Judas lai Jisas ai atu siye lu maꞌe areare heneti.
18
Sosu aꞌi pe Jisas Owane Sitewi lo maꞌe au teꞌe tepaꞌasiye su, le lu disaipel lo aiwawe aꞌi, lowe saꞌi nepesi, iyape Kidron, feni eire maꞌe fi. Saꞌi nepesi toneri su, lowe awei taꞌi maꞌe fi. Jisas lu disaipel lo aiwawe awei ape papu wiye. 2 Sosu aꞌi pe meni Judas, Jisas maꞌe au areareyei ape, le awei ape soꞌoruweye. Nowe tomu neꞌese Jisas lu feni mase awei ape sahe onu fetaneyenariteye. 3 Sosu Judas Rom lo ai atu siye lu tomu neꞌese, awei ape henetai. Au heseyei lu owane tamo, lu Farisi tamo, lowe wiyawi siye lu tamo ai atu siye lu mase eimawesawi. Lowe ipari meneꞌe, eine, tiye, yehe erei aiwawe aꞌi awei maꞌe aitai. Lowe werese awei maꞌe henerai. 4 Serai Jisas etiri werese, le ne heneraiyei ape siye, soꞌoruwe tepaꞌasiye. Le lowe werese maꞌe fi. Le apou ei toweriye, “Fene eiwerai nehisiya awere?” 5 Sosu lowe le maꞌe itiyaꞌu eiye, “Nomo meni Jisas omo Nasaret maꞌe fai ape nehisiya.” Sosu le itiyaꞌu eiye, “Ane lai ne.” Sosu meni Judas, Jisas maꞌe au areareyei ape, lowe mase teiteye. 6 Serai Jisas lowe maꞌe eiye su, “Ane lai ne.” Lowe peri ape wanuwe. Lowe hepene se suꞌariyewe meꞌiyeni maꞌe awei sahe winetaiye. 7 Sosu Jisas lowe maꞌe tame ei toweriye, “Fene eiwerai nehisiya awere?” Sosu lowe itiyaꞌu eiye, “Nomo meni Jisas omo Nasaret maꞌe fai ape, nehisiya.” 8 Jisas itiyaꞌu eiye, “Ane fene maꞌe au teꞌe tepaꞌasiye. Ane lai ne. Fene ane nehisiya su, fene lu feni ano arosawire.” 9 Peri ape Jisas lai tu au teꞌeye ape, lu tamo ape ne, ane maꞌe auwe ape, ane lowe werese au noweinoweinamiye. Sosu lowe werese mi mi pasi pasi wisere aꞌi ironamiyei.a 10 Sosu Saimon Pita lu werese siyeye su, le ipari meneꞌe pite aꞌi ereti se aniyewe, meni ta lo apaniye eyate feni sahe aine tou laꞌeye. Meni ape au heseyei meni owane pefine lo wiyawi siye meni maꞌe aine tou laꞌeye. Meni eite lo iyape Malkus. 11 Serai Jisas Pita maꞌe eiye, “Ipari meneꞌe pite aꞌi no seni papu fure. Wiyawi ape Owane Sitewi Tai Pefine aꞌi ano lai, ane maꞌe auwe ape, ane pei umasite.”bAi lu tamo lai Jisas meni owane Anas maꞌe heneti.
12 Sosu aꞌi pe Rom lo ai atu siye lu werese, lowe Jisas ereti wafei se ti tawesiye. 13 Lowe Jisas ereti wafei se ti tawesiye su, lowe meni ta iyape Anas maꞌe heneti. Meni ape au heseyei meni owane wiyeme aꞌi lo aite pape. Aite pape lo iyape Kaiafas. Le Owane Sitewi lo wesi meni owane wiyeme aꞌi nowe ape se onuwe. 14 Tu naifa meni ape Kaiafas apou eiye, “Nomo meni ta aine teraꞌeyei su, serai Rom ai atu siye lu tamo nomo werese aine teraꞌe taꞌame.”c
Pita Jisas ne meꞌiyeni maꞌe atati arunati.
15 Sosu aꞌi pe Saimon Pita, meni tereꞌe mase Jisas moꞌo iteye. Meni tereꞌe ape meni owane Kaiafas soꞌoruweteye. Serai ai atu siye lu Jisas Kaiafas lo wesi nepawe maꞌe heneti su, meni ape, Jisas lo yo umasiye ape, le Jisas mase wesi nepawe papu wiye. 16 Ahowa, Pita wesi nowe yo maꞌe teiteye. Sosu meni tereꞌe ape, meni owane Kaiafas soꞌoruweye ape, le yo noweinowei siye menitani maꞌe ei toweriyei ne fi, “Pita faraꞌu wesi papu wiyei awere?” Sosu meni tereꞌe ape, Pita wesi papu hene wiye. 17 Serai menitani ape, yo au noweinoweiteye ape, le Pita maꞌe ei toweriye, “Ne Jisas lo yo umasisiya awere? Piyete awere?” Sosu Pita itiyaꞌu eiye, “Ahowa, ane lai Jisas lo yo umasisiya taꞌama.” 18 Sosu wiyawi yahowaꞌi ani siye lu tamo, Owane Sitewi lo wesi lo wiyawi ani siye lu tamo, lowe tahe naretei aꞌi iroteye. Serai lowe yehe arineye. Sosu lowe yehe atahe aꞌi teiteye su, lowe tahe lowe lo yehe heteye. Sosu Pita aiwawe aꞌi ereti yehe heteye.
Au heseyei meni Owane lai Jisas etiye.
19 Sosu aꞌi pe au heseyei meni owane Jisas maꞌe ei toweriteye, “Lu disaipel no eiwerai awere? Peri no werese lo sitewi piye teꞌesiya awere?” 20 Sosu Jisas le maꞌe itiyaꞌu eiye, “Ane lu taune werese maꞌe nepawe amerame aꞌi maꞌe au teꞌe fiyariteye. Ane mi mi werese Owane Sitewi lo wesi sahe peri ano au teꞌe atuatuteye. Sosu aiwawe aꞌi ane Owane Sitewi lo wesi erasi pefine aꞌi sahe lu taune maꞌe au teꞌe atuatu fiyariteye. Juda lo lu taune werese wesi sahe taꞌuwerai su, ane lowe maꞌe peri eresene aꞌi au teꞌe taꞌame. 21 Ne piyene ane maꞌe ei towerisiya awere? Ne lu taune werese maꞌe, peri ano wanuwe ape, ei towerire. Wanure! Lu taune ape mo lowe peri sitewi ano soꞌoruwesiya.” 22 Sosu meni ta Jisas lo peri ape wanuwe su, le Jisas lo mato ereti se aineye. Le Jisas maꞌe eiye, “Ne Owane Sitewi lo wesi meni owane maꞌe itiyaꞌu apou wou aꞌi owe ape au teꞌere.” 23 Sosu Jisas le maꞌe itiyaꞌu eiye, “Ane peri wawero aꞌi au teꞌeye su, ne faraꞌu peri wawero aꞌi ape au teꞌe fiyariyei. Sosu ane peri wiyeme aꞌi au teꞌeye su, ne piyene mato ano aineye awere?” 24 Serai meni Anas Jisas lo peri wanuwe su, le Jisas ereti wafei se ti tawesiye ape au heseyei meni owane pefine aꞌi, aite pape, Kaiafas maꞌe eimawesawi.
Pita Jisas ne meꞌiyeni maꞌe atati aruwe.
25 Sosu aꞌi pe Saimon Pita tahe lo yehe sahe yehe heteye. Sosu lu tamo le maꞌe eiye, “Ne meni Jisas lo yo umasisiya awere?” Sosu Pita apou eiye, “Ahowa, ane lai meni ape Jisas lo yo umasi taꞌame.” 26 Au heseyei meni owane lo wiyawi yahowaꞌi siye meni, le tahe lo yehe sahe heteye. Le Pita wiyawi siye meni lo apaniye aine tou laꞌeye siyeye. Meni ape wiyawi siye meni lo lu tewi ne. Meni ape Pita apou eiye, “Ne meni Jisas mase awei sahe iroteye. Ane lai ne siyeye.” 27 Serai Pita apou eiye, “Wawero aꞌi ne! Ane meni ape mase iroteye taꞌama.” Sosu Pita peri eite teꞌeye su, irowe kakaruk lai uteye.d
Lu owane tamo lai Jisas Pailat maꞌe heneti.
28 Sosu nowe mitaiyeye su, Kaiafas Jisas ne ei toweri tepaꞌasiye su, Juda lo lu tamo Jisas meni owane Kaiafas arunatiyewe, lowe Jisas Rom lo meni owane lo wesi maꞌe heneti. Juda lo lu tewi Rom lo meni owane lo wesi papu wi taꞌame. Lowe meni owane ape lo wesi papu wiye su, lowe marepi hepene lowe lo unou aꞌi heneraiyei. Serai lowe taꞌuwe hereiyei ene arowata. 29 Sosu lowe meni owane lo wesi henerai su, meni owane eite iyape Pailat, le lowe maꞌe fi. Sosu le wesi nowe maꞌe lowe maꞌe eiye, “Meni ape piye yo seni luwaru aꞌi iroteye awere?” 30 Sosu lowe le maꞌe itiyaꞌu eiye, “Meni ape yo seni luwaru aꞌi iro taꞌame su, nomo ne maꞌe henetairowata. Sosu meni ape yo seni luwaru aꞌi ironamiteye. Serai nomo meni ape ne maꞌe henetai.” 31 Serai Pailat lowe maꞌe eiye, “Fene taꞌu le yo seni fene lo se au hese etire.” Sosu Juda lo lu tamo le maꞌe itiyaꞌu eiye, “Rom lo meni owane tutawe le nomo einamisiya. Serai nomo meni ta aine teraꞌerowata. Eite amou ne!”e 32 Tu naifa Jisas lu disaipel lo maꞌe au teꞌeye, “Lowe ane niꞌari se me tapeꞌi sahe aine tawere tawesiyei.” Serai Juda lo lu apou au teꞌeyei su, peri ape wiyeme aꞌi henerai.f
33 Sosu aꞌi pe meni owane Pailat wesi lo si tame wiye. Le Jisas ei aniye. Le apou ei toweriye, “Ne Juda lo meni owane tutawe aꞌi awere? Piyete awere?” 34 Sosu Jisas le maꞌe itiyaꞌu eiye, “Peri ape no ne, marepi no aꞌi totesiya awere? Meni tereꞌe ta marepi lo ne maꞌe au teꞌeye awere?” 35 Sosu Pailat itiyaꞌu eiye, “Ane Juda lo meni taꞌama. Serai Juda lo lu werese no, lowe lai ne ane maꞌe henetai. Sosu au heseyei lu owane aiwawe aꞌi ne ane maꞌe henetai. Ne piye yo seni luwaru aꞌi iroteye awere?”g 36 Sosu Jisas itiyaꞌu eiye, “Ane awei ape lo meni owane tutawe heneraiyei su, lu feni werese ano ane ne ai atunamiyei. Lowe ane ne ai atunamiyei su, Juda lo lu tewi ane ne maꞌe henetairowata. Ahowa, ane lu taune werese, peri wiyeme aꞌi umasiye ape, au noweinoweisiya.” 37 Serai Pailat Jisas lo peri wanuwe su, le Jisas maꞌe eiye, “Sosu ne meni owane tutawe tene!” Sosu Jisas itiyaꞌu eiye, “Ei, peri no wiyeme aꞌi tene! Ane meni owane tutawe tene! Mai ano ane auteiye su, Owane Sitewi lai meni owane tutawe ane maꞌe ariariyeye. Wiyawi ano lo marepi sitewi apou aꞌi toteye, ‘Ane lu taune werese maꞌe peri wiyeme aꞌi au teꞌe fiyarinamiyei. Lu taune werese peri wiyeme aꞌi umasiyei su, lowe peri noꞌu ano wanu ani soꞌoruweyei.’” 38 Sosu Pailat le maꞌe eiye, “Peri wiyeme aꞌi ne, eite piye awere?”
Pailat Jisas me tapeꞌi sahe eimawesawi.
Sosu aꞌi pe Pailat peri ape teꞌe tepaꞌasiye su, le Juda lo lu tamo maꞌe si tame fi. Sosu le lowe maꞌe eiye, “Meni ape lo yo seni aseyaro aꞌi ne. 39 Sosu ne yo ta irosiya. Yo ape apou aꞌi teꞌeye, nowe taꞌuwe hereiyei heneraiyei su, ane meni taꞌi kalabus wesi sahe nowe maꞌe hene arunatiyei. Marepi ano apou aꞌi totesiya. Ane meni ape fene maꞌe hene au arunatiyei. Le meni owane tutawe Juda lo ne.” 40 Serai lowe peri lo wanuwe su, lowe peri erasi hare uteye, “Ahowa, ne meni ape kalabus wesi maꞌe ani fu arosawire. Ne meni ta iyape Barabas kalabus wesi sahe nowe maꞌe fa hene arunatire.” Meni ape Barabas taꞌarei meni aꞌi ne.