7 Sosu nomo wai se omo Tair arunati su, nomo omo Tolemes iyatu furi. Wai ape furi su, nomo lu feni tamo eriteye. Sosu, nomo lowe mase poweiye taꞌi saro ahe iroteye. 8 Nowe moꞌo su, nomo omo Tolemes arunati su, nomo omo Sisaria maꞌe iyatu heneri. Nomo Filip lo wesi sahe aiwawe iroteye. Filip Owane Sitewi lo peri au teꞌe siye meni. Tu naifa lu taune tomu neꞌese Jisas lo peri umasiteye ape, lowe lu ereti feni werese feni hesi aꞌi (7) Jerusalem sahe ei ariariyeye. Filip meni taꞌi aiwawe aꞌi ariariyeye. Wiyawi lowe lo ape ne, lowe lu taune ayei tamo noneteye.^b 9 Meni ape eime taune watiꞌare hesiyo hesiyo iroteye. Taune ape mo, etiri nowe meꞌiye su henerairowa ape, au teꞌe areiyeteye. 10 Poweiye tomu neꞌese nomo saro ahe iroteye su, meni ta Owane Sitewi lo peri au teꞌe siye meni, iyape Agabus, pani Judia maꞌe arunatiyewe, omo Sisaria maꞌe itorai.^c 11 Sosu le nomo maꞌe henerai su, le Pol lo lire wafei aniye. Sosu le ereti lowe topo lo lire wafei sahe ti tawesiteye. Sosu le apou eiye, “Owane Sitewi lo Hepene Waraꞌi aꞌi apou eisiya, ‘Juda lo lu tamo meni ape lire wafei eite ani asiteye ape, aiwawe aꞌi ti tawesirowa. Sosu lowe meni ape awei lo lu owane tereꞌe maꞌe heneti.’”^d

12 Sosu nomo peri ape wanuwe su, nomo werese Pol maꞌe apou eiye, “Ne omo Jerusalem maꞌe owe ape yanere.” 13 Sosu Pol lowe maꞌe itiyaꞌu eiye, “Fene piyene lu ewite irosiya awere? Piyene marepi ano afofoweye awere? Fene luwei sawa! Owane Sitewi lai ane maꞌe apou au eirowa su, lowe ane maꞌe ereti lowe wafei se ti tawesirowa. Wiyeme aꞌi ne ane omo Jerusalem sahe faraꞌu temeniyerowa. Omo ape sahe ane Meni Owane Jisas lo wiyawi, ane taꞌanerowa ape, temeniyerowa su, etiri faraꞌu aꞌi ne.”^e

14 Sosu Pol lo marepi kairefi aꞌi teriteye su, lowe peri itiyaꞌu teꞌe taꞌame. Sosu nomo werese apou teꞌeye, “Nomo Meni Owane Pefine maꞌe apou ei toweriyei, marepi no aiwawe aꞌi nomo umasirowa.”

15 Nowe meꞌiye su, nomo etiri werese nomo lo taꞌuwe su, nomo omo Sisaria arunatiyewe, omo Jerusalem maꞌe yaneri. 16 Sosu lu feni tamo, omo Sisaria maꞌe fai ape, nomo mase aiwawe fi. Sosu lowe nomo Nason lo wesi maꞌe heneti. Wesi ape sahe nomo saro iroteye. Meni ape kemere Saiprus maꞌe henerai. Tu naifa le Jisas ne tote umasiteye.

17 Nomo omo Jerusalem maꞌe henerai su, Jisas lo lu feni nomo hene aniyei ne au teꞌe wisereyeye.

20 Sosu aꞌi pe lowe Pol lo peri wanuwe su, lowe Owane Sitewi maꞌe au teꞌe wisereyeye. Sosu lowe Pol maꞌe apou eiye, “Kaiyemo Pol, ne etiri eite soꞌoruwesiya. Juda lo lu taune tomu neꞌese aꞌi Jisas lo peri tote umasiteye. Lu feni werese ape mo aiwawe aꞌi Moses lo yo peri umasiteye.^g 21 Sosu lowe peri no wanuwe. Ne Juda lo lu tamo Pani tereꞌe tereꞌe maꞌe iroteye ape, apou au teꞌeteye, ‘Fene werese Moses lo yo peri owe ape umasite.’ Ne lowe werese maꞌe apou au teꞌe atuatuteye, ‘Fene mitaru werese tahe lowe lo owe ape toure. Fene Juda lo marepi werese nomo lo owe ape umasite.’ 22 Nomo piye irowei awere? Juda lo lu taune, Jisas ne tote umasiteye ape, lowe werese, ne fai ape, wanurowa. 23 Sosu nomo lowe maꞌe piye peri teꞌerowa awere? Nomo etiri ape, ne piye irorowa ape, ne maꞌe au teꞌesiya. Lu hesiyo hesiyo saro ahe iroteye. Lowe Owane Sitewi maꞌe peri teꞌe naneiyei ta aꞌi au teꞌe naneiyei.^h 24 Ne lu hesiyo hesiyo ape mase ire. Lowe Moses lo yo peri umasisiya ape, lowe yo seni aseyaro aꞌi irorowa. Ne lowe mase aiwawe aꞌi yo seni aseyaro irote. Ne etiri Owane Sitewi maꞌe au heseyei ape faraꞌu etere. Lowe yo seni aseyaro aꞌi tepaꞌasiye su, lowe faraꞌu mato towe werese au howere. Serai lu taune werese yo seni no siyeye su, lowe peri no, lowe wanuwe ape, peri wawero aꞌi siye soꞌoruwerowa. Ne lai Moses lo yo peri umasisiya.ⁱ 25 Sosu lu tewi tereꞌe, Jisas umasiye ape, nomo one towe lowe maꞌe lese ausawi. Nomo lo peri apou teꞌesiya, ‘Sepei luwaru aꞌi lo ayei fene owe ape ene are. Fene fisaꞌi werese owe ape ene are. Fene fe loꞌu, ereti se aine teraꞌeye ape, fisaꞌi henerai taꞌame ape, owe ape ene are. Fene tafaꞌe yo seni luwaru aꞌi owe ape irote.’”^j

26 Nowe moꞌo su, Pol lu hesiyo hesiyo ape mo hene aniye su, lowe yo seni werese aseyaro aꞌi irowe. Sosu yo seni aseyaro aꞌi tepaꞌasiye su, le Owane Sitewi lo wesi papu wiye. Le Owane Sitewi lo wesi wiyawi iro siye lu maꞌe apou au teꞌeye, “Nowe yo seni aseyaro aꞌi iro tepaꞌasiyei su, nomo etiri ta Owane Sitewi maꞌe nomo taꞌi taꞌi aꞌi au hese ereirowa.”^k

27 Nowe mi ereti feni werese feni hesi aꞌi (7) i tepaꞌasiye su, Juda lo lu tamo, omo pani Esia maꞌe fai ape, lowe Pol Owane Sitewi lo wesi papu siyeteye. Lowe lu taune werese ne ai marepi erasi aꞌi au iroteye. Lowe Pol lo ereti se anite tawesiteye su, lowe lu taune werese maꞌe apou hareye, 28 “Juda lo lu taune werese nomo pati anire! Meni eite lu taune werese maꞌe apou au teꞌe atuatusiya, ‘Fene werese Juda lo marepi werese arunatite. Fene Moses, lo yo peri owe ape umasite. Fene Owane Sitewi lo wesi ape owe wire.’ Fene peri nomo lo wanute! Meni ape meni tewi tereꞌe ta Owane Sitewi lo wesi papu hene wiye. Yo seni ape amou tene! Le Owane Sitewi lo wesi tutawe unou aꞌi au iroteye.” 29 Lowe meni ta, iyape Trofimus, Pol mase iro siyeteye. Serai lowe apou toteye, “Pol meni ape Owane Sitewi lo wesi tutawe papu hene wiye.”^l

30 Lu taune werese omo Jerusalem sahe peri lowe lo wanuwe su, lowe werese itero taꞌuwerai. Lowe Pol anite tawesiraiyewe, Owane Sitewi lo wesi nowe maꞌe hene ani niꞌariye arosawi. Pereye aꞌi lowe Owane Sitewi lo wesi tutawe lo yo ti tawesiteye.

31 Lowe Pol aine teraꞌeyei ne toteye su, Rom lo ai atu siye lu lo meni owane ahi erasi wanuwe. Lu taune werese, omo Jerusalem sahe iroteye ape, Pol maꞌe au luwaruweteye. 32 Pereye aꞌi meni owane ape lu erasi tamo witane aꞌi lowe maꞌe itorai. Lu taune meni owane ape siyetai su, lowe Pol tame aine na taꞌame. 33 Sosu Meni Owane ape Pol maꞌe itero anite tawesirai. Le ai atu siye lu tamo maꞌe apou eiye, “Fene wafei erasi hesi se Pol ti tawesite.” Lowe Pol wafei se ti tawesi tepaꞌasiye su, le lowe maꞌe apou ei toweriye, “Meni eite eiwerai awere? Le piye yo seni irowe awere?” 34 Lu taune tamo peri taꞌi aꞌi au teꞌeye, lu taune tereꞌe tamo peri tereꞌe tereꞌe au teꞌeye. Lu taune peri ahi erasi aꞌi teꞌeye su, meni owane ape peri sitewi lowe lo wanu eti taꞌame. Serai le ai atu siye lu tamo apou eiye, “Fene wesi nomo lo maꞌe Pol hene memeꞌitire.” 35 Sosu lowe Pol wesi lowe lo maꞌe hene memeꞌitiye su, lu taune werese ai marepi erasi aꞌi toteye. Lowe le aine teraꞌeyei ne toteye. Sosu ai atu siye lu tamo le ereti werese se wesi papu hene memeꞌiti wiye. 36 Sosu lu taune werese apou hareyei erasi uteye, “Meni ape aine teraꞌere! Meni ape aine teraꞌere!”^m

37 Sosu aꞌi pe ai atu siye lu Pol wesi papu hene wiyei ne toteye su, Pol meni owane maꞌe apou ei toweriye, “Ane ne maꞌe peri ta ei toweriyei awere?” Sosu Meni Owane ape peri ta itiyaꞌu ei toweriye, “Ne peri Grik teꞌesiya awere? 38 Ane ne ne apou toteye, Ne lai Isip lo meni eite tu naifa le lu owane maꞌe ai atu tiyatiteye, sosu ai atu siye lu 4,000 pani ariye aꞌi hene memeꞌititeye.”ⁿ

39 Sosu Pol itiyaꞌu apou eiye. “Ane Juda lo meni wiyeme aꞌi ne. Ane omo Tarsus pani Silisia maꞌe fai. Omo ano iyape se. Ane lu taune werese peri ta au teꞌeyei ne toteye. Ane ne ei towerisiya, faraꞌu awere?” 40 Sosu meni owane le maꞌe apu eiye, “Faraꞌu ne peri no au teꞌete eiye.” Sosu Pol wesi tawati saro teiteye su, ereti lo tesi fuwe. Sosu lu taune werese peri titaneye su, Pol lowe maꞌe peri Hibru se au teꞌeteye.