3 Sosu le lu tamo mase omo Damaskus atahe aꞌi iteye su, sosu witane aꞌi niꞌarawe maꞌe mitaiyeyei erasi itorai. Mitaiyeyei ape lai lowe werese ani napetuwe. 4 Sosu Sol awei sahe wiyeineyewe, peri ahi erasi wanuwe. Peri ahi apou eiye, “Sol, Sol ne piyene ane au luwaruweye awere?”

5 Sosu Sol itiyaꞌu apou ei toweriye, “Meni Owane Pefine aꞌi, ne eiwerai awere?” Peri ahi apou itiyaꞌu eiye. “Ane aꞌi lai Jisas. Ne lai ane au luwaruwesiya. 6 Ne sinere! Ne omo Damaskus maꞌe ire. Sosu meni ta, piye etiri ne irowei ape, ne maꞌe teꞌerowa.”

7 Lu tereꞌe werese, Sol aiwawe iteye ape, lowe hepene se suꞌariye. Lowe peri eite wanuwe. Ahowa, lowe meni ape siye taꞌame. 8 Sosu Sol awei sahe sineteye su, le nihe lo nisoꞌuwe tawesiye. Le etiri werese siye taꞌame. Sosu lowe le omo Damaskus maꞌe ereti se heneti. 9 Poweiye hesi heta nihe nisoꞌuwe tawesi ape, iroteye. Le ayei tamo a taꞌame. Saꞌi a taꞌame.

10 Meni ta, Jisas lo peri umasiye ape, omo Damaskus sahe iroteye ape, iyape lo Ananaias. Sosu Meni Owane Pefine le maꞌe suwou hamehameyei se uteye, “Ananaias.” Le itiyaꞌu apou eiye, “Ei, Meni Owane Pefine, ane sato irosiya.”

11 Sosu Meni Owane Pefine apou eiye, “Ne Judas lo wesi maꞌe ire! Wesi ape sahe yo iyape ‘Fareraiye’ irosiya. Ne iyei su, ne Sol, omo Tarsus maꞌe fai ape, ei aniye. Pereye aꞌi le ane maꞌe au teꞌe tiyatiye. 12 Ane le maꞌe suwou hamehameyei se au teꞌeye. Le apou siyeye, ‘Meni ta iyape lo Ananaias ereti lo se ne maꞌe fuwewe, nihe no au taꞌane petaneye. Serai ne faraꞌu siyerowa.’”

13 Sosu Ananaias itiyaꞌu eiye, “Meni Owane, meni ape lu feni no werese au luwaruwesiya. Ane peri heneruwe ape wanuwe. Le lu feni no Jerusalem maꞌe au luwaruweye. 14 Le omo eite sahe au heseyei lu owane lo kairefi se fai. Le lu, taune, eimane werese, peri no umasiye ape, kalabus wesi maꞌe henetirowa.”

15 Sosu aꞌi pe Meni Owane Pefine lai Ananaias maꞌe apou eiye, “Ire! Ane meni ape ariariyeye. Le lu tewi tereꞌe maꞌe iyape ano se au teꞌe fiyarirowa. Le peri ano lu tewi tereꞌe lo lu owane maꞌe au teꞌe fiyarirowa. Sosu le peri ano Israel lo lu taune maꞌe au teꞌe fiyarirowa.^b 16 Le peri ano au teꞌe fiyariyei su, le fofowei erasi teriterowa. Ane le maꞌe fofowei erasi aꞌi au atuaturowa.”^c

17 Sosu aꞌi pe meni Ananaias wesi ape papu wiye. Le ereti lo Sol hire maꞌe isawe aniteye. Sosu le apou eiye. “Kaiyemo Sol, Meni Owane Pefine aꞌi, Jisas nomo lo, ne omo ape sahe yanerai su, le ne maꞌe yo sahe siyeye. Le ane ne maꞌe eimawesai. Le nihe no au taꞌane petaneyei. Sosu le Owane Sitewi lo Hepene Waraꞌi aꞌi marepi hepene papu no maꞌe eimawesai.” 18 Pereye aꞌi etiri tamo hare tahe koropo wou aꞌi nihe lo laꞌe arowe. Sosu le si tame siyeteye. Sosu le sineye su, Ananaias lai le saꞌi au huwe. 19 Sosu le ayei tamo aye su, le tahe kairefi aꞌi henerai.

Sosu poweiye tomu neꞌese, Sol omo Damaskus sahe Jisas lo lu feni mase iroteye.

20 Pereye aꞌi le taꞌuweyei wesi sahe lu taune maꞌe au teꞌe fiyariye. Le apou teꞌeye, “Meni ape Jisas, Owane Sitewi lo meni eime ne.”

21 Lu taune werese peri ape wanuwe su, lowe hepene se suꞌariye. Lowe apou ei toweriye, “Sawi Amou! Meni ape lu taune, Jisas lo marepi umasiye ape, Jerusalem sahe iroteye ape, le lowe maꞌe au luwaruweteye awere? Le omo ape sahe lu taune tamo wafei se ti tawesiyei ne toteye. Sosu au heseyei lu owane kalabus wesi maꞌe henetiyei ne toteye.”^d

22 Sol Owane Sitewi lo peri au teꞌe fiyariteye su, le peri lo Owane Sitewi lo kairefi se teꞌe fiyariye. Le lu taune werese maꞌe, Owane Sitewi lai, Jisas ariariyeye ape, au teꞌe atuatuteye. Au teꞌeye su, lu taune tomu neꞌese hepene se suꞌariye. Lowe le maꞌe peri itiyaꞌu teꞌerowata.^e

23 Nowe tomu neꞌese i tepaꞌasiye su, Juda lu owane lai Sol aine teraꞌeyei ne teꞌe naneiye. 24 Ahowa, Sol lu owane lo peri ape ne wanuwe. Lu owane ape mo lai ai atu siye lu tamo yo tewiye sahe tei ninawe siye etiteye. Lowe Sol aine teraꞌeyei ne toteye. 25 Lu feni lo le pasi aꞌi tapiye fisahe pite aꞌi maꞌe henetiyewe, lowe Sol ipi erasi papu tapiye fisahe nowe hi maꞌe ani ararowe. Sosu Sol omo tereꞌe iteroti.^f

26 Sosu aꞌi pe le omo Jerusalem maꞌe henerai su, le Jisas lo lu disaipel mase taꞌuweyei ne toteye. Ahowa, lowe le mase taꞌuwe taꞌame. Lowe meni ape ne atoweiyeteye. Lowe marepi lowe lo apou toteye, “Meni ape Jisas lo peri umasi taꞌame.”^g 27 Meni ta iyape, Barnabas, Sol Jisas lo lu disaipel maꞌe heneti. Le lu feni maꞌe apou teꞌeye, “Sol lai Meni Owane Pefine aꞌi nomo lo yo mai sahe siyeye. Meni Owane Pefine le maꞌe au teꞌeteye.” Moꞌo su Sol lu taune werese Damaskus sahe Jisas lo peri kairefi se au teꞌe fiyariteye. Sosu le atoweiye taꞌame.^h 28 Sosu Sol Jisas lo lu feni mase taꞌuweye. Le lowe mase fiyari howeiye. Le Jisas lo peri kairefi se au teꞌe fiyariye. 29 Nowe ta se le lu tereꞌe tamo maꞌe, pani Grik maꞌe fai ape, teꞌe tiyatiteye. Lowe Sol ne ai peri erasi aꞌi toteye. Sosu lowe le aine teraꞌeyei ne toteye. 30 Sosu lu feni tamo, Jisas ne tote tawesiteye ape, peri lowe lo wanuwe su, lowe Sol omo Sisaria maꞌe henetiyewe, omo Tarsus maꞌe wai se eimawesawi.

31 Sosu aꞌi pe lu taune werese, Jisas lo peri umasiteye ape, pani, omo Judia, omo pani Galili, omo pani Samaria. Lowe marepi fetane aꞌi iroteye. Lu taune werese ape mo tote tawesiyei lowe lo kairefi aꞌi henerai. Owane Sitewi lo Hepene Waraꞌi aꞌi lai lu taune werese maꞌe kairefi lo auwe. Sosu lu taune tomu neꞌese lu feni mase taꞌuwerai. Lowe Owane Sitewi maꞌe au teꞌe wisereyeteye.

32 Sosu aꞌi pe Pita omo omo tereꞌe maꞌe fiyariti su, le lu taune, Jisas ne tote tawesiteye ape, omo Lida sahe iroteye ape, sewiyenarai. 33 Omo henerai su, le meni ta siyeye, iyape lo Ainias. Meni ape lowe paꞌare afofo aꞌi iyu menei ereti feni werese feni hesi heta (8) wari sahe howeiteye. Le uweirowata. 34 Sosu Pita le maꞌe apou eiye, “Ainias, Jisas Krais lai ne au taꞌane faraꞌuwesiya. Ne sinere! Etiri werese no taꞌuwere.” Pereye aꞌi Ainias sineteye. 35 Lu taune werese, omo Lida, omo Saron iroteye ape, meni ape siyeye su, lowe Meni Owane Pefine aꞌi maꞌe ani aresaiye umasiye.

36 Omo Jopa sahe menitani iyape Tabita, iyape tereꞌe Dorkas, Jisas lo marepi umasiye ape, le weriyei weriyei yo seni wisere aꞌi au taꞌaneteye. Le lu taune werese maꞌe, maꞌaru etiri poꞌuteye ape, au pati ferafereiteye. 37 Sosu aꞌi pe le u erasi ta menitani ape yaꞌoreye. Sosu le temeniyeye. Lowe, Juda lo peri umasiteye ape, tahe paꞌare lo saꞌi au ani hu sasariye. Sosu lowe wesi tutu wari hire maꞌe ani fuwe. 38 Omo Lida lai omo Jopa ataheyeye su, lu taune Jisas ne umasiteye ape, lowe Pita, omo Lida sahe iroteye ape wanuwe su, lowe lu hesi le maꞌe eimawesawi. Lowesi apou teꞌeye, “Ne notosi mase omo Jopa maꞌe fa aiya.” 39 Sosu pereye aꞌi Pita sineyewe, lowesi mase omo Lida maꞌe tame fai. Lowe henerai su, lowesi Pita wesi tutu papu wiye, Dorkas howeiteye ape, hene wiye. Lowe papu wiye su, weiname tomu neꞌese uruwei erasi irowe. Lowe ipari tahe tomu neꞌese, menitani ape taꞌaneye ape, Pita maꞌe au atuatuwe. 40 Sosu Pita lu taune werese wesi tutu nowe maꞌe eimawesawi. Sosu le lowe uporo apeꞌi onuwe su, le Owane Sitewi maꞌe teꞌeye. Sosu le menitani lo tahe paꞌare maꞌe atati onuwe. Sosu le menitani maꞌe eiye, “Tabita sinere!” Sosu menitani nihe lo petaneye. Sosu le Pita maꞌe siyeye, le sine onuwe. 41 Sosu Pita menitani ereti lo aniteyewe, ani sineye. Sosu le lu taune, Jisas ne umasiteye ape, sosu weiname werese ei aniye. Sosu le apou eiye, “Fene menitani ape siyere. Le norohu aꞌi irosiya.” 42 Lu taune werese, omo Jopa irosiya ape, etiri ape wanuwe. Sosu lu taune tomu neꞌese Jisas ne tote tawesi umasiteye. 43 Sosu aꞌi pe Pita poweiye tomu neꞌese Jopa maꞌe iroteye. Le meni Saimon, fe tahe taꞌaneteye ape, lo wesi sahe howeiteye.