5 Juda lo lu taune tomu neꞌese, omo omo werese maꞌe fai ape, omo Jerusalem sahe taꞌuwerai. Lowe werese Owane Sitewi lo peri tote tawesi umasiteye. 6 Lowe noꞌu ape wanuwe su, lu taune werese wesi maꞌe taꞌuwerai. Lowe werese hepene se suꞌariye erasi aꞌi iroteye. Lowe lu feni ape, peri tereꞌe tereꞌe towafi lowe lo teꞌeye ape, wanuwe. 7 Lowe marepi erasi aꞌi hepene se suꞌariye. Serai lowe apou teꞌe toweriye, “Sawi amou! Lu werese eite mo, lowe omo pani Galili lo lu maꞌe fai. 8 Lowe peri lo au teꞌe fiyariye su, nomo peri sitewi towafi nomo lo se wanusiya. Peri ape, lowe au teꞌeye ape, mai towafi nomo lo nomo auteiye su, lowe peri ape au teꞌeteye. 9 Nomo werese pani tereꞌe tereꞌe maꞌe fai. Nomo tamo omo pani Partia, tamo omo pani Midia, tamo omo pani Elam, nomo tamo omo pani Mesopotemia maꞌe fai. Lu tamo omo pani Judia, lu tamo omo pani Kapadosia maꞌe fai. Lu tamo omo pani Pontus, lu tamo omo pani Esia maꞌe fai. 10 Nomo tamo omo pani Frigia, nomo tamo omo Pamfilia, nomo tamo omo pani Isip maꞌe fai. Lu tamo omo pani Libia lo omo pani Sairini atahe aꞌi ape maꞌe fai. Sosu lu taune omo Rom maꞌe fai. Nomo werese omo Jerusalem sahe taꞌuwerai. 11 Lu taune werese eite mo Juda lo lu taune wiyeme aꞌi ne. Sosu lu taune tamo Juda lo lu taune heꞌi aꞌi henerai. Lu taune tamo kemere Krit maꞌe fai. Sosu Arebia lo pani maꞌe fai. Nomo wiyawi erasi pefine aꞌi, Owane Sitewi taꞌaneteye ape, peri towafi nomo lo se wanuwe.” 12 Lowe marepi erasi aꞌi tote luwaruweye. Sosu lowe hepene erasi se suꞌariye. Sosu lowe taꞌu apou teꞌe toweri tiyatiteye, “Etiri eite ne piye peri sitewi teꞌesiya awere?”

13 Sosu lu tamo lowe ne teꞌe naru luwaruweye. Lowe apou eiye, “Lowe aꞌi lai saꞌi meremereye aꞌi anamiteye. Lowe meremereye aꞌi henerai.”

14 Sosu aꞌi pe Pita lu feni ponei sahe teiteye su, le lowe maꞌe au teꞌe fiyariye, lu taune werese maꞌe peri erasi apou teꞌe fiyariye, “Juda lo lu feni ano, fene werese omo Jerusalem irosiya ape, ane peri wiyeme aꞌi fene maꞌe au teꞌesiya. Fene peri ano wanu eti umasire. 15 Fene, nomo ne meremereyesiya ape, totesiya awere? Ahowa, lu feni ano, nomo saꞌi meremereye aꞌi a taꞌame. Nomo meremereye taꞌame. Nowe esi ponei aꞌi irosiya. Ahowa, lu taune tamo, saꞌi meremereyeyei ape, esi ponei a taꞌame. 16 Ahowa, tu naifa meni ta iyape Joel, Owane Sitewi lo peri au teꞌe fiyariye, le etiri ape ne, fene siyesiya ape, apou leseye,

22 Sosu Pita peri tereꞌe apou eiye, “Fene Israel lo lu taune peri ano wanure! Owane Sitewi lai meni ape Jisas Nasaret maꞌe fai ape, ariariyeye. Le Jisas maꞌe kairefi tamo lo auwe. Kairefi lo se Jisas lai wiyawi erasi pefine aꞌi taꞌaneye. Le wiyawi erasi pefine aꞌi taꞌaneye. Fene etiri werese ape mo siyeteye. 23 Owane Sitewi lai marepi lo se meni ape fene maꞌe eimawe arosai. Tu naifa Owane Sitewi lai etiri werese siye soꞌoruweteye. Lu luwaru aꞌi tamo Jisas maꞌe au luwaruweye su, Owane Sitewi lai siye soꞌoruweteye! Sosu lowe Jisas me tapeꞌi sahe aine tawere teraꞌeye su, Owane Sitewi lai siye soꞌoruweye! Tu naifa weriyei le lai etiri werese ape mo siye soꞌoruweye. 24 Jisas temeniyeye su, Owane Sitewi lai si tame taꞌane norohuwe sineye. Si taꞌane norohuwe sineye su, Jisas lai temeniyeyei ape aweraꞌiyeye. Fofowei erasi arunati. Le fisiye yo sahe irorowata. Temeniyeyei ape lai Jisas ani ti tawesirowata. 25 Tu naifa meni Devit le ne teꞌeye. Le apou eiye,

29 Sosu Pita apou tame eiye, “Kaiyemo mo, ane fene peri wiyeme ta au teꞌesiya. Meni ape Devit, yaꞌariyei aite nomo lo temeniyeyewe, lowe fisiye yo papu fuwe. Sosu nowe pereye eite se fisiye yo lo sato irosiya.^d 30 Meni ape Devit, le etiri ta soꞌoruweye. Owane Sitewi lai le peri lo au teꞌe siye meni ta heneraiyei ne ariariyeye. Owane Sitewi lai le maꞌe eiye,

31 Devit peri ape leseye su, etiri ape henerai taꞌame. Le meni ape ne, Owane Sitewi ariariyeye ape, temeniyerowawe, si taꞌane norohuwe sinerowawe, le meni ape ne teꞌeteye. Sosu Owane Sitewi lai meni ape fisiye yo papu irotorowata. Ahowa, tahe paꞌare lo uwaserowata.^e 32 Owane Sitewi lai meni ape Jisas si tame taꞌane norohuwe hene ani sineye. Nomo werese lai etiri ape siyeteye. Serai nomo peri wiyeme aꞌi ape fene maꞌe au teꞌe areiyesiya. 33 Owane Sitewi lai Jisas ereti eyate feni lo se hene wi onuwe. Nowe pereye eite se Owane Sitewi lai le maꞌe peri pefine aꞌi au teꞌe naneiye. Peri pefine aꞌi ape, Owane Sitewi lai au teꞌe naneiyei ape, Owane Sitewi lai Hepene Waraꞌi aꞌi lo hi awei maꞌe eimawe arosa. Pereye fene lai Owane Sitewi lo Hepene Waraꞌi aꞌi siyeye. Fene lai ahi peri lo ape wanuwe.^f 34 Nowe ape se Owane Sitewi lai omo hire maꞌe meni Devit si taꞌane norohuwe hene wi taꞌame. Ahowa, le apou eiye,

36 Sosu Pita apou tame eiteye, “Serai Israel lo lu taune werese wanure! Owane Sitewi lai Jisas, fene me tapeꞌi sahe aine teraꞌeye ape, Le Meni Owane Pefine aꞌi au iro henerai. Serai fene etiri ape mo siye soꞌoruwesiya.”^g

37 Sosu aꞌi pe lu taune werese peri lo ape wanuwe su, lowe marepi kororu aꞌi irowe. Lowe Pita, lu feni tereꞌe werese maꞌe, Jisas lai ariariyeye ape, aiwawe apou eiye, “Kaiyemo mo, nomo piye eiwerou irowei awere?”

38 Sosu Pita itiyaꞌu apou eiye, “Fene marepi fene lo yo seni luwaru aꞌi atati tote awetore. Yo seni luwaru aꞌi atati arunatiyei su, fene taꞌi taꞌi aꞌi saꞌi au ani hure. Fene Jisas lo iyape se ei aniyei su, Owane Sitewi yo seni luwaru aꞌi fene lo ani sasari pamowerowa. Yo seni luwaru aꞌi au sasari pamoweye su, Owane Sitewi lai Hepene Waraꞌi aꞌi lo marepi hepene fene lo papu neri aꞌi se eimawe arosairowa. 39 Owane Sitewi lo peri teꞌe naneiyei ape, le fene, eimane werese no aiwawe, sosu lu taune werese werese maꞌe Owane Sitewi lo peri teꞌe naneiyei ape auwe. Lu taune werese, Owane Sitewi lai, Meni Owane Pefine aꞌi nomo lo, topo le maꞌe ei aniye ape, le Hepene Waraꞌi aꞌi lo lowe maꞌe eimawe arosairowa.”^h

40 Pita peri tereꞌe tomu neꞌese lowe maꞌe au teꞌeye, “Fene werese weiyai! Owane Sitewi lai lu taune, yo seni luwaru aꞌi ironamisiya ape, au hese etirowa. Serai fene yo seni luwaru aꞌi fene lo fa atati arunatire. Fene yo seni luwaru aꞌi atati arunati taꞌame su, Owane Sitewi lai fene aiwawe aꞌi au hese etirowa.” 41 Serai lu taune peri lo wanu umasiye su, lu taune tomu neꞌese saꞌi au ani huwe. Sosu lu taune tomu neꞌese (3,000 aiwawe aꞌi) Jisas lo peri wanu tote tawesi umasiye. Lowe werese Jisas lo lu feni aiwawe aꞌi henerai.ⁱ

42 Sosu aꞌi pe lu taune werese, Jisas lo peri wanu tote tawesi umasiye ape, lowe, Owane Sitewi lo etiri werese aꞌi, lu aposel ape mo au teꞌe atuatuteye ape, wanuwei ne taꞌuwerai. Lowe werese marepi taꞌi aꞌi toteteye. Sosu lowe aiwawe ene ayei ne taꞌuwerai. Sosu lowe Owane Sitewi maꞌe peri au teꞌe tiyatiye.^j

43 Lu taune werese marepi wisere erasi aꞌi tote nineꞌinamiteye. Lu feni, Jisas lai ariariyeye ape, lowe wiyawi erasi pefine aꞌi tomu neꞌese taꞌaneteye. Lu taune werese etiri ape mo siyeye su, lowe marepi erasi hepene se suꞌariye. Sosu Owane Sitewi maꞌe au teꞌe wisereye nineꞌiteye. 44 Lu taune werese, Jisas lo peri wanu tote tawesiye ape, lowe wesi ta sahe taꞌuwerai. Etiri werese towafi lowe lo lowe lu taune tiyati noneteye.^k 45 Awei pani tewi towafi lowe lo, sosu etiri werese towafi lowe lo, lowe lai etiri werese ape mo ani taꞌuweyewe, lu tereꞌe tamo maꞌaru se eteye. Sosu lowe maꞌaru aniyewe, lu taune ariye aꞌi taꞌi taꞌi aꞌi none isafiyeteye. 46 Nowe mi mi werese aꞌi lowe Owane Sitewi lo wesi tutawe sahe taꞌuweye. Lowe wesi tereꞌe tereꞌe sahe ene ayei ne taꞌuweye. Lowe marepi erasi aꞌi nineꞌi wisereyenamiteye. Lowe marepi kairefi aꞌi se totenamiteye. 47 Lowe Owane Sitewi maꞌe au teꞌe wisereye nineꞌinamiteye. Lu taune werese omo Jerusalem sahe lowe ne tote wisereyeteye. Sosu mi mi werese Meni Owane Pefine aꞌi lai lu taune tomu neꞌese aꞌi topo le maꞌe sahe hene aniteye.^l