23
Sosu Pol ponei sahe teiteye su, le lowe maꞌe au teꞌeye, “Kaiyemo mo ano, ane mi mi werese marepi wisere aꞌi tei iroteye. Ane yo seni luwaru aꞌi iro taꞌame. Owane Sitewi lai etiri ape siye soꞌoruwesiya.” 2 Sosu au heseyei meni owane pefine aꞌi Ananaias, peri ape wanuwe su, le, lu tamo Pol atahe aꞌi teiye ape maꞌe, apou teꞌeye, “Fene ahi lo sahe ainere.”a 3 Sosu Pol le maꞌe teꞌe naruwe apou itiyaꞌu eiye, “Ne marepi hesiyei tote siye meni, Owane Sitewi lai ne aine teraꞌe temeniyerowa. Ne lai wesi me wou aꞌi taꞌe towasisiya ape, tahe lo wisere aꞌi loꞌu lo papaꞌu aꞌi irosiya. Ne atahe aꞌi winetairowa. Ne aꞌi lai ane Moses lo yo peri ne au hese eti areiyesiya. Ahowa, ne ane ahi sahe aine naye su, ne aꞌi lai yo peri ape arisiye.”b4 Sosu lu tamo, Pol atahe aꞌi teiye ape, lowe Pol maꞌe eiye, “Piyene ne au heseyei meni owane tutawe maꞌe teꞌe naruwe awere?”
5 Sosu Pol itiyaꞌu apou teꞌeye, “Kaiyemo mo ano, ane au heseyei meni owane tutawe soꞌoru taꞌama. Tu naifa, Owane Sitewi apou teꞌeye,
‘Fene werese lu owane werese fene lo maꞌe owe ape teꞌe narute.’
Serai ane le ne soꞌoruwesiya su, ane le maꞌe peri ape teꞌe narurowata.” Kis 22:28
6 Sosu Pol lu Farisi, lu Sadyusi wesi ape papu siyeye su, le lowe maꞌe uteye, “Kaiyemo mo werese, ane meni Farisi pefine aꞌi ne. Tai ano aiwawe aꞌi meni Farisi pefine aꞌi ne. Ane Owane Sitewi lai marepi hepene si tame taꞌane norohuwe hene aniyei ne tote tawesiye. Fene ane etiri ape ne au hese etiye.”c
7 Sosu Pol peri ape au teꞌeye su, lu taune werese ai marepi erasi aꞌi toteteye. Sadyusi lu werese lai, Farisi lu werese maꞌe ai marepi erasi toteye. 8 Sadyusi lu werese lowe marepi apou aꞌi toteye. Lu taune werese norohuwe si tame sinerowata. Lowe marepi tereꞌe apou toteye, “Owane Sitewi lo ipari wisere aꞌi, sosu ipari tereꞌe tereꞌe iro taꞌame.” Ahowa, Farisi lu werese etiri werese ape mo tote tawesiye.d 9 Sosu lowe ai marepi erasi aꞌi tote tiyatiteye su, Farisi lu owane tamo ponei maꞌe teiteyewe, lowe si tame norohuweyei ne peri kairefi aꞌi au teꞌeteye. Sosu lowe apou teꞌeye, “Meni ape yo seni luwaru aꞌi iro taꞌame. Ipari wisere aꞌi ta lai meni ape au teꞌeteye awere? Owane Sitewi lo ipari wisere aꞌi le maꞌe au teꞌeteye awere? Nomo soꞌoru taꞌama.”
10 Sosu ai marepi erasi luwaru aꞌi henerai su, ai atu siye meni owane Pol wesi topo lo maꞌe heneti. Lowe Pol aine teraꞌeyei ne toteye su, ane lowe ne atoweiyesiya.
11 Moꞌo pasi su, Meni Owane Pefine aꞌi Pol maꞌe atahe aꞌi teirai. Le Pol apou eiye, “Ne tei kairefiyere. Ne atoweiye sawa! Ne ane ne omo Jerusalem sahe au teꞌe fiyarirowa su, ne ane ne omo Rom aiwawe aꞌi au teꞌe fiyarirowa.”e
Lu owane tamo Pol aine teraꞌeyei ne teꞌe naneiye.
12 Nowe esi moꞌo su, Juda lo lu tamo taꞌuwerai. Lowe apou toteye, “Nomo werese ayei werese saꞌi werese siyenamiye. Nomo Pol aine teraꞌeye su, nomo faraꞌu ayei ene arowa, saꞌi tamo ene arowa.” 13 Lu hesi werese (40) aiwawe aꞌi toteye. 14 Lowe au heseyei lu owane maꞌe, yaꞌariyei lu owane maꞌe teꞌe siyenamiyei lo peri teꞌeyei ne fi. Lowe maꞌe teꞌeye, “Nomo werese ayei werese siyenamiyei. Pol temeniyeyei su, nomo faraꞌu ayei tame ene ayei. 15 Sosu aꞌi pe fene taꞌuweyei ape, iyape Sanhitran, Pol ei anire. Fene ai lu meni owane maꞌe apou teꞌere, ‘Nomo Pol lo etiri siye eti soꞌoruwerowa.’ Fene le heneta. Fene owane maꞌe apou teꞌeye, Ahowa, Pol aiyeyei su, nomo le aine teraꞌeyei.”f
16 Ahowa, Pol lo eiwane peri lowe lo wanuwe su, le ai atu siye lu lo wesi papu wiye. Le Pol maꞌe apou eiye, “Lowe ne aine teraꞌeyei ne totesiya.” 17 Sosu Pol ai atu siye meni owane ta ei aniye. Le apou eiye. “Ne meni eime ai atu siye meni owane maꞌe henetire. Le peri ta ne maꞌe au teꞌeyei ne fai.” 18 Sosu le eiwane meni erasi maꞌe heneti. Ai atu siye meni owane ape apou eiye, “Pol meni ape, nomo wafei se ti tawesiye ape, le meni eime eite ne maꞌe eimawesawi. Meni eime ne maꞌe peri ta au teꞌeyei ne fai.”
19 Sosu ai atu siye meni owane ereti lo aine aiyaꞌo aniyewe, le tewi wesi sahe feni eire maꞌe heneti. Sosu le apou ei toweriye, “Ne piye peri ta teꞌeyei ne fai awere?”
20 Meni eime ape apou eiye, “Juda lo lu tomu neꞌese apou teꞌe naneiye. Lowe apou toteye, ‘Nomo nowe moꞌo su, Pol owane meni maꞌe henetirowa.’ Lowe apou teꞌerowa, ‘Nomo Pol lo peri eti wanu soꞌoruweyei ne fai.’ 21 Ne le lowe maꞌe owe ape henetai. Lu tomu neꞌese, lu hesi tawerese aiwawe aꞌi (40) Pol aine teraꞌeyei ne toteye. Lowe ayei, saꞌi werese siyenamiye. Pol aine teraꞌeyei su, lowe faraꞌu ayei, saꞌi ene arowa. Lowe lo etiri ape taꞌuwe naneiteye, ne peri lo ape aniyei su, lowe Pol, ai lu meni owane maꞌe henetirowa su, sosu lowe le aine teraꞌerowa.”
22 Sosu ai atu siye meni owane ape lai meni eime nowe maꞌe eimawesawi. Le meni eime ape apou eiye, “Ne lu taune werese maꞌe owe ape teꞌere.”
Pol omo Sisaria maꞌe heneti.
23 Sosu aꞌi pe ai atu siye meni owane tutawe lai lu owane hesi lo ei aniye, “Fenesi ai atu siye lu tomu neꞌese ei taꞌuwe naneire. Ai atu siye lu 200, lu tereꞌe 70, fe hos nihari tereꞌe erasi sahe onuwei ape, lu tereꞌe 200 ti aniteye ape, ei taꞌuwe naneire. Nowe pasi aꞌi lowe werese omo Sisaria maꞌe iyei. 24 Fenesi Pol maꞌe fe hos hire fa onure. Fenesi le meni owane erasi iyape Feliks maꞌe heneti. Lu tamo Pol owe ape aine teraꞌere.” 25 Sosu le one towe ta apou leseye,
26 “Ane lai Klodius Lisias.
One towe eite meni owane Feliks maꞌe ausawiyei. Ane ne se eritewa. 27 Juda lo lu tamo meni eite anite tawesiye. Lowe le aine teraꞌeyei ne toteye. Ahowa, ane lai ai atu siye lu werese ano aiwawe ereti lowe lo sahe ani erauwe. Ane Rom lo meni eite wanuwe.g 28 Sosu ane lai meni ape lo peri eti wanuwei ne toteye. Ane le lu owane taꞌuweyei ape maꞌe heneti.h 29 Sosu ane lowe maꞌe peri eti ei toweriye su, lowe itiyaꞌu apou teꞌeye, ‘Meni eite yo peri nomo lo arisiye. Meni eite yo seni luwaru aꞌi iro taꞌame.’ Serai ane aiwawe toteye, meni eite yo seni luwaru aꞌi iro taꞌame. Serai nomo meni eite aine teraꞌerowata. Ane le kalabus wesi maꞌe henetirowata. 30 Sosu ane peri ape, lowe aine teraꞌeyei ne toteye ape ne, wanuwe su, pereye aꞌi ane le ne maꞌe eimawesawi. Ane lu tereꞌe tamo ne maꞌe eimawesawi. Lowe Pol ne peri ahi aꞌi ne maꞌe au teꞌerowa. Peri ano tepaꞌasiye.”i
31 Sosu pasi po, ai atu siye lu tomu neꞌese aꞌi lowe Pol omo Antipatris maꞌe heneti. 32 Nowe esi moꞌo su, lu fe hos onuwe ape, lowe Pol omo Sisaria maꞌe heneti. Ai atu siye lu werese wesi lowe lo maꞌe si tame fi. 33 Lowe omo Sisaria maꞌe heneri su, lowe one towe meni owane maꞌe auwe. Sosu le maꞌe Pol henetai. 34 Meni owane one towe ape siye teꞌeteye su, le Pol maꞌe ei toweriye, “Omo pani no eiwerou irosiya awere?” Sosu Pol le maꞌe itiyaꞌu apou eiye, “Omo pani ano Silisia.” 35 Sosu meni owane apou eiye, “Faraꞌu, lu tereꞌe tamo, ne etiyei ape, heneraiyei su, ane peri no wanurowa.” Sosu le Pol Herot lo wesi erasi maꞌe, le tu iroteye ape, henetiyewe, ai atu siye lu tamo le tei ninaweteye.