22
“Kaiyemo mo ano, aite werese ano, ane peri no ne, itiyaꞌu au teꞌeye ape, wanure!” 2 Sosu lowe werese Pol peri Hibru se teꞌeye su, lowe peri titaneye. 3 Sosu Pol apou teꞌeteye, “Ane Juda lo meni pefine aꞌi ne. Mai ano, omo Tarsus sahe omo pani Silisia iroteye ape, ane auteiye. Sosu ane meni eime oso aꞌi omo Jerusalem maꞌe fi. Ane saro ahe iroteye su, meni ape, Gamaliel, lai ane maꞌe Moses lo yo peri au teꞌe atuatu etiteye. Sosu ane lai yaꞌariyei nomo lo marepi ape kairefi aꞌi umasiteye. Fene pereye aiwawe aꞌi.a 4 Sosu ane lai lu taune werese, Jisas lo marepi umasiteye ape, au luwaruweteye. Lu tewi tamo ane lai aine teraꞌeye. Ane lai lu taune, eimane werese wafei se ti tawesiteyewe, kalabus wesi maꞌe heneti.b 5 Au heseyei lu owane pefine lu taꞌuwe owane, taꞌuweyei ape peri ano pefine aꞌi au teꞌeyei. Lowe one towe ta omo Damaskus lo lu owane tamo maꞌe lese ausawi. Ane lai omo ape sahe one towe ape aiti. Ane lu taune werese, Jisas lo marepi tote umasiteye ape, omo Jerusalem maꞌe henetaiyei ne toteye. Ane lowe werese kalabus wesi maꞌe henetiyei ne toteye.Pol lowe maꞌe marepi hepene heꞌi aꞌi lo ne au teꞌeye.
6 Poweiye po se ane yo sahe iteye su, ane omo Damaskus atahe aꞌi heneri. Pereye aꞌi mi erasi aꞌi niꞌarawe maꞌe itorai. Ane maꞌe tewi mitaiye fiyariye. 7 Sosu ane awei sahe winetaiye su, ane peri ahi wanuwe. Peri ahi apou eiye, ‘Sol, Sol, ne ane maꞌe piyene au luwaruwesiya awere?’ 8 Sosu ane le maꞌe itiyaꞌu ei toweriye, ‘Owane, ne eiwerai awere?’ Sosu peri ahi itiyaꞌu eiye, ‘Ane lai Jisas omo Nasaret maꞌe fai. Ne lai ane luwaru aꞌi irosiya.’ 9 Lu ape mo, ane aiwawe fi ape, mi erasi ape siyeye. Ahowa, lowe peri ahi wanu taꞌame. 10 Sosu ane apou ei toweriye, ‘Meni Owane, ne ane eiwerou irowei awere?’ Sosu Meni Owane Pefine aꞌi apou eiye, ‘Sinere, omo Damaskus maꞌe ire! Omo Damaskus henerai su, lu tamo ne peri eiwerou irowei ape au teꞌerowa.’ 11 Lu tamo ane mase itiye ape, lowe ereti ano anite tawesiyewe, omo Damaskus maꞌe heneti. Mi erasi ape nihe ano nisoꞌuwe.
12 Ane omo Damaskus henerai su, meni taꞌi iyape Ananaias ane maꞌe sewiyeyei ne fai. Meni ape Moses lo yo peri umasi etiteye. Juda lo lu taune werese omo ape sahe meni ape ne wisereyeyei ne toteye. 13 Le ane maꞌe teirai apou eiye, ‘Kaiyemo, Sol, nihe no tame siye petanere.’ Sosu pereye aꞌi ane faraꞌu siyeye. Sosu ane le siyeye. 14 Sosu le tame eiye, ‘Nomo yaꞌariyei lo Owane Sitewi ne ariariyeteye. Ne lai Owane Sitewi lo marepi wanu soꞌoruwerowa. Ne lai meni wisere aꞌi pefine lo siyerowa. Meni ape lai ahi se ne maꞌe au teꞌe atuaturowa. 15 Ne lai lu taune werese maꞌe, etiri ne siyeteye ape, sosu wanuteye ape, au teꞌe fiyarirowa. 16 Ne owe ape ninawere! Ne Jisas lo marepi tote umasiyei su, ane ne faraꞌu saꞌi au huwei. Ne Jisas lo marepi tote umasiyei su, le yo seni luwaru werese aꞌi no au ani sasari pamowerowa.’
Pol lu tewi tereꞌe maꞌe au teꞌeyei ne eimawesawi.
17 Sosu ane omo Jerusalem maꞌe si tame fi. Ane Owane Sitewi lo wesi papu le maꞌe au teꞌeteye su, ane suwou hamehameyei siyeye. 18 Suwou hamehameyei ape sahe owane pefine lai ane maꞌe au teꞌeteye. Le apou teꞌeye, ‘Ne omo Jerusalem witane aꞌi arunati. Ne peri ano au teꞌeyei su, lu taune werese wanu anirowata.’c 19 Ane le maꞌe itiyaꞌu eiye, ‘Meni owane pefine, lu werese ape mo etiri ape wanu soꞌoruweye. Ane taꞌuweye wesi werese maꞌe lu feni werese lo, ane lowe kalabus wesi maꞌe heneti. Ane lowe umasiteye su, ane tahe lo kairefi aꞌi ainenati.d 20 Sosu lowe meni Stiven fene lo au teꞌe siye meni, tapiye se aine teraꞌeye, ane aine teraꞌeye ape ne, ane marepi wisereyeye. Ane ipari tahe werese lowe lo au noweinoweiteye.’e 21 Sosu Owane Sitewi Pefine aꞌi ane maꞌe itiyaꞌu eiye, ‘Ne ire. Ane ne lu tewi tereꞌe maꞌe omo eyeri maꞌe eimawesawiyei.”f
Pol Rom lo meni pefine aꞌi ne.
22 Lu taune werese Pol lo peri ape wanuwe su, lowe werese ai marepi erasi toteye. Lowe apou hare uteye, “Meni ape aine teraꞌere! Meni ape aine teraꞌere, Meni apou ape awei sahe irotorowata.” 23 Lowe werese ai marepi erasi aꞌi hare uteye su, lowe ipari tahe towafi lowe lo ani topoto fiyari ereye. Awei peperi ape hire maꞌe ani ere aweye. 24 Sosu ai atu siye meni owane, Pol wesi papu hene wiye. Le ai atu siye lu tamo apou teꞌeye, “Fene meni eite wesi papu hene wiyewe, tahe lo sahe aine nare.” Fene tahe lo sahe aine na tepaꞌasiye su, fene le maꞌe apou ei towerire, “Piyene lowe werese ne maꞌe peri erasi hare uteye awere?” 25 Lowe Pol ereti lowe lo wafei se ti tawesiye su, Pol meni owane maꞌe ei toweriye, “Ane Rom lo meni pefine aꞌi ne. Lowe ane eti se taꞌame. Peri ano wanu taꞌame. Fene lai yo peri fene lo apou teꞌesiya awere? Ne faraꞌu meni aiwawe aꞌi aineyei awere?”g
26 Sosu ai lu meni owane pefine aꞌi ape peri lo wanuwe su, le ai atu siye meni owane maꞌe siyeyei ne fi. Le apou teꞌeye, “Meni eite Rom lo meni ne. Ne aꞌi lai eiwerou irowei awere? Ne Rom lo meni aiwawe aꞌi aine narowata.”
27 Sosu ai atu siye meni owane lai Pol maꞌe ei toweriyei ne fai, “Ne ane lai maꞌe eire! Ne Rom lo meni pefine aꞌi awere?” Sosu Pol itiyaꞌu eiye, “Ei, ane Rom lo meni pefine tene.”
28 Sosu ai atu siye meni owane apou eiye, “Ane Rom lo meni henerai su, ane maꞌaru tomu neꞌese ani eteye.” Ahowa, Pol itiyaꞌu eiye, “Mai ano auteiye su, ane Rom lo meni pefine aꞌi henerai.”
29 Sosu lowe, teꞌe toweriyei ne fai ape, pereye aꞌi atoweiyeye si fi. Ai atu siye meni owane lai hepene se suꞌariye. Le atoweiye iroteye. Le Pol Rom lo meni pefine aꞌi wafei se ti tawesiye ape, si atoweiyeye. Le Pol wafei se ti tawesiye su, le Rom lo yo peri arisiye. Le Pol lo tahe aine naye su, aiwawe aꞌi Rom lo yo peri arisiye.h
Pol lai taꞌuweyei wesi sahe au teꞌe areiyeye.
30 Nowe moꞌo su, ai atu siye meni owane peri sitewi wiyeme aꞌi wanu etiyei ne toteye. Sosu le taꞌuweyei wesi tereꞌe owane werese ei taꞌuwerai. Owane Sitewi lo wesi lu owane werese teꞌe taꞌuwerai. Sosu le Pol taꞌuweyei wesi maꞌe lowe Pol heneti. Lu owane werese ponei sahe teiye.