5 Sosu aꞌi pe lu hesi Sailas, Timoti omo pani Masedonia arunatiyewe, omo Korin maꞌe henerai. Lowesi Pol maꞌe sewiyeyei ne fai. Pol Juda lo lu taune werese maꞌe marepi taꞌi aꞌi apou au teꞌeteye, “Meni Owane Jisas ne, Owane Sitewi meni ape ariariyeyewe, hi awei maꞌe eimawe arosai.^c 6 Sosu Juda lo lu peri ape wanuwe su, lowe Pol maꞌe peri luwaru aꞌi au teꞌe naruwe. Pol peri luwaru aꞌi wanuwe su, le awei peperi ipari tahe lo sahe au ani sasarisawi. Le lowe maꞌe apou teꞌeye, “Owane Sitewi lai fene maꞌe ai marepi totenamiteye. Le fene ne meꞌiyeni maꞌe atati aruwei. Fene yehe omo maꞌe iyei su, etiri fene lo ne. Ane Owane Sitewi lo marepi fene maꞌe au teꞌe atuatuteye. Ahowa, fene peri ano wanu taꞌame. Serai ane meꞌiyeni maꞌe fene ne atati aruwei. Serai ane awei peperi ipari tahe ano sahe au ani sasarisawisiya. Fene, Juda lo lu taune werese, peri ano wanu taꞌame su, ane lu taune tewi tereꞌe maꞌe Jisas lo peri au teꞌe fiyarirowa.”^d 7 Sosu Pol taꞌuweyei wesi arunati su, le meni Titius Jastus lo wesi maꞌe fi. Meni ape Owane Sitewi maꞌe au teꞌe wisereyeye. 8 Meni tereꞌe ta iyape Krispus taꞌuweyei wesi meni owane, le lu tewi lo aiwawe aꞌi Jisas lo peri tote tawesi umasiteye. Lu taune tomu neꞌese, omo Korin sahe iroteye ape, aiwawe aꞌi tote tawesi umasiteye. Lowe Owane Sitewi lo marepi tote tawesiteye su, Pol, lu feni lo aiwawe, lowe maꞌe saꞌi au huteye.

9 Nowe pasi ta se Meni Owane Pefine aꞌi lai Pol maꞌe suwou hamehameyei se siyeteye. Le apou eiye, “Ne atoweiye sawa. Ne lu taune werese maꞌe fa au teꞌe fiyarite. Ne peri ano owe ape einamite. 10 Ane lai ne aiwawe irosiya. Owe lu tamo ne maꞌe ainerowata. Lowe ne maꞌe au luwaruwerowata. Lu taune tomu neꞌese omo ape sahe marepi ano umasinamisiya.”^e 11 Pol suwou hamehameyei siyeye su, le Korin maꞌe yame tamo (18) saro iroteye. Le Owane Sitewi lo peri lowe maꞌe au teꞌe fiyariteye ape au teꞌeteye.

12 Meni owane ta iyape Galio, Juda lo marepi umasi taꞌame. Le omo pani Akaia lo lu taune au noweinoweiteye. Nowe ape se Juda lo lu tamo Pol maꞌe au luwaruweteye. Lowe Pol Galio maꞌe henetiyei ne etiteye. Lowe apou teꞌeye, 13 “Meni eite lu taune werese maꞌe tatai aniteye. Le lowe maꞌe apou au teꞌeteye, ‘Fene Owane Sitewi maꞌe yo tereꞌe se fu au teꞌe wisereyete.’ Meni ape yo peri nomo lo arisinamisiya.”

14 Sosu Pol lowe ponei maꞌe sine teiyewe, meni owane pefine lai lu taune werese maꞌe apou au teꞌeye, “Juda lo lu werese, fene peri ano wanure! Meni eite yo peri ta arisiye su, ane faraꞌu peri fene lo wanurowa. Meni eite yo seni luwaru aꞌi irowe su, ane peri fene lo faraꞌu wanurowa. 15 Ahowa, fene yo peri fene lo sahe fene Juda lo meni tereꞌe lo iyape au teꞌeyewe, meni ape yo peri fene lo arisiye su, ane peri fene lo wanurowata. Fene lai etiri eite au fareraiyere. Ane etiri eite wanurowata.” 16 Serai meni owane ape lowe werese nowe maꞌe au sasari arosawi.

17 Sosu aꞌi pe lu tamo meni Sostenes, taꞌuweyei wesi meni owane pefine maꞌe hene anite tawesiyewe, etiyei wesi nepawe pani atahe aꞌi aineye. Meni owane Galio siyeye su, le etiri ape tote taꞌame.

18 Sosu aꞌi pe Pol omo Korin poweiye tamo se saro iroteye. Nowe meꞌiye su, le omo Korin Jisas lo lu feni arunatiyewe, pani Siria maꞌe wai se iyatuti. Nohuwe hesi tani Prisila meni lo Akwila, lowesi Pol aiwawe aꞌi fi. Tu naifa Pol, Owane Sitewi maꞌe peri ta au teꞌe naneiye. Sosu omo Senkria sahe le mato towe topo lo werese howe pamoweye. Peri teꞌe naneiye tepaꞌasiye su, le mato towe werese aꞌi howe pamoweye.^f 19 Sosu lowe wai se omo Efesus maꞌe iyatu heneri. Saro ahe Pol nohuwe hesi ape arunatiyewe, le taꞌuweyei wesi papu wiye. Le Juda lo lu tamo maꞌe au teꞌe tiyatiteye. 20 Lowe Pol maꞌe teꞌe toweriye, “Ne faraꞌu nomo mase iroterowa awere?” Sosu Pol itiyaꞌu apou eiye, “Ahowa!” 21 Sosu le arunati su, le apou teꞌeye, “Owane Sitewi lo marepi ane maꞌe teꞌeye su, ane heta su si tame aiyerowa.” Sosu le omo Efesus arunatiyewe, wai se iyatuti.

22 Wai se iyatuti su, le omo Sisaria maꞌe iyatu heneri. Sosu omo Sisaria arunati su, le omo Jerusalem maꞌe yaneri. Le Jisas lo lu feni werese maꞌe eriteteye. Sosu lowe arunati su, le omo Antiok maꞌe itori. 23 Le omo Antiok maꞌe henerai. Poweiye mi tomu neꞌese saro iroteye. Omo Antiok arunati su, le omo tereꞌe tereꞌe maꞌe heneri. Le pani Galesia, pani Frigia maꞌe au teꞌe fiyariti. Le peri lo se Jisas lo lu feni werese maꞌe au kairefiyeteye.

24 Sosu aꞌi pe Juda meni ta iyape Apolos, omo Aleksandria maꞌe fai. Meni ape omo Efesus maꞌe henerai. Meni ape etiri tomu neꞌese wanu soꞌoruweteye. Le Owane Sitewi lo peri werese one towe lo sahe wanu soꞌoruweteye. 25 Tu naifa meni ta le maꞌe Jisas lo marepi au teꞌe atuatuteye. Serai meni ape Jisas lo peri lu taune werese maꞌe au teꞌe areiyeteye. Le Jisas lo peri kairefi se au teꞌeteye. Tu naifa meni ape, Jon lo saꞌi au huwe ape, le siye soꞌoruweye. 26 Meni ape Apolos, Juda lo taꞌuweyei wesi papu wiye su, le Jisas lo peri kairefi se au teꞌeteye. Sosu Prisila, Akwila aiwawe peri lo wanuwe su, lowesi le maꞌe wesi topo lo maꞌe heneti. Wesi topo lo maꞌe henerai su, lowesi le maꞌe Owane Sitewi lo marepi werese au teꞌe atuatuteye. 27 Sosu Apolos omo pani Akaia maꞌe iyei ne toteye su, Jisas lo lu feni tamo le maꞌe eimawesawi. Lowe one towe ta Jisas lo lu feni maꞌe omo Akaia maꞌe lese ausawi. Lowe apou leseye, “Fene meni eite eritere.” Sosu le omo pani Akaia henerai su, le Jisas lo lu feni werese au pati ferafereiteye. Le lowe maꞌe, Owane Sitewi lo marepi hepene heꞌi waraꞌi aꞌi auwe ape, au pati taꞌaneteye.” 28 Meni ape Juda lo lu tamo kairefi se au teꞌe tiyatiteye. Lowe peri ape wanuwe su, lowe peri itiyaꞌu teꞌerowata. Lu taune werese siyeye su, lowe meni ape ne Owane Sitewi maꞌe au teꞌe wisereyeteye. Meni ape lu taune werese maꞌe Owane Sitewi lo peri apou au teꞌe atuatuteye, “Owane Sitewi lai Jisas ariariyeye.” Le meni Krais tene!^g