Sosu poweiye ape se, lowe lu taune werese, Jisas ne tote tawesiteye ape maꞌe Jerusalem sahe au luwaruwenamiteye. Lowe werese omo pani Judia, omo pani Samaria maꞌe fiyari howeiye. Jisas lo lu aposel wiyeme aꞌi, lowe omo Jerusalem sahe iroteye. 2 Sosu lu tamo Jisas lo peri umasiteye ape, lowe Stiven lo tahe paꞌare fisiye yo sahe funari. Sosu lowe luwei erasi aꞌi ewiteye. 3 Meni ape Sol lai Jisas lo lu feni werese au luwaruweyei ne toteye. Le wesi taꞌi taꞌi werese maꞌe lu taune werese hene niꞌarititeye, kalabus wesi maꞌe heneti.^a

4 Serai lu taune werese, omo omo fiyari howeiye ape, lowe Jisas lo peri teꞌe fiyariteye. 5 Meni Filip omo Samaria maꞌe fi. Le lu taune werese maꞌe omo ape sahe meni Jisas, Owane Sitewi lai ariariyeye ape ne, au teꞌe fiyariyei ne fi. 6 Sosu lu taune werese etiri erasi pefine aꞌi, Filip taꞌaneteye ape, lowe peri lo wanuwe su, lowe peri ape wanu tote tawesi umasiteye. 7 Sosu le lu taune tomu neꞌese, sepei luwaru tomu neꞌese aꞌi papu iroteye ape, le lai sepei luwaru aꞌi ape mo au taꞌane sasari arosawi. Sepei luwaru aꞌi hare uteyei erasi irowe su, lowe lu taune werese arunatiyewe fi. Lu taune lowe afofo aꞌi se, le lowe lowe lo au taꞌane faraꞌuweye. 8 Serai lu taune werese, omo ape sahe iroteye ape, lowe marepi erasi aꞌi wisereye nineꞌiteye.

9 Nowe ape se meni ta, iyape Saimon, omo ape sahe iroteye. Le sinariyei meni erasi aꞌi ne. Nowe tu naifa le sinariyei seni au taꞌaneteye. Sosu lu taune werese, omo Samaria sahe, lowe meni ape marepi tote wisereyeye. Le apou eiye, “Ane meni erasi aꞌi ne. Ane meni iyape se ne.” 10 Sosu lu taune werese lu taune iyape se, sosu lu taune tereꞌe lowe werese Saimon lo peri wanu etiteye. Lowe apou au teꞌeye, “Meni ape Owane Sitewi lo kairefi se irosiya.” 11 Lu taune werese sinariyei siyeye su, lowe werese meni ape umasiteye. 12 Sosu aꞌi pe Filip peri heneruwe wisere aꞌi lu taune werese maꞌe au teꞌeteye. Le aiwawe aꞌi Jisas Krais lo iyape ne au teꞌeteye su, lu taune tomu neꞌese wanu tote tawesi umasiye. Serai lu taune Jisas ne tote tawesiye su, le moꞌo lu taune maꞌe saꞌi au huwe. 13 Sosu Saimon aiwawe Filip lo peri wanuwe su, le aiwawe aꞌi Jisas ne tote tawesi umasiye. Sosu Filip le maꞌe saꞌi au huwe. Sosu meni ape Filip moꞌo umasiye. Le Filip lo etiri wisere aꞌi siyeye su, le hepene se suꞌariye.

14 Sosu aꞌi pe lu taune tomu neꞌese, omo Samaria sahe iroteye ape, Jisas ne tote tawesi umasiteye. Sosu lu aposel ape mo, omo Jerusalem sahe iroteye ape, tote tawesiyei lowe lo wanuwe su, lowe lu hesi Pita, Jon lowe maꞌe eimawesawi. 15 Lowesi henerai su, lowesi Owane Sitewi maꞌe apou au teꞌe toweriye. “Ne Hepene Waraꞌi aꞌi no lu taune werese maꞌe, omo Samaria iroteye ape, marepi hepene papu au ani wiyei ne eimawesaire.” 16 Owane Sitewi lo Hepene Waraꞌi aꞌi lu taune werese ape mo tu naifa marepi lowe lo papu wi taꞌame. Lowe Meni Owane Jisas lo iyape se saꞌi ani huwe. 17 Sosu Pita, Jon lowesi ereti lowesi lo se lu taune werese maꞌe hire isawe hetesiyewe, Owane Sitewi lo Hepene Waraꞌi lowe papu wira.^b

18 Sosu aꞌi pe lowesi meni Saimon ereti hire maꞌe isawe hetesiye su, le Owane Sitewi lo Hepene Waraꞌi itorai ape, siyeye, le apou eiye, 19 “Ane kairefi lo ape aniyei ne totesiya. Ane maꞌaru tomu neꞌese fenesi maꞌe auwei. Ane kairefi ape aniyei su, ane lu taune werese ereti hire maꞌe isawe hetesirowa. Serai lowe Owane Sitewi lo Hepene Waraꞌi anirowa.”

20 Sosu Pita itiyaꞌu eiye, “Ne maꞌaru mase temeniyenamirowa. Marepi no luwaru aꞌi apou toteye, Owane Sitewi lo Hepene Waraꞌi aꞌi, Owane Sitewi lai ausiya ape, ‘Ane faraꞌu maꞌaru se eteyei ne totesiya.’ Yo seni ape luwaru aꞌi ne. 21 Ne Owane Sitewi lo wiyawi tewi aꞌi nomo mase taꞌanerowata. Marepi hepene no, Owane Sitewi lai siyeye ape, unou pefine aꞌi ne. 22 Ne marepi hepene heꞌi ani aresaiyere. Ne Owane Sitewi maꞌe apou ei towerire, ‘Ne yo seni luwaru aꞌi ano au ani pamowere.’ Ane soꞌoru taꞌama. Owane Sitewi lai yo seni luwaru aꞌi no, marepi papu toteye ape, au ani sasari pamowerowa awere? Piyete awere? 23 Ane marepi no siye soꞌoruwesiya. Marepi no wawe saꞌi horuse aꞌi wou aꞌi ne. Marepi no sahe etiri werese luwaru aꞌi papu temeꞌeriyesiya. Yo seni luwaru aꞌi lai marepi hepene no yaꞌore tawesisiya.”

24 Sosu aꞌi pe Saimon itiyaꞌu apou eiye, “Fenesi Meni Owane Pefine aꞌi maꞌe ane ne au teꞌe towerite. Peri ape, fenesi teꞌeye ape ane maꞌe henerai taꞌame.”

25 Sosu aꞌi pe lowesi Meni Owane Pefine lo peri lu taune werese maꞌe au teꞌeteye su, lowesi Samaria lo omo omo au teꞌeteyewe, omo Jerulalem maꞌe si tame fai.

26 Sosu aꞌi pe Meni Owane Pefine lo ipari wisere aꞌi Filip maꞌe apou eiye, “Ne yo mai ta fau maꞌe itori. Yo mai ape lu ariye aꞌi ne. Yo mai ape lowe omo Jerusalem arunatiyewe, omo Gasa sahe itorai.” 27 Sosu Filip yo mai sahe iteye su, meni owane ta, pani Itiopia maꞌe fai ape, siyeye. Meni ape meni owane erasi aꞌi ne. Itiopia lo menitani owane tutawe, iyape Kandasi. Le menitani owane lo maꞌaru werese au noweinoweiteye. Meni ape Jerusalem fai su, le Owane Sitewi lo wesi tutawe sahe Owane Sitewi ne au teꞌe wisereyeyei ne fai. 28 Sosu omo topo lo si tame iteye su, le wai tereꞌe ta awei pani maꞌe uweisiya ape, sahe onuwe. Le Owane Sitewi lo one towe sahe siye teꞌeteye. One towe ape sahe le Owane Sitewi lo au teꞌe siye meni, Aisaia, lo peri au siye teꞌeye. 29 Sosu Owane Sitewi lo Hepene Waraꞌi aꞌi lai Filip maꞌe apou eiye. “Ne wai ape maꞌe ataheye teirire.” 30 Sosu aꞌi pe Filip wai ape maꞌe ataheye teirai. Iteroti su, le meni ape, peri siye teꞌeye ape, wanuwe. Le Owane Sitewi au teꞌe siye meni, Aisaia lo peri siye teꞌeye. Sosu Filip le maꞌe apou ei toweriye, “Ne peri eite lo sitewi wanu soꞌoruwesiya awere? Piyete awere?”

31 Le itiyaꞌu apou eiye, “Ane peri eite lo sitewi wanu soꞌoru taꞌama. Meni ta lai ane sitewi lo au teꞌe atuatuwei su, ane faraꞌu peri lo sitewi wanu soꞌoruweyei.” Sosu le Filip maꞌe eiye, “Ne wai papu ane mase wi onura.” 32 Meni owane ape Owane Sitewi lo peri apou siye teꞌeye. Apou eiye,

34 Sosu meni Owane ape Filip maꞌe ei toweriye, “Au teꞌe siye meni ape le eiwerai ne leseye awere? Le topo lo leseye awere? Meni tereꞌe leseye awere?” 35 Sosu Filip Owane Sitewi lo peri ape, Aisaia leseye ape, Meni Owane ape ne au teꞌeye. Sosu moꞌo le Jisas ne au teꞌe areiyeye. 36 Lowesi wai se itiye su, lowesi saꞌi ta siyeye. Sosu meni owane ape apou eiye, “Siyete! Saꞌi irosiya. Ne faraꞌu ane saꞌi au huwei awere?”^c 37 Sosu Filip le maꞌe apou eiye, “Ne Jisas lo peri ne marepi werese no se tote tawesiyei su, ne faraꞌu saꞌi ani huwei.” Sosu meni owane ape itiyaꞌu apou eiye, “Ei! Ane lai Jisas ne, Owane Sitewi lo ariariye siye meni, marepi werese ano se tote tawesiye. Ane Jisas Owane Sitewi lo meni eime poto ne tote tawesiye. Jisas lai Owane Sitewi lo meni eime ne. Ane marepi eite tote tawesiye.”

38 Sosu meni owane ape apou eiye, “Wai ano ape arure.” Sosu meni owane ape Filip aiwawe lowesi saꞌi maꞌe itowe. Sosu Filip lai le saꞌi au huwe. 39 Sosu lowe saꞌi arunati su, Meni Owane Pefine aꞌi lo Hepene Waraꞌi aꞌi, le Filip hene itero poꞌutenati. Sosu meni owane ape Filip tame siyeye taꞌame. Sosu le wai papu wi atowe su, omo topo lo marepi erasi aꞌi si tame wisereye nineꞌiti. 40 Sosu aꞌi pe Owane Sitewi lo Hepene Waraꞌi aꞌi lai Filip omo Asdot maꞌe heneti. Sosu le omo omo werese sahe Jisas ne au teꞌe fiyariti. Au teꞌe fiyariye su, le omo Sisaria maꞌe henerai.^d