Pol Masedonia sahe Jisas lo peri au teꞌe fiyariteye.
20
Sosu aꞌi pe yo seni luwaru aꞌi poꞌutesawi su, Pol lai Jisas lo lu feni werese ei taꞌuwe aniye. Sosu le lowe maꞌe peri kairefi aꞌi ta au teꞌeye su, le lowe maꞌe eritenatiyewe, pani Masedonia maꞌe fi. 2 Sosu pani Masedonia tewi maꞌe iteye su, le lu taune tomu neꞌese lo marepi peri au teꞌe kairefiyeteye. Le omo pani arunati su, pani Grik maꞌe heneri. 3 Saro ahe le yame hesi heta iroteye. Juda lo lu tamo Pol aine teraꞌeyei ne toteye su, Pol marepi hesi tereꞌe toteye. Le pani Siria wai se iyatutiyei ne toteye. Juda lo lu tamo le maꞌe au luwaruweyei ne toteye. Le wai ape arunatiyewe, yo se omo pani Masedonia si tame iteye. 4 Pol pani ape arunati su, le meni Sopater, Pirus lo meni eime omo Beria maꞌe fai ape, aiwawe aꞌi fi. Lu tamo tereꞌe iyape Aristarkus, Sekundus, lowesi omo Tesalonaika maꞌe fai ape, Gaius omo Derbe, Timoti, lu hesi Tikikus, Trofimus, omo pani Esia maꞌe fai ape, lowe werese Pol mase aiwawe aꞌi fi. 5 Lu ape mo tu fi. Lowe omo Troas nomo ne ninaweteye. 6 Ahowa, taꞌuwe hereiyei erasi i tepaꞌasiye su,a Nomo omo Filipai wai se iyatutiteye. Nomo wai se iyatu, iyatutiteye. Poweiye ereti feni werese (5) i tepaꞌasiye su, nomo omo Troas heneri. Lu werese ape tu fi ape, siyeye. Poweiye ereti feni werese feni hesi aꞌi (7) nomo lu feni ape mase saro ahe iroteye.Pol lai meni Yutikus si tame taꞌane norohuwe sineye.
7 Nowe amou neriwei su, nomo werese taꞌuweraiyei ne ene ateye. Sosu Pol lu taune tomu neꞌese Owane Sitewi lo peri au teꞌeteye. Nowe moꞌo su, Pol iyei ne toteye. Pol peri au teꞌe teꞌeteye. Pasi po au teꞌeteye. 8 Wesi tewi hire maꞌe ape sahe nomo taꞌuweyei ape, yehe erei tomu neꞌese iroteye. 9 Meni yoꞌorei ta iyape Yutikus umaruwe yo sahe onuteye. Pol au teꞌeteye su, meni ape nihe pereꞌeyeye. Sosu nihe orese aꞌi teriteye su, le hi awei sahe winetaiye. Sosu lu tamo wesi hi itori su, meni ape hene aniye. Sosu meni temeniyeye. 10 Sosu Pol itori su, meni ape hi maꞌe lowe uporo apeꞌi onuwe. Ereti lo se yaꞌore aniye. Le apou eiye, “Taweiru sawa! Marepi lo norohu aꞌi irosiya!” 11 Sosu Pol wesi tewi hire maꞌe si tame wiye. Sosu lowe nau taꞌase ani topotowewe none ene aye. Sosu Pol Owane Sitewi lo peri nowe mitaiyeye au teꞌeteye. Sosu le fi. 12 Sosu lowe meni yoꞌorei ape norohu aꞌi wesi topo lo maꞌe heneti. Lowe werese marepi wisereyeteye.
Pol omo Troas arunatiyewe, omo Miletus maꞌe heneri.
13 Sosu aꞌi pe nomo wai se iyatutiyewe, omo Asos heneri. Omo ape sahe nomo Pol wai papu hene wiraiyei ne toteye. Tu Pol peri aiwawe teꞌeye. Le tu yo se uweiteyei ne toteye. 14 Le nomo omo Asos sahe siyeye su, nomo le wai papu hene ani asiye. Sosu nomo werese wai se iyatutiyewe, omo Mitilini maꞌe iyatu heneri. 15 Nowe moꞌo su nomo wai se omo Mitilini arunatiyewe, kemere Kios heneri. Sosu nowe moꞌo su, nomo kemere Kios arunatiyewe, saꞌi iyatu toneriyewe, omo Samos heneri. Sosu omo Samos arunatiyewe, nowe moꞌo su, omo Miletus maꞌe iyatu henerai. 16 Pol omo Efesus aweraꞌiyenatiyei ne toteye. Le pani Esia sahe iroteyei wou taꞌama. Le omo Jerusalem maꞌe witane aꞌi iyei ne toteye. Le nowe Pentikos lo ene ayei erasi omo Jerusalem maꞌe witane aꞌi iyei ne toteye. Serai nomo omo Efesus aweraꞌiyenatiyewe, omo Miletus maꞌe fi.
Pol Krais lo lu taune maꞌe au teꞌe eritesawi.
17 Pol omo Miletus saro iroteye su, le peri ta omo Efesus maꞌe ausawi. Le Jisas lo lu feni tamo, yaꞌariyei lu owane tamo ei aniye.b 18 Lowe henerai su, le lowe maꞌe apou eiye, “Fene etiri ape wanu soꞌoruwesiya. Tu naifa ane omo pani Esia fai su, ane fene mase aiwawe nowe werese iroteye. Serai fene yo seni ano siye soꞌoruwesiya.c 19 Ane Meni Owane Pefine nomo lo wiyawi taꞌane tohoteyewe, fene ne marepi erasi aꞌi tote ewiteteye. Ane fene mase aiwawe iroteye su, ane meni yahowaꞌi aꞌi irowe. Ahowa, Juda lo lu werese ane maꞌe au luwaruweteye. Ane fofowei erasi teriteye. Lowe ane maꞌe teꞌe naruwe. Lowe ane aine teraꞌeyei ne toteye. 20 Fene ape soꞌoruwe tene! Ane peri ano fene maꞌe fareyare taꞌame. Ane lu taune werese Owane Sitewi lo peri au teꞌe fiyariye. Peri ano fene maꞌe au teꞌe kairefiyeteye. Ane wesi taꞌi taꞌi aꞌi Owane Sitewi lo peri au teꞌe fiyariteye. 21 Ane kairefi aꞌi se Juda lo lu taune werese, Grik lo lu taune werese maꞌe apou au teꞌeteye, ‘Fene werese yo seni luwaru aꞌi ne tote ani aresaiye awetote. Sosu Jisas Meni Owane nomo lo maꞌe tote tawesi umasite.’ 22 Sosu pereye Owane Sitewi lo Hepene Waraꞌi aꞌi ane maꞌe apou eiye, ‘Ne omo Jerusalem maꞌe ire!’ Ane Owane Sitewi lo peri wanuwe su, ane omo Jerusalem maꞌe iyei ne toteye. Piye etiri ta ane maꞌe henerairowa awere? Ane soꞌoru taꞌama. 23 Ane etiri ape soꞌoruwesiya. Omo werese ape mo ane iroteye ape, Owane Sitewi lo Hepene Waraꞌi aꞌi ane maꞌe apou eiye, ‘Weiyai! Orese erasi aꞌi tamo ne maꞌe henerairowa. Lu tamo ne kalabus wesi maꞌe henetirowa.’d 24 Peri ano wanure! Marepi ano aiwawe totesiya. Marepi hepene ano yahowaꞌi aꞌi irosiya. Ane Owane Sitewi lo wiyawi taꞌane poꞌuterowa su, ane marepi erasi aꞌi tote wisereyerowa. Jisas lai ane maꞌe wiyawi erasi lo auwe. Ane wiyawi ape taꞌane tepaꞌasiyei su, ane marepi wisere aꞌi teriterowa. Jisas lo wiyawi erasi ape aiwawe aꞌi ne. Ane lu taune werese Owane Sitewi lo peri heneruwe au teꞌe fiyarirowa. Owane Sitewi lai lu taune werese maꞌe marepi hepene heꞌi waraꞌi aꞌi aurowa.e
25 Sosu ane fene werese maꞌe Owane Sitewi lo marepi au teꞌe fiyariteye. Ane fene mase iroteye. Pereye aꞌi etiri ape ane soꞌoruwe tene! Fene werese ane tame siyerowata. 26 Serai ane fene maꞌe kairefi aꞌi se au teꞌesiya. Lu taune tamo marepi hepene heꞌi aꞌi ani taꞌame su, etiri ano taꞌama. 27 Ane fene werese maꞌe Owane Sitewi lo marepi werese kairefi se au teꞌe fiyariteye. 28 Fene Krais lo lu feni werese au noweinoweite. Fene lai marepi fene lo tote kairefiyete. Owane Sitewi lo Hepene Waraꞌi aꞌi lai fene maꞌe wiyawi lo ape auwe. Serai fene Owane Sitewi lu feni werese fa au noweinoweite. Le aꞌi lai lu feni lo Jisas lo fisaꞌi se si tame ete hene aniye.f 29 Ane fene arunatiyei su, lu luwaru aꞌi tamo fene luwaruweyei ne aiyerowa, apou wou aꞌi you erawe ape lai fe yene ape tomu ererowa. Lowe marepi werese fene lo luwaruweyei ne toterowa.g 30 Lu tamo fene mase irosiya ape, lowe fene maꞌe peri wawero au teꞌerowa. Lowe Jisas lo lu feni lo marepi tatai aniyei ne totesiya. Sosu lu taune neꞌese peri lowe lo umasirowa. 31 Serai weiya! Marepi ano tote tawesite! Ane lai iyu menei hesi heta mi mi pasi pasi etiri ape ne fene maꞌe au teꞌeteye. Ane marepi ano orese aꞌi teriteye.h 32 Sosu aꞌi pe ane marepi fene lo Owane Sitewi maꞌe ausiya. Fene Owane Sitewi lo peri werese tote tawesite. Le aꞌi lai fene maꞌe marepi hepene heꞌi aꞌi auwe. Owane Sitewi lo peri ape fene maꞌe au kairefiyerowa. Fene Owane Sitewi lo lu feni henerai. Sosu aiwawe aꞌi fene marepi hepene heꞌi anirowa. 33 Ane etiri tamo fene lo ne, ane fene mase iroteye su, ei tatai aniye. Maꞌaru werese, ipari tahe werese fene lo ane aiwawe ei tatai aniye.i 34 Etiri ape fene soꞌoruwe tene! Ane lau mase iroteye su, ane wiyawi ta ereti topo ano se taꞌaneteye. Ane ipari tahe luwaru iroteye su, ane wiyawi ta taꞌaneteye. Ane lu feni ano maꞌe etiri ape mo aiwawe aꞌi auwe.j 35 Etiri werese ane wiyawi taꞌaneteye su, ane lu taune werese maꞌe au atuatuteye. Fene wiyawi erasi aꞌi taꞌane tohoteteye su, fene lu taune, kairefi taꞌame ape mo, au pati taꞌaneteye. Fene Jisas lo peri wanure! Le apou teꞌeye, ‘Fene lu taune tereꞌe etiri ta auwei su, fene marepi erasi aꞌi tote wisereyerowa. Lu taune tereꞌe lai etiri ta fene maꞌe auwei su, fene marepi oso aꞌi teriterowa.’”
36 Sosu Pol peri ape teꞌe tepaꞌasiye su, le lowe mase lowe uporo apeꞌi onuwewe, Owane Sitewi maꞌe au teꞌe wisereyeteye. 37 Sosu lowe werese marepi erasi aꞌi ewiteye. Lu ewiteye erasi lowe iroteye. Sosu lowe le maꞌe ereti towafi lowe lo se yaꞌore wisereyeye. Sosu le lowe maꞌe erasi erite irowe. 38 Pol lowe maꞌe apou teꞌeteye su, “Ane fene werese si tame siyerowata.” Lowe lu ewite erasi irowe. Sosu lowe le mase aiwawe aꞌi wai maꞌe wi atoweye.