Jisas topo le ne Owane Sitewi maꞌe ei toweriteye.
17
Peri ape Jisas lai Owane Sitewi maꞌe au teꞌeteye. Sosu Jisas nihe hire aute siyeyewe, le apou eiye, “Owane Sitewi Tai Pefine aꞌi ano, nowe ano henerai tepaꞌasiye. Ne meni eime no ei ani arowete. Sosu ane, meni eime no iyape no ei ani arowenamiyei. 2 Ne ane maꞌe kairefi pefine aꞌi no auwe. Serai ane lu taune werese au noweinoweiyei. Lu taune werese, ne ane maꞌe ariariye auwe ape, ane lowe werese maꞌe marepi hepene heꞌi aꞌi aurowa. Sosu lowe mi mi pasi pasi weriyei tei ironamirowa. 3 Mi mi pasi pasi weriyei tei ironamirowa. Peri sitewi apou aꞌi teꞌesiya. Lu taune werese marepi no pei soꞌoruwete. Sosu aiwawe aꞌi lowe ane Jisas Krais, ne, ne meni eite hi awei maꞌe eimawe arosai ape, ane ne pei siye soꞌoruwete. Serai lowe werese marepi notosi lo umasiyei su, notosi lowe maꞌe marepi hepene heꞌi aurowa. Serai lowe mi mi pasi pasi weriyei tei ironamirowa.a 4 Ane awei sato ironamiteye su, ane iyape no ei ani arowenamiteye. Ne ane maꞌe wiyawi no auwe. Serai ane wiyawi werese no taꞌane tepaꞌasiye.b 5 Sosu serai ane ne maꞌe au ei toweriyei, Owane Sitewi Tai Pefine aꞌi ano, tu naifa weriyei, nowe awei werese iro taꞌame su, ne ane maꞌe iyape erasi pefine aꞌi auwe. Serai ne iyape erasi pefine aꞌi eite ane maꞌe si tame fa aure. Sosu ne aiwawe aꞌi iyape no fu ei ani arowere.”cJisas lu feni lo ne Owane Sitewi maꞌe au teꞌe toweriye.
6 “Lu taune werese, awei sahe iroteye ape, ne ane maꞌe ariariye auwe ape, ane lowe maꞌe iyape no ne au teꞌe areiyeye. Lu taune werese ape mo lowe werese no no ne. Serai ne lowe werese ane maꞌe auwe. Lu taune werese ape mo, lowe peri werese no tote tawesi umasinamiteye. 7 Serai lu taune werese peri ape apou wanu soꞌoruwe tepaꞌasiye. Etiri werese ne, ane maꞌe auwe ape, etiri ape mo ne maꞌe fai tene! 8 Peri no ne, ane maꞌe au teꞌeteye ape, ane peri ape no lowe maꞌe au teꞌe areiyenamiteye. Sosu lowe peri no wanu soꞌoruweye su, lowe ane ne wanu soꞌoruweye. Ane aꞌi lai ne maꞌe fai. Sosu lowe peri ape apou tote tawesiye, ne ane hi awei maꞌe eimawe arosai. 9 Serai ane lowe ne, ne maꞌe au ei towerisiya. Ane lu taune werese werese ne ne maꞌe au ei towerirowata. Ahowa, ane lowe ne, ane maꞌe ariariye auwe ape, ane lowe ne, ne maꞌe ei towerisiya. Lowe werese ape mo nono ne. 10 Lu taune werese ano ape ne nono ne. Etiri werese no, ano ne. Sosu aiwawe aꞌi etiri werese ano, nono ne. Lowe peri ano umasiye su, lowe iyape ano ei ani aroweye. 11 Nowe ataheyewa, ane awei sahe arunati wiyei. Ane ne maꞌe omo hire maꞌe wiyei. Lowe ape mo awei sahe ironamiyei. Owane Sitewi Tai Pefine aꞌi Waraꞌi aꞌi ano, ne lu taune werese iyape no sahe fa tote tawesire. Iyape no ape ne ane maꞌe auwe. Serai lowe iyape no aniyei su, lowe marepi taꞌi aꞌi tote ironamiyei. Notosi aiwawe aꞌi marepi taꞌi aꞌi ironamisiya. 12 Ane lowe mase ironamiteye su, ane lowe iyape no se anite tawesinamiteye. Iyape no ape ne ane maꞌe auwe. Ane lowe werese tote tawesiyewe, au noweinoweiye. Lu taune werese ape mo mi mi pasi pasi kairefi aꞌi teiteye. Ahowa, meni taꞌi le aꞌi lai omo yehe maꞌe iyei. Le omo yehe iyei su, peri no tu naifa weriyei au teꞌe areiyeteye ape, peri ape wiyeme aꞌi heneraiyei.d
13 Sosu aꞌi pe ane ne maꞌe hire wiyei. Sosu peri ape ano, ane lu taune werese awei sahe iroteye ape, au teꞌe areiyeye. Lowe peri ano wanu umasiyei su, marepi wisere aꞌi ano lowe lire papu iro temeꞌeriyenamirowa. 14 Ane lowe maꞌe peri wiyeme aꞌi no auwe. Sosu lu taune werese awei lo marepi umasiye ape, lowe lu disaipel notosi lo maꞌe ai marepi totenamisiya. Lowe peri no wanu umasiye su, lowe awei lo marepi tote umasiye taꞌama. Ane aiwawe aꞌi, ane awei lo marepi tote umasi taꞌame. 15 Ane ne maꞌe apou ei towerisiya taꞌama. Lu taune werese, awei irosiya ape, ne lowe werese fa hene aitire. Ahowa, ane ne maꞌe apou ei towerisiya, ne lowe werese fa au noweinoweite. Serai sepei luwaru Satan, le marepi hepene lowe lo au luwaruwerowata.e 16 Lowe awei lo marepi umasiye taꞌama. Ahowa, ane aiwawe aꞌi, ane awei lo marepi tote umasisiya taꞌame. 17 Peri no wiyeme aꞌi ne. Serai peri wiyeme aꞌi no se, ne marepi hepene lowe lo aseyaro aꞌi fa au irore. 18 Ne ane hi awei maꞌe eimawe arosai su, ane lowe aiwawe aꞌi lu taune werese maꞌe peri no au teꞌeyei ne eimawesawi.f 19 Sosu ane tahe paꞌare ano ne maꞌe au heseyei. Serai lu feni ano peri wiyeme aꞌi wanu soꞌoruweyei. Lowe peri wiyeme aꞌi wanu soꞌoruweyei. Lowe peri wiyeme aꞌi wanu soꞌoruweyei su, ne marepi hepene lowe lo aseyaro waraꞌi au irowei.”
Jisas lu feni werese lo Tai lo maꞌe teꞌe toweriteye.
20 “Ane ne maꞌe lowe ne au ei toweriyei. Ei, lowe peri no au teꞌe fiyariyei su, lu taune tamo peri no wanu umasiyei. Serai ane lu feni ape mo ne, ne maꞌe au ei toweriyei. 21 Lu feni ape mo lowe notosi lo marepi taꞌi aꞌi umasiyei. Notosi aiwawe aꞌi ne. Ne Owane Sitewi Tai Pefine aꞌi ano ane papu ironamisiya. Sosu ane ne papu ironamisiya. Sosu aiwawe aꞌi, lowe notosi papu ironamisiya. Lu taune werese awei irosiya ape, lowe lu disaipel notosi lo yo seni lowe lo siyeyei su, lowe etiri ta apou ani soꞌoruweyei. Ne aꞌi lai ane hi awei maꞌe eimawe arosai. 22 Sosu ne ane maꞌe iyape erasi aꞌi auwe su, ane lowe maꞌe aiwawe aꞌi iyape no auwei. Sosu lowe iyape no aniyei su, lowe werese marepi taꞌi aꞌi toteyei. Notosi aiwawe aꞌi marepi taꞌi aꞌi totenamisiya.g 23 Ane lowe papu ironamiyei. Sosu ne ane papu ironamiteye. Lowe notosi papu ironamisiya su, lowe marepi hepene lowe lo aseyaro pefine aꞌi heneraiyei. Sosu lu taune werese, awei lo marepi umasiye ape, lu disaipel notosi lo siyeyei su, lowe marepi apou aꞌi toteyei, ‘Owane Sitewi lai meni ape hi awei maꞌe eimawe arosai.’ Sosu ne marepi erasi aꞌi ane maꞌe tote wawesiyenamisiya. Sosu aiwawe, ne lowe werese maꞌe marepi erasi aꞌi totenamisiya.
24 Owane Sitewi Tai Pefine aꞌi ano, marepi ano ane ne maꞌe au teꞌeyei. Lu taune werese, ne ane maꞌe auwe ape, lu taune ape mo ane mase pei ironamite. Lowe ane mase iroteyei su, lowe faraꞌu mi erasi ano siyeyei. Ne aꞌi lai mi erasi ape ane maꞌe auwe. Tu naifa weriyei awei werese henerai se taꞌama su, ne aꞌi lai marepi erasi aꞌi ane maꞌe totenamiteye. 25 Sosu Owane Sitewi Tai Pefine aꞌi waraꞌi aꞌi ano, ne yo seni werese pefine aꞌi ironamiyei. Lu taune werese awei lo marepi umasinamiteye ape, lowe ne soꞌoru taꞌama. Ahowa, ane ne ne pefine aꞌi soꞌoruwenamisiya. Lu feni ano lowe etiri ape apou soꞌoruweye. Ne aꞌi lai ane hi awei maꞌe eimawe arosai. 26 Sosu ane iyape no lowe maꞌe au teꞌe areiyeye. Sosu ane mi mi werese iyape no au teꞌe areiyenamiyei. Ne aꞌi lai ane marepi erasi aꞌi totenamiteye. Marepi erasi no ape lire papu lowe lo ironamirowa. Serai lowe lu taune maꞌe marepi erasi aꞌi tote wawesiye tiyatinamiteyei. Sosu lowe ane aiwawe aꞌi, marepi taꞌi aꞌi heneraiyei. Serai ane ne ne lowe maꞌe au atuatunamiteyei.”