Awei meni owane Herot lai Jems aine teraꞌeye.
12
Sosu aꞌi pe poweiye ape se awei meni owane tutawe, iyape Herot,a lu taune maꞌe, Jisas ne umasiteye ape, au luwaruweteye. Serai le Jisas lo lu feni tamo ereti se anite tawesiyewe, kalabus wesi maꞌe fu arunari. 2 Le ai atu siye lu tamo maꞌe apou eiye, “Fene meni Jems, Jon lo airu hene aiseriyewe, ipari meneꞌe se aine teraꞌere.” 3 Jems aine teraꞌe tepaꞌasiye su, Juda lo lu taune etiri ape ne marepi wisere aꞌi ne. Serai meni owane Herot marepi wisere aꞌi lowe lo siyeye su, le apou toteye, “Ane Pita aiwawe aꞌi ereti se anite tawesiye. Sosu ane moꞌo aiwawe aꞌi le aine teraꞌeyei.” Nowe ape se Juda lo lu taune tomu neꞌese taꞌuwe hereiyei ta taꞌuwe aniye. Taꞌuwe hereiyei ape lo iyape “Nau Meiyei Taꞌama.” Lowe nau opaiyei su, lowe etiri ta nau sahe fu aro taꞌame. 4 Sosu le Pita ereti se anite tawesiyewe, kalabus wesi maꞌe hene arunarai. Herot ai atu siye lu tomu neꞌese Pita maꞌe ninaweyei ne eimawesawi. Nowe esi aꞌi ai lu hesiyo hesiyo Pita ninaweteye. Poweiye po se ai lu hesiyo hesiyo tereꞌe le tei siye ninaweteye. Sosu pasi aꞌi ai lu hesiyo hesiyo tereꞌe Pita tei siye ninaweteye. Sosu pasi po ai lu hesiyo hesiyo tereꞌe le tei siye ninaweteye. Taꞌuwe hereiyei ape, iyape Pasova, i tepaꞌasiye su, Herot Pita lu taune werese ponei maꞌe henetiyewe, le etiyei ne toteye. Moꞌo lu taune werese siyeyei su, le Pita aine teraꞌerowa. 5 Sosu aꞌi pe Pita kalabus wesi sahe iroteye su, lu taune werese Jisas ne tote tawesiteye ape, Owane Sitewi maꞌe Pita ne au teꞌe toweri etiteye.Owane Sitewi lai Pita kalabus nowe maꞌe hene arosai.
6 Pasi aꞌi Herot apou toteye, “Ane aperi Pita lu taune werese ponei maꞌe henetirowawe, etirowa.” Sosu Pita kalabus wesi papu howeiteye su, ai atu siye meni taꞌi eyate feni maꞌe wafei se ti tawesiye, meni taꞌi epi feni maꞌe wafei se ti tawesiye. Lu hesi yo sahe ninaweteye. 7 Pereye aꞌi Owane Sitewi lo ipari wisere aꞌi kalabus wesi papu ponei sahe itorai. Mi erasi kalabus wesi sahe tewi mitaiye fiyariye. Sosu le Pita maꞌe ani eisoweye. Sosu le maꞌe eiye, “Witane aꞌi sinere!” Sosu le sineye su wafei hesi ereti sahe ani erau ararowe. 8 Sosu aꞌi pe Owane Sitewi lo ipari ape le maꞌe eiye. “Ipari tahe no ani asire. Lowe tahe no ani asire.” Sosu Pita ipari tahe, lowe tahe topo lo ani asiye. Sosu tame eiye, “Ipari tahe erasi apeꞌiye atati asiyewe, sosu ane moꞌo umasiye.” 9 Sosu Pita Owane Sitewi lo ipari wisere aꞌi ape kalabus wesi nowe maꞌe umasiti. Ahowa, Pita etiri ape soꞌoru taꞌama. Le suwou hamehameyei aiwawe aꞌi siye toteye. 10 Lowesi lu hesi, tei siye ninaweteye ape, aweraꞌiyenatiyewe fi. Sosu lu hesi tereꞌe yo sahe, tei siye ninaweteye ape, aweraꞌiyenatiyewe fi. Sosu lowesi kalabus wesi lo yo kairefi erasi henerai su, sosu yo ape toso howeiye. Sosu lowesi nowe maꞌe henerai. Lowesi eyeri oso aꞌi iteye su, Owane Sitewi lo ipari ape le arunatiyewe, niꞌarawe hire maꞌe wiye.b
11 Sosu Pita aiwawe toteye, “Etiri eite wiyeme aꞌi. Owane Sitewi lai ipari lo ane maꞌe eimawesai. Sosu ane kalabus wesi arunatiyewe, Herot aiwawe aweraꞌiyenati. Serai etiri werese Juda lo lu taune ane ne au luwaruweyei ne toteye ape, aweraꞌiyenati.”
12 Le etiri ape mo tote tepaꞌasiye su, le Maria lo wesi maꞌe fi. Maria meni eime lo, iyape Jon Mak tu naifa auteiye. Lu taune tomu neꞌese Owane Sitewi maꞌe au teꞌe toweriyei ne taꞌuwerai. 13 Sosu Pita yo sahe aine taꞌaruteye. Sosu wiyawi menitani ta, iyape Roda, yo tosowei ne fi. 14 Sosu Pita lo peri ahi wanuwe su, le marepi erasi nineꞌiteye. Serai le yo toso taꞌame. Le si tame iterotiyewe, lu taune werese maꞌe eiye, “Wanure, Pita wesi yo nowe maꞌe sahe teisiya!” 15 Lowe le maꞌe apou eiye, “Piyete. Ne meremereye aꞌi henerai.” Sosu menitani ape tame teꞌeye. Sosu lowe apou teꞌeye, “Nomo soꞌoru taꞌama. Pita lo hepene yo sahe teisiya awere?”
16 Sosu aꞌi pe Pita yo sahe tame aine taꞌaruteye. Lowe yo tosowe su, Pita siyeye. Lowe marepi hepene se suꞌariye. 17 Sosu Pita peri lowe lo au einamiye. Sosu eiye, “Owane Sitewi lai ipari wisere aꞌi lo kalabus wesi maꞌe eimawesai. Le wafei ano ani erauwe. Sosu ane kalabus wesi nowe maꞌe heneti.” Sosu le tame eiye, “Fene meni Jems, Jisas lo paꞌise, sosu lu taune Jisas ne umasiteye ape, aiwawe aꞌi etiri ape mo ne au teꞌere.” Sosu le lowe maꞌe teꞌe tepaꞌasiye su, Pita wesi tereꞌe maꞌe fi.
18 Sosu esi aꞌi ai atu siye lu werese hepene se suꞌari luwaru aꞌi irowe. Lowe apou teꞌe toweriye, “Meni ape Pita, eiwerou maꞌe fi awere?”c 19 Sosu Herot Pita siyeyei ne nehiteye su, le siye taꞌame. Sosu le ai atu siye lu apou ei toweriye, “Pita eiwerou maꞌe irosiya awere?” Sosu lowe soꞌoru taꞌama. Sosu le ai atu siye lu tereꞌe tamo maꞌe apou eiye, “Fene ai atu siye lu ape mo hene aitiyewe, lowe aine teraꞌere.” Sosu Herot, Judia lo pani arunatiyewe, omo Sisaria maꞌe fetaneye itori. Poweiye tamo saro iroteye.
Herot temeniyeye.
20 Le omo Tair, omo Saidon lo lu taune werese ne ai peri erasi irowe. Sosu lowe Herot maꞌe taꞌuwerai. Lowe le peri teꞌe tiyatiyei ne toteye. Lowe omo pani ape ayei werese Herot lo pani maꞌe aniye. Serai lowe meni owane maꞌe peri fere au teꞌeyei ne toteye. Lowe meni Blastus marepi towafi lowe lo eteye. Meni ape Blastus lai Herot lo wesi au noweinoweiteye.
21 Sosu poweiye ta se Herot lu taune maꞌe au teꞌeyei ne ariariyeye ape, le ipari tahe loꞌu wisere aꞌi lo ani asiteye su, le awei meni owane tutawe lo me tutoꞌu saro onuteye. Sosu le lowe maꞌe au teꞌeteye. 22 Le peri au teꞌe tepaꞌasiye su, lu taune werese hare uteyei erasi irowe. “Peri ahi ape god ta lo peri ahi wou ne. Le meni ta lo peri au teꞌe taꞌame.” 23 Sosu pereye aꞌi Herot lai Owane Sitewi maꞌe peri luwaru aꞌi au teꞌe naruteye. Serai Owane Sitewi lai ipari lo ta hi maꞌe eimawesai. Sosu ipari ape iꞌere tamo Herot lo tahe maꞌe heneraiyei ne au irowe. Serai le temeniyeye.d
24 Lu taune tomu neꞌese lai Owane Sitewi lo peri omo omo tereꞌe maꞌe au teꞌe fiyariye.e
25 Sosu lowesi meni Barnabas, Sol aiwawe wiyawi lowesi lo taꞌane tepaꞌasiye su, lowesi omo Jerusalem maꞌe arunati. Meni Jon Mak lowesi mase fi.f