Jisas wafei wou aꞌi ne, nomo wafei nei wou aꞌi ne.
15
1\f + \fr 15:1 \ft Jisas lo nowe se, Lu taune werese wain saꞌi anamiteye. Lowe wafei lo so pereꞌe aꞌi aine towesiye. Sosu saꞌi ape ani ateye.\f* Jisas lu disaipel lo maꞌe apou teꞌeye, “Ane wain saꞌi wafei wiyeme aꞌi ne. Owane Sitewi Tai Pefine aꞌi ano wain saꞌi wafei au noweinoweisiya. 2 Wafei nei werese so taꞌesiya su, Owane Sitewi Tai Pefine aꞌi ano tewi aꞌi touwei. Le wafei nei aine touwei su, wafei nei heꞌi aꞌi so tomu neꞌese taꞌeyei. Sosu aiwawe wafei nei werese so taꞌeyei taꞌama su, Owane Sitewi Tai Pefine aꞌi ano wafei nei aine tou aniyei yehe maꞌe fu arowei.a 3 Ane peri anowe lo marepi si apou aꞌi au tote teꞌesiya. Fene wafei nei wou aꞌi ne. Fene peri ano wanu umasiyei su, fene marepi hepene amerame aꞌi heneraiyei. Owane Sitewi lai yo seni luwaru aꞌi fene lo aine tou fusawiyei. 4 Fene ane papu fa irore. Sosu ane fene papu irosiya. Wafei nei aꞌi lai so taꞌerowata. Ahowa, wafei nei wafei si meni ti nate tawesiyei. Wafei nei wafei si meni ti nate tawesiyei su, wafei nei so faraꞌu taꞌeyei. Fene wou aꞌi ne. Fene ane maꞌe ti nate tawesiyei taꞌama su, fene kairefi aꞌi tei taꞌame. Sosu wiyawi ano taꞌanerowata. 5 Ane wafei si meni ne. Fene wafei nei ne. Lu taune ta ane papu irowei. Sosu ane le papu irowei su, le wiyawi erasi ano irowei. Fene ane maꞌe ti nate tawesiyei taꞌama su, fene wiyawi ano taꞌanerowata. 6 Lu taune ta ane papu iro taꞌame su, Owane Sitewi lai le maꞌe ani fusawiyei. Wafei nei ariye wou aꞌi ne. Wafei nei ariye aꞌi aine tou ani lotowei. Sosu wafei nei foroꞌoweyei su, le yehe ti leiyei. Serai lowe yehe ti seroꞌo tepaꞌasiyei.b 7 Fene ane papu irosiya su, sosu peri ano marepi fene lo papu ironamisiya su, fene Owane Sitewi maꞌe marepi fene lo ne au ei toweriyei. Sosu le peri fene lo wanuwei. Sosu marepi fene lo au irowei. 8 Fene ane sahe nate tawesinamiyei su, fene Owane Sitewi Tai Pefine aꞌi ano lo iyape ei ani aroweyei. Lu taune yo seni fene lo siyeyei su, lowe apou toteyei. ‘Lu taune eite mo lowe Jisas lo lu feni ne.’c 9 Owane Sitewi Tai Pefine aꞌi ano ane ne marepi erasi aꞌi tote wawesiyenamisiya. Ane fene ne aiwawe aꞌi marepi erasi aꞌi tote wawesiyenamisiya. Sosu ane fene ne mi mi pasi pasi weriyei marepi erasi aꞌi tote wawesiyenamirowa. Fene marepi ano se ironamire. 10 Ane Owane Sitewi Tai Pefine aꞌi ano lo peri wanu umasisiya su, ane Owane Sitewi Tai Pefine aꞌi ano lo marepi se ironamisiya. Sosu aiwawe fene peri ano wanu umasiyei su fene marepi ano se ironamiyei.d 11 Ane peri eite ano, ane fene maꞌe au teꞌe tepaꞌasiye ape, marepi wisere aꞌi ano fene papu ironamisiya. Serai marepi wisere aꞌi fene lo erasi aꞌi heneraiyei.”Fene lu feni ano tote wawesiye tiyatite.
12 “Peri ano ape ane fene maꞌe au teꞌesiya. Wanu umasire! Ane fene ne marepi erasi aꞌi totenamisiya su, serai fene taꞌi taꞌi marepi erasi aꞌi fa tote wawesiyenamite!e 13 Fene meni ta marepi erasi aꞌi tote wawesiyeyei su, yo seni fene lo ape wisere aꞌi ne. Meni ta marepi toteyei su, ane kaiyemo mo ano ne temeniyeyei. Yo seni ape wisere pefine aꞌi tene!f 14 Fene peri ano wanu umasiyei su, fene kaiyemo mo wiyeme aꞌi ano ne.g 15 Ane fene maꞌe wiyawi yahowaꞌi siye lu iyape fene lo ei teꞌe taꞌame. Wiyawi yahowaꞌi siye meni le wiyawi owane lo marepi tote soꞌoru taꞌama. Ahowa, ane fene maꞌe iyape apou eiye, ‘Kaiyemo mo.’ Owane Sitewi Tai Pefine aꞌi ano lai peri werese lo ane maꞌe au teꞌesiya. Sosu ane Tai Pefine aꞌi ano lo peri wanuwe su, ane peri lo fene maꞌe au teꞌe areiyeye. 16 Fene ane maꞌe fai su, fene marepi towafi fene lo umasi taꞌame. Ahowa, ane fene yo ano umasiyei ne ariariyeye. Fene yo ano umasiye su, ane wiyawi ano irowei ne ei aniye. Fene lu taune werese maꞌe peri ano fa au teꞌe fiyarire. Lowe yo ano umasiyei su, lowe kairefi aꞌi mi mi pasi pasi weriyei tei ironamitorowa. Fene wiyawi ano ironamiyei su, fene Owane Sitewi Tai Pefine aꞌi ano maꞌe marepi fene lo ne au teꞌe toweriyei. Fene iyape ano se au teꞌe toweriyei. Fene iyape ano se au teꞌe toweriyei su, Tai Pefine aꞌi ano lai etiri ape, marepi fene lo ne auwei. 17 Ane fene maꞌe au teꞌesiya. Fene peri ano fa wanu umasite. Fene lai lu feni taꞌi taꞌi aꞌi marepi erasi aꞌi fa tote wawesiye tiyatinamite.”h
Lu taune neꞌese Krais lo lu feni ne ai marepi totesiya.
18 “Lu taune werese awei sahe irosiya ape, lowe ai marepi erasi aꞌi fene maꞌe totenamisiya su, peri ape wiyeme aꞌi ne. Lowe tu ane maꞌe ai marepi erasi aꞌi totenamiye. 19 Fene awei lo yo umasiyei su, lu taune werese, awei irosiya ape, fene maꞌe marepi erasi aꞌi tote wawesiyenamiyei. Fene yo ano umasisiya su, awei lo lu taune werese fene ne ai marepi erasi aꞌi tote wawesiyenamisiya. Piyene awere? Fene awei lo yo seni werese arunatiyewe, yo ano umasinamisiya.i 20 Lu tamo ane maꞌe au luwaruweyei su, lowe fene maꞌe aiwawe aꞌi au luwaruweyei. Lu taune tamo peri ano wanu umasiyei su, lowe peri fene lo aiwawe aꞌi wanu umasiyei. Peri ano tote tawesinamite. Tu ane fene maꞌe apou au teꞌeye. Wiyawi yahowaꞌi siye meni lai wiyawi owane lo marepi unahi irosiya.j 21 Ahowa, lowe Owane Sitewi Tai Pefine aꞌi ano ane ne, hi awei maꞌe eimawesai ape, soꞌoru taꞌama Serai lowe fene maꞌe au luwaruwesiya. Lowe apou totesiya. Nomo Jisas lo lu feni maꞌe au luwaruweyei su, nomo Jisas maꞌe au luwaruweyei. 22 Sosu ane peri ano lowe maꞌe au teꞌeye taꞌame su, lowe yo seni luwaru aꞌi lo marepi tote tawesi taꞌame. Ahowa, ane lowe maꞌe faiyewe, peri ano au teꞌe fiyariye su, lowe peri ano wanu umasi taꞌame. Lu taune eite ne lowe yo seni luwaru aꞌi irowei su, serai lowe peri ape wou teꞌerowata. ‘Meni ape nomo maꞌe yo seni luwaru aꞌi nomo lo ne au teꞌe fiyariyei taꞌama. Aiwawe aꞌi, meni ape nomo maꞌe yo wisere aꞌi au atuatuwe taꞌama. Ahowa, ane lai lowe maꞌe peri ano au teꞌe areiyeye. Sosu lowe ane meꞌiyeni maꞌe atati aruwei.’ 23 Lu taune tamo ane maꞌe ai marepi erasi aꞌi totenamisiya su, lowe Owane Sitewi Tai Pefine aꞌi ano maꞌe aiwawe aꞌi ai marepi erasi aꞌi totenamisiya.k 24 Ane fai su, ane wiyawi erasi pefine aꞌi taꞌaneye. Lu werese wiyawi erasi aꞌi irowe wou taꞌame. Lowe werese wiyawi ano siyeye. Ahowa, lowe yo seni luwaru aꞌi ironamisiya. Ahowa, lowe ane siye tepaꞌasiye. Aiwawe aꞌi lowe wiyawi ano siye tepaꞌasiye. Sosu lowe peri ano wanu umasi taꞌame. Serai lowe ane maꞌe ai marepi erasi aꞌi totenamisiya. Lowe Owane Sitewi Tai Pefine aꞌi ano maꞌe aiwawe aꞌi ai marepi erasi aꞌi totenamisiya. 25 Ai marepi lo yo seni lowe totenamisiya ape, meni taꞌi Owane Sitewi lo peri tu naifa au leseye. Owane Sitewi lo peri ape apou aꞌi leseye,
‘Lowe ane maꞌe ai marepi erasi aꞌi totenamisiya. Marepi sitewi se taꞌame.’” Sng 35:19; 69:4
Hepene Waraꞌi aꞌi hi awei maꞌe itorairowa.
26 “Ane Owane Sitewi lo Hepene Waraꞌi, Owane Sitewi Tai Pefine aꞌi ano maꞌe fai ape, fene maꞌe eimawesaiyei. Le peri wiyeme aꞌi hepene ne. Le fene maꞌe aiyeyei su, le fene maꞌe au pati aniyei. Le lu taune werese maꞌe ane ne au teꞌe fiyariyei.l 27 Sosu ane wiyawi ano ani taꞌaneye su, fene ane mase mi mi werese ironamiteye. Serai fene ane ne lu taune werese maꞌe fa au teꞌe fiyarite!”