Jisas disaipel lo maꞌe saꞌi Taiberias sahe henerai.
21
Nowe moꞌo ta se, Jisas lu disaipel lo maꞌe hare ite sahe, iyape Taiberias, henerai. Le lowe maꞌe apou aꞌi henerai. 2 Lu feni tamo hare ite ape taꞌuwerai. Saimon Pita, Tomas, iyape tereꞌe Didimus, Nataniel, omo Kana pani Galili sahe maꞌe fai ape, Sebedi lo eimane hesi aꞌi, lu feni hesi aꞌi tereꞌe. Lowe werese hare ite maꞌe taꞌuwerai. 3 Sosu Saimon Pita lowe maꞌe eiye, “Ane hare honaiye ani fu arowei.” Lowe le maꞌe itiyaꞌu eiye, “Nomo aiwawe aꞌi ne mase aiyeyei.” Sosu lowe hare honaiye wai papu ani asiye. Wai saꞌi maꞌe tewi ite arosawi. Nowe pasi werese lowe hare honaiye ani fu aronamiteye. Hare werese ariye. 4 Ahowa, nowe mitaiyeye se, Jisas saꞌi eneri tewiye sahe teiteye. Lu feni Jisas siye soꞌoru taꞌame. 5 Serai Jisas lowe maꞌe ei toweriye, “Eimane, fene hare tamo anisiya awere?” Lowe le maꞌe itiyaꞌu eiye, “Ahowa, nomo hare werese ariye.” 6 Sosu le lowe maꞌe eiye, “Fene hare honaiye wai ai feni maꞌe ani fu arore. Fene peri ano wanu umasiyei su, fene hare tomu neꞌese aniyei.” Serai lowe hare honaiye wai eyate feni maꞌe ani fu arowe. Sawi Amou! Hare tomu neꞌese hare honaiye lai ti tawesiye. Lowe hare honaiye hare mase werese niꞌariye anirowata. Hare tomu neꞌese, orese aꞌi ne. Serai lowe niꞌariye anirowata.a 7 Serai ane, Jon, Jisas marepi erasi tote wawesiyenamiteye ape, ane Pita maꞌe eiye, “Weiya! Meni ape Meni Owane nomo lo ne!” Pita peri ano wanuwe su, le ipari tahe uperi lo ani asiye. Hare honaiye ani fu arowe su, le ipari tahe uperi lo ani arauwe. Serai le ipari tahe uperi lo ani asiyewe, saꞌi papu yeꞌi arowe.b 8 Pita Jisas maꞌe saꞌi feiye. Lu feni werese, wai papu iroteye ape, moꞌo iyatutaiteye. Wai saꞌi tewiye atahe aꞌi ne. Lowe hare honaiye hare werese mase iyatu niꞌaritaiteye. 9 Lowe wai saꞌi tewiye maꞌe furi. Lowe wai arunati, Jisas maꞌe fi. Lowe henerai su, Jisas yehe arineye, hare tamo nau mase taꞌaseye. 10 Sosu Jisas lowe maꞌe eiye, “Fene hare tamo, aniye ape, aita.” 11 Saimon Pita peri wanuwe su, le saꞌi tewiye maꞌe hare honaiye niꞌari aniye. Lowe hare werese nauwiteye, apou aꞌi (153 hare aniye). Hare tomu neꞌese orese aꞌi. Ahowa, hare honaiye tou erau taꞌame.c 12 Moꞌo su, Jisas lowe maꞌe eiye, “Fene hare ene ara.” Nomo werese le maꞌe apou ei toweri taꞌame, “Ne eiwerai awere?” Nomo werese soꞌoruweye. Meni ape Meni Owane nomo lo tene! 13 Hare taꞌase tepaꞌasiye su, Jisas hare, nau taꞌase aiwawe aꞌi ani erauwiye, lowe maꞌe noneti au aye. 14 Jisas fisiye yo sahe si tame norohuwe sineye su, le nowe hesi heta lu disaipel lo maꞌe henerai. Nowe ape se nowe hesi heta henerai.dJisas Pita maꞌe au teꞌe tiyatiteye.
15 Sosu lowe ene a tepaꞌasiye su, Jisas Pita maꞌe ei toweriye, “Saimon, Jon lo meni eime, Ne ane ne marepi tote wawesiyesiya awere? Ne lu feni ano tereꞌe fu ani ararosiya awere?” Pita itiyaꞌu eiye, “Ei, owane, Ne marepi ano siye soꞌoruwe tepaꞌasiye. Ane ne marepi erasi aꞌi totesiya.” Serai Jisas le maꞌe itiyaꞌu eiye, “Ne fe sipsip yene ano au ene are.” 16 Sosu Jisas Pita maꞌe tame ei toweriye, “Saimon, Jon lo meni eime, Ne ane ne marepi erasi aꞌi tote wawesiyesiya awere? Ne lu feni werese ano hi ararosiya awere?” Pita le maꞌe itiyaꞌu si tame eiye, “Ei, Meni Owane Pefine aꞌi, ne marepi ano ne soꞌoruwesiya! Ane ne ne marepi erasi aꞌi totesiya.” Jisas le maꞌe eiye, “Ne fe sipsip werese ano au noweinoweite.”e 17 Jisas nowe hesi heta Pita maꞌe tame ei toweriye, “Saimon, Jon lo meni eime, ne ane ne marepi erasi totesiya awere?” Serai Pita marepi orese aꞌi teriteye. Jisas piyene nowe hesi heta apou ei toweriye awere? “Ne ane ne marepi erasi aꞌi totesiya awere?” Serai le Jisas maꞌe itiyaꞌu eiye, “Meni Owane, Ne etiri werese siye soꞌoruwe tepaꞌasiye. Ne marepi ano siye soꞌoruwesiya tene! Ane lai ne marepi erasi aꞌi totesiya.” Jisas le maꞌe eiye, “Ne fe sipsip werese ano au are. 18 Peri ano wiyeme aꞌi ne. Wanure! Ane ne maꞌe au teꞌeye, ‘Ne meni yoꞌorei iroteye su, ne ipari tahe werese no ani asinamiteye. Ne omo maꞌe marepi no uweiyei ne toteye. Sosu ne yaꞌariyei heneraiyei su, ne ereti no fu fareraiyei. Meni tereꞌe ipari tahe no ne maꞌe au ani asiyei. Lowe ne maꞌe omo tereꞌe tereꞌe maꞌe henetirowa. Marepi no aꞌi lai taꞌama.’” 19 Jisas peri ape Pita maꞌe au teꞌeye su, le peri lo sitewi apou aꞌi teꞌesiya. Pita Owane Sitewi lo wiyawi taꞌanerowa. Serai lu tamo le maꞌe aine teraꞌeyei ne toterowa. Le lu taune werese maꞌe au teꞌe fiyarirowa su, le kairefi aꞌi se teirowa. Lowe le kalabus wesi maꞌe henetirowa. Sosu moꞌo, lowe le maꞌe aine teraꞌerowa. Lowe Pita aine teraꞌeyei su, le Owane Sitewi lo iyape ei ani aroweyei. Serai Jisas Pita maꞌe au teꞌe soꞌoruweye. Sosu Jisas Pita maꞌe au teꞌe tepaꞌasiye su, le le maꞌe apou eiye, “Ne yo ano umasire!”f
20 Sosu Pita atati teiyewe, le ane maꞌe Jon, Jisas marepi erasi totenamisiya ape, siyeteye. Ane lowesi moꞌo uweiteye. Nowe nomo taꞌuwe hereiyei ene ateye su, ane mato ano Jisas lo iyoꞌo maꞌe futeye. Sosu ane Jisas apou ei toweriteye, “Owane eiwerai ne ai lu maꞌe au areare henetiyei awere?”g 21 Serai Pita ane maꞌe siyeteye su, le Jisas maꞌe ei toweriye, “Meni Owane Pefine aꞌi, meni eite, lowe lai le ne piye irowei awere?” 22 Jisas le maꞌe itiyaꞌu eiye, “Ane le maꞌe eiyei su, ne mi mi werese teinamirowa. Sosu ane si tame itorairowa. Marepi ano ne. Ne le ne marepi owe ape totere. Ane ne maꞌe eisiya, Ne yo ano umasire!” 23 Jisas peri ape au teꞌeye su, peri ape lu taune maꞌe Jisas lo yo umasiye ape, apou aꞌi toteye, “Meni eite Jon, le mi mi werese hepene se ironamirowa.” Ahowa, Jisas peri apou aꞌi teꞌe taꞌame. Le apou eiye, “Ane le maꞌe eisiya su, ‘Ne mi mi werese teinamirowa. Sosu ane si tame itorairowa. Marepi ano aꞌi ne. Ne le ne marepi owe ape totere.’”
24 Ane, Jon, Jisas lo meni disaipel, etiri werese Jisas iroteye ape, ane lai siyeteye. Ane lu taune werese maꞌe omo werese sahe Jisas lo wiyawi werese au teꞌe fiyarisiya. Ane etiri werese ape mo one towe sahe leseteye. Nomo peri ape, ane leseye ape, wiyeme aꞌi soꞌoruwesiya tene! Nomo Jisas lo wiyawi werese siyeteye.h 25 Jisas wiyawi tomu neꞌese ironamiteye. Ane wiyawi werese lo lese taꞌame. Lu tamo Jisas lo wiyawi werese one towe sahe leseyei su, one towe werese ape mo omo omo werese sahe lese temeꞌeriyeyei. One towe tereꞌe lowe eiwerou maꞌe fuwei awere?i