5 Ahowa, Juda lo lu tewi tamo lowesi maꞌe marepi afofo aꞌi toteteye. Lowe lai lu luwaru aꞌi tamo, lu taꞌarei aꞌi tamo, onotaꞌano aꞌi lu tamo teꞌe taꞌuwe aniye. Lowe maꞌe apou eiye, “Fene werese lu taune werese mase lowesi maꞌe au luwaruwete.” Sosu lowe werese lu taune werese mase ai peri erasi au irowe. Lowe meni Jeson lo wesi maꞌe fi. Lowe Pol, Sailas lowesi itero siyeyei ne fi. Lowe lowesi lu taune werese maꞌe ai marepi niꞌariyei ne totesiya. 6 Ahowa, lowe lowesi siye taꞌame su, lowe Jeson, lu feni tamo ereti anite ti tawesiye. Lowe awei meni owane maꞌe heneti. Lowe apou uteye, “Wanure! Lu hesi ape Pol, Sailas lowesi omo omo werese sahe yo seni luwaru aꞌi iroteye. Pereye lowesi saro ahe henerai. 7 Jeson lai lowesi wesi topo lo sahe au noweinoweiteye. Lowe, Meni Owane Sisar, Rom lo meni owane tutawe lo peri ape teꞌe naruwe. Lowe apou au teꞌeye, ‘Meni owane pefine tereꞌe irosiya. Meni Owane pefine tereꞌe lo iyape Jisas.’”^a 8 Sosu awei lu owane werese lu taune werese mase peri ape wanuwe su, lowe ai marepi luwaru erasi aꞌi toteteye. 9 Sosu awei lu owane Jeson, lu feni lo aiwawe, maꞌe apou eiye, “Fene nomo maꞌaru tamo auwei su, fene faraꞌu wesi no si tame iyei.” Sosu lowe lu owane maꞌe maꞌaru tamo auwewe, wesi lo si tame fi.

10 Nowe pasi su, lu feni tamo lai, Pol, Sailas eimawesawi. Lowesi omo Beria maꞌe fi. Omo Beria henerai su, lowesi Juda lo taꞌuweyei wesi papu wiye. 11 Sosu aꞌi pe Beria lo lu taune marepi lowe lo wisereye kairefiyeteye. Tesalonaika lo lu taune marepi lowe lo haroharo aꞌi ne. Beria lo lu taune Pol lo peri wanuwe su, lowe Owane Sitewi lo one towe wanu tote etiteye. Pol lo peri wiyeme aꞌi awere? Wawero aꞌi awere? 12 Juda lo lu taune tomu neꞌese Jisas lo marepi tote tawesiteye. Omo pani Grik lo yaꞌariyei taune owane tomu neꞌese aiwawe toteye. Grik lo lu tomu neꞌese aiwawe aꞌi Jisas lo marepi umasiteye. 13 Ahowa, Juda lo lu taune, omo Tesalonaika iroteye ape, Pol Owane Sitewi lo peri au teꞌe fiyariyei ne wanuwe su, lowe omo Beria maꞌe iteroti. Lowe lu taune werese lo marepi luwaru aꞌi au teꞌeteye. 14 Jisas lo lu feni werese lowe siyeye su, lowe Pol saꞌi erasi tewiye maꞌe eimawesawi. Lu hesi Sailas, Timoti lowesi omo Beria saro iroteye. 15 Lu tamo, Pol aiwawe fi ape, lowe le omo Atens maꞌe heneti. Sosu Pol lowe maꞌe apou teꞌeye, “Lu hesi ano, Sailas, Timoti aiwawe, lowesi ane moꞌo fu aiya.” Sosu lowe le arunatiyewe, omo Beria maꞌe si tame fi.

16 Pol lai lowesi omo Atens sahe ninaweteye su, le god wawero tomu neꞌese lu taune, au teꞌe wisereyeye ape, siyeteye. Le ai marepi erasi aꞌi toteye. 17 Sosu le Juda lo taꞌuweyei wesi maꞌe fi. Sosu le Juda lo lu tamo, Grik lo lu tamo, Owane Sitewi Pefine aꞌi maꞌe au teꞌe wisereyeteye ape, le taꞌuweyei wesi nepawe maꞌe Owane Sitewi lo peri au teꞌe areiyeteye.^b 18 Sosu aꞌi pe lu tamo Epikurian lo marepi tote tawesiteye ape, lu tereꞌe tamo Stoik lo marepi tote tawesiteye ape, lowe Pol maꞌe henerai. Lowe Pol maꞌe ai peri morose aꞌi teꞌe tiyatiyei ne fai. Lu tamo apou teꞌeye, “Meni ape peri topo lo soꞌoru taꞌama. Le piye peri teꞌesiya awere?” Lu tereꞌe tamo apou teꞌeye, “Le aꞌi lai god tereꞌe ne au teꞌesiya.” Pol Jisas lo peri au teꞌeteye. Owane Sitewi lai Jisas si tame taꞌane norohuwe hene aniye. 19 Sosu lowe Pol ereti se aniteyewe, awei lu owane tamo, taꞌuwerai ape, maꞌe heneti. Lu ape taꞌuwerai ape iyape Areopagus. Lowe henerai su, le maꞌe apou ei toweriye, “Ne piye peri heꞌi aꞌi teꞌe fiyariteye awere? 20 Nomo peri heꞌi no wanuwe su, nomo peri ape lo sitewi wanu soꞌoru taꞌama. Ne peri sitewi ape ne nomo maꞌe au teꞌere.” 21 Sosu lu taune tomu neꞌese omo Atens sahe iroteye ape, nowe tomu neꞌese peri heꞌi aꞌi tereꞌe tereꞌe ape mo teꞌe teꞌe tiyatiteye.

22 Sosu Pol lai Areopagus lo taꞌuweyei ponei sahe sineteye su, le apou teꞌeye, “Atens lo lu werese wanure! Ane fene, god tomu neꞌese maꞌe au teꞌe nineꞌisiya ape, siyesiya. 23 Ane yo mai itiye su, ane god lo etiri tomu neꞌese siyeteye. Ane itiye su, ane god taꞌi lo metei wari siyeteye. Fene peri ape metei unahi sahe apou leseye, ‘Nomo ne maꞌe au teꞌe wisereye nineꞌiteye. Ahowa, nomo ne soꞌoru taꞌama.’ Ane fene maꞌe au teꞌeye. Ane etiri ape wiyeme aꞌi soꞌoruwesiya. 24 Owane Sitewi pefine aꞌi lai awei werese werese taꞌaneye. Le aꞌi lai etiri werese, papu irosiya ape, taꞌaneye. Le aꞌi lai hire niꞌarawe werese lo Meni Owane Pefine aꞌi ne. Le aꞌi lai awei werese werese lo Meni Owane Pefine aꞌi ne. Le wesi ta, lu taꞌaneye ape, sahe iro taꞌame.^c 25 Owane Sitewi ape ereti lo se etiri werese taꞌaneteye. Le etiri werese ape mo maꞌe marepi hepene norohu aꞌi auwe. Le lowe maꞌe ahi lo se fateteye su, lu taune werese marepi hepene norohu aꞌi henerai. Lu taune werese le maꞌe au pati taꞌanerowata. Etiri werese aꞌi ne topo lo ne.^d 26 Tu naifa weriyei, le meni tutawe ape taꞌaneye. Meni taꞌi aꞌi ape se, lu taune tereꞌe tereꞌe omo omo werese sahe henerai. Le omo werese ape ne lu taune eiwerou maꞌe irosiya ape mo, au ariariyeye. Aiwawe aꞌi le lu taune, eiwerou su henerairowa ape, au ariariyeye. 27 Owane Sitewi lo marepi apou totesiya. Lu taune werese le maꞌe siye nehinamirowa. Lowe omo omo werese sahe le maꞌe siye nehinamiteye. Lowe le siyerowa su, lowe le ne umasinamirowa. Le nomo werese atahe aꞌi ironamisiya.^e 28 Nomo le sahe ironamisiya. Le nomo mase uweinamisiya. Nomo le papu ironamitorowa. Lu tamo, omo towafi fene lo irosiya ape, apou teꞌeye, ‘Nomo eimane topo lo ne.’ 29 Nomo werese Owane Sitewi lo eimane aꞌi ne. Serai fene peri tamo owe ape totete, ‘Nomo Owane Sitewi pefine aꞌi tapiye gol, tapiye silva, tapiye tereꞌe se faraꞌu taꞌanerowa.’ Fene Owane Sitewi pefine aꞌi taꞌanerowata.^f 30 Tu naifa fene werese etiri ape mo soꞌoru taꞌama. Sosu marepi fene lo ape ne Owane Sitewi lai tote iꞌaneye. Ahowa, pereye nowe eite se le aꞌi lai lu taune werese maꞌe apou teꞌesiya, ‘Fene werese marepi hepene fa ani aresaiye awetote.’ 31 Nowe ta se henerairowa su, Owane Sitewi lai lu taune werese lo yo seni au hese ereirowa. Le yo seni werese au hese ereirowa su, marepi lo farere aꞌi ironamirowa. Tu naifa weriyei, le lai meni ta yo seni au hese ereiyei ne ariariyeye. Meni ape temeniyeye su, le meni ape si tame taꞌane norohuwe ani sineye. Serai le nomo werese maꞌe marepi farere aꞌi lo au atuatuteye.”^g

32 Pol peri tepaꞌasiye. Lu tamo meni ape ne si tame norohuwe sineye ape, wanuwe su, lowe apou teꞌeye, “Peri eite wawero tene!” Lu tamo tereꞌe apou teꞌeye, “Nomo peri ape wisere aꞌi se wanuwe. Ne nomo maꞌe si tame au teꞌe areiyete!” 33 Sosu Pol peri tepaꞌasiye su, le taꞌuweyei ape arunati fi. 34 Lu tewi oso aꞌi Pol lo marepi umasiteye. Lowe Jisas lo peri wanu tote tawesiteye. Meni taꞌi iyape Dionisius, Areopagus lo meni taꞌi iroteye. Meni tani tereꞌe ta iyape Damaris, aiwawe Jisas lo marepi umasiteye. Sosu lu taune tereꞌe tamo aiwawe aꞌi Jisas ne tote tawesi umasinamiteye.