Juda lo lu lai Pol etiye.
24
Nowe poweiye ereti feni werese i tepaꞌasiye su, au heseyei meni owane iyape Ananaias, yaꞌariyei lu tamo, au teꞌe siye meni iyape Tertulus, lowe werese omo Sisaria maꞌe itorai. Lowe awei meni owane tutawe maꞌe Pol etiyei ne fai. 2 Lowe Pol ei aniye su, meni Tertulus, meni owane tutawe Feliks maꞌe Pol lo yo seni luwaru aꞌi apou au teꞌeye, “Feliks ne lai nowe tomu neꞌese wisere aꞌi irowe. Lu werese ai atu tiyatirowata. Ne lai peri fere lu taune werese maꞌe au irowe. Ne lai etiri werese, wisere aꞌi taꞌaneye. Kairefi no se ne lai etiri wisere aꞌi au taꞌaneye. 3 Lu taune werese omo omo werese sahe ne, owane pefine maꞌe au teꞌe wisereyeye. 4 Ane peri tamo oso poꞌo aꞌi ne maꞌe au teꞌeyei ne fai. Ne faraꞌu wanurowa awere? 5 Meni eite luwaru aꞌi tene! Le Juda lo lu taune werese maꞌe ai marepi erasi aꞌi iroteye. Omo omo werese sahe le ai marepi au iroteye. Le lai lu tewi tereꞌe lo meni owane tutawe. Lu tewi tereꞌe lo iyape Nasaret. Lowe werese Nasaret lo meni ta umasiteye.a 6 Le etiri luwaru aꞌi Owane Sitewi lo wesi tutawe sahe irowei ne toteye. Yo peri nomo lo amouwesiya. {Serai nomo le ereti lo anite tawesiye. Nomo le yo peri nomo lo se etiyei ne toteye.b 7 Ahowa, ai atu siye meni owane iyape Lisias, sosu ai atu siye lu tomu neꞌese aiwawe kairefi erasi se lowe le heneti. 8 Sosu le nomo maꞌe apou eiye, fene meni eite Feliks maꞌe etiyei ne ire.}c Ne le maꞌe siye etiyei su, ne lai peri ano wiyeme aꞌi wanu soꞌoruwerowa. Etiri eite nomo etiyei ne fai ape pefine aꞌi ne.” 9 Sosu Juda lo lu werese wanuwe su, lowe ahi taꞌi aiwawe aꞌi au teꞌeye. Lowe apou teꞌeye, “Etiri werese ape mo pefine aꞌi tene!”Pol meni owane Feliks maꞌe au teꞌe areiyeye.
10 Sosu awei meni owane ape Pol aine aiyaꞌo aniye su, Pol apou itiyaꞌu eiye, “Iyu menei tomu neꞌese omo pani eite sahe ne lai au heseyei siye meni pefine aꞌi ne. Serai ane ne maꞌe itiyaꞌu au teꞌe areiyerowa. Ane marepi erasi aꞌi wisereye nineꞌisiya. 11 Ne faraꞌu lu ape mo maꞌe apou teꞌe towerire, ‘Poweiye ereti feni hesi lowe hesi aꞌi i tepaꞌasiye su, ane lai omo Jerusalem maꞌe Owane Sitewi maꞌe au teꞌe wisereyeyei ne fi.’ 12 Lu tewi ape mo ane maꞌe, ai peri teꞌe tiyatiteye ape, au fu teꞌesiya. Lowe ane maꞌe ai peri lu taune maꞌe teꞌe tiyatiteye ape, siye taꞌame. Ane Owane Sitewi lo wesi tutawe wiye su, ane lu tamo ai peri teꞌe tiyati taꞌame. Ane lai taꞌuweyei wesi papu lu taune maꞌe yo seni luwaru aꞌi iro taꞌame. Pani tewi tereꞌe maꞌe ane yo seni luwaru aꞌi iro taꞌame. 13 Peri lowe lo ape ane au fu teꞌeye su, lowe peri sitewi lo ne maꞌe au teꞌe atuaturowata. 14 Ahowa, ane peri ta ne maꞌe au teꞌesiya. Ane marepi tereꞌe umasisiya su, ane yaꞌariyei nomo lo Owane Sitewi maꞌe au teꞌe wisereyeye. Lowe marepi ape ne apou teꞌesiya, ‘Marepi tereꞌe ape wawero aꞌi ne. Ane lai etiri werese, Moses lo yo peri irosiya ape, ane marepi taꞌi tote tawesiteye. Ane Owane Sitewi lo au teꞌe siye lu werese lo peri tote tawesiteye.’ 15 Ane lai marepi taꞌi lowe lo tote tawesisiya. Marepi nomo lo aiwawe aꞌi ne. Owane Sitewi lai lu taune werese wisere aꞌi, sosu lu taune werese luwaru aꞌi lowe werese si tame norohu hene anirowa.d 16 Serai ane lai mi mi pasi pasi Owane Sitewi lo nihe se yo seni aseyaro aꞌi ironamiteye. Sosu aiwawe aꞌi ane lu taune werese lo nihe se yo seni aseyaro aꞌi ironamiteye. 17 Sosu aꞌi pe ane omo Jerusalem arunati su, iyu menei tomu neꞌese, ane si tame aiye taꞌame. Nowe moꞌo su ane si fai su, ane maꞌaru tamo lu ariye aꞌi maꞌe auwei ne aitai. Ane etiri tamo Owane Sitewi maꞌe au heseyei ne aitai. 18 Lowe ane Owane Sitewi lo wesi tutawe papu siyeye su, ane meni waraꞌi aꞌi ne. Ane meni amerame aꞌi. Lowe ane siyeye su, lu taune tomu neꞌese ane maꞌe taꞌuwerai. Ane yo seni luwaru aꞌi iro taꞌame.e 19 Ahowa, ane meni yahowaꞌi aꞌi ne. Lu tamo omo pani Esia maꞌe fai ape, lowe ne maꞌe fai taꞌame. Lowe ane ne ai peri au fu teꞌeye su, lowe ne maꞌe ai peri ape au teꞌe areiyerowa. 20 Lu ape mo saro ahe teisiya ape, lowe ane maꞌe ai peri yo seni luwaru aꞌi au fu teꞌeye su, lowe ne maꞌe faraꞌu au teꞌe areiyerowa. Ane lu owane werese taꞌuwerai ape maꞌe, iroteye su, lowe ane yo seni luwaru aꞌi siyerowata. 21 Peri ape lowe lo wiyeme aꞌi tene! Ane lowe ponei maꞌe teiye su, ane peri taꞌi kairefi aꞌi au teꞌe areiyeye. Ane apou teꞌeye, ‘Lu taune werese temeniyeye su, Owane Sitewi lai lowe werese si tame taꞌane norohuwe hene anirowa.’ Ane peri ape kairefi aꞌi tote tawesisiya. Fene pereye marepi ano ape au hesere.”f
22 Sosu aꞌi pe Feliks le Jisas lo marepi oso poꞌo aꞌi wanu soꞌoruwe ape, lowe maꞌe apou teꞌeye, “Peri ape tepaꞌasiye. Lu werese ire. Meni ape Lisias ai atu siye meni owane aiyerowa su, ane faraꞌu peri ape au teꞌe fareraiyerowa.”g 23 Sosu le ai atu siye meni owane taꞌi maꞌe apou eiye, “Ne Pol kalabus wesi maꞌe henetire. Ne le au noweinoweite. Pol lo kaiyemo mo werese faraꞌu etiri tamo aunarairowa.”
Feliks lai Pol kalabus wesi papu fu aroweye.
24 Nowe tomu neꞌese tepaꞌasye su, meni owane Feliks tani lo aiwawe fai. Tani lo iyape Drusila. Tani ape Juda lo menitani. Sosu le Pol ei aniye. Pol fai su, le Jisas Krais lo peri lowesi maꞌe au teꞌe areiyeye. Lowe Jisas lo peri wanu etiye. 25 Sosu Pol yo seni aseyaro aꞌi, tahe lowesi lo, lowesi au noweinoweiteye ape, ne, au teꞌe areiyeye. Nowe yeꞌewi se Owane Sitewi lai lu taune werese au hese ereirowa. Le etiri ape mo lowesi maꞌe apou au teꞌe areiyeye. Feliks peri ape wanuwe su, le marepi erasi aꞌi atoweiyeye. Sosu le apou teꞌeye, “Faraꞌu peri teꞌe tepaꞌasire. Ne ire. Marepi ano toteyei su, ane ne si ei anirowa.” 26 Le marepi tereꞌe aꞌi toteye. Le apou toteye, “Pol ane maꞌe maꞌaru tamo fa aure.” Serai le nowe tomu neꞌese Pol ei aniyei ne teꞌe tiyatiteye.
27 Sosu aꞌi pe iyu menei hesi aꞌi i tepaꞌasiye su, Feliks omo ape arunatiyewe fi. Meni tereꞌe iyape Porsius Festus, le Feliks lo yaru wiyawi atati taꞌaneteye. Ahowa, Feliks Juda lo lu werese maꞌe marepi nineꞌiyei ne toteye. Serai le Pol kalabus wesi maꞌe saro arunati.