Lu owane tamo lai, Pita, Jon kalabus papu funari.
4
Sosu Pita, Jon lowesi Jisas lo peri lu taune maꞌe au teꞌeye su, ai lu tamo, au heseyei lu owane tamo, ai lu lo meni owane ta, Owane Sitewi lo wesi au noweinoweiteye ape, sosu lu owane tereꞌe tamo iyape Sadyusi, lowe lowesi maꞌe henerai. 2 Lowe lowesi ne ai marepi erasi aꞌi toteye. Lowesi lu taune maꞌe Jisas lo iyape se apou au teꞌe fiyariye, “Nowe yeꞌewi su lu taune werese si tame taꞌane norohuwe sinerowa.” Serai lowe ai marepi erasi aꞌi lowesi ne totenamiteye. 3 Neriwei su lowe lowesi ereti anite tawesiyewe, kalabus wesi maꞌe heneti. Lowe apou toteye, “Nowe pasiyewa. Nomo esi aꞌi su lowesi meni owane lo wesi maꞌe etiyei ne heneti.” 4 Nowe poweiye tamo i tepaꞌasiye su, lu taune tomu neꞌese Owane Sitewi lo wesi iroteye su, lowe peri lowesi lo wanuwe. Lu taune tomu neꞌese Jisas lo peri tote tawesi umasiteye. Lu tomu neꞌese aꞌi (5,000 aiwawe aꞌi) Jisas ne tote tawesiye. Taune tomu neꞌese aiwawe aꞌi peri lowesi lo wanu tote tawesi umasiteye.aLowe Pita, Jon, lowesi etiye.
5 Esi su lu owane tomu neꞌese, yaꞌariyei lu tamo, Juda lo yo peri soꞌoruwe siye lu tamo, lowe omo Jerusalem maꞌe taꞌuwerai. 6 Meni Anas, au heseyei meni owane pefine aiwawe aꞌi taꞌuwerai. Kaiafas aiwawe taꞌuwerai, Jon, Aleksander lowesi aiwawe taꞌuwerai. Lu tereꞌe tamo, Anas lo lu feni aiwawe taꞌuwerai. 7 Sosu aꞌi pe lowe Pita, Jon lu owane maꞌe ponei sahe au teiyei ne henetai. Lowe lowesi apou teꞌe toweriye, “Fenesi piye kairefiyeyei aniye awere? Kairefiyeyei ape ne eiwerai fenesi maꞌe auwe awere?”
8 Sosu Pita, Owane Sitewi lo Hepene Waraꞌi aꞌi papu iroteye ape, lowe maꞌe eiye, “Israel lo lu owane, wanure! 9 Peri ano wanu etire, fene lu taune werese pani Israel sahe aiwawe wanure. 10 Jisas, Nasaret lo meni ape, Owane Sitewi lai le ariariyeye ape, fene lai meni ape me tapeꞌi sahe aine teraꞌeye. Sosu Owane Sitewi lai le si tame taꞌane norohuwe hene ani sineye. Meni ape, Jisas lo kairefi se, meni eite lowe hesi aꞌi lo afofo aꞌi au taꞌane tei kairefiyeyei.b 11 Tu naifa weriyei meni ta Devit, meni ape ne toteye. Le Owane Sitewi lo one towe sahe apou leseye,
‘Tapiye ta, wesi taꞌane siye lu ani fu arosawi ape, Owane Sitewi lai tapiye eite tutawe heneraiyei ne au irowe.’ Sng 118:22
12 Jisas aꞌi lai lu taune werese marepi hepene heꞌi aurowa. Owe meni tereꞌe ta lu taune werese marepi hepene heꞌi aꞌi aurowata. Owane Sitewi lai Jisas maꞌe kairefiyeyei lo auwewe, le hi awei maꞌe eimawe arosai. Nomo werese le ne fu umasinamite.”c
13 Lowe Pita, Jon lo peri kairefi aꞌi siyeye su, lowe hepene se suꞌariye, apou eiye, “Lu hesi ape ne, au teꞌe atuatu siye lu tamo lai lowesi marepi wisere aꞌi au teꞌe atuatuteye awere? Lowesi iyape se taꞌama. Lowesi kairefiyeyei eite eiwerou maꞌe aniye awere? Nowe tu se lowesi Jisas mase iroteye.” 14 Lowe meni lowe hesi aꞌi afofo aꞌi siyeye su, lowe peri ta itiyaꞌu teꞌe taꞌame. Meni ape lowe hesi aꞌi faraꞌuwe tepaꞌasiye. 15 Sosu lowe lowesi wesi tewi nowe maꞌe eimawesawi. Lowesi fi su, lowe teꞌe tiyatiyei ne taꞌuwerai. 16 Lowe apou teꞌe tiyati toweriteye, “Nomo lu hesi ape ne eiwerou irowei awere? Lu taune werese omo Jerusalem sahe etiri erasi pefine aꞌi ape, lowesi taꞌaneye ape, wanu wisereyeye. Nomo etiri ape eiwerou fareyarerowata. 17 Nomo lowesi maꞌe Jisas lo iyape se owe ape teꞌe einamirowa. Nomo lowesi maꞌe teꞌe einami taꞌame su, lu taune werese peri lowesi lo wanu tote tawesi umasirowa.”
18 Sosu aꞌi pe lowe lowesi si tame ei aniye. Lowesi si tame wiye su, lowe apou eiye, “Fenesi peri nomo lo wanu etire! Fenesi Jisas lo iyape se owe ape teꞌe fiyarite.”d 19 Ahowa, Pita, Jon lowe maꞌe itiyaꞌu teꞌeye, “Fene lai peri notosi lo wanu etire. Notosi Owane Sitewi lo peri umasiyei awere? Notosi peri fene lo umasiyei awere? Wanure! Notosi lai Owane Sitewi lo peri lo umasiyei tene!e 20 Etiri werese ape mo, notosi wanuwe ape, sosu etiri werese ape mo notosi siyeye ape, notosi lu taune werese maꞌe au teꞌe fiyarirowa!” 21 Lowe lowesi maꞌe peri kairefi aꞌi se au teꞌe einamiye su, lowe lowesi nowe maꞌe eimawe arosawi. Lowe yo seni lowesi lo ne au hese etirowata. Lu taune werese Owane Sitewi maꞌe au teꞌe wisereyeteye. Lu taune werese lowesi ne apou teꞌeye, “Lowesi yo seni aseyaro wisere aꞌi iroteye.” Serai lu owane ape mo lowesi kalabus wesi maꞌe henetirowata. Kalabus wesi maꞌe henetirowa su, lu taune werese lowe maꞌe ai marepi erasi aꞌi toterowa. 22 Meni ape lowe hesi aꞌi afofo aꞌi se iyu menei lu hesi werese (40 aiwawe aꞌi) iroteye. Sosu pereye aꞌi lowe hesi aꞌi afofo aꞌi lo se kairefiyeye.
Krais lo lu taune Owane Sitewi maꞌe au teꞌe toweriye.
23 Sosu aꞌi pe lu owane lowesi wesi nowe maꞌe eimawesawi su, lowesi lu feni lo maꞌe si tame fiyewe, lowe maꞌe peri ape, au heseyei lu owane werese, sosu yaꞌariyei lu owane werese lowesi maꞌe teꞌeye ape, au teꞌeye. 24 Lu taune Jisas ne tote tawesiteye ape mo peri lowesi lo wanuwe su, lowe Owane Sitewi maꞌe peri erasi au teꞌe wisereye nineꞌiteye. Lowe apou au teꞌeye, “Meni Owane Pefine aꞌi, ne lai etiri werese taꞌaneye. Ne omo pani werese taꞌaneye. Saꞌi erasi werese aꞌi taꞌaneye. Etiri werese awei pani sahe, saꞌi sahe, sosu niꞌarawe hire maꞌe irosiya ape, ne lai taꞌaneye.f 25 Yaꞌariyei nomo lo Devit, le wiyawi yahowaꞌi taꞌane siye meni no. Owane Sitewi lo Hepene Waraꞌi se Devit apou eiye,
‘Lu tewi tereꞌe werese omo werese sahe piyene ai erasi ironamisiya. Lu tewi nomo lo piyene Owane Sitewi maꞌe marepi yahowaꞌi irowei ne toteye awere?
26 Awei lu owane tutawe werese omo werese maꞌe ai atu tiyatiyei ne taꞌuwesiya. Sosu yaꞌariyei lu owane werese, Owane Sitewi maꞌe ai atu tiyatiyei ne taꞌuweye. Lowe Owane Sitewi lo meni maꞌe, le ariariyeye ape, ai atu tiyatiyei ne taꞌuweye.’” Sng 2:1-2
27 “Meni owane Herot, sosu meni Pontius Pailat, lu taune tomu neꞌese aꞌi, Juda lo yo peri umasi taꞌame ape, sosu Juda lo lu taune tamo omo Jerusalem sahe taꞌuwerai su, etiri werese ape mo pefine aꞌi henerai. Lowe Jisas maꞌe ai atu tiyatiyei ne taꞌuwerai. Meni ape Jisas, le wiyawi yahowaꞌi waraꞌi aꞌi meni no. Ne le ariariyeyewe, hi awei maꞌe lu taune werese si tame ete hene aniyei ne eimawe arosai.g 28 Lu werese ape mo etiri ape Jisas maꞌe au luwaruweye su, ne aꞌi lai tu naifa siye soꞌoruweteye. Kairefi no se, sosu marepi no se, lu ape mo le maꞌe au irowe.h 29 Serai ne lu owane lo peri wanure. Ne nomo, wiyawi yahowaꞌi lu taune no fa pati taꞌanere. Ne nomo au noweinoweinamite. Ne nomo au noweinoweiyei su, nomo faraꞌu peri no kairefi aꞌi se lu taune werese maꞌe au teꞌe fiyari areiyerowa.i 30 Kairefi no nomo maꞌe eimawe arosa. Nomo kairefi no se lu taune u tahe se faraꞌu au taꞌane faraꞌuwerowa. Sosu etiri wisere tomu neꞌese aꞌi kairefi no se au taꞌanerowa. Nomo etiri ape mo Jisas lo kairefi se au taꞌanerowa.”
31 Sosu aꞌi pe lowe Owane Sitewi maꞌe au teꞌe tepaꞌasiye su, Owane Sitewi lai wesi ape auseriyeye. Sosu Owane Sitewi lo Hepene Waraꞌi aꞌi lu taune werese, wesi papu ape iroteye ape, marepi hepene lowe lo papu wiye. Sosu lowe Owane Sitewi lo peri kairefi aꞌi se au teꞌe fiyariye.
Krais lo lu taune etiri towafi lowe lo tiyati maꞌe auteye.
32 Lu taune werese, Jisas ne tote tawesiteye ape, lowe marepi taꞌi aꞌi toteteye. Maꞌaru etiri werese towafi lowe lo aiwawe aꞌi, lowe etiri werese lowe taꞌi taꞌi none tiyatiye.j 33 Lu aposel ape mo lai kairefi erasi pefine aꞌi lu taune maꞌe apou au teꞌe fiyariteye. Lowe apou teꞌeye. “Meni Owane Jisas, Owane Sitewi lai si tame taꞌane norohuwe sineye. Peri ape ne pefine aꞌi tene.” Sosu Owane Sitewi lai lu taune werese, peri lo umasiteye ape, le lowe maꞌe au teꞌe wisereye nineꞌiteye. 34-35 Lowe werese etiri ape mo lowe ariye ape, aniye. Lu taune tamo wesi towafi lowe lo, sosu awei pani towafi lowe lo iroteye ape, lu tereꞌe maꞌaru se eteye. Sosu lowe maꞌaru werese towafi lowe lo lu aposel ape mo maꞌe auwe. Lu feni ape mo maꞌaru aniye su, lowe lu taune maꞌe, etiri maꞌaru ariye aꞌi iroteye ape mo maꞌe, isafiye nonetiye.k
36 Sosu aꞌi pe meni ta iyape Josep, Livai lo lu tewi, pani Saiprus maꞌe fai ape, awei pani tewi ta iroteye. Meni tereꞌe ta lai eteye. Sosu Josep iyape tereꞌe Barnabas lo sitewi aiwawe aꞌi, “Meni ape lai lu taune maꞌe marepi au fetaneye kairefiyesiya.” 37 Josep Barnabas le maꞌaru aniyewe, lu aposel ape mo maꞌe aitai.