16
“Pereye ane peri werese ano fene maꞌe au teꞌesiya su, serai fene marepi kairefi aꞌi teinamiyei. Lu tamo fene maꞌe au luwaruwesiya. Serai nomo Jisas lo yo arunatiyei. Ahowa, fene marepi eite owe ape totere! Fene kairefiyeyei ano se yo werese ano fa umasite. 2 Fene ane umasiyei su, Juda lo lu owane fene maꞌe Owane Sitewi lo wesi nowe maꞌe ani fusawiyei. Lowe lu feni ano maꞌe aine teraꞌeyei su, lowe marepi apou aꞌi toteyei, ‘Nomo lu taune ape mo aine teraꞌeyei su, nomo Owane Sitewi lo wiyawi au irowei.’ Wawero aꞌi tene!a 3 Lowe lai Owane Sitewi Tai Pefine aꞌi ano notosi soꞌoruwe taꞌame su, lowe lu feni ano maꞌe au luwaruweyei.b 4 Ane fene mase ironamisiya su, ane peri ape mo fene maꞌe au teꞌesiya. Nowe oso aꞌi su, ane fene arunatiyei. Serai ane peri ape fene maꞌe fu au teꞌeyei. Sosu lowe etiri luwaru aꞌi fene maꞌe au irowei su, fene peri ano marepi tote tawesiyei.”Owane Sitewi lo Hepene Waraꞌi aꞌi lo wiyawi.
5 “Tu naifa Owane Sitewi Tai Pefine aꞌi ano, ane hi awei maꞌe eimawesai. Sosu nowe oso aꞌi su ane Tai Pefine aꞌi ano maꞌe si tame wiyei. Serai fene werese ane maꞌe apou teꞌe toweri taꞌama. ‘Ne eiwerou maꞌe iyei awere?’ 6 Ane fene maꞌe peri ape au teꞌeye su, fene peri ano wanuwe. Fene wanuwe su, marepi fene lo orese aꞌi tote napetu tawesisiya. 7 Ane peri wiyeme aꞌi fene maꞌe au teꞌesiya. Ane fene maꞌe arunatiyei su, fene ne au wisereyeyei. Ane Owane Sitewi Tai Pefine aꞌi ano maꞌe iyei su, ane fene maꞌe Owane Sitewi lo Hepene Waraꞌi hi maꞌe eimawesaiyei. Ane wi taꞌame su, Owane Sitewi lo Hepene Waraꞌi aꞌi fene maꞌe itorairowata.c 8 Sosu le hi awei maꞌe itoraiyei su, le lu taune werese maꞌe yo seni luwaru aꞌi lowe lo au atuatuwei. Le lowe maꞌe yo seni waraꞌi aꞌi au atuatuwei. Le lowe maꞌe Owane Sitewi yo seni lowe lo au heseyei ape au atuatuwei. 9 Le yo seni luwaru aꞌi ne au atuatu fiyariyei. Lu taune tamo ane ne tote tawesi taꞌame su, Owane Sitewi lo Hepene Waraꞌi aꞌi yo seni luwaru aꞌi lowe lo au atuatu areiyerowa. 10 Le yo seni waraꞌi lowe maꞌe au atuatuwei. Le lowe maꞌe apou eiye, ‘Jisas me tapeꞌi sahe temeniyeyei su, le yo seni wisere aꞌi irowei. Le Owane Sitewi Tai Pefine aꞌi lo si tame iyei su, lu taune werese Jisas lo yo seni wisere aꞌi siyeyei. Sosu Jisas si tame iyei su, lu taune werese le maꞌe siyeyei taꞌama.’ 11 Le au heseyei lo seni lowe maꞌe au atuatuwei. Hepene waraꞌi aꞌi lowe maꞌe apou au teꞌeye. ‘Lu taune tamo Jisas aine teraꞌeyei su, Owane Sitewi lai awei owane wiyeme, Satan, maꞌe au heseyei. Serai sepei Satan, omo yehe maꞌe mi mi pasi pasi weriyei ironamitorowa.’d 12 Ane peri tomu neꞌese fene maꞌe pei au teꞌeyei. Ahowa, marepi fene lo tote aniterowata.e 13 Sosu peri wiyeme siye Hepene aiyeyei su, le peri wiyeme werese aꞌi fene maꞌe au teꞌe atuatuwei. Le fene maꞌe au teꞌeyei su, le marepi lo umasiyei taꞌama. Ahowa, Owane Sitewi Tai Pefine aꞌi ano peri lo le maꞌe au teꞌesiya. Tai Pefine aꞌi ano lo peri ape, Hepene Waraꞌi aꞌi lo wanunamisiya ape, le fene maꞌe au teꞌeyei. Etiri tomu neꞌese awei sahe henerai taꞌama. Hepene Waraꞌi aꞌi itoraiyei su, le etiri eite mo fene maꞌe au teꞌe atuatuwei. 14 Le peri werese ano fene maꞌe au teꞌe fiyariyei su, wiyawi ape se le iyape ano ei ani aroweyei. 15 Owane Sitewi Tai Pefine aꞌi ano lo etiri werese ane maꞌe auwe. Serai ane Owane Sitewi Tai Pefine aꞌi ano lo marepi werese aꞌi wanu soꞌoruwe tepaꞌasiye. Ne Hepene Waraꞌi aꞌi maꞌe etiri ano eite mo au teꞌeyei su, le lai fene maꞌe peri ano au teꞌe areiyeyei.
16 Nowe oso aꞌi su, fene ane siyerowata. Sosu meꞌiye oso aꞌi su, fene ane tame siyeyei.”f
Nowe meꞌiye su, lu disaipel lo nineꞌinamirowa.
17 Lu feni tamo lowe taꞌu apou teꞌe tiyatiye. “Le piye peri teꞌeye awere? ‘Nowe oso aꞌi su, fene ane siyeyei taꞌama. Sosu meꞌiye oso aꞌi su, fene ane tame siyeyei.’ Le peri tereꞌe apou eiye, ‘Ane Owane Sitewi Tai Pefine aꞌi ano maꞌe iyei.’ Le piye peri teꞌesiya awere?” 18 Sosu lowe taꞌu teꞌe tiyatinamiteye, “Piye peri lo au teꞌesiya awere? ‘Nowe oso aꞌi su.’ Marepi si lo piye awere? Nomo marepi si lo soꞌoru taꞌama.” 19 Sosu Jisas marepi lowe lo ani soꞌoruwe tepaꞌasiye. Lowe peri lo ne le maꞌe apou teꞌe toweriyei ne toteye. Sosu Jisas lowe maꞌe ei toweriye, “Ane tu fene maꞌe au teꞌeye su, ‘Nowe oso aꞌi su fene ane siyerowata. Sosu nowe meꞌiye oso aꞌi su fene ane si tame siyerowa.’ Fene peri ano lo marepi si soꞌoru taꞌama awere? 20 Peri ano wiyeme aꞌi. Wanure! Ane fene maꞌe au teꞌeyei. Ane temeniyeyei su, awei lu taune werese marepi wisere aꞌi irowei. Fene temeniyeyei ano ne erasi aꞌi ewiteyei. Fene ane ne marepi orese aꞌi teriteyei. Ahowa, weiya! Nowe meꞌiye su marepi orese aꞌi fene lo marepi nineꞌi aꞌi heneraiyei. 21 Menitani eimane auteiyei su, le fofowei erasi aꞌi teriteyei. Menitani ape fofowei erasi teriteyei su, le marepi orese aꞌi irowei. Sosu menitani eimane autei tepaꞌasiyei su, le fofowei erasi aꞌi ne marepi tote iꞌaneyei. Sosu le marepi wisere aꞌi irowei. Piyene awere? Le meni eime topo lo autei tepaꞌasiyei. 22 Serai ane fene maꞌe teꞌeyei. Pereye fene marepi orese aꞌi teritesiya. Ahowa, ane fene tame siyeyei. Fene ane siyeyei su, marepi fene lo tote nineꞌi teriteyei. Lu taune werese marepi wisere aꞌi fene lo tote ani fusawirowata. 23 Nowe ape se le itoraiyei su, fene ane maꞌe peri ta teꞌe toweriyei taꞌama. Piyene awere? Ane sato ariye. Peri ano wiyeme aꞌi ne. Wanure! Ane fene maꞌe au teꞌeyei. Fene Owane Sitewi Tai Pefine aꞌi ano maꞌe iyape ano se marepi fene lo teꞌe toweriyei su, le aꞌi lai fene maꞌe iyape ano se marepi fene lo auwei.g 24 Tu fene iyape ano se Owane Sitewi Tai Pefine aꞌi ano maꞌe etiri ta teꞌe toweriye taꞌama. Fene le maꞌe iyape ano se teꞌe towerire! Sosu fene marepi fene lo aniyei. Owane Sitewi Tai Pefine aꞌi ano fene maꞌe marepi wisere erasi aꞌi se auwei ne totesiya.
Jisas lai awei lo kairefi ani ararowe.
25 Ane fene maꞌe au teꞌesiya su, ane peri anowe au teꞌesiya. Nowe henerai tepaꞌasiye su, ane peri anowe werese aꞌi au teꞌerowata. Ahowa, ane Owane Sitewi Tai Pefine aꞌi ano ne fene maꞌe au teꞌe areiyeyei. 26-27 Nowe ape se fene etiri ta iyape ano se teꞌe toweriyei. Fene Owane Sitewi Tai Pefine aꞌi ano maꞌe teꞌe toweriyei. Le fene ne marepi erasi aꞌi totenamisiya. Sosu le fene maꞌe marepi fene lo auwei. Ane apou au teꞌe taꞌame. Fene ane maꞌe teꞌe toweriyei. Sosu ane Tai Pefine aꞌi ano maꞌe marepi fene lo ne au ei toweriyei. Ahowa, fene lai Tai Pefine aꞌi ano maꞌe teꞌe towerire.h 28 Ane Owane Sitewi Tai Pefine aꞌi ano maꞌe fai. Le aꞌi lai ane hi awei maꞌe eimawe arosai. Nowe meꞌiye su, ane awei eite tame arunatiyei. Sosu ane Tai Pefine aꞌi ano maꞌe si tame wiyei.” 29 Sosu lu disaipel lo le maꞌe eiye, “Wanure! Pereye ne peri werese au teꞌe areiyesiya. Ne peri anowe au teꞌe taꞌame. 30 Ne etiri werese soꞌoruwe tepaꞌasiye. Nomo peri ape soꞌoruwesiya. Nomo werese ne maꞌe peri werese aꞌi au teꞌe toweri taꞌame. Nomo peri no wanuwe su, nomo ne lai, Owane Sitewi Tai Pefine aꞌi no maꞌe fai ape, wiyeme aꞌi soꞌoruwesiya.” 31 Sosu Jisas lowe maꞌe itiyaꞌu ei toweriye, “Fene ane ne marepi tote tawesisiya awere? 32 Wanure! Nowe ta ataheyewa. Ahowa, nowe ape henerai tepaꞌasiye. Fene werese wesi fene lo maꞌe fiyaritiyei. Fene ane maꞌe arunatiyei. Ane woto aꞌi irowei. Ahowa, ane woto aꞌi iro taꞌame. Owane Sitewi Tai Pefine aꞌi ano ane mase ironamiyei.i 33 Peri werese ape ano ane fene maꞌe au teꞌeye. Fene yo ano umasiyei su, fene marepi fetane aꞌi ani ironamiyei. Fene awei sato ironamisiya su, lowe fene maꞌe au luwaruweyei. Fene marepi kairefi aꞌi totere. Ane lai awei lo yo seni werese aꞌi hi ani araro tepaꞌasiye.”j