4 Juda lo lu taune werese lowe etiri werese ano siye soꞌoruweteye. Ane meni eime oso aꞌi iroteye su, lowe ane siye soꞌoruweteye. Ane lai omo pani ano iroteye ape, lowe ane siye soꞌoruweteye. Ane omo Jerusalem maꞌe fi su, lowe marepi ano siye soꞌoruweteye. 5 Lowe mi mi werese ane siye soꞌoruweteye. Lowe aiwawe aꞌi toteyei su, lowe peri wiyeme aꞌi ape faraꞌu ne maꞌe au teꞌe areiyerowa. Ane Farisi lo marepi werese umasi etiteye su, lowe faraꞌu ne maꞌe au teꞌe areiyerowa.^a 6 Tu naifa Owane Sitewi lai yaꞌariyei nomo lo maꞌe peri ta wiyeme aꞌi au teꞌeye. Ane lai marepi ape tote tawesi etisiya. Pereye lowe ane maꞌe marepi ape etiyei ne toteye. 7 Owane Sitewi lai peri wiyeme aꞌi ape au teꞌeye su, Israel lo lu tewi (12) lowe werese peri teꞌe naneiyei ape mo ne ninawesiya. Lowe Owane Sitewi maꞌe wiyawi taꞌaneteye su, lowe mi mi pasi pasi peri teꞌe naneiyei ape mo ne ninaweteye. Meni owane, marepi ape aiwawe aꞌi ane tote tawesisiya ape, lowe ane etiyei ne totesiya.^b 8 Owane Sitewi lai kairefi erasi irosiya. Le lu tamo, temeniyeye ape, faraꞌu si tame taꞌane norohuwe hene anirowa. Juda lo lu tamo marepi ape tote tawesi taꞌame.

9 Tu naifa ane lai apou toteye. Ane wiyawi ta taꞌaneteye. Ane lu taune werese, Jisas Nasaret lo meni lo marepi umasiteye ape, ane lowe maꞌe au luwaruweye.^c 10 Ane omo Jerusalem maꞌe fai su, ane apou aiwawe irowe. Au heseyei lu Owane werese lo kairefi se, ane Jisas lo lu feni tomu neꞌese kalabus wesi maꞌe heneti. Lowe lu feni ape teraꞌeyei ne toteye su, ane apou eiye, ‘Ei, fene lowe aine teraꞌere.’ 11 Mi mi werese ane taꞌuweyei wesi werese sahe lu feni werese maꞌe au luwaruweye. Ane lowe Owane Sitewi ne teꞌe naruteye ape, au fu teꞌeye. Ane ai erasi lowe ne toteteye su, ane omo pani tereꞌe maꞌe fiyewe, lowe kalabus wesi maꞌe hene aniye.

12 Ane omo Damaskus maꞌe lowe hene aniyei ne toteye. Ane yaneye su, ane au heseyei meni owane lo kairefi se lowe hene aniyei ne toteye. 13 Poweiye po se ane lu tamo mase yo sahe iteye. Pereye aꞌi ane mi erasi, niꞌarawe maꞌe itorai ape, siyeye. Mitaiyeyei ape erasi aꞌi ne, poweiye lo mi oso aꞌi ne. Nomo werese napetu tawesiye. 14 Nomo werese awei sahe winetaiteye. Sosu ane peri ahi ta uteye ape, wanuwe. Peri ahi ape, peri ano se iyape Hibru apou uteye, ‘Sol, Sol! Piyene ane maꞌe au luwaruwesiya awere? Ne lai apou teꞌe areiyesiya su, ne topo ne au luwaruwesiya.’ 15 Sosu ane itiyaꞌu eiye, ‘Meni owane ne eiwerai awere?’ Sosu meni owane itiyaꞌu apou eiye, ‘Ane lai Jisas ne. Ne lai ane maꞌe au luwaruweye. 16 Sosu ne sine teire. Ane ne ariariyeye. Ne lai wiyawi ano taꞌanerowa. Ne lai etiri werese, ne siyeye ape, au teꞌe fiyarite. Etiri werese, ane ne au atuaturowa ape, ne lu taune werese maꞌe au teꞌe fiyarirowa. 17 Lu tewi no ne maꞌe au luwaruweyei su, ane ne pati henetirowa. Lu tewi tereꞌe ne maꞌe au luwaruweyei su, ane ne aiwawe aꞌi au pati ferafereirowa. 18 Ane lai ne lu taune tomu neꞌese maꞌe au teꞌe fiyariyei ne eimawesawirowa. Lowe peri ano, ne au teꞌe fiyariyei ape, wanuwe su, lowe yo seni luwaru aꞌi towafi lowe lo aresaiye atati arunatirowa. Lowe Owane Sitewi maꞌe si tame atati toterowa. Pereye lowe pasi wou aꞌi iroteye. Lowe peri ano umasirowa su, lowe mi aꞌi wou aꞌi tei irotorowa. Lowe sepei Satan lo kairefi fa atati arunatirowa su, lowe Owane Sitewi ne umasirowa. Lowe ane umasirowa su, Owane Sitewi lai yo seni luwaru aꞌi lowe lo au ani sasari pamowerowa. Lowe yo seni luwaru aꞌi lowe lo au ani sasari pamowerowa su, Owane Sitewi lu taune werese lo aiwawe omo hire maꞌe hene ani wirowa.’^d

19 Serai ane ne maꞌe, meni owane Agripa, au teꞌesiya, Owane Sitewi lai ane maꞌe au suwou hamehameyei siyeye su, ane suwou hamehameyei ape umasiteye. 20 Tu ane lai lu taune, omo Damaskus iroteye ape, au teꞌe fiyariteye. Sosu omo Damaskus arunati su, ane lu taune maꞌe omo Jerusalem sahe au teꞌeyei ne fi. Aiwawe aꞌi ane omo pani Judia maꞌe lu taune werese maꞌe au teꞌe fiyariye. Moꞌo ane lu tewi tereꞌe werese maꞌe au teꞌe fiyariye. Ane Owane Sitewi lo peri lowe werese maꞌe au teꞌe fiyariye. Lowe yo seni luwaru aꞌi lowe lo fa ani aweto arunatiyewe, Owane Sitewi ne umasite. Lowe yo seni luwaru aꞌi ani aresaiye arunatiyei su, lu taune werese wiyawi lowe lo wisere aꞌi siyeye. 21 Ane Owane Sitewi lo peri Owane Sitewi lo wesi tutawe sahe au teꞌe fiyariye su, Juda lo lu tamo ane anite tawesiyewe, ane aine teraꞌeyei ne toteye. 22 Mi mi pasi pasi Owane Sitewi lai ane au pati ferafereiteye. Serai ane lu taune owane werese lu taune yahowaꞌi aꞌi maꞌe Owane Sitewi lo peri au teꞌe areiyesiya. Peri ano Owane Sitewi lo au teꞌe siye lu werese lo peri aiwawe aꞌi au teꞌesiya. 23 Lowe Moses aiwawe apou au teꞌe areiyeteye, Owane Sitewi ‘Meni Owane Sitewi lai ariariye ape, fofowei erasi wiyeme aꞌi teriterowa. Moꞌo su, lu tamo le maꞌe aine teraꞌerowa. Aine teraꞌerowa su, Owane Sitewi lai le si tame taꞌane norohuwe hene anirowa. Le meni tutawe Owane Sitewi lai si tame taꞌane norohuwe hene anirowa. Le awei hi maꞌe itorai su, le marepi hepene heꞌi aꞌi lu taune werese lo maꞌe, lu tewi tereꞌe maꞌe au teꞌeyei ne itorairowa.’”^e

24 Sosu meni owane Festus Pol maꞌe peri erasi aꞌi uteye, “Pol, ne meremereye aꞌi ne. Marepi erasi no, ne maꞌe meremereye aꞌi irowe.”

25 Sosu Pol itiyaꞌu apou eiye, “Owane meni Festus, Ahowa! Ane meremereye taꞌama. Peri ano farere wiyeme aꞌi ne. 26 Meni owane ape peri ano wanu soꞌoruwesiya. Ane faraꞌu le maꞌe au teꞌe teꞌerowa. Le etiri werese, ane au teꞌesiya ape, siye soꞌoruweteye. Ane lai etiri werese fareyareye se taꞌama. 27 Meni owane Agripa, ne Owane Sitewi lo au teꞌe siye lu werese lo marepi tote tawesisiya awere? Ane ne marepi ape tote tawesiye ape, soꞌoruwe tene!

28 Sosu Agripa Pol maꞌe itiyaꞌu eiye, “Nowe oso aꞌi su, ne apou toteye, ne ane marepi heꞌi aꞌi ape tatai anirowa awere?”

29 Sosu Pol itiyaꞌu eiye, “Nowe oso aꞌi su, nowe pite aꞌi, ane Owane Sitewi maꞌe ne au teꞌe towerisiya. Fene werese ane mase irosiya ape, ahowa, fene wafei se owe ape ti tawesinamirowa. Ne, lu taune werese aiwawe, peri ano wanuwe ape, Owane Sitewi lai fene werese maꞌe marepi hepene heꞌi aꞌi aurowa.”

30 Sosu meni owane ape, Festus menitani Bernaisi, lu owane tereꞌe aiwawe aꞌi sine teiteye. 31-32 Lowe werese nowe maꞌe heneye. Sosu lowe apou teꞌe tiyatiteye, “Meni ape yo seni luwaru aꞌi iro taꞌame. Nomo le aine teraꞌerowata. Nomo kalabus wesi maꞌe henetirowata.” Sosu Agripa, Festus maꞌe apou eiye, “Meni ape Rom lo meni owane tutawe, Sisar maꞌe ei ani taꞌame su, nomo le nowe maꞌe ani arosawirowa. Ahowa, nomo le meni owane tutawe ape Sisar, maꞌe eimawesawirowa.”