Lu aposel lai lu tamo au teꞌe ariariyeye.
6
Sosu aꞌi pe lu taune tomu neꞌese Jisas lo peri wanu tote tawesi umasiteye. Lu tamo Grik lo peri teꞌeye ape, lowe lu tamo, Hibru lo peri teꞌeye ape, ai peri fu teꞌeye. Lowe apou eiye, “Fene taune weiname towafi fene lo au noweinoweisiya. Ahowa, fene taune weiname towafi nomo lo aweraꞌiyenati. Mi mi weriyei fene taune weiname maꞌaru noneye su, fene taune weiname nomo lo aweraꞌiyenati.”a 2 Sosu lu aposel ape ne (12) lowe lu taune, Jisas ne tote tawesiteye ape, teꞌe taꞌuweraiyewe, lowe maꞌe apou teꞌeye, “Nomo Owane Sitewi lo peri, nomo fene maꞌe au teꞌeye ape, aweraꞌiyerowata. Ahowa, nomo taune weiname etiri maꞌaru au aweraꞌiyenatirowata. Nomo Owane Sitewi lo peri aꞌi au teꞌe fiyariyei. 3 Serai fene werese, Meni Owane Pefine aꞌi umasisiya ape, wanure, fene lu ereti feni werese feni hesi aꞌi (7) ariariyere. Lu tewi ape mo Owane Sitewi lo Hepene Waraꞌi papu irosiya. Lowe etiri werese ape mo siye soꞌoruwesiya. Lu taune werese lowe ne marepi wisere aꞌi totesiya. Fene lu ape mo ariariyeyei su, lowe wiyawi tereꞌe tereꞌe ape mo au noweinoweirowa. 4 Nomo aꞌi lai mi mi weriyei Owane Sitewi lo peri lu taune maꞌe au teꞌe fiyarirowa. Sosu nomo Owane Sitewi maꞌe au teꞌe tiyatirowa. Etiri eite mo pefine aꞌi tene.”5 Lu taune werese peri ape ne wisere aꞌi toteye. Sosu lowe meni Stiven ariariyeye. Meni ape Owane Sitewi lo peri wanu tote tawesi umasiteye. Owane Sitewi lo Hepene Waraꞌi aꞌi le papu iroteye. Lowe lu tereꞌe tereꞌe ariariyeye, meni Filip, meni Prokorus, meni Nikanor, meni Timon, meni Parmenas, meni Nikolas, omo Antiok maꞌe fai ape, le Juda meni heꞌi aꞌi henerai. 6 Lowe lu ape mo ariariyeye su, lowe lu aposel ape mo maꞌe henetai. Sosu lowe lu ape mo ereti hire sahe fuwewe, sosu Owane Sitewi maꞌe au teꞌe wisereyeye.
7 Sosu lu aposel ape mo Owane Sitewi lo peri au teꞌe fiyari howeiye. Serai lu taune tomu neꞌese aꞌi Owane Sitewi lo peri wanu tote tawesi umasiteyewe. Au heseyei lu owane tomu neꞌese Jisas lo peri wanu tote tawesi umasiteye.b
Lu owane tamo Stiven ereti lo sahe anite tawesiye.
8 Sosu aꞌi pe Owane Sitewi lai meni Stiven maꞌe kairefiyeyei lo auwe. Sosu le le maꞌe ferafereiyei lo erasi aꞌi auwe. Meni ape lu taune werese maꞌe wiyawi erasi pefine aꞌi taꞌaneye. 9 Sosu lu tamo Stiven ne ai marepi toteteye. Lu ape mo, lowe omo pani Sairini, omo pani Aleksandria, omo pani Silisia, omo pani Esia lowe maꞌe fai. Lowe Stiven maꞌe henerai. Marepi lowe lo apou toteteye. “Nomo taꞌuwerai su, nomo marepi fetane aꞌi au teꞌesiya. Tu lu ape mo wiyawi erasi pefine aꞌi taꞌaneteye. Lowe maꞌaru aniyei ne tote taꞌame.” Serai lowe Stiven lo peri wanuwei ne fai. Lowe Stiven lo peri wanuwe su, lowe Stiven maꞌe ai marepi teꞌe tiyatiteye. 10 Ahowa, Owane Sitewi lai Stiven maꞌe marepi wisere aꞌi lo auwewe, serai lowe ai marepi towafi lowe lo yahowaꞌi au irowe. Owane Sitewi lo Hepene Waraꞌi Stiven maꞌe kairefiyeyei lo auwe.c 11 Sosu lowe eresene aꞌi lu tereꞌe tereꞌe tamo maꞌe marepi wawero aꞌi apou teꞌeye. Fene peri nomo lo le ne au fu teꞌeyei su, nomo fene maꞌe maꞌaru tamo aurowa. Fene peri nomo lo au teꞌere, “Nomo meni ape, Owane Sitewi, sosu Moses lowesi maꞌe teꞌe naruwe. Nomo peri ape wanuwe.” 12 Serai lu taune tomu neꞌese Stiven maꞌe ai marepi erasi aꞌi totenamiteye. Lowe yaꞌariyei lo yo peri siye lu tamo, sosu yaꞌariyei lu tamo ai marepi au irowe. Sosu lowe werese Stiven anite tawesiyewe, au heseyei lu owane maꞌe heneti. 13 Lowe lu tamo, peri wawero au fu teꞌeteye ape, henetai. Lowe apou eiye, “Meni eite mi mi weriyei weriyei Owane Sitewi lo wesi teꞌe luwaruwenamiteye. Yo peri nomo lo aiwawe aꞌi teꞌe naruwe. 14 Nomo peri lo apou wanuwe. Le apou eiye, ‘Meni eite Jisas, Nasaret maꞌe fai ape, le Owane Sitewi lo wesi ani erau fiyariyei.’ Peri tereꞌe le apou eiye, ‘Ane yaꞌariyei nomo lo yo seni weriyei, heꞌi atati awetowei. Yo seni ape, yaꞌariyei nomo lo Moses lai nomo maꞌe auwe.’” 15 Sosu lu ape mo, Stiven maꞌe fu teꞌeyei ne taꞌuwe ape, lowe Stiven lo nihari aꞌi siye etiteye. Nihari lo mi erasi tewi mitaiyeye, Owane Sitewi lo ipari wisere aꞌi lo nihari wou henerai.