Ananaias, tani lo Safaira peri wawero au teꞌeye.
5
Sosu aꞌi pe meni ta iyape Ananaias, sosu tani lo aiwawe, iyape Safaira, lowesi awei pani tewi ta iroteye. Sosu lowesi teꞌe tiyatiyewe, apou eiye, “Notosi awei pani tewi towafi notosi lo maꞌaru aniyewe, lu aposel maꞌe aurowa.” Sosu meni tereꞌe awei tewi lowesi lo eteyewe, maꞌaru tamo Ananaias maꞌe auwe. 2 Maꞌaru aniye su, lowesi teꞌe tiyatiyewe, “Notosi maꞌaru tewi aꞌi lu feni maꞌe auwei. Notosi tewi aꞌi aniterowa.” Sosu le lu feni maꞌe maꞌaru tewi aꞌi tamo auwewe, lowe maꞌe apou eiye, “Notosi maꞌaru werese fene maꞌe ausai.”a 3 Sosu aꞌi pe Pita apou ei toweriye, “Ananaias, ne piyene Owane Sitewi lo Hepene Waraꞌi se teꞌe areareye awere? Ne piyene sepei, Satan, ne lire papu wirai awere? Ne awei lo maꞌaru tewi aꞌi aniteye.b 4 Awei pani tewi ape fenesi ro wiyeme aꞌi ne. Meni tereꞌe awei pani ape eteye su, maꞌaru ape, le ne maꞌe auwe ape, maꞌaru werese ape mo fenesi lo wiyeme aꞌi ne. Ne aꞌi lai eiwerou su faraꞌu nonerowa. Etiri ape fenesi lo aꞌi ne. Ahowa, ne lai nomo maꞌe teꞌe areareye. Yo seni ape, fenesi irowe ape, luwaru aꞌi ne. Sosu ne lai Owane Sitewi teꞌe areareye su, ne yo seni tahe luwaru erasi aꞌi irowe.” 5 Ananaias peri ape wanuwe su, le awei sahe wiyeine temeniyeye. Lu taune werese etiri ape wanuwe su, lowe atoweiye erasi aꞌi irowe. 6 Sosu aꞌi pe yoꞌorei lu tamo faiyewe, lowe meni ape ipari tahe napetuwewe, omo nowe maꞌe sutaitetiye. Sosu lowe fisiye yo sahe towasiye. 7 Nowe meꞌiye su tani lo lu aposel maꞌe fai. Le etiri ape soꞌoru taꞌama. 8 Sosu Pita le maꞌe apou ei toweriye, “Maꞌaru werese eite ne, awei pani tewi lo maꞌaru werese aꞌi awere? Fenesi maꞌaru werese aꞌi nomo maꞌe auwe awere?” Le itiyaꞌu apou eiye, “Ei, notosi maꞌaru werese eite fene maꞌe auwe.” 9 Sosu Pita le maꞌe apou eiye, “Fenesi piyene Owane Sitewi lo Hepene Waraꞌi se teꞌe areareye. Siyete, yoꞌorei lu tamo saro irosiya. Lowe meni no sutaitetiyewe, fisiye yo sahe towasinari. Nowe pereye aꞌi lowe ne sutaitetirowa.” 10 Pereye aꞌi menitani ape awei sahe wiyeine temeniyeye. Yoꞌorei lu ape mo si fai su, lowe tani lo temeniyeyei siyerai. Sosu lowe menitani ape sutaitetiyewe, fisiye yo sahe towasiye. Meni lo atahe aꞌi sahe towasiye. 11 Lu taune werese, Jisas ne tote tawesiteye ape, sosu lu taune tereꞌe tamo etiri ape wanuwe su, lowe atoweiyeyei erasi irowe.Lu aposel lai lu taune u se ape au taꞌane faraꞌuweye.
12 Sosu aꞌi pe lu aposel werese etiri erasi pefine tomu neꞌese lu taune maꞌe au taꞌaneye. Lu feni, Jisas umasisiya ape, Owane Sitewi lo wesi tewi iyape Solomon lo aise perei taꞌuweteye.c 13 Owe lu taune tereꞌe tamo lowe mase taꞌuweye. Ahowa, lowe lu aposel ape mo ne marepi erasi aꞌi toteye. Ahowa, lowe lowe mase taꞌuwerai taꞌame. Lowe etiri werese lowe siyeteye ape, atoweiyeye 14 Lu taune tomu neꞌese aꞌi Jisas lo peri wanuwewe, le ne tote tawesi umasiteye. 15 Serai lu taune tomu neꞌese Jisas ne tote tawesi umasinamiteye su, lowe lu taune u se ape, lowe yo mai sahe henetai. Lowe lu taune u se ape mo, yo sahe howei ereteye su, lowe apou toteye, “Lu aposel ape mo yo sahe aiyeyei su, hawowou lowe lo lai lu taune u se napeturowa. Hawowou lowe lo ape lu taune napetuwei su, u lowe lo ape mo faraꞌuwerowa.” 16 Lu taune tomu neꞌese omo tereꞌe tereꞌe Jerulalem atahe aꞌi maꞌe fai ape, lowe lu taune u se ape sutaitetai. Lu taune sepei luwaru aꞌi se ape hene aitai. Lu aposel ape mo lai lu taune werese u se ape au taꞌane faraꞌuweye.
Au heseyei lu owane tamo lu aposel maꞌe au luwaruweye.
17 Sosu aꞌi pe au heseyei meni owane pefine aꞌi, lu tewi lo mase, Sadyusi lo lu tewi, lowe werese Jisas lo lu feni ne marepi luwaru aꞌi tote afofoweye. 18 Lowe lu aposel ape mo ereti se anite tawesiyewe, kalabus wesi papu ani aroweye. 19 Nowe pasiyeye su, lowe kalabus wesi papu saro iroteye. Owane Sitewi lo ipari wisere aꞌi kalabus wesi yo tosowewe, nowe maꞌe heneti.d 20 Owane Sitewi lo ipari wisere aꞌi ape lai lowe maꞌe apou eiye, “Fene Owane Sitewi lo wesi tutawe sahe teiri. Sosu fene Owane Sitewi lo wesi tutawe teiyei su, fene lu taune werese maꞌe peri heꞌi aꞌi eite au teꞌe fiyariye. Peri heꞌi eite, fene au teꞌe fiyariyei ape, Owane Sitewi lai marepi hepene heꞌi aꞌi lu taune maꞌe aurowa.” 21 Sosu lowe esi peri ape wanuwe su, lowe, Owane Sitewi lo wesi tutawe papu wiye. Papu wiye su, lowe lu taune werese Owane Sitewi lo peri heꞌi aꞌi au teꞌe fiyariye.
Sosu aꞌi pe au heseyei meni owane pefine aꞌi sosu lu feni lo mase henerai su, lowe Israel lo lu owane tamo ei taꞌuwerai. Lowe ai atu siye lu tamo kalabus wesi maꞌe lu aposel ape mo henetaiyei ne eimawesawi. 22 Lu owane ape mo kalabus wesi maꞌe henerai su, lowe lu aposel ape mo siye ariye. Sosu lowe au heseyei meni owane pefine maꞌe si tame faiyewe, lowe maꞌe itiyaꞌu teꞌeye, 23 “Nomo liyewe kalabus wesi lo yo ti tepaꞌasiye, yo tewiye tewiye sahe lu hesi ape saro teiteye. Nomo yo eite tosowe su, lu ape mo papu ariye siyeye.” 24 Meni owane, Owane Sitewi lo wesi au noweinoweiteye ape, sosu au heseyei lu owane wanuwe su, lowe apou toteye. Piye etiri ape, pereye henerai ape, awere? Nomo soꞌoru taꞌama. Lu taune werese etiri ape wanuwei su, lowe piye toterowa awere? 25 Ahowa, meni ta lowe maꞌe henerai. Le lowe maꞌe apou eiye. “Wanure, lu ape mo fene kalabus wesi maꞌe hene fu arosawi ape, lowe werese Owane Sitewi lo wesi tutawe papu sahe lu taune werese maꞌe au teꞌe fiyarisiye.” 26 Lowe peri eite wanuwe su, kalabus wesi lo meni owane, lu feni lo mase, lowe lu aposel ape mo lu owane maꞌe si tame henetai. Lowe ereti anite tawesi taꞌame. Lowe lu taune werese ne atoweiyeye. Lowe lu taune tapiye lowe maꞌe fusawiyei ne atoweiyeye.
Lu aposel lai peri teꞌe fiyariyei ne atoweiye taꞌame.
27 Lowe henetai su, lu owane werese lowe ponei sahe au teiye. Sosu au heseyei meni owane pefine aꞌi lowe maꞌe peri tomu neꞌese ei toweriyei. 28 Le apou ei toweriye, “Nomo fene peri kairefi aꞌi se Jisas lo iyape se au teꞌe einamiye. Ahowa, fene lu taune werese maꞌe omo Jerusalem sahe au teꞌe fiyariye. Fene lu taune werese maꞌe apou au fu teꞌeye, ‘Fene, au heseyei lu owane werese aiwawe aꞌi lai meni ape Jisas me tapeꞌi sahe aine teraꞌeye.’”e
29 Sosu aꞌi pe Pita lu feni mase lowe itiyaꞌu teꞌeye, “Nomo Owane Sitewi lo peri wiyeme aꞌi umasiyei. Nomo lu lo peri umasirowata.f 30 Fene Jisas me tapeꞌi sahe hene ani aine teraꞌeye su, Owane Sitewi lai yaꞌariyei nomo lo le ne tote tawesi umasiye ape, le lai Jisas si tame taꞌane norohuwe sineye. Fene Jisas me tapeꞌi sahe niꞌari se hene ani aine tawere teraꞌeye. 31 Owane Sitewi lai Jisas si tame taꞌane norohuwe hene sineye su, le Jisas, meni owane pefine aꞌi, ei ani aroweye. Jisas, lu taune werese marepi hepene heꞌi auwe ape, Owane Sitewi lai le maꞌe kairefi erasi auwe. Israel lo lu taꞌi taꞌi marepi hepene ani awetowei su, Jisas lai yo seni luwaru aꞌi lowe lo au ani sasari pamowerowa.g 32 Nomo, Owane Sitewi lo Hepene Waraꞌi aiwawe aꞌi, nomo etiri ape mo siyeye. Lu taune taꞌi taꞌi aꞌi, peri lo tote tawesi umasiteye ape, Owane Sitewi lai Hepene Waraꞌi lo lu taune werese ape mo papu wiyei ne eimawe arosai.”
Gamaliel lu owane ape mo maꞌe peri wisere aꞌi au teꞌeye.
33 Sosu aꞌi pe lu owane werese peri ape wanuwe su, lowe maꞌe ai marepi erasi aꞌi toteye. Lowe lu aposel werese aine teraꞌeyei ne toteye. 34 Meni Farisi owane ta, iyape Gamaliel, meni ape Owane Sitewi lo yo peri soꞌoruwe siye meni ne. Lu taune werese meni ape ne tote wisereyeye. Meni ape lu owane ponei sahe sineteye su, le apou eiye, “Lu aposel ape mo ne, nomo lowe nowe maꞌe eimawe arosawiyei. Nowe oso aꞌi su nomo faraꞌu lowe ei aniyei.” 35 Sosu le lu owane maꞌe au teꞌeye, “Israel lo lu owane. Fene peri ano wanure! Fene lowe maꞌe au luwaruweyei su, fene tu etiri ape ne tote eti hese ereirowa. 36 Tu naifa meni ta henerai, iyape Teudas, le apou eiye, ‘Ane meni erasi iyape se.’ Serai lu tomu neꞌese (400 aiwawe aꞌi) le moꞌo umasiteye. Sosu lowe meni ape aine teraꞌeye su, lu feni lo atoweiye fiyariti. Lu feni lo atoweiye fiyariye su, wiyawi lo yahowaꞌi henerai!h 37 Moꞌo su, meni tereꞌe henerai, iyape Judas, Galili maꞌe fai. Lu taune werese iyape leseye su, meni ape lu feni lo mase ai erasi atuteye. Lowe meni ape aine teraꞌeye. Lu feni lo tereꞌe tereꞌe atoweiye fiyariti. 38 Serai fene marepi ano wanu totere! Ane apou toteye, fene Jisas lo lu aposel kalabus wesi nowe maꞌe hene ani arosaire. Fene lowe maꞌe owe ape au luwaruwere. Meni ta lai wiyawi ape lo sitewi irosiya su, wiyawi eite yahowaꞌi henerairowa. 39 Ahowa, Owane Sitewi lai wiyawi ape lo sitewi irosiya su, fene lowe maꞌe owe ape einamire. Fene lai Owane Sitewi maꞌe ai atu tiyatiye. Serai fene lu aposel werese maꞌe owe ape au luwaruwere.”
Lowe lu aposel lo meꞌiyeni maꞌe wafei se aineye.
40 Sosu aꞌi pe le peri teꞌe tepaꞌasiye su, lu owane werese meni eite lo peri wanu umasiye. Sosu lowe lu aposel ape mo teꞌe aniye. Lowe wafei se meꞌiyeni lowe lo maꞌe aineye. Lowe apou teꞌeye, “Fene Jisas lo iyape se owe ape teꞌe fiyarite.” Sosu lowe wesi nowe maꞌe ani arosawi.i 41 Lowe taꞌuweyei wesi arunati su, lowe Owane Sitewi ne au teꞌe wisereye nineꞌiteye. Lowe Jisas lo iyape se neritase taꞌame. Serai lowe Owane Sitewi maꞌe peri au teꞌe wisereye nineꞌiteye.j 42 Mi mi weriyei Owane Sitewi lo wesi tutawe sahe, sosu wesi tereꞌe tereꞌe sahe lowe Jisas, Owane Sitewi lai ariariyeye ape, au teꞌe fiyari areiyeteye.