APOSEL
Wiyawi ape Lu Aposel ape mo Iroteye ape
Jisas Owane Sitewi lo Hepene Waraꞌi aꞌi hi awei maꞌe eimawesairowa.
1
Kaiyemo ano, Tiofilus, tu naifa ane one towe tereꞌe sahe ne maꞌe leseye su, ane Jisas lo peri werese, wiyawi werese, le iroteye ape, ane tu apou leseteye.a 2-5 Jisas awei sahe iroteye su, le Owane Sitewi lo Hepene Waraꞌi aꞌi se lu disaipel lo maꞌe apou teꞌeye, “Fene omo omo werese ire! Lu taune werese maꞌe peri ano au teꞌe atuatute.” Lu feni, Jisas lai ariariyeye ape, peri ape Owane Sitewi lo Hepene Waraꞌi aꞌi se wanuwe. Sosu Jisas temeniyeye. Moꞌo Owane Sitewi lai si tame taꞌane norohuwe hene aniye su, lu disaipel lo maꞌe saro henerai. Poweiye lu hesi werese (40) Jisas lu disaipel lo maꞌe nowe poweiye tomu neꞌese saro henerai. Lowe Jisas siyeye su, lowe le ne marepi tote tawesiteye. Nowe poweiye saro henerai su, Jisas lu feni maꞌe Owane Sitewi lo marepi werese au teꞌe atuatuwe. Sosu aꞌi pe nowe taꞌi se Jisas lu feni maꞌe saro henerai ape, le apou eiye, “Fene omo Jerusalem maꞌe owe ape arunatire. Ahowa, weiya! Owane Sitewi lo peri teꞌe naneiyei, le fene maꞌe au teꞌe naneiye ape, henerairowa. Ane lai fene maꞌe tu au teꞌeye. Tu naifa Jon lai lu taune werese saꞌi au huwe. Nowe oso aꞌi su, Owane Sitewi lai fene maꞌe Hepene Waraꞌi aꞌi lo au hurowa.” Sosu Owane Sitewi lai Jisas hire niꞌarawe maꞌe wiye. Ane etiri werese ape mo one towe sahe lese tepaꞌasiye.b6 Sosu aꞌi pe lu feni, Jisas aiwawe, taꞌuwerai su, lowe apou ei toweriye, “Eiwerou su, ne Israel lo lu taune werese maꞌe kairefiyeyei se lowe taꞌu au noweinoweiyei ne si tame aurowa awere? Nowe meꞌiye su aurowa awere? Nowe pereye eite se lowe maꞌe aurowa awere?”c 7 Sosu le itiyaꞌu eiye, “Etiri ape mo ne, fene owe ape totere. Ane etiri ape ne fene maꞌe au teꞌerowata. Tai ano lai kairefiyeyei lo se poweiye eite, sosu nowe tewi aꞌi ariariyeye.d 8 Ahowa, Owane Sitewi lo Hepene Waraꞌi aꞌi fene papu wirai su, fene Owane Sitewi lo kairefiyeyei ape anirowa. Fene kairefiyeyei ape anirowa su, fene lu taune werese maꞌe peri ano au teꞌe fiyarite. Fene lu taune werese maꞌe omo Jerusalem sahe au teꞌe fiyarite. Sosu lu taune werese omo pani Judia au teꞌe fiyarite. Sosu lu taune werese omo pani Samaria au teꞌe fiyarite. Sosu lu taune maꞌe omo omo werese eyeri maꞌe au teꞌe fiyarite.”e
Owane Sitewi lai Jisas niꞌarawe maꞌe hene wiye.
9 Sosu aꞌi pe Jisas peri lo tepaꞌasiye su, Owane Sitewi lai le niꞌarawe maꞌe hene wiye. Lowe siye aroweye su, Jisas aitu papu wiye. 10 Lowe niꞌarawe maꞌe siye etiteye su, lu hesi, Owane Sitewi lo ipari wisere aꞌi, ipari tahe wapo aꞌi ani asiye ape, saro teiteye. 11 Lowesi apou eiye, “Fene, Galili lo lu, fene piyene niꞌarawe hire maꞌe siye arowesiya awere? Meni eite Jisas, Owane Sitewi lai le niꞌarawe maꞌe hene wiye ape, le aiwawe aꞌi si tame itorairowa.”f
Lu feni meni heꞌi aꞌi au teꞌe ariariyeye.
12 Sosu aꞌi pe Jisas lo lu disaipel Omo Oliv arunatiyewe, Jerusalem maꞌe si tame fi. Omo Oliv atahe aꞌi ne. Lowe yo mai sahe kilomita hesi heta iteye.gh 13 Lowe omo Jerusalem maꞌe henerai su, lowe wesi ape, lowe howeiteye ape, si tame fi. Sosu lowe wesi tewi tutu hire sahe taꞌuwerai. Lu tomu neꞌese wesi tutu ape maꞌe taꞌuwerai. Lu ape mo iyape tereꞌe tereꞌe apou eiye, Pita, Jon, Jems, Andru, Filip, Tomas, Bartolomyu, Matyu, Jems tereꞌe, Alfius lo meni eime, Judas, Jems tereꞌe lo meni eime, Saimon. Meni eite Israel lo marepi werese tote tawesinamiteye.i 14 Lowe taune tamo mase Maria, Jisas lo mai, Jisas lo paꞌise ape mo aiwawe taꞌuwerai. Lowe marepi taꞌi aꞌi Owane Sitewi maꞌe peri teꞌe tiyatiteyei ne fai.
Lowe meni Matias, Judas lo yaru sahe ariariyeye.
15 Lowe werese poweiye tomu neꞌese wesi tutu sahe Owane Sitewi maꞌe peri teꞌeyei ne fai. Sosu aꞌi pe Pita lai lu taune ponei sahe sineyewe, peri ta au teꞌeye. Lu taune tomu neꞌese wesi sahe taꞌuwerai (120 aiwawe aꞌi). 16 Sosu Pita apou teꞌeye, “Lu feni ano fene Jisas lo peri wanu tote tawesisiya ape, wanure. Tu naifa, Owane Sitewi lo Hepene Waraꞌi aꞌi meni Devit maꞌe peri wiyeme teꞌeteye. Sosu Devit meni Judas ne leseye, ‘Kaiyemo ano ai atu siye lu tamo Jisas maꞌe heneti.’j 17 Judas Jisas lo lu disaipel taꞌi wiyeme aꞌi. Le nomo aiwawe iroteye. Le nomo aiwawe wiyawi lo pati taꞌaneteye.”
18 Sosu le Jisas maꞌe au luwaruweteye su, le maꞌaru aniye. Maꞌaru aniye su, Judas awei tewi ete aniye. Sosu awei tewi siyenari su, le awei sahe winetaiye su, lire lo aine erauwiye. Saiwe lo werese nowe henerai.k 19 Lu taune werese Jerusalem sahe etiri eite wanuwe su, lowe awei tewi iyape au teꞌe eiye, “Akeldama.” Peri ape lo sitewi apou aꞌi, “Awei Tewi Fisaꞌi Fiyari Eresiya.”
20 Pita apou eiye, “Tu naifa meni Devit yaꞌariyei nomo lo one towe Buk Song apou leseye,
Meni ape lo wesi mi mi pasi pasi yahowaꞌi fa iroteye. Owe lu taune werese wesi eite wi ironamite. Wesi eite lo meni owane ne, meni tereꞌe ta wiyawi lo ape taꞌanerowa.’” Sng 69:25; 109:8
21 Sosu Pita tame teꞌeye, “Meni ape Judas temeniyeye. Serai nomo meni heꞌi ariariyerowa. Meni heꞌi ape Judas lo wiyawi taꞌanerowa. Meni heꞌi ape Owane Jisas mase nomo aiwawe weriyei iroteye. Sosu le Jisas lo peri werese wanuteye. 22 Meni heꞌi eite lai Jon Jisas maꞌe saꞌi au huwe ape, siyeye. Sosu etiri werese, Jisas taꞌaneye ape, siyeteye. Sosu le, Owane Sitewi lai Jisas niꞌarawe hire maꞌe hene wiye ape, siyeteye. Meni eite lai, Jisas si tame sine norohuweye ape, le lu taune werese maꞌe au teꞌe fiyariteye.”l
23 Sosu lowe lu hesi ei aniye. Lowesi lo iyape Josep, iyape hesi tereꞌe Barsabas, sosu Jastus. Sosu meni tereꞌe ape iyape Matias. 24 Sosu lowe Owane Sitewi maꞌe peri ta teꞌe toweriye, lowe apou teꞌe toweriye, “Meni Owane Pefine aꞌi, ne lai meni heꞌi ape ariariye tepaꞌasiye. Ne lu werese lo marepi hepene siye soꞌoruwe tepaꞌasiye. Ne aꞌi lai meni heꞌi ape nomo maꞌe au atuatu areiyere. 25 Meni heꞌi ape, le Judas lo yaru taꞌanerowa. Meni Judas, Krais lo wiyawi ape atati arunatiyewe, le yaru topo lo maꞌe fi.” Yaru ape ne, Owane Sitewi lai lu taune yo seni luwaru aꞌi iroteye ape ne, au taꞌaneye. 26 Sosu lowe tapiye oso aꞌi ani fu arosawi su, tapiye ape lai meni Matias ariariyeye. Serai Matias lai Judas lo yaru ape aniye. Sosu Matias lai Jisas lo lu disaipel henerai.