19
Sosu meni Pailat lu taune werese lo peri wanuwe su, le Jisas wesi papu hene wiye. Le ai atu siye lu tamo maꞌe eiye, “Fene wafei tepi tewi ta aiseri. Wafei aniyei su, fene meni ape Jisas lo meꞌiyeni maꞌe ainere.” 2 Ai atu siye lu tamo Jisas wesi lowe lo maꞌe heneti. Lowe wafei tepi tewi se Jisas lo meꞌiyeni maꞌe aineye. Meꞌiyeni maꞌe aineye su, lowe Jisas ipari tahe werese ani arauwewe, sosu ipari tahe loꞌu aꞌi ani asiye. Lowe wafei tohu niꞌari ape se Jisas lo mato sahe au ti atati asi arowe.ab 3 Sosu lowe Jisas ponei sahe au teiteye. Lowe Jisas maꞌe teꞌe naruwe. Lowe lowe uporo apeꞌi onuwewe, le maꞌe eiye, “Siyere! Juda lo meni owane pefine aꞌi tene!” Lowe ereti se nihari lo sahe aineteye. 4 Sosu meni owane Pailat Jisas lu taune werese maꞌe heneti. Le lowe maꞌe eiye, “Siyere! Ane meni eite fene maꞌe heneti. Ane marepi ano fene maꞌe au teꞌeyei. Fene marepi ano fa soꞌoruwere. Ane aꞌi lai Jisas lo yo seni aseyaro aꞌi ironamiteye ape, siyesiya.” 5 Pailat peri tepaꞌasiye su, le Jisas maꞌe ei aniye. Sosu Jisas fai. Serai Jisas lo mato sahe wafei tohu niꞌari se iroteye. Le ipari tahe loꞌu aꞌi ani asinamiteye. Jisas fai su, meni owane Pailat lu taune werese maꞌe eiye, “Siyere! Meni eite lai ne.” 6 Sosu au heseyei lu owane werese, lu tereꞌe meni owane Jisas siyeye su, lowe peri erasi hare uteye, “Meni eite me tapeꞌi sahe aine teraꞌere. Me tapeꞌi sahe aine teraꞌere!” Sosu Pailat lowe maꞌe eiye, “Ane le papu yo seni luwaru aꞌi siye taꞌame. Serai ane me tapeꞌi sahe aine teraꞌerowata. Fene taꞌu meni ape aine teraꞌeyei ne henetire.” 7 Sosu Juda lo lu owane le maꞌe itiyaꞌu eiye, “Yo nomo lo taꞌi irosiya. Jisas tu naifa apou eiye, ‘Ane aꞌi lai Owane Sitewi lo meni eime ne.’ Serai le peri ape au teꞌeye su, yo nomo lo apou aꞌi teꞌesiya, ‘Fene meni ape fa aine teraꞌere.’” 8 Sosu meni owane Pailat peri ape wanuwe su, le marepi erasi aꞌi tote atoweiyeye. 9 Le wesi lo si tame wiye su, le Jisas maꞌe ei toweriye, “Ne eiwerou maꞌe fai awere?” Ahowa, Jisas le maꞌe peri itiyaꞌu teꞌe se taꞌame.c 10 Serai Pailat le maꞌe eiye, “Ne piyene ane maꞌe itiyaꞌu au teꞌe taꞌame awere? Ane meni erasi tene! Ane kairefi erasi aꞌi irosiya. Ane lowe maꞌe au teꞌeyei su, faraꞌu meni ape ani fu arosawire. Sosu aiwawe ane faraꞌu ne me tapeꞌi sahe aine teraꞌeyei. Etiri ape ne lai fa ani soꞌoruwere.” 11 Sosu Jisas le maꞌe itiyaꞌu eiye, “Owane Sitewi lai awei lo lu owane werese kairefiyeyei auwe. Owane Sitewi lai ne meni owane heneraiyei ne ariariye taꞌama su, ne yo ape umasirowata. Serai ne ane aine teraꞌeyei su, ne seni luwaru aꞌi irowei. Ahowa, meni ape lai ane ne maꞌe henetai ape, le yo seni luwaru erasi aꞌi irowe.”d 12 Sosu meni owane Pailat Jisas lo peri wanuwe su, le Jisas marepi erasi aꞌi se arosawiyei ne toteye. Ahowa, Juda lo lu werese peri erasi hare uteye, “Ne meni ape arosawiyei su, meni owane Sisar ne maꞌe ai marepi toteyei. Aiwawe aꞌi ne meni Sisar lo marepi umasiyei taꞌama. Meni ta meni owane tutawe heneraiyei ne totesiya su, le owane Sisar maꞌe ai atuwei.”e13 Serai meni owane Pailat peri lowe lo wanuwe su, le Jisas lowe maꞌe henetai. Le me toꞌu lo, yo seni au heseyei ape, onuteye. Me toꞌu ape sahe tapiye potu erasi aꞌi iroteye. Hibru lo peri apou aꞌi teꞌesiya, “Gabata.” 14 Poweiye ape se lu taune werese taꞌuwe hereiyei lo etiri au taꞌuwerai. Nowe poweiye ponei aꞌi. Sosu Pailat Juda lo lu werese maꞌe eiye, “Siyere! Meni owane tutawe fene lo ne!” 15 Lu werese peri wanuwe su, lowe peri erasi hare uteye, “Meni eite henetire. Ne le me tapeꞌi sahe aine teraꞌere. Meni eite henetire!” Sosu Pailat lowe maꞌe eiye, “Ane meni owane tutawe fene lo me tapeꞌi sahe aine teraꞌeyei awere?” Sosu au heseyei lu owane werese le maꞌe itiyaꞌu eiye, “Ahowa, meni owane tutawe nomo lo Sisar aꞌi tene!” 16 Serai meni owane Pailat peri lowe lo wanuwe su, le Jisas lowe maꞌe au heneti. Serai lowe Jisas me tapeꞌi sahe aine teraꞌeyei ne toteye.
Jisas me tapeꞌi sahe aine teraꞌe temeniyeye.
17 Serai lowe Jisas hene aniye su, lowe omo Jerusalem nowe maꞌe heneti. Lowe me tapeꞌi Jisas lo iyoꞌo sahe fuwe. Serai Jisas me tapeꞌi lo omo nowe maꞌe suteti. Le me tapeꞌi lo omo ta hire maꞌe, iyape, Mato Paꞌare lo Omo, suteti. Hibru lo peri apou aꞌi teꞌesiya, Golgota. 18 Jisas omo tu paꞌare heneri su, lowe ipari tahe werese ani arauwe. Sosu lowe Jisas me tapeꞌi sahe niꞌari se ereti lowe aine tawere tawesiye. Lowe lai lu hesi tereꞌe mase me tapeꞌi sahe aine tawere towesi teraꞌeye. Meni taꞌi ai feni maꞌe ti tawere tawesiye. Meni taꞌi opi feni maꞌe me tapeꞌi sahe aine tawere tawesi teraꞌeye. Jisas ponei aꞌi me tapeꞌi sahe aine tawere tawesiye. 19 Sosu Pailat peri tamo one towe sahe leseye. Peri ape apou aꞌi leseye,
Jisas, Nasaret lo meni, Juda lo meni owane tutawe
Le lese tepaꞌasiye su, le one towe ape me tapeꞌi sahe aine tawere tawesiye. 20 Serai Pailat peri ape leseye su, Juda lo lu taune tomu neꞌese peri ape siye teꞌeteye. Omo ape Jisas me tapeꞌi sahe aine teraꞌeye ape, omo Jerusalem atahe aꞌi ne. Serai lu taune tomu neꞌese omo ape sewiyeyei ne fi. Peri ape, Pailat leseye ape, peri Hibru, Rom lo peri, Grik lo peri sahe leseye. 21 Sosu au heseyei meni owane tutawe aꞌi peri ape siyeye su, lowe Pailat maꞌe eiye, “Ne owe ape lesere, ‘Juda lo meni owane tutawe aꞌi ne.’ Ahowa, ne apou aꞌi fa lesere, ‘Le apou eiye, ane lai Juda lo meni owane tutawe ne.’” 22 Pailat lowe maꞌe eiye, “Peri ano, ane leseye ape, ane lese tepaꞌasiye.”
23 Sosu aꞌi pe ai atu siye lu Jisas me tapeꞌi sahe aine teraꞌeye su, lowe Jisas lo ipari tahe werese ani erauwiye. Tewi hesiyo hesiyo ani erauwiye. Sosu lowe ai atu siye lu hesiyo hesiyo ani nonetiye. Sosu Jisas lo ipari tahe tereꞌe, unahi iroteye ape, ipari tahe wisere aꞌi ne. Ipari tahe lo hetene ite tiyati taꞌame. Ipari tahe werese ape taꞌi aꞌi tiye. 24 Serai lowe taꞌu teꞌe tiyatiye, “Nomo ipari tahe eite ani erauwiyei taꞌama. Nomo tapiye oso ani fu arowei. Nomo tapiye oso aꞌi fu arowei su, meni ta lo nihari siyeye su, ipari tahe lo meni ape lai aniyei.” Tu naifa Owane Sitewi lo au teꞌe siye meni taꞌi apou leseye,
“Lowe ipari tahe ano lowe taꞌu au nonetiye. Sosu ipari tahe tereꞌe unahi irosiya ape, lowe tapiye fusawi aniyei.” Sng 22:18
Serai ai atu siye lu tapiye fusawi su, peri ape wiyeme aꞌi henerai. 25 Serai ai atu siye lu tapiye fusawi su, taune tamo me tapeꞌi atahe aꞌi teiteye. Lowe Jisas me tapeꞌi sahe siyeyei ne fai. Jisas lo mai, mai lo einei, Maria, Klopas lo tani, sosu Maria, omo Makdala maꞌe fai ape, lowe Jisas atahe aꞌi teiteye.f 26 Sosu Jisas lai mai lo, lu feni ta, iyape Jon, lowesi aiwawe aꞌi siyeye. Meni ape, Jisas lai marepi erasi aꞌi tote wawesiyenamiteye ape, Jisas lowesi siyeye su, le mai lo maꞌe eiye, “Menitani, meni eime no siyere!”g 27 Sosu le meni disaipel lo, Jon, maꞌe eiye, “Ne Siyere! Ne mai ano au noweinoweite!” Serai meni ape Jon Jisas lo mai wesi lo heneti. Sosu le Jisas lo mai au noweinoweinamiteye.
Jisas temeniyeye.
28 Sosu Jisas peri lo ape teꞌe tepaꞌasiye su, Jisas apou toteye, “Wiyawi werese ano tepaꞌasiye.” Peri werese, Owane Sitewi lo au teꞌe siye lu werese leseye ape, wiyeme aꞌi henerai tepaꞌasiye. Serai Jisas apou eiye, “Ane saꞌi wawe teriteye.”h 29 Sosu Jisas peri ape teꞌeye su, saꞌi paꞌare wain saꞌi uwaseye ape, iroteye. Meni taꞌi ipari tahe tewi aꞌi saꞌi paꞌare papu fuwe. Wain saꞌi ipari tahe ape sahe nate aniye. Sosu le me nei, iyape hisop, hire maꞌe tiye. Ti tepaꞌasiye su, le Jisas lo ahi maꞌe fuwe.i 30 Jisas wain saꞌi uwaseye ape, aye su, le apou eiye, “Etiri werese tepaꞌasiye.” Sosu le mato epeꞌe ararowewe, hepene lo fi.
Ai lu ta Jisas lo watipi feni maꞌe ti se tewiye.
31 Sosu aꞌi pe Juda lo lu owane, meni owane Pailat maꞌe ei toweriye, “Nowe ape se nomo taꞌuwe hereiyei lo etiri werese taꞌuwerai. Serai pereye nomo lu lo tahe paꞌare werese me tapeꞌi sahe fu hene ani itorai. Lu tahe paꞌare lowe lo aperi nowe amou me tapeꞌi sahe irorowata. Eite amou ne. Serai ne lowe lo lowe aine towesire. Ne lowe lowe lo aine towesiyei su, lowe witane aꞌi temeniyeyei. Lowe werese temeniyeye su, nomo faraꞌu ani itoraiyewe, fisiye yo ani fuwei.”j 32 Serai meni owane Pailat ai atu siye lu tamo me tapeꞌi maꞌe eimawesawi. Lowe henerai su, lowe meni ai feni lo lowe aine towesiye. Sosu lowe meni opi feni lo lowe aine towesiye. Lu hesi ape Jisas mase me tapeꞌi sahe temeniyeye. 33 Lowe Jisas maꞌe henerai su, lowe Jisas hepene fi ape siye tepaꞌasiye. Serai lowe Jisas lo lowe aine towesiye taꞌama. 34 Ahowa, ai atu siye meni taꞌi ti se Jisas lo tahe feni maꞌe ereti se tewiye. Le ti niꞌari aniye su, saꞌi waraꞌi, fisaꞌi aiwawe aꞌi nowe maꞌe henerai. 35 Ane lai Jon etiri werese ape mo siyeyewe, lu taune werese maꞌe au teꞌe fiyariye. Peri ape ano ane fene maꞌe au teꞌeyei ape, wiyeme aꞌi tene! Peri ano wawero aꞌi taꞌama. Ane siye soꞌoruwe tepaꞌasiye. Lu taune tamo peri ano wanuwei su, lowe faraꞌu Jisas ne tote tawesi umasiyei.k 36 Tu naifa weriyei Owane Sitewi lo au teꞌe siye meni ta one towe sahe apou leseye,
“Lowe paꞌare werese lo aine towesi taꞌame.” Sng 34:20
Serai lowe Jisas me tapeꞌi sahe aine teraꞌeye su, ai atu siye lu Jisas lo paꞌare aine towesi taꞌame. Serai peri ape tu naifa weriyei leseye ape wiyeme aꞌi henerai.l 37 Sosu aiwawe aꞌi Owane Sitewi lo peri tereꞌe tu naifa weriyei leseye ape, apou aꞌi teꞌesiya,
“Lowe meni ape lowe lai ti eine se tewiyei ape siyeyei.” Sek 12:10
Peri ape aiwawe aꞌi wiyeme aꞌi henerai tepaꞌasiye.m
Lowe Jisas lo tahe paꞌare fisiye yo papu funari.
38 Moꞌo su, meni ta, iyape Josep, omo Arimatea maꞌe fai ape, le ereseni aꞌi Jisas lo peri wanu umasinamiye. Le Juda lo lu owane werese marepi atoweiyeteye. Sosu le meni owane Pailat maꞌe ei toweriyei ne fi. Le apou ei toweriye, “Ane Jisas lo tahe paꞌare hene aitiyei ne totesiya. Tapiye fisiye yo maꞌe fuwei.” Pailat le maꞌe itiyaꞌu eiye, “Ei, faraꞌu Jisas lo tahe paꞌare aiti.” Serai meni ape Jisas lo tahe paꞌare aiti. 39 Meni tereꞌe iyape Nikodemus aiwawe aꞌi fai. Le tu naifa pasi aꞌi Jisas maꞌe ei toweriyei ne fai. Le saꞌi heneri wisere aꞌi Jisas lo tahe paꞌare sahe ani teineyei ne fai. Saꞌi heneri wisere aꞌi orese aꞌi tene (30 kilogram aiwawe aꞌi ne).n 40 Sosu lowesi Jisas lo tahe paꞌare ipari tahe ani noweri fuwe. Lowe etiri tamo heneri wisere aꞌi Jisas lo tahe paꞌare sahe teineye. Juda lo lu tahe paꞌare fisiye fuwei su, lowe yo seni ape mi mi werese aꞌi ironamiteye. 41 Omo ape sahe, Jisas temeniyeye ape, awei taꞌi saro iroteye. Sosu awei sahe tapiye fisiye yo iroteye. Tapiye fisiye yo heꞌi aꞌi, lu tamo heꞌi aꞌi horuseye. Tu lowe tahe paꞌare ta tapiye fisiye sahe fu taꞌame. 42 Tapiye fisiye yo ape atahe aꞌi iroteye. Serai lowesi witane aꞌi Jisas lo tahe paꞌare tapiye fisiye yo fuwei ne toteye. Nowe taꞌuwe hereiyei ataheyewa. Serai lowe etiri werese taꞌuwerai. Nowe ape se lowesi tahe paꞌare fisiye fuwei ne amouweye.