Stiven lu owane maꞌe, etiyei ne taꞌuweye ape, au teꞌeye.
7
Sosu aꞌi pe au heseyei meni owane pefine aꞌi le maꞌe ei toweriye, “Lu ape mo, ne fu teꞌesiya ape, peri lowe lo wiyeme aꞌi awere? Piyete awere?” 2 Sosu Stiven itiyaꞌu apou teꞌe, “Lu feni peri ano wanure! Tu naifa yaꞌariyei nomo lo meni Abraham pani Mesopotemia sato iroteye. Nowe meꞌiye su le omo Haran maꞌe fi. Pani Mesopotemia sato iroteye su, Owane Sitewi lai hire yaro irosiya ape, Abraham maꞌe henerai. 3 Owane Sitewi lai le maꞌe apou eiye,‘Lu tewi no, pani awei ape sahe no arunatire. Sosu ane ne maꞌe pani awei tereꞌe heꞌi aꞌi au atuaturowa. Pani awei ape maꞌe ire!’ Stt 12:1
4 Sosu aꞌi pe le pani Kaldia arunatiyewe fi. Sosu le fi su, le omo Haran maꞌe onuri. Abraham lo tai temeniyeye su, Owane Sitewi lai le omo pani tereꞌe maꞌe eimawesawi. Omo pani ape, nowe pereye eite se, fene saro irosiya.a 5 Owane Sitewi lai etiri ta le maꞌe au taꞌame. Opiyai! Le le maꞌe awei tewi oso aꞌi au taꞌame. Ahowa, Owane Sitewi le maꞌe apou eiye,
‘Moꞌo su ane awei pani werese ape lu tewi no maꞌe aurowa.’ Stt 12:7
‘Nowe meꞌiye su lu tewi no awei pani ape arunatirowa. Lu tereꞌe lo pani sahe iroteyei. Lu tewi tereꞌe ape mo lowe maꞌe au luwaruwerowa. Lowe lu tewi no wafei se ti tawesirowa. Sosu wiyawi yahowaꞌi erasi taꞌanerowa. Maꞌaru anirowata. Lowe wiyawi yahowaꞌi taꞌanerowa. Lowe pani ape sahe iyu menei (400 aiwawe aꞌi) iroteye. 7 Iyu menei (400) i tepaꞌasiyei su, ane lai lu tewi tereꞌe, fene werese wiyawi yahowaꞌi anite tawesi ape, au hese ereirowa. Lu tewi no pani Isip arunatirowawe, pani eite sahe ane ne au teꞌe wisereye nineꞌinamirowa.’ Kis 3:12
8 Owane Sitewi lai Abraham maꞌe peri teꞌe naneiyei ape au teꞌeye. Peri teꞌe naneiyei ape apou aꞌi, ‘Ne tahe no meneꞌe se touwe. Ne tahe touwei ape siyeyei su, ne Owane Sitewi maꞌe tote tawesiyei.’ Abraham lo tani meni eime ta auteiye, iyape Aisak. Sosu poweiye ereti feni werese feni hesi heta (8) i tepaꞌasiye su, Abraham meni eime lo tahe touwe. Meni eime tahe touwe ape, Abraham Owane Sitewi lo peri teꞌe naneiyei ape aniye. Nowe meꞌiye su Aisak lo tani meni eime ta auteiye, iyape Jekop. Nowe meꞌiye su Jekop lo tani werese eimane ereti feni hesi lowe hesi aꞌi (12) auteiye. Jekop lo eimane werese yaꞌariyei sitewi henerai.b 9 Josep lo airu werese, lowe le maꞌe yo seni luwaru aꞌi irowe. Sosu lowe lu tereꞌe tamo siyeye su, lowe lu tereꞌe ape maꞌe Josep henetiyewe, pani Isip lowe lo maꞌe eimawesawi. Josep wiyawi yahowaꞌi taꞌaneteye. Josep pani Isip sahe iroteye su, Owane Sitewi lai le mase ironamiteye.c 10 Owane Sitewi lai le au noweinoweiteye. Lowe le au luwaruweteye su, Owane Sitewi lai le au pati ferafereiteye. Owane Sitewi le ne marepi tote wisereyeteye. Sosu Isip lo meni owane tutawe Josep ne aiwawe aꞌi marepi wisereye aꞌi toteye. Sosu Josep Isip lo pani werese au noweinoweiteye. Sosu le Isip lo meni owane tutawe lo wesi au noweinoweiteye.d 11 Josep meni owane henerai su, lu taune werese pani Isip sahe, pani Kenan sahe ene ayei poꞌuteye. Lau erasi henerai su, yaꞌariyei nomo lo werese ayei nehi ani taꞌame. Lu taune werese lau mase teriteteye.e 12 Meni ape Jekop peri heneruwe ta, ayei tomu neꞌese Isip sahe iroteye ape, wanuwe. Sosu le tu eimane topo lo, yaꞌariyei nomo lo, pani Isip maꞌe eimawesawi. 13 Sosu moꞌo Josep airu werese lo maꞌe apou eiye,
‘Ane Josep, paꞌise towafi fene lo ne. Marepi fene lo apou aꞌi toteye, ane temeniyeye. Ahowa, siyere! Ane norohu aꞌi irosiya.’ Stt 45:4
Sosu Isip lo meni owane tutawe, le Josep lo awaripi wanu soꞌoruweye.f 14 Sosu moꞌo Josep awaripi lo Isip maꞌe teꞌe aniye. Josep lo lu feni werese Isip maꞌe fai, lu tomu neꞌese aꞌi (75 aiwawe aꞌi) Isip maꞌe wiye.g 15 Sosu Jekop pani Isip maꞌe itowe. Le, eimane lo aiwawe aꞌi, saro ahe temeniyeye.h 16 Paꞌare lowe lo omo Sekem maꞌe aiti. Paꞌare lowe lo Abraham lo fisiye yo sahe fu arowe. Tu naifa fisiye yo ape Abraham lai Hamor lo eimane tamo se ete aniye. Abraham maꞌaru tamo auwe.i 17 Nowe ape se peri wiyeme aꞌi Owane Sitewi lai Abraham maꞌe au teꞌe naneiye ape, atahe aꞌi henerai su, lu tewi no lo tomu neꞌese henerai. 18 Sosu nowe meꞌiye su Isip lo meni owane tutawe tereꞌe henerai. Le Josep wanu soꞌoru taꞌama.j 19 Le lai yaꞌariyei nomo lo maꞌe yo seni luwaru aꞌi au irowe. Le eimane heꞌi lowe lo werese liye paꞌare aꞌi nowe maꞌe fu arosawi. Sosu eimane heꞌi tomu neꞌese temeniyeye.k 20 Nowe ape se menitani ta meni eime topo lo, iyape Moses, auteiye. Meni eime ape, Owane Sitewi lo nihe se, wisere aꞌi ne. Yame hesi heta, meni eime lo mai le maꞌe moꞌu au ateye. Lowe Moses tai lo wesi sahe fareyare iroteye.l 21 Yame hesi heta i tepaꞌasiye su, meni ta Isip lo meni owane tutawe maꞌe le ne au teꞌeye. Isip lo meni owane tutawe lo eime taune, meni eime ape siyeyewe, wesi topo lo maꞌe au noweinoweiyei ne heneti. Eime taune ape Moses moꞌu au ateye. Meni eime topo lo wou aꞌi ne.m 22 Meni eite, Moses, le meni erasi henerai tepaꞌasiye. Le Isip lo etiri, yo seni werese siye soꞌoruwe tepaꞌasiye. Isip lo etiri, yo seni werese aꞌi, lowe le maꞌe au teꞌe atuatu tepaꞌasiye. Le Isip lo peri wanu soꞌoruweye. Le wiyawi erasi aꞌi taꞌaneteye.
23 Sosu aꞌi pe le iyu menei lu hesi werese (40) siyeye su, le lu tewi topo lo maꞌe sewiyeyei ne toteye. Lu tewi topo lo aiwawe aꞌi Israel lo lu tewi. 24 Sosu le Isip lo meni ta, Israel lo meni tereꞌe ta maꞌe au luwaruweye ape, siyeye. Sosu le witane aꞌi se Isip lo meni ape aine teraꞌeye.n 25 Sosu Moses apou toteye, ‘Owane Sitewi lai ane Israel lo lu tewi au pati ferafereiyei ne eimawesai. Serai lowe ane siyeye su, lowe etiri ta siye soꞌoruweyei. Owane Sitewi lai ane maꞌe au pati ferafereiyei ne eimawesai.’ Ahowa, lowe siye soꞌoru taꞌama. 26 Poweiye moꞌo su Moses lu hesi, ai atu tiyatiteye ape, siyeye. Le lowesi maꞌe apou eiye, ‘Fenesi ai atu tiyati arure! Fenesi lu tewi taꞌi aiwawe aꞌi ne. Fenesi piyene ai atu tiyati irowe awere?’ 27 Sosu meni ape, meni tereꞌe maꞌe ai atu tiyatiye ape, le meni Moses maꞌe ani ere itesawiyewe, itiyaꞌu apou ei toweriye,
‘Eiwerai ne kairefi nomo ne au hese ereiyei ne auwe awere? Ne yo seni nomo lo au hese ereirowata.
28 Ne ane aiwawe aꞌi aine teraꞌeyei awere? Liyewe ne lai Isip lo meni ta aine teraꞌeye aiwawe aꞌi ne. Nomo peri heneruwe ape wanu tepaꞌasiye.’ Kis 2:14
29 Sosu Moses peri ape wanuwe su, le atoweiye erasi aꞌi iteroti. Le omo pani Midian maꞌe atoweiye iteroti. Sosu le menitani taꞌi aꞌi naituwe. Lowesi eimane hesi auteiye. Le lu tewi tereꞌe lo omo pani onuteye.o
30 Sosu aꞌi pe iyu menei lu hesi werese (40) i tepaꞌasiye su, Moses omo pani, lu taꞌame ape, iroteye. Sosu Owane Sitewi lo ipari wisere aꞌi Moses maꞌe itorai. Le me same ta sahe yehe aꞌi papu wiye. Omo pite aꞌi iyape Sainai atahe aꞌi iroteye. 31 Moses etiri ape siyeye su, le hepene se suꞌariye. Le atahe aꞌi aiye ataheyeye su, le Meni Owane Pefine aꞌi lo peri ahi erasi wanuwe. 32 Meni Owane Pefine lo peri ahi apou eiye,
‘Ane aꞌi lai Abraham lo Owane Sitewi, Aisak lo Owane Sitewi, Jekop lo Owane Sitewi.’ Kis 3:6
Sosu Moses tei atoweiye auseriyeye. Le me ape yehe ti meteteye ape, siyeye ne atoweiyeye. 33 Sosu aꞌi pe Meni Owane Pefine le maꞌe apou eiye,
‘Lowe tahe no ani tahe ani arosawire. Awei eite ano aꞌi meni ta teirowata.
34 Ane Isip lo lu taune werese lu feni ano maꞌe au luwaruweyei siyeye. Ane lu uruwei lowe lo wanuwe. Ane lai lowe hene ani ferafereiyei ne fai. Serai ane ne pani Isip maꞌe si lowe maꞌe au ferafereiyei ne eimawesawiyei.’” Kis 3:7-10
35 Sosu aꞌi pe Stiven apou tame teꞌeye, “Meni Moses ape ne, lowe tu naifa le ne apou teꞌeye. ‘Eiwerai ne kairefiyeyei nomo ne au hese ereiyei ne auwe awere?’ Owane Sitewi lai meni Moses lowe maꞌe eimawesawi. Moses lai meni owane lowe lo henerai. Owane Sitewi lo ipari wisere aꞌi me same papu iroteye su, Owane Sitewi lai meni ape ariariyeye.p 36 Sosu le lu tewi lo, Isip lo omo pani hene arunari. Le etiri erasi pefine aꞌi tereꞌe tereꞌe, tu lowe siyeye taꞌame ape, taꞌaneye. Le etiri erasi pefine aꞌi ape mo Isip lo pani sahe taꞌaneye. Le wiyawi erasi pefine aꞌi Saꞌi Loꞌu aꞌi sahe taꞌaneye. Le wiyawi erasi pefine aꞌi omo pani, lu taꞌame ape sahe, taꞌaneye. Lowe omo pani, lu taꞌame ape sahe, iyu menei lu hesi werese (40) saro iroteye.q 37 Meni ape, Moses, le aiwawe aꞌi Israel lo lu tewi maꞌe apou eiye,
‘Nowe meꞌiye ta su Owane Sitewi lai au teꞌe siye meni ta, ane aiwawe aꞌi, fene maꞌe eimawesai. Le lu tewi nomo lo aiwawe aꞌi henerai.’ Lo 18:15
38 Meni ape, Moses, le lai aiwawe aꞌi omo pani ariye aꞌi saro iroteye. Owane Sitewi lo ipari wisere aꞌi Omo Sainai sahe au teꞌeye su, le aꞌi lai yaꞌariyei nomo lo mase iroteye. Owane Sitewi lai meni ape maꞌe yo peri, marepi hepene ausiya ape, norohu aꞌi au teꞌeye. Serai meni ape Owane Sitewi lo peri fene maꞌe teꞌe fiyariye. Le nomo maꞌe au teꞌe fiyariye.r 39 Yaꞌariyei nomo lo yo peri ape wanuwe su, lowe yo peri ape umasi taꞌame. Ahowa, lowe meni ape ne meꞌiyeni maꞌe atati aruwe. Lowe marepi apou toteye, ‘Nomo pani Isip si ire.’ 40 Sosu lowe Moses lo paꞌise Aron maꞌe apou teꞌeye,
‘Meni tereꞌe ape Moses le nomo Isip maꞌe henetai ape, le eiwerou fi awere? Le temeniyeye awere? Nomo soꞌoru taꞌama. Serai ne etiri ta taꞌanere. Etiri ape hepene se heneraiyei. Serai nomo etiri ape nomo omo pani wisere aꞌi maꞌe henetirowa.’ Kis 32:1
41 Sosu nowe ape se lowe fe bulmakau yene nihari aiwawe tapiye gol se taꞌaneye. Lowe fe loꞌu nihari eite maꞌe au heseye. Lowe yakowei erasi irowe. Lowe etiri eite maꞌe au teꞌe wisereye nineꞌiteye.s 42 Sosu Owane Sitewi lai lowe ne meꞌiyeni maꞌe atati aruwe. Sosu Owane Sitewi lai lowe aweraꞌiyenati. Etiri werese, niꞌarawe maꞌe iroteye ape, lowe etiri ape mo ne au teꞌe wisereye nineꞌiteye. Tu naifa Owane Sitewi lo au teꞌe siye meni ta apou Owane Sitewi lo one towe sahe aiwawe leseye,
‘Israel lo lu tewi, fene omo pani, etiri werese poꞌuteteye ape, iyu menei lu hesi werese (40) sahe iroteye su, fene fe loꞌu tamo ane maꞌe au hese taꞌame. 43 Ahowa, fene lai ipari tahe wesi erasi tereꞌe ta, lu taune god wawero, iyape Molek, au teꞌe wisereyeye. Fene god wawero tereꞌe, iyape Refan, lo eiwariyemi fene lai eiwariyemi eite lowe uporo apeꞌi onuwewe, le maꞌe au teꞌe wisereyeteye. Serai ane fene werese omo tereꞌe eyeri maꞌe eimawesawirowa. Omo Babilon aweraꞌiyenatirowawe, sosu feni eiro maꞌe irowa.’ Amo 5:25-27
44 Tu naifa yaꞌariyei nomo lo omo pani etiri werese poꞌuteteye ape, sahe iroteye su, Owane Sitewi lo wesi, ipari tahe se taꞌaneye ape, lowe aiwawe iroteye. Lowe wesi eite siyeye su, lowe apou toteye, ‘Owane Sitewi lai nomo aiwawe iroteye.’ Owane Sitewi lai Moses maꞌe wesi ape, le taꞌaneye ape, au atuatuwe. 45 Sosu lowe wesi ape taꞌaneye su, yaꞌariyei nomo lo wesi ape aiwawe suteti. Meni Josua lai lu taune, omo pani tereꞌe iroteye ape, ai atu tiyatiye su, lowe Owane Sitewi lo ipari tahe wesi ape aiwawe sutaiteti. Lu taune tereꞌe, omo pani iroteye ape, Owane Sitewi lai lowe naꞌari arosawi. Owane Sitewi lo ipari tahe wesi ape omo pani ape sahe iroteye. Nowe meꞌiye su meni owane Devit henerai su, wesi ape iroteye.t 46 Sosu Owane Sitewi lo nihe se, meni ape Devit ne au teꞌe wisereyeteye. Serai Devit lai Owane Sitewi maꞌe apou ei toweriye, ‘Jekop lo Owane Sitewi, ane faraꞌu wesi no tapiye se taꞌanerowa awere?’u 47 Ahowa, Devit Owane Sitewi lo wesi tutawe taꞌane taꞌame. Meni tereꞌe iyape Solomon, le aꞌi lai Owane Sitewi lo wesi tutawe au taꞌaneye.v 48 Ahowa, wesi werese aꞌi, lu taꞌaneye ape, Owane Sitewi lai onu te taꞌame. Au teꞌe siye meni taꞌi Owane Sitewi lo one towe sahe apou leseye, Owane Sitewi apou eiye,
49 ‘Wesi ano niꞌarawe hire yaro ironamisiya. Hi awei ape sahe, ane lowe topo ano saro atosiya. Fene ane ne piye wesi au taꞌaneyei awere? Omo pani eiwerou maꞌe ane howeirowa awere?
50 Ahowa, fene etiri ta tote anite tawesire! Ane ereti topo ano se etiri werese aꞌi taꞌaneye.’ Ais 66:1-2
51 Fene werese peri ano wanure! Fene marepi afofo aꞌi totesiya. Fene lu taune, peri werese ano tote arisinamisiya ape, fene lowe ne aiwawe aꞌi ne. Fene Owane Sitewi lo peri werese wanu arisinamiteye. Marepi fene lo kairefi luwaru aꞌi ne. Fene lai yaꞌariyei fene lo aiwawe aꞌi ne. Lowe Owane Sitewi lo peri umasi taꞌame fene Owane Sitewi lo Hepene Waraꞌi aꞌi lo peri wanu arisinamisiya.w 52 Owane Sitewi lo au teꞌe siye lu werese, fene lai lowe maꞌe au luwaruweteye. Lowe lai lu werese, meni waraꞌi aꞌi ne au teꞌeteye ape, aine teraꞌeye. Tu naifa lowe apou au teꞌeye. Meni waraꞌi aꞌi ta moꞌo aiyerowa. Lowe peri ape au teꞌeye su, yaꞌariyei fene lo lowe aine teraꞌeye. Meni waraꞌi aꞌi ape henerai su, fene meni ape ne meꞌiyeni maꞌe atati aruwewe, sosu le aine teraꞌeye.x 53 Owane Sitewi lai yo peri lo ape fene maꞌe auwe. Owane Sitewi lo ipari werese yo peri lo ape ne fene maꞌe au teꞌeteye. Sosu fene Owane Sitewi lo yo peri ape wanuwe su, fene yo peri lo wanu arisinamisiya.”
Lowe meni Stiven tapiye se aine teraꞌeye.
54 Lowe Stiven lo peri ape wanuwe su, lowe le maꞌe ai marepi erasi pi tomu tawesiteye. 55 Ahowa, Stiven, Owane Sitewi lo Hepene Waraꞌi aꞌi papu iroteye ape, le niꞌarawe hire maꞌe siye etiteye. Le Owane Sitewi lo mitaiyeyei erasi pefine aꞌi siyeye. Le Jisas Owane Sitewi lo eyate feni maꞌe teiyei siyeye.y 56 Sosu le apou eiye, “Siyere! Ane niꞌarawe ani erauwiyei siyesiya. Ane meni ape, hi awei maꞌe niꞌarawe hire maꞌe itorai ape, Owane Sitewi lo eyate feni maꞌe teisiya ape, siyesiya.”z 57 Sosu lowe apaniye lowe lo ereti se anite tawesiyewe, lowe peri erasi aꞌi hareteye. Lowe werese Stiven maꞌe wafei se itero anite ti tawesiri. 58 Sosu lowe omo nowe maꞌe le hene niꞌariti. Lowe le omo nowe maꞌe hene niꞌariti su, lowe tapiye le maꞌe ani fusawi. Sosu lowe lai, peri wawero au teꞌeye ape, ipari tahe ani erau aniyewe, sosu lowe yoꞌorei meni Sol maꞌe ipari tahe ereti lo se au aniteyei. 59 Lowe tapiye fusawi su, Stiven Jisas maꞌe au apou eiye, “Jisas Meni Owane Pefine aꞌi ano, Ne hepene ano hene ani wire.” 60 Sosu le lowe uporo apeꞌi onuwewe, sosu le apou hareye, “Meni Owane Pefine aꞌi, ne yo seni luwaru aꞌi lowe lo au ani sasari pamowere.” Sosu le peri ape tepaꞌasiye su, le temeniyeye.a