Pol omo Rom maꞌe wai se iyatuti.
(Aposel 27:1–28:31)
Lowe Pol omo Rom maꞌe eimawesawi.
27
Meni owane lo peri teꞌe naneiyei tepaꞌasiye. Pol Pani Itali maꞌe iyei ne toteyei su, le kalabus wesi lu tereꞌe tamo aiwawe ai atu siye meni owane maꞌe iyape Julius heneti. Meni ape ai atu siye lu tomu neꞌese iyape Rom meni owane pefine lo ai atu siye lu, au noweinoweiteye. Ane Pol lo lu feni aiwawe iyei. 2 Sosu nomo wai ape papu omo Adramitium maꞌe fai ape, aro atowe. Wai ape omo tamo pani Esia maꞌe iyatutiyei ne toteye. Nomo wai se omo Sisaria arunatiyewe, saꞌi erasi ape maꞌe iyatu toneye. Meni taꞌi iyape Aristarkus nomo aiwawe fi. Le omo Tesalonaika pani Masedonia maꞌe fai.a 3 Nowe moꞌo su, nomo omo Saidon maꞌe iyatu furi. Meni Julius Pol maꞌe au noweinoweiteye. Le Pol maꞌe apou eiye, “Ne faraꞌu kaiyemo no werese siyeri. Lowe faraꞌu au arowa.” 4 Sosu nomo omo Saidon arunati su, fiyaru erasi aꞌi heneraiyewe, wai nomo lo kemere Saiprus feni wisere aꞌi maꞌe iyatuti. 5 Sosu nomo kemere Saiprus arunatiyewe fi. Saꞌi erasi omo Silisia, omo Pamfilia atahe aꞌi iyatu toneri. Sosu nomo omo Maira pani Lisia sahe wai iyatu furi. 6 Ai atu siye meni owane Aleksandria lo wai tereꞌe siyeye. Le nomo wai ape se hene arunari. Wai ape pani Itali maꞌe iyatutiyei ne toteye.7 Omo Maira arunati su, nomo momotei aꞌi iyatutiteye. Nowe poweiye tomu neꞌese momotei aꞌi fi. Fiyaru erasi henerai su, nomo omo Nidus kairefi se henerai. Sosu nomo senitewi maꞌe furi taꞌame su, nomo kemere Krit feni maꞌe iyatu toneri. Omo Salmone aweraꞌiynatiyewe fi. 8 Nomo saꞌi tewiye kairefi se iyatutiteye, nomo iyatuti su, nomo saꞌi ape iyape Yaꞌorei Wisere aꞌi maꞌe furi. Saꞌi Yaꞌorei Wisere aꞌi ape omo Lasea atahe aꞌi irosiya.
9 Sosu aꞌi pe nomo nowe poweiye tomu neꞌese saro ahe iroteye. Nowe tahe paꞌare saꞌi au huwe ape, i tepaꞌasiye su, fiyaru erasi aꞌi atahe aꞌi henerai.b Saꞌi ei erasi aiwawe atahe aꞌi henerai. Wai ta saꞌi iyatu toneri su, fiyaru, saꞌi ei wai ani awetu awetorowa. Sosu Pol lowe maꞌe peri kairefi se apou teꞌeye, 10 “Lu werese Wanure! Nomo saꞌi toneriyei su, fiyaru, saꞌi ei erasi wai eite ani awetu awetorowa. Wai ani awetorowa su, etiri werese saꞌi papu itorowa. Nomo aiwawe aꞌi saꞌi papu itorowa. Serai nomo awei pani sahe sato ahe onure.” 11 Ahowa, ai atu siye meni owane Pol lo peri umasi taꞌama. Le wai lo meni owane marepi topo lo wanu umasiteye. 12 Nowe fiyaru erasi se, saꞌi yaꞌorei ape wai senitewi maꞌe furai taꞌame. Wai furowa su, saꞌi ei wai ani awetorowa, serai lu tomu neꞌese saꞌi yaꞌorei ape arunatiyei ne toteye. Lowe omo Finiks maꞌe iyei ne toteye. Omo ape sahe nowe fiyaru erasi se saro iroteye. Omo ape sahe Kemere Krit sahe saꞌi yaꞌorei wisere aꞌi ape fiyaru ne saro ahe fareyarerowa.
Fiyaru saꞌi ei erasi aꞌi henerai.
13 Sosu fiyaru oso aꞌi henerai su, lowe apou toteye, “Fiyaru wisere aꞌi. Nomo omo Finiks maꞌe iyei.” Sosu lowe saꞌi erasi iyatu toneye. Lowe Krit lo saꞌi tewi atahe aꞌi maꞌe iyatuti. 14 Oso aꞌi su, fiyaru ape henerai. Fiyaru erasi Kemere Krit sahe soro maꞌe oweirai. 15 Fiyaru erasi ape wai nomo lo ani terutorowe su, nomo wai ape iyatuti noweinowei taꞌame. Wai ape fetaneyeti. 16 Nomo kemere oso aꞌi iyape Kauda fetaneyetiteye su, nomo wai oso aꞌi kairefi anite ti tawesiye. 17 Sosu lu werese wai oso aꞌi ape ani ti tawesi tepaꞌasiye su, lowe wai erasi ape wafei se ti atati tawesiye. Fiyaru erasi ape lai wai ape aine tapereseyei ne ataheyeye. Wai ape wafei ti tawesi tepaꞌasiye su, lowe wai eneri tapiye omo pani Afrika sahe aine tapereseyei ne tote atoweiyeye. Lowe wai lo ipari tahe hi ani ararowe su, fiyaru wai ape ani fetaneyeti. 18 Fiyaru erasi wai nomo lo ani aineraiteye. Nowe moꞌo su, lowe etiri werese wai sahe ani asiye ape, saꞌi maꞌe fu arowe. Serai wai erasi ape wiyeme aꞌi fetaneyeteye. 19 Nowe hesi heta i tepaꞌasiye su, lowe wai lo etiri werese, wafei aiwawe saꞌi maꞌe ani fu arowe. 20 Nowe tomu neꞌese poweiye, eiwariyemi werese siye taꞌame. Fiyaru erasi nomo werese ani arosawi. Nomo werese apou toteye, “Nomo werese saꞌi papu atenise itorowa.”
21 Nowe tomu neꞌese lowe ene a taꞌame su, Pol ponei teiye apou teꞌeye, “Lu werese wanure! Fene peri ano wanu umasiye su, nomo faraꞌu iroteye. Nomo Kemere Krit saro teiteye su, etiri werese nomo lo fu aro taꞌame. Nomo werese wiyeme aꞌi iroteye.” 22 Ahowa, fene werese marepi fene lo kairefi aꞌi totere. Lu werese nomo lo saꞌi papu atenise ito taꞌame. Wai ape lai saꞌi papu itorowa. 23 Liyewe pasi, Owane Sitewi, ane umasiye ape, ane wiyawi lo au taꞌaneteye ape, Owane Sitewi lo ipari wisere aꞌi ane maꞌe atahe aꞌi teirai. 24 Le apou eiye, “Pol, atoweiye sawa! Ne Rom lo meni owane tutawe, Sisar maꞌe teiri. Sisar peri no wanurowa. Owane Sitewi lai ne lu werese aiwawe irosiya ape, le peri no ape wanuteye. Lu werese saꞌi atenise temeniye taꞌame.”c 25 Serai fene werese kairefi aꞌi irore. Fene atoweiye sawa! Ane Owane Sitewi lo marepi tote tawesisiya. Etiri werese Owane Sitewi lai ane au teꞌeteye su, wiyeme aꞌi henerairowa. 26 Ahowa, nomo kemere oso aꞌi tewiye sahe wai werese ani furowa.d
27 Sosu aꞌi pe pasi ereti feni werese lowe hesiyo hesiyo i tepaꞌasiye su, fiyaru erasi nomo Saꞌi Adria fetaneyeti. Pasi po, wai lo lu tewi tamo awei pani ta atahe aꞌi iyei ne toteye. 28 Sosu lowe wafei tapiye se saꞌi yaru siyeyei ne ani fu arowe. Saꞌi yaru (40 mita aiwawe aꞌi). Nowe oso aꞌi, lowe wafei tapiye se si tame ani fu arowe. Saꞌi yaru (30 mita aiwawe aꞌi). 29 Lowe werese atoweiye irowe. Sosu lowe tapiye erasi hesiyo hesiyo wafei se ti tawesiye ape, lowe saꞌi maꞌe ani fu arowe. Sosu lowe god tereꞌe towafi lowe lo nowe mitaiyeyei ne teꞌeye. 30 Wai lo lu tewi tamo wai arunatiyei ne toteye su, sosu lowe wai oso saꞌi papu ani fu arowe. Lowe peri apou areare teꞌeye, “Nomo wai pihatu maꞌe wafei tapiye se saꞌi papu ani fu arorowa.” Lowe lai wai erasi ape arunatiyei ne toteye. 31 Sosu aꞌi pe Pol ai atu siye meni owane maꞌe apou eiye, “Lu eite mo wai erasi arunatiyei su, nomo werese temeniyerowa. Lowe werese wai sato pei irote.” 32 Ai atu siye lu werese peri eite wanuwe su, lowe wai lo wafei meneꞌe se aine touwe. Sosu wai oso aꞌi saꞌi papu itori.
33 Nowe mitaiyeye su, Pol ponei sahe teiye le apou teꞌeye, “Fene werese nowe tomu neꞌese ene a taꞌame. Serai ane fene maꞌe au teꞌe areiyesiya. 34 Fene werese ayei tamo ene are. Fene ene a taꞌame su, fene werese luwaru irorowa. Fene kairefi aꞌi irote. Fene werese wisere aꞌi teitorowa.” 35 Sosu Pol peri tepaꞌasiye su, le lowe ponei aꞌi nau taꞌase ani topotowe, Owane Sitewi maꞌe au teꞌe wisereyeye. Sosu le nau taꞌase tewi pa tewi ene ateye. 36 Sosu lowe werese kairefi heꞌi aniye su, lowe nau taꞌase ene ateye. 37 Lu werese, wai papu iroteye ape (276 aiwawe aꞌi ne). 38 Lowe werese ene a tepaꞌasiye su, lowe kewi so saꞌi papu ani fu arowe. Lowe kewi so fu arowe su, wai orese taꞌame, fetane aꞌi fetaneyeye.
Wai erasi ape aine tapereseye.
39 Esi su, lowe awei pani ta siyeye. Ahowa, lowe awei pani ape soꞌoru taꞌama. Eiwerou maꞌe irosiya awere? Sosu lowe saꞌi yaꞌorei eneri wisere aꞌi ta siyeye su, lowe wai saꞌi tewiye furiyei ne toteye. 40 Sosu lowe wafei tapiye se aine tou arowe. Lowe wai si iyatu siye wafei aine touwe. Sosu lu tamo ipari tahe hire ani aine apeꞌi ereye. Sosu eneri maꞌe furiyei ne toteye. 41 Ahowa wai eneri ta aine tawesiye. Wai pihatu heꞌe tawesiye. Wai si saꞌi ei erasi se aine taperese fiyari ereye.
42 Ai atu siye lu werese kalabus lu werese aine teraꞌeyei ne toteye. Lowe apou toteye, kalabus lu werese saꞌi feirowa su, lowe werese itero fiyarisawi. 43 Ai atu siye meni owane Pol noweinoweiyei ne toteye. Sosu le lowe maꞌe apou eiye, “Ahowa, fene lu werese owe ape aine teraꞌere.” Sosu le apou eiye, “Lu werese faraꞌu saꞌi itorire. Eneri sahe feiri. 44 Lu tamo feirowata ape faraꞌu metei tewi aꞌi ereti se ani fetane feiteye. Sosu lu werese eneri maꞌe fei ani teiri.”