Jisas si tame norohuwe sineye.
20
Lowesi Jisas lo tahe paꞌare fisiye sahe fuwe su, nowe Fraide. Sosu pasi hesi aꞌi i tepaꞌasiye su, nowe Sande henerai. Nowe mitaiyeye su, menitani ta iyape Maria omo Makdala maꞌe fai ape, le tapiye fisiye yo siyeyei ne fai. Le tapiye fisiye yo henerai su, tapiye fisiye yo ariye aꞌi siyeye. Tapiye nowerisawi. 2 Le tapiye ariye aꞌi siyeye su, le meni Saimon Pita maꞌe itero ti. Ane, Jon, Jisas marepi erasi aꞌi tote wawesiyenamiteye ape, Saimon Pita aiwawe aꞌi iroteye. Sosu Maria notosi maꞌe henerai su, le apou eiye, “Lowe Jisas lo tahe paꞌare taꞌarei aiti. Tapiye fisiye yo ariye. Nomo tahe paꞌare lo eiwerou maꞌe fu aiti awere? Nomo soꞌoru taꞌama.” 3 Sosu Pita peri ape wanuwe su, le tapiye fisiye yo maꞌe itero ti. Ane, Jon, aiwawe aꞌi iteroti. 4 Sosu notosi fisiye yo maꞌe iteroti su, ane tu tapiye fisiye yo maꞌe henerai. 5 Ane tu fisiye yo maꞌe henerai su, ane meꞌiyeni apeꞌi arowe. Fisiye yo papu siyeye. Ane ipari tahe tu lowesi noweri fuwe ape siyeye. Ane fisiye yo papu wi taꞌame. 6 Sosu Saimon Pita moꞌo fai. Fisiye yo henerai su, le fisiye yo papu wiye le ipari tahe werese aꞌi lo siyeye. 7 Sosu ipari tahe, lowe Jisas lo nihari napetuwe ape, le ipari tahe eite feni tereꞌe siyeye. Ipari tahe ape ani apeꞌi atati fuwe. Ipari tahe ape tahe paꞌare werese ani noweri fuwe ape, feni tereꞌe maꞌe apeꞌi fuwe siyeye. 8 Saimon Pita fisiye yo papu wiye su, ane, Jon, tu fisiye yo maꞌe fai ape, fisiye yo papu moꞌo wiye. Ane ipari tahe werese siyeye su, ane Maria lo peri tote tawesiye. 9 Notosi aiwawe aꞌi apou toteye, “Lu tamo Jisas lo tahe paꞌare taꞌarei aiti.” Notosi Owane Sitewi lo peri marepi iꞌaniye. Tu Jisas nomo maꞌe au teꞌeye, “Ane temeniyeyei su, ane si tame sineyei.”a 10 Serai notosi wesi towafi notosi lo si tame fi.Menitani Maria Magdala Jisas siyeye.
11 Lowesi wesi towafi lowesi lo si tame fi su, menitani ta iyape Maria fisiye yo nowe sahe luteye. Luteye su, le meꞌiyeni apeꞌi arowe. Fisiye yo papu siyeye. 12 Fisiye yo papu siyeye su, le Owane Sitewi lo ipari wisere hesi aꞌi siyeye. Lowesi ipari tahe wapo aꞌi ani asiteye. Lowesi wari Jisas howeiteye ape, saro onuteye. Taꞌi pihatu maꞌe onuteye, taꞌi sitewi maꞌe onuteye. 13 Sosu lowesi le maꞌe teꞌe toweriye, “Menitani, ne piyene lusiya awere? Ne eiwerai siye nehisiya awere?” Menitani lowesi maꞌe itiyaꞌu eiye, “Lowe meni owane ano lo tahe paꞌare taꞌarei aiti. Lowe eiwerou maꞌe fuwe awere? Ane soꞌoru taꞌama.” 14 Sosu menitani peri ape au teꞌe tepaꞌasiye su, le atati awetoti. Le meni Jisas siyeye. Le meni ape soꞌoru taꞌama.b 15 Sosu Jisas le maꞌe ei toweriye, “Menitani ne piyene lusiya awere? Ne eiwerai siye nehisiya awere?” Menitani lo marepi apou aꞌi toteye, “Meni eite awei pani au noweinowei siye meni ne.” Serai le meni ape apou ei toweriye, “Kaiyemo, ne tahe paꞌare ani aiti su, eiwerou maꞌe fuwe awere? Ane faraꞌu tahe paꞌare lo ani aiti.” 16 Sosu Jisas le maꞌe eiye, “Maria!” Menitani iyape lo wanuwe su, le atati awetoti. Le maꞌe eiye, “Atuatu siye meni!” Hibru lo peri apou aꞌi teꞌesiya, “Rabonai.” 17 Le peri “Rabonai ” au teꞌeye su, le Jisas maꞌe ereti se yaꞌoreiye. Sosu Jisas le maꞌe eiye, “Ne ane owe ape yaꞌorere! Ane Owane Sitewi Tai Pefine aꞌi ano hire maꞌe wi taꞌame. Weiya. Ne lu feni ano maꞌe au teꞌeri. Ane Tai Pefine aꞌi ano, Tai Pefine aꞌi fene lo aiwawe hire maꞌe wiyei. Ane Owane Sitewi ano, Owane Sitewi fene lo aiwawe aꞌi maꞌe wiyei.”c 18 Serai Maria omo Makdala maꞌe fai ape, le Jisas lo lu disaipel maꞌe au teꞌeyei ne fi. Le lowe maꞌe eiye, “Ane Meni Owane nomo lo siyeye.” Le peri ape mo ane maꞌe au teꞌeteye.
Lu disaipel lo ape mo Jisas siyeye.
19 Nowe Sande pasi su, Jisas lo lu disaipel werese wesi papu onuteye. Wesi lo yo werese ti tawesiye. Lowe Juda lo lu werese atoweiyeye, serai lowe wesi lo yo werese ti tawesiye. Lowe onuteye su, meni Jisas ponei sahe teiteye. Le lowe maꞌe eiye, “Fene marepi fetane aꞌi irote.” 20 Sosu le peri ape teꞌe tepaꞌasiye su, le lowe maꞌe ereti tahe feni lo au atuatuteye. Lu disaipel lo siyeye su, lowe marepi wisere erasi aꞌi nineꞌiteye. Lowe Meni Owane Pefine aꞌi lowe lo siyeteye.d 21 Serai Jisas lowe maꞌe tame eiye, “Fene marepi fetane aꞌi irote! Owane Sitewi Tai Pefine aꞌi ano lai ane hi awei maꞌe eimawesai. Serai aiwawe aꞌi, ane lai fene lu taune werese maꞌe omo werese sahe eimawesawiyei.” 22 Le peri teꞌe tepaꞌasiye su, le ahi honoruwe lowe maꞌe fateye. Sosu le lowe maꞌe eiye, “Fene Owane Sitewi lo Hepene Waraꞌi aꞌi anire. 23 Fene lu taune werese lo yo seni luwaru aꞌi ani sasari pamoweyei su, yo seni luwaru aꞌi lowe lo au sasari tepaꞌasiyei. Sosu fene lu taune werese lo yo seni luwaru aꞌi ani pamoweyei taꞌama su, yo seni luwaru aꞌi lowe lo lire papu ironamiyei.” Peri ape teꞌe tepaꞌasiye su, Jisas wesi nowe maꞌe fi.e
Tomas lai Jisas siyeye.
24 Jisas ponei teirai su, meni disaipel lo taꞌi aꞌi iyape Tomas, iyape tereꞌe Didimus, le wesi ape papu iro taꞌame. 25 Sosu Tomas wesi maꞌe henerai su, Jisas lo lu disaipel werese Tomas maꞌe au teꞌeteye, “Nomo Meni Owane Pefine aꞌi nomo lo siyeye.” Ahowa, Tomas lowe maꞌe itiyaꞌu eiye, “Ane niꞌari yaru ereti lo se siye taꞌame su, ane peri fene lo wanu tote tawesirowata. Aiwawe aꞌi ane tu ereti ano se tahe feni lo hetesiyeyei su, sosu moꞌo ane faraꞌu peri fene lo wanu tote tawesiyei.”
26 Sosu aꞌi pe poweiye ereti feni werese feni hesi heta (8) i tepaꞌasiye su, Jisas lo lu disaipel werese wesi ape papu iroteye. Tomas aiwawe aꞌi iroteye. Wesi lo yo werese ti tawesi tepaꞌasiye. Sosu Jisas lowe maꞌe ponei teirai. Lowe maꞌe eiye, “Fene marepi fetane aꞌi irote.” 27 Le Tomas maꞌe atati awetoti, apou eiye, “Ne ereti no niꞌari yaru ano siye hetesiyere. Ereti no feni ano papu fure, ti eine yaru ani hetesiyere teritere. Ne peri ano owe ape wanu arisire. Ne peri werese ano wanu tote tawesi umasire.” 28 Tomas Jisas lo peri wanuwe su, le apou eiye, “Meni Owane ano, ne Owane Sitewi wiyeme aꞌi ano tene!” 29 Sosu Jisas le maꞌe eiye, “Ne niꞌari yaru siyeye, sosu ne peri ano wiyeme aꞌi wanu tote tawesi umasiye. Wanure! Lu taune tomu neꞌese niꞌari yaru ano siye taꞌame. Lowe peri werese ano wanu tote tawesi umasiye su, Owane Sitewi ano lowe maꞌe marepi wisere aꞌi auwei.”f
One towe eite lo peri sitewi.
30 Jisas wiyawi pefine aꞌi tomu neꞌese ironamiteye. Lu feni werese lo wiyawi erasi pefine aꞌi ape lo siyeye. Ane lai Jisas lo wiyawi werese aꞌi one towe ape sahe lese taꞌame. 31 Ahowa, ane wiyawi pefine aꞌi tamo lo one towe sahe leseteye. Fene wiyawi ape lo one towe eite sahe siye teꞌeyei su, fene Jisas ne siye soꞌoruweyei. Jisas lai Krais tene! Le Owane Sitewi lo meni eime. Fene Jisas lo peri wanu tote tawesi umasiyei su, Owane Sitewi lai fene maꞌe marepi hepene heꞌi aꞌi aurowa. Serai fene mi mi pasi pasi weriyei tei ironamirowa.g