9 Sosu aꞌi pe lowe pasi aꞌi iteye su, nowe esi omo Jopa maꞌe atahe aꞌi henerai.

Sosu aꞌi pe poweiye po aꞌi Pita wesi aite maꞌe wiye. Le Owane Sitewi maꞌe au teꞌe tiyatiyei ne fi. 10 Sosu le lau erasi mase teriteye. Le ayei ta areme. Lowe ayei tamo taꞌuweye su, le hamehameyei ta siyeye. Le apou siyeye, 11 Niꞌarawe erauwi fiyariye. Le ipari tahe erasi oweriye hesiyo hesiyo se hi awei maꞌe teꞌe sahe ararowei siyeye. 12 Ipari tahe erasi sahe ayei etiri werese luwaru aꞌi se itorai, fe luwaru aꞌi, haru luwaru aꞌi, irowe luwaru aꞌi, awiye luwaru aꞌi, etiri werese ayei amou aꞌi siyeye. 13 Sosu peri ahi ta apou eiye, “Pita sinere! Ne etiri eite tamo aine teraꞌe are.”

14 Sosu Pita itiyaꞌu eiye, “Ahowa! Meni Owane Pefine, ane ayei etiri luwaru werese aꞌi arowata. Ayei etiri eite mo oroꞌoru aꞌi. Eite amouweyei ne.”^a

15 Sosu peri ahi tame eiye, “Ne ayei etiri werese eite mo oroꞌoru aꞌi owe ape teꞌere. Ane ayei etiri werese eite mo amerame aꞌi au irowe. Ne faraꞌu are.”^b 16 Sosu peri ahi nowe hesi heta tame teꞌeye. Sosu ipari tahe ape si hire niꞌarawe maꞌe wiye.

17 Pita suwou hamehameyei ape ne toteye su, Kornilius lo lu ape mo Saimon, tahe taꞌane siye meni lo wesi, nehiteye. 18 Henerai su, lowe apou teꞌe toweriye, “Saimon Pita irosiya awere? Piyete awere?”

19 Sosu Pita suwou hamehameyei toteteye su, Owane Sitewi lo Hepene Waraꞌi le maꞌe apou eiye, “Saimon, Lu hesi heta ne ne ei aniye. 20 Sinere! Wesi papu hi itore. Ne lowe mase ire. Ne marepi erasi aꞌi owe ape totere. Ane lai lowe ne maꞌe eimawesai.” 21 Sosu Pita hi maꞌe itoraiyewe, lowe maꞌe eiye, “Ane lai ne, fene ei aniye ape. Fene piyene ane nehiyei ne fai awere?”

22 Sosu lu ape mo apou itiyaꞌu eiye, “Meni Kornilius nomo ne ne nehiyei ne eimawesai. Meni ape yo seni farere aꞌi ne. Le Owane Sitewi lo peri werese umasinamisiya. Juda lo lu taune werese meni ape ne marepi wisere aꞌi toteye. Owane Sitewi lo ipari wisere aꞌi ta meni ape maꞌe ito eirai, ‘Ne Saimon Pita hene aiseri. Le Owane Sitewi lo marepi werese aꞌi ne maꞌe au teꞌerowa.’”

23 Sosu Pita lowe wesi papu ene ayei ne ei aniye. Sosu lowe wesi ape sahe pasi aꞌi howeiye.

Esi mitaiyeyei su, Pita, lu hesi heta, lu tereꞌe tamo, Owane Sitewi lo peri umasiteye ape, aiwawe omo Jopa arunatiyewe fi. 24 Lowe yo sahe howeiteye. Sosu esi aꞌi lowe omo Sisaria maꞌe henerai. Sosu Kornilius lowe ninaweteye su, le lu feni werese lo, kaiyemo tamo lo ei taꞌuwerai. 25 Sosu Pita wesi papu wiye su, Kornilius le maꞌe lowe uporo apeꞌi onuraiyewe, le maꞌe au teꞌe wisereye nineꞌiteye. 26 Ahowa, Pita le maꞌe eiye, “Sinere! Ane aꞌi lai meni yahowaꞌi ne. Ne ane maꞌe lowe uporo apeꞌi owe ape onure!”^c 27 Pita le mase teꞌe tiyatiteye su, lowesi wesi papu wiye. Wesi papu wiye su, le lu taune tomu neꞌese, wesi sahe taꞌuwerai ape, siyeye. 28 Sosu le lowe maꞌe apou teꞌeye, “Fene etiri ape ta soꞌoruwesiya tene! Nomo, Juda lo lu tewi maꞌe fai ape, nomo lu tewi tereꞌe mase teirowata. Eite amou ne. Ahowa, Owane Sitewi lai ane maꞌe etiri ta au atuatuwe, ‘Ane lu tamo oroꞌoru aꞌi wou eirowata.’ 29 Serai Kornilius ane ei aniye su, ane witane aꞌi fai. Sosu ane ne maꞌe apou ei towerisiya, ‘Ne piyene ane ei aniye awere?’”

30 Sosu Kornilius apou eiye, “Pasi hesi heta i tepaꞌasiye su, ane poweiye wati su Owane Sitewi maꞌe au teꞌe tiyatiteye. Pereye aiwawe aꞌi meni ta ipari tahe wapo aꞌi ane metete maꞌe teirai. 31 Sosu ane maꞌe apou eiye, ‘Kornilius, Owane Sitewi lai peri werese no, ne le maꞌe teꞌeteye ape, wanuwe. Le maꞌaru no, ne lai lu taune tereꞌe maꞌe auwe ape, siyeye. 32 Serai ne Saimon Pita, omo Jopa irosiya ape, hene aiseri. Le Saimon tereꞌe fe tahe taꞌane siye meni lo wesi irosiya. Saimon lo wesi saꞌi tewiye sahe irosiya.’ 33 Serai ane pereye aꞌi ne ei aniye. Owane Sitewi lai nomo mase irosiya. Ne saro ahe fai su, ane marepi wisere erasi aꞌi terite wisereyeye. Sosu ane lu tewi ano, lu taune tereꞌe tamo ei taꞌuwe aniye. Nomo Owane Sitewi lo marepi werese, Owane Sitewi ne maꞌe au teꞌeye ape, wanuwei ne totesiya.”

34 Sosu aꞌi pe Pita lowe maꞌe eiye, “Peri ape wiyeme aꞌi. Ane etiri ta soꞌoruwesiya. Owane Sitewi lai lu taune werese aiwawe aꞌi siyesiya.^d 35 Lu taune omo omo werese sahe Owane Sitewi maꞌe au teꞌe wisereyeyei su, le yo seni aseyaro aꞌi irowei su, Owane Sitewi lai lu taune apo mo le topo lo maꞌe ei aniyei. 36 Fene werese etiri ape soꞌoruwesiya. Owane Sitewi lai Juda lo lu taune werese maꞌe peri lo eimawesai. Owane Sitewi lo peri wisere aꞌi apou teꞌesiya, ‘Jisas Krais lai lu taune werese maꞌe peri fere au teꞌesiya. Jisas ne, le lai Meni Owane Pefine lu taune werese maꞌe henerai.’ 37 Fene etiri werese, Judia lo pani werese sahe henerai ape, wanuwe. Tu Jon omo Galili sahe lu taune werese maꞌe apou au teꞌe fiyariye, ‘Lu taune werese fene yo seni luwaru werese aꞌi fene lo atati awetore. Sosu fene saꞌi ani hure.’^e 38 Fene etiri ape mo, etiri werese moꞌo henerai ape, soꞌoruwesiya. God lai Hepene Waraꞌi lo kairefi lo mase Jisas omo Nasaret lo meni maꞌe auwe. Sosu le omo tereꞌe tereꞌe maꞌe lu taune tomu neꞌese wiyawi erasi au taꞌaneteye. Le lu taune werese, sepei Satan marepi hepene papu iroteye ape, au taꞌane sasarisawi. Owane Sitewi lo kairefi le mase iroteye.^f 39 Nomo lu disaipel lo, etiri werese Juda lo pani werese sahe, omo Jerusalem sahe nomo Jisas lo wiyawi erasi pefine aꞌi siyeteye. Lowe le me tapeꞌi sahe niꞌari se aine tawere teraꞌeye. 40 Ahowa, Owane Sitewi lai le si tame taꞌane norohuwe sineye. Le poweiye hesi heta fisiye yo sahe iroteye. Sosu Owane Sitewi lai le si tame taꞌane norohuwe hene sineye. Sosu si tame sineye su, lu taune tomu neꞌese lai le siyeteye. 41 Owane Sitewi lai lu taune werese maꞌe le au atuatu taꞌame. Ahowa, Owane Sitewi lai lu taune tamo faraꞌu siyeyei ne au ariariyeye. Jisas si tame norohuwe sineye su, nomo aꞌi lai le mase ene aye, saꞌi ene aye.^g 42 Sosu le nomo maꞌe apou eiye, ‘Fene lu taune werese maꞌe teꞌe fiyarite. Ane meni ape, Owane Sitewi lai ariariyeye ape. Owane Sitewi lai ane maꞌe kairefi lo se lu taune werese, temeniyeye ape, norohuwe irosiya ape, yo seni werese lowe lo au hese etirowa.’^h 43 Tu naifa Owane Sitewi lo au teꞌe siye lu werese le ne au teꞌe areiyeye. Lu taune werese, peri lo umasiteye ape, Owane Sitewi lai Jisas lo kairefiyeyei se lowe maꞌe yo seni luwaru aꞌi lowe lo au ani sasari pamowerowa.”ⁱ

44 Sosu aꞌi pe Pita au teꞌe tepaꞌasiye su, Owane Sitewi lo Hepene Waraꞌi lu taune werese maꞌe, peri lo wanuwe ape, itorai.^j 45-46 Lowe lu taune peri tereꞌe se, Owane Sitewi maꞌe au teꞌe wisereyeye ape, wanuwe. Juda lo lu, Jisas lo peri umasiteye ape, Pita mase fai ape, lowe hepene se suꞌariye. Serai lowe apou teꞌeye, “Sawi amou! Owane Sitewi lai Hepene Waraꞌi aꞌi lo lu taune tereꞌe tereꞌe maꞌe auwe.”^k 47 Sosu aꞌi pe Pita apou eiye, “Owe lu tamo lu taune saꞌi au ani huwei ne owe ape amouweye. Lu taune werese eite Owane Sitewi lo Hepene Waraꞌi aꞌi nomo aiwawe aniye.” 48 Serai Pita apou eiye, “Fene lu taune werese maꞌe Jisas Krais lo kairefi se saꞌi au ani hure.” Sosu lowe Pita maꞌe apou ei toweriye, “Ne faraꞌu poweiye tamo nomo mase tei irorowa awere?”^l