wiyeme aꞌi fa umasiyei. Tai Pefine aꞌi ano ane maꞌe peri ta au teꞌeye. Serai ane peri lo wanu umasiyei. Ane peri lo umasiyei su, ane Tai Pefine aꞌi ano ne marepi erasi aꞌi tote wawesiyenamisiya ape, lu taune werese maꞌe au teꞌe atuatuwei. Serai lowe werese siye soꞌoruweyei. Ane lai Tai Pefine aꞌi ano ne marepi erasi aꞌi tote wawesiyenamisiya. Sinere! Nomo iyei ne.”