Pol Rom lo meni owane tutawe, Sisar, yo seni lo au hese ereirowa.
25
Sosu nowe hesi heta i tepaꞌasiye su, meni Festus omo Sisaria arunatiyewe, omo Jerusalem maꞌe yaneri. 2 Omo Jerusalem maꞌe henerai su, au heseyei lu owane tamo, lu owane tereꞌe tamo le maꞌe Pol etiyei ne fi.a 3 Lowe le maꞌe apou teꞌeye, “Ne etiri wisere aꞌi nomo maꞌe aure. Ne meni Pol omo Jerusalem maꞌe si eimawesawi.” Lowe apou toteye, “Pol aiyerowa su, nomo yo tewiye sahe tei fareyarerowa. Pol aiyeyei su, nomo le aine teraꞌerowa.”b 4 Ahowa, Festus lowe maꞌe itiyaꞌu eiye, “Pol omo Sisaria kalabus wesi sahe saro irosiya. Nowe moꞌo su ane omo ape maꞌe si tame irowa. 5 Fene lu Owane tamo ane mase itorirowa. Meni ape yo seni luwaru aꞌi iroteye su, fene le maꞌe etirowa.”6 Sosu Festus nowe poweiye ereti hesi werese (10) lowe mase iroteye su, le omo Sisaria maꞌe si itori. Nowe moꞌo su, le Pol teꞌe etiye. Sosu le apou eiye, “Fene meni Pol heneta.” 7 Sosu Pol henerai su, Juda lo lu tamo, omo Jerusalem maꞌe itorai ape, le atahe aꞌi teirai. Lowe Pol ne yo seni luwaru aꞌi tomu neꞌese au fu teꞌeteye. Lowe etiri ape mo sitewi au teꞌe taꞌame.c 8 Sosu Pol itiyaꞌu apou eiye, “Ahowa, ane yo seni luwaru aꞌi ta Juda lo yo werese ne iro taꞌame. Ane Owane Sitewi lo yo peri arisi taꞌame. Aiwawe aꞌi ane Rom lo meni owane tutawe lo yo peri werese arisi taꞌame.”
9 Sosu Festus Juda lo lu werese pereꞌi siyeyei ne toteye. Le apou teꞌe toweriye, “Ne faraꞌu omo Jerusalem maꞌe yaneyei awere? Ne faraꞌu ane ne taꞌuweyei wesi maꞌe tei irorowa awere? Serai lowe lo peri werese wanurowa awere?”
10 Sosu Pol itiyaꞌu apou eiye, “Ane lai Rom lo meni owane tutawe lo taꞌuweyei wesi sahe teisiya. Lowe ane maꞌe wesi ape sahe etiyei ne toteye. Faraꞌu, ane etiri luwaru werese aꞌi Juda lo lu taune werese maꞌe iro taꞌame. Ne peri ano wiyeme aꞌi wanu soꞌoruwerowa! 11 Serai ane etiri luwaru aꞌi erasi ta irowe su, ne ane aine teraꞌeyei ne toteye. Ane faraꞌu temeniyerowa. Ahowa, Juda lo lu ape mo, peri lowe lo, ane au fu teꞌeye ape, wawero aꞌi su, ne lu tereꞌe tamo lowe maꞌe ane henetirowata. Ane meni owane tutawe no, Sisar, yo seni ano au hese ereire.”
12 Sosu Festus lu owane tamo lo teꞌe tiyatiteye su, le si tame fai. Le Pol maꞌe apou eiye, “Ne Rom lo meni owane tutawe ei aniye su, ne Rom lo owane tutawe maꞌe fu ire.”
Meni Festus lai meni owane tutawe, Agripa, Pol ne ei toweriye.
13 Nowe poweiye tamo i tepaꞌasiye su, meni owane Agripa einei lo Bernaisi omo Sisaria maꞌe henerai. Lowesi Festus maꞌe au teꞌe wisereyeyei ne toteye. 14 Lowesi nowe tomu neꞌese iroteye su, Festus lowesi maꞌe Pol ne teꞌeye. Le apou teꞌeye, “Meni ta kalabus wesi sahe iroteye ape, meni owane Feliks le kalabus wesi sahe arunati.d 15 Ane omo Jerusalem maꞌe fi su, au heseyei lu owane tamo, yaꞌariyei tamo, ane maꞌe au teꞌeyei ne fai. Lowe le aine teraꞌeyei ne teꞌeye. 16 Ane lowe maꞌe apou teꞌeye, ‘Rom lo yo peri apou teꞌesiya. Nomo meni ta lu tereꞌe tamo maꞌe yahowaꞌi henetirowata. Tu le lowe maꞌe teirowawe, peri lowe lo wanuwei. Sosu le faraꞌu peri lowe lo itiyaꞌu teꞌerowa.’ 17 Lowe saro ahe ane mase fai su, ane pereye aꞌi le etiyei ne ei taꞌuwerai. Ane nowe moꞌo su, ane meni ape ei aniye. 18 Sosu lu ape mo ponei maꞌe teiye su, lowe yo seni luwaru aꞌi au fu teꞌeye. Ane yo seni luwaru aꞌi ape mo wanuwe su, ane aiwawe aꞌi toteye, ‘Meni ape yo seni luwaru erasi aꞌi iro taꞌame.’ 19 Ahowa, lowe peri tame au fu teꞌeye. Lowe meni taꞌi, temeniyeye ape, iyape Jisas ne, teꞌe areiyeye. Meni ape ne, Pol apou eiye, ‘Meni ape Jisas, temeniyeye su, Owane Sitewi lai le si tame taꞌane norohuwe hene aniye. Lowe Juda lo marepi aiwawe aꞌi au teꞌeteye.’ 20 Ane peri lo sitewi siye etiyei ne toteye su, ane yo peri ape soꞌoru taꞌama. Serai ane le maꞌe ei toweriye, ‘Ne faraꞌu omo Jerusalem maꞌe si tame irowa awere? Lowe lai yo seni no au hese etirowa.’ 21 Sosu Pol Rom lo meni owane tutawe, Sisar, maꞌe ei aniye su, ane apou toteye. Le lai meni owane tutawe ape maꞌe fu ire. Sosu ane le kalabus wesi sahe heneti. Wai taꞌi omo Rom maꞌe iyei su, ane le meni owane tutawe nomo lo maꞌe eimawesawi.”
22 Sosu aꞌi pe meni owane Agripa, Festus maꞌe ei toweriye, “Ane faraꞌu meni ape lo peri wanurowa awere?” Sosu le itiyaꞌu eiye, “Ei, aperi su, ne peri ape faraꞌu wanurowa.”
Pol Agripa maꞌe au teꞌe areiyeye.
23 Nowe moꞌo su, Agripa einei lo Bernaisi lowesi ipari tahe wisere aꞌi ani asiteye. Lowesi lu owane tomu neꞌese mase, awei lo lu owane tomu neꞌese mase, ai atu siye lu owane tamo taꞌuweyei wesi papu wiye. Sosu lowe taꞌuwe tepaꞌasiye su, Festus lai Pol ei aniye. 24 Sosu Pol taꞌuweyei wesi henerai su, Festus lowe maꞌe apou teꞌeye, “Meni owane tutawe Agripa, lu owane werese nomo aiwawe irosiya ape, fene meni ape siye etire. Juda lo lu taune werese omo Jerusalem sahe omo Sisaria sahe ane maꞌe apou eiye, ‘Ne meni eite fu aine teraꞌere.’ 25 Ane Pol lo peri wanuwe su, ane yo seni lo le ne aine teraꞌeyei ne tote taꞌame. Sosu le Rom lo meni owane tutawe, Sisar, ei aniye su, ane omo Rom maꞌe eimawesawiyei ne toteye. 26 Ane Rom lo meni owane tutawe, Sisar maꞌe one towe ta leseyei su, ane peri soꞌoru taꞌama. Serai ane fene maꞌe Pol henetai. Ane meni Owane Agripa maꞌe Pol henetai. Nomo werese peri lo wanu etiyei su, ane peri ta faraꞌu Rom lo meni owane tutawe, Sisar maꞌe one towe lese ausawirowa. 27 Ane kalabus wesi meni ta, yo seni aseyaro aꞌi iroteye ape, Rom lo meni owane tutawe Sisar maꞌe eimawesawirowata. Ane yo seni luwaru aꞌi, le irowe ape ne, one towe sahe leseyei.”