Pita lu tewi tereꞌe ne omo Jerusalem sahe au teꞌe fiyariteye.
11
Sosu aꞌi pe lu aposel ape mo, sosu lu tereꞌe, Jisas ne umasiteye ape, omo pani Judia iroteye ape, lowe lu tewi tereꞌe Owane Sitewi lo peri tote tawesi umasiteye ape, wanuwe. 2 Sosu Pita omo Jerusalem maꞌe si tame yaneye su, Juda lo lu tamo, Jisas lo peri umasiye ape, lowe Pita maꞌe ai peri erasi au teꞌeye. 3 Lowe apou teꞌeye, “Ne lu tewi tereꞌe luwaru aꞌi lo wesi papu wiyewe, sosu lowe mase ene aye. Yo seni ape amouwesiya tene!”a 4 Sosu Pita etiri werese henerai ape, lowe maꞌe itiyaꞌu apou au teꞌeye, 5 “Ane omo Jopa sato onuteye su, ane Owane Sitewi maꞌe au teꞌe tiyatiteye. Sosu ane suwou hamehameyei ta siyeye. Ane ipari tahe erasi niꞌarawe sahe, oweriye hesiyo hesiyo se hi awei maꞌe itorai ape, siyeye.b 6 Ane ipari tahe papu siyeye su, ane ayei etiri lowe paꞌare hesiyo hesiyo ape siyeye. Ane ayei etiri werese luwaru aꞌi itorai, fe luwaru aꞌi, haru luwaru aꞌi, irowe luwaru aꞌi, awiye luwaru aꞌi, etiri werese ayei amou aꞌi siyeye. 7 Sosu ane etiri ape mo siyeye su, peri ahi ta ane maꞌe apou eiye, ‘Pita sinere! Ayei etiri tamo aine teraꞌe are.’ 8 Sosu ane itiyaꞌu eiye, ‘Ahowa! Meni Owane Pefine, ane etiri luwaru aꞌi werese arowata. Etiri oroꞌoru werese aꞌi ane ahi papu furowata.’ 9 Sosu peri ahi tame eiye, ‘Owane Sitewi lai etiri ape mo amerame aꞌi au irowe. Ne ayei etiri werese ape mo oroꞌoru aꞌi owe ape teꞌere.’ 10 Ane peri ahi ape nowe hesi heta wanuwe. Sosu ipari tahe niꞌarawe maꞌe si tame wiye. 11 Sosu aꞌi pe pereye aꞌi, lu hesi heta wesi sahe henerai. Meni ta Sisaria maꞌe ape, lowe ane maꞌe eimawesai. 12 Sosu Owane Sitewi lo Hepene Waraꞌi aꞌi ane maꞌe apou eiye, ‘Ne faraꞌu lowe mase si ire.’ Sosu ane lu ereti feni werese feni taꞌi ape mo (6), Jisas lo peri umasiteye ape, aiwawe fi. Nomo meni ape lo wesi papu wiye. 13 Meni ape lai nomo maꞌe, le Owane Sitewi lo ipari wisere aꞌi siyeye ape ne, teꞌeteye. Owane Sitewi lo ipari ape apou eiye, ‘Ne meni ta iyape Saimon Pita omo Jopa sahe hene aiseri. 14 Meni ape aiyeyei su, le Owane Sitewi lo marepi werese ne maꞌe au teꞌerowa. Ne peri ape wanuwei su, Owane Sitewi lai ne lu feni no mase marepi hepene heꞌi aꞌi aurowa.’c 15 Ane lowe maꞌe au teꞌeteye su, Owane Sitewi lo Hepene Waraꞌi aꞌi lowe maꞌe itorai. Le nomo maꞌe tu aiwawe aꞌi itorai.d 16 Sosu ane Owane Sitewi lo peri tame tote tawesiye. Jon lu taune maꞌe saꞌi se au ani huwe. Sosu Owane Sitewi lai fene maꞌe Hepene Waraꞌi aꞌi lo au ani hurowa.e 17 Owane Sitewi lai Hepene Waraꞌi aꞌi lo lu tewi tereꞌe maꞌe au eimawesai. Nomo Jisas lo peri umasiye su, nomo tu aiwawe aꞌi Owane Sitewi lo Hepene Waraꞌi aꞌi aniye. Ane aꞌi lai Owane Sitewi owe ape einamite.”18 Sosu lowe peri ape wanuwe su, lowe ai marepi tote taꞌame. Lowe Owane Sitewi maꞌe au teꞌe wisereyeye. Lowe apou eiye, “Serai lu taune tereꞌe tamo marepi hepene atati awetowei su, Owane Sitewi lai lowe maꞌe aiwawe aꞌi marepi hepene heꞌi aꞌi auwei.”f
Lu taune, Jisas ne tote tawesiteye ape, omo Antiok sahe iroteye.
19 Nowe tu naifa lu tamo meni Stiven maꞌe au luwaruweye su, lu taune tomu neꞌese omo omo tereꞌe maꞌe atoweiye fiyariti. Lowe omo pani Fonisia, kemere Saiprus, omo Antiok maꞌe fi. Lowe Jisas lo peri Juda lo lu taune maꞌe au teꞌe fiyariye.g 20 Sosu lu tamo, kemere ta iyape Saiprus maꞌe fai ape, Sairini maꞌe fai ape, lowe omo Antiok sahe Meni Owane Jisas ne lu taune tereꞌe ape mo maꞌe au teꞌeye. Lu taune omo pani Grik maꞌe fai. 21 Sosu Jisas lo kairefi lowe mase iroteye. Serai lu taune tomu neꞌese yo seni luwaru aꞌi atati arunatiyewe, Jisas ne umasiteye. Sosu Owane Sitewi lai lowe maꞌe marepi hepene heꞌi aꞌi auwe.
22 Sosu Jisas lo lu feni omo Jerusasem sahe peri heneruwe ape wanuwe su, lowe meni ta, iyape Barabas, omo Antiok maꞌe eimawesawi.h 23 Sosu le omo Antiok maꞌe henerai su, le Owane Sitewi lo kairefiyeyei lu taune maꞌe itoraiyei siyeye. Le Owane Sitewi maꞌe marepi erasi aꞌi au teꞌe wisereyeteye. Le lowe maꞌe apou eiye, “Fene Owane Sitewi lo peri, sosu Owane Sitewi lo yo waraꞌi aꞌi fa umasi etite. Fene yo tereꞌe umasirowata.” 24 Meni eite Barnabas meni wisere aꞌi ne. Owane Sitewi lo Hepene Waraꞌi aꞌi marepi hepene lo papu temeꞌeriyenamiteye. Le Meni Owane Pefine aꞌi lo marepi tote tawesi umasinamiteye. Meni ape Jisas ne au teꞌeye su, lu taune tomu neꞌese yo seni luwaru aꞌi atati arunatiyewe, Meni Owane Pefine aꞌi maꞌe umasinamiteye.
25 Sosu aꞌi pe meni Barnabas omo Tarsus maꞌe fi. Le meni Sol nehiti.i 26 Le meni ape siyeye su, le le omo Antiok maꞌe si heneti. Sosu lowesi yame tomu neꞌese Owane Sitewi lo lu feni aiwawe aꞌi iroteye. Lowesi Owane Sitewi lo marepi werese lowe maꞌe au teꞌe atuatuteye. Lu taune tomu neꞌese Owane Sitewi lo peri wanuteye. Sosu lowe Krais lo lu feni Antiok sahe maꞌe iyape heꞌi aꞌi au teꞌeye. Iyape heꞌi aꞌi ape apou aiwawe ‘Kristen.’
27 Sosu poweiye eite se Owane Sitewi lo au teꞌe siye lu tamo omo Jerusalem maꞌe arunatiyewe, omo Antiok maꞌe fai. 28 Owane Sitewi lo au teꞌe siye meni ta, iyape Agabus, le Owane Sitewi lo Hepene Waraꞌi aꞌi se ponei sahe sine teiteye su, le apou eiye, “Nowe meꞌiye su omo omo werese sahe ayei werese ariye poꞌuterowa.” Awei meni owane Klodius lo nowe se etiri ape wiyeme aꞌi henerai.j 29 Lu taune meni Agabus lo peri wanuwe su, lowe maꞌaru tamo taꞌuwe aniye. Lu tamo, maꞌaru erasi iroteye ape, maꞌaru tomu neꞌese auwe, lu tamo maꞌaru oso aꞌi iroteye ape, maꞌaru oso aꞌi auwe. Lowe maꞌaru werese lu taune, Jisas ne umasiye ape, omo pani Judia sahe ausawi. 30 Lowe lu hesi Barnabas, Sol lowesi maꞌaru ape, lowe taꞌuwe aniye ape, aitiyei ne ariariyeye. Lowesi maꞌaru ape mo lu owane maꞌe, Jisas ne tote tawesinamiteye ape, aiti.k