Pol kemere Malta maꞌe iroteye.
28
Nomo werese saꞌi tewiye maꞌe furi. Lu tamo kemere lo iyape Malta au teꞌeye. 2 Lu taune, kemere ape sahe iroteye ape, nomo maꞌe wisere aꞌi au pati taꞌaneteye. Lowe yehe arineye su, lowe nomo ne au wisereyeteye. Saꞌi naretei aꞌi erasi itoteye su, lowe nomo yehe atahe se apou ei aniye.a 3 Sosu Pol lowahi yehe taꞌuwe arineye su, le lowahi ape mo yehe ani leiye. Sosu haru aimesi lai lowahi yehe hire tepaꞌasiye auweiye. Sosu Pol ereti sahe tomuwe. 4 Sosu lu werese, omo ape sahe iroteye ape, haru eite siyeye su, lowe teꞌe tiyatiye. Lowe apou eiye, “Sawi amou! Meni eite aine teraꞌe siye meni. Saꞌi ei erasi le aine teraꞌe taꞌame su, sepei owane yo seni luwaru aꞌi itiyaꞌu irowei ape, le haru aimesi aine teraꞌerowa.” 5 Sosu Pol haru ape yehe papu fu arosawi. Haru ape Pol tomuwe su, le temeniye taꞌame.b 6 Lu taune werese ereti lo meiyei ne toteye. Sosu lowe Pol temeniye winetaiyei ne toteye. Ahowa, lowe nowe ta se ninaweteye su, lowe marepi towafi lowe lo apou tote awetowe. “Pol temeniye taꞌame su, serai meni eite god tereꞌe ne.”c7 Kemere ape sahe meni owane ta lo awei pani atahe aꞌi iroteye. Meni owane lo iyape Publius. Le, nomo fai ape, wanuwe su, le nomo werese maꞌe au isafiye noweinoweiteye. Nowe hesi heta i tepaꞌasiye su, le nomo au isafiye noweinoweiteye. 8 Meni ape lo tai u erasi se wari sahe howeiteye. Meni ape tahe umeri se, li saꞌi, u se howeiteye. Sosu Pol le maꞌe fi su, ereti topo lo hire isawe hetesiye. Sosu le Owane Sitewi maꞌe au teꞌeye. Sosu peri ape au teꞌe tepaꞌasiye su, tahe lo au faraꞌuweye. Li saꞌi poꞌuteye. 9 Sosu lu taune tomu neꞌese u se ape, wanuwe su, lowe Pol maꞌe fai. Sosu le lowe werese au taꞌane faraꞌuweye. 10 Sosu lu taune werese, kemere sahe iroteye ape, etiri tomu neꞌese nomo maꞌe auwe. Sosu nomo wai se iyei ne toteye su, lowe etiri ayei tomu neꞌese nomo maꞌe auwe.
Pol omo Rom henerai.
11 Sosu aꞌi pe yame hesi heta nomo kemere ape sahe iroteye. Sosu meni Aleksandria lo wai taꞌi kemere ape sahe tu henerai ape, fiyaru saꞌi ei ninawe poꞌuteye. Fiyaru, saꞌi ei tepaꞌasiye su, lowe omo Rom maꞌe iyatutiyei ne toteye. Lowe god tereꞌe hesi lo hepene pihatu sahe leseye. Lowesi lo iyape Kasta, Polaks. 12 Sosu nomo Kemere Malta arunati su, saꞌi erasi iyatu toneri. Nomo omo Sirakyus maꞌe henerai. Nomo poweiye hesi heta saro iroteye. 13 Sosu poweiye hesi heta i tepaꞌasiye su, nomo Sirakyus arunati. Sosu omo Regium maꞌe henerai. Nowe moꞌo su, fiyaru ta fau maꞌe fai ape, henerai. Sosu nomo Regium arunatiyewe, omo Puteoli maꞌe nowe moꞌo se henerai. 14 Nomo omo Puteoli henerai su, nomo wai ape arunati. Lu feni tamo wesi towafi lowe lo sahe nomo ei aniye. Nomo poweiye ereti feni werese feni hesi aꞌi (7) tei iroteye. Nomo lowe arunati su, nomo yo sahe omo Rom maꞌe iteye. 15 Nomo yo sahe iteye su, lu feni nomo lo, nomo fai ape, wanuwe su, lowe nomo maꞌe taꞌuwerai. Lu taune tamo omo Apius lo nepawe amerame aꞌi maꞌe fai. Lu tamo tereꞌe omo tereꞌe howeiyei lo wesi hesi heta iroteye ape, maꞌe fai. Lowe nomo maꞌe taꞌuwerai. Pol lowe werese siye taꞌuwerai su, le Owane Sitewi maꞌe au teꞌe wisereyeye. Le marepi lo kairefi aꞌi irowe. 16 Nomo omo Rom henerai su, lu owane tamo apou teꞌeye, “Ne faraꞌu wesi no howeiri. Ane kalabus wesi maꞌe heneti taꞌame. Ai atu siye meni taꞌi ne aiwawe aꞌi iyei. Le ne au ninawe noweinoweiteyei.”
Pol Owane Sitewi lo peri omo Rom sahe au teꞌe fiyariteye.
17 Nowe hesi heta i tepaꞌasiye su, Pol Juda lo lu owane tamo ei taꞌuwe aniye. Lowe taꞌuwerai su, lowe maꞌe apou teꞌeye, “Kaiyemo mo, ane lu tewi nomo lo maꞌe yo seni luwaru aꞌi ta iro taꞌame ne. Aiwawe ane yaꞌariyei yo peri nomo lo arisi taꞌame. Ahowa, Juda lo lu owane tamo ane anite ti tawesiyei. Lowe ane Rom lo meni owane maꞌe heneti. 18 Rom lo lu owane ape mo peri ano wanuwe su, lowe ane arosaiyei ne toteye. Lowe apou teꞌeye, ‘Pol yo seni luwaru aꞌi ta iro taꞌame. Serai nomo le aine teraꞌe taꞌame.’ Ahowa, Juda lo lu owane tamo ane aine teraꞌeyei ne toteye.d 19 Juda lo lu owane apou hareye, ‘Ahowa! Ne meni ape owe ape arosawi. Ne le aine teraꞌere.’ Serai ane Rom lo meni owane tutawe, Sisar ei aniye. Ane Juda lo lu taune werese maꞌe orese aꞌi irowei ne tote taꞌame.e 20 Serai ane fene teꞌe taꞌuwerai. Ane fene peri ta teꞌeyei ne toteye. Owane Sitewi lo peri teꞌe naneiyei, nomo Israel lu taune werese ninawesiya ape, ane meni ape ne au teꞌesiya. Lowe marepi ano ape ane lu taune werese maꞌe au teꞌeteye ape, ne wafei se ti tawesiteye.”f
21 Sosu lowe itiyaꞌu teꞌeye, “Nomo one towe ta lowe fai ape maꞌe, lese ausai taꞌame. Lu tereꞌe tamo, Jerusalem maꞌe fai ape, lowe ne ne yo seni luwaru aꞌi au teꞌerai taꞌame. 22 Ahowa, nomo peri no wanuwei ne totesiya. Lu taune tomu neꞌese, omo omo werese iroteye ape, Jisas ne au teꞌe naruteye.”g
23 Sosu aꞌi pe lowe poweiye ta se Pol lowesi maꞌe taꞌuweraiyei ne ariariyeye. Poweiye ape henerai su, lu taune tomu neꞌese Pol lo wesi maꞌe taꞌuwerai. Sosu Pol esi, neriwei aꞌi Owane Sitewi lo peri au teꞌe areiyeteye. Le Jisas ne Moses lo yo peri sahe au teꞌeteye. Le Owane Sitewi lo au teꞌe siye lu werese lo one towe lowe maꞌe Jisas ne au teꞌe atuatuteye. 24 Lu taune tamo Pol lo peri wanuwe su, lowe Jisas lo yo umasiteye. Lu taune tereꞌe tamo wanu umasi taꞌame. 25 Lu taune tereꞌe tamo marepi tereꞌe tereꞌe toteteye. Sosu Pol peri ta lowe maꞌe teꞌe, “Owane Sitewi lo Hepene Waraꞌi aꞌi yaꞌariyei nomo lo maꞌe Owane Sitewi lo au teꞌe siye meni, Aisaia, ahi lo se peri wiyeme aꞌi apou au teꞌeye,
26-27 ‘Ne lu taune ape maꞌe peri wiyeme aꞌi au teꞌere. Fene werese peri ape wanurowa su, ahowa, fene peri eti sitewi wanu soꞌoruwerowata. Fene siyerowa su, etiri werese fene siye soꞌoruwerowata. Lu tewi ape lo marepi kairefi aꞌi henerai. Lowe apaniye lo aine tawesiye su, serai lowe Owane Sitewi lo peri wanu taꞌame. Lowe nihe lowe lo nisoꞌuwe tawesiye su, lowe etiri werese siye taꞌame. Lowe nihe lowe lo petaneyei su, apaniye lowe lo tosowei su, marepi lowe lo wanu soꞌoruwerowa su, lowe marepi towafi lowe lo ani awetorowa su, ane faraꞌu marepi hepene heꞌi aurowa.’ Ais 6:9-10
28 Juda lo lu taune, fene peri ano wanu etire. Owane Sitewi lai lu taune Moses lo yo peri umasi taꞌame ape, lowe maꞌe yo seni luwaru aꞌi towafi lowe lo au ani sasari pamoweye. Lowe werese Owane Sitewi ne tote tawesiyei su, le lowe maꞌe marepi hepene heꞌi aꞌi aurowa. Lu taune tewi tereꞌe ape mo peri lo wanu etirowa. Peri ape Aisaia lai lu taune werese maꞌe au teꞌeye. Lu taune wesi arunati.” 29 {Pol peri ape teꞌe tepaꞌsiye su, Juda lo lu tamo ai marepi erasi teꞌe tiyati toteteye. Lowe wesi ape arunatiyewe fi.}h
30 Sosu aꞌi pe Pol iyu menei hesi wesi lo, le eteye ape, sahe iroteye. Lu taune le maꞌe aiyeteye ape, le lai lowe ne au teꞌe wisereyeteye. 31 Sosu le Owane Sitewi lo marepi kairefi aꞌi se lu taune tomu neꞌese maꞌe, le sahe sewiye aiyeteye ape, au teꞌe areiyeteye. Sosu le Meni Owane Jisas Krais lo peri lu taune maꞌe au teꞌe atuatuteye. Ane Luk one towe eite lese tepaꞌasiye. Papera.