8 Tu ane peri ta fene maꞌe teꞌe soꞌoruwerowa. Lu taune tomu neꞌese omo werese irosiya ape mo, tote tawesiyei fene lo ne au teꞌe fiyari areiyeteye. Jisas Krais nomo werese maꞌe marepi hepene heꞌi aꞌi auwe. Serai ane Owane Sitewi maꞌe tote tawesiyei fene lo ne au wisereyesiya. 9-10 Ane mi mi werese Owane Sitewi maꞌe fene ne au ei towerinamisiya. Ane marepi kairefi aꞌi fene maꞌe sewiyeyei ne totesiya. Serai ane Owane Sitewi maꞌe mi mi werese apou ei towerisiya, “Ane lu tewi no omo Rom irosiya ape, sere sewiyeyei ne totesiya. Ane marepi no umasirowa. Ne faraꞌu ane maꞌe yo ta au atuature. Serai ane lowe maꞌe sewiyeyei ne irowa.” Owane Sitewi lai marepi ano siye soꞌoruwe tepaꞌasiye. Ane lai marepi kairefi aꞌi ano se peri heꞌi aꞌi lo au teꞌenamiteye. Ane lu taune werese werese maꞌe Owane Sitewi lo meni eime ne au teꞌe fiyari areiyenamisiya.^e 11 Ane marepi erasi aꞌi se fene siyeyei ne totesiya. Ane fene maꞌe aiyerowa su, ane Owane Sitewi lo Hepene Waraꞌi aꞌi lo yo seni fene maꞌe au teꞌe areiyerowa. Sosu tote tawesiyei fene lo tei kairefiyerowa. 12 Ane tote tawesiyei fene lo siyeyei su, fene marepi ano faraꞌu tei kairefiyerowa. Sosu aiwawe aꞌi fene tote tawesiyei ano se siyeyei su, ane marepi fene lo tei kairefiyerowa. Serai tote tawesiyei nomo lo tei kairefiyenamirowa. 13 Fene apou wanu soꞌoruweyei su, ane marepi nineꞌirowa. Wanure! Kaiyemo nowe tomu neꞌese ane fene maꞌe sewiyeyei ne aiyetereme. Ahowa, nowe werese ape etiri ta mo lai yo ano einamiteye. Serai ane fene maꞌe aiye te taꞌame. Ane fene maꞌe sewiyeyei ne totereme. Tu naifa ane lu tewi tereꞌe mase Owane Sitewi lo wiyawi taꞌaneteye. Aiwawe aꞌi ane fene mase Owane Sitewi lo wiyawi taꞌaneyei ne totesiya. Serai ane tote tawesi kairefiyeyei fene lo au teꞌe kairefiyerowa.^f 14 Ane fene mase Owane Sitewi wiyawi taꞌaneyei ne aiyereme. Piyene awere? Owane Sitewi lai ane maꞌe peri lo lu taune werese maꞌe fa au teꞌe fiyari areiyeyei ne auwe. Serai ane lu taune werese werese maꞌe Krais lo peri heneruwe ape fa au teꞌe areiyeye tene. Lu taune omo pani Grik irosiya ape ane Krais lo peri heneruwe fa au teꞌe areiyerowa. Aiwawe aꞌi lu tewi tereꞌe omo pani tereꞌe tereꞌe sahe irosiya ape, ane lowe maꞌe Krais lo peri heneruwe au teꞌe areiyerowa. Lu tewi tereꞌe marepi wisere erasi ape mo mase ane aiwawe aꞌi au teꞌe areiyerowa. Sosu aiwawe aꞌi lu taune marepi yahowaꞌi irosiya ape mo, ane lowe maꞌe Krais lo peri heneruwe au teꞌe areiyerowa. 15 Sosu aiwawe aꞌi marepi ano erasi aꞌi totesiya. Ane fene maꞌe omo Rom sahe irosiya ape, aiwawe aꞌi Krais lo peri heneruwe au teꞌe areiyeyei ne totesiya. 16 Ane Krais lo peri heneruwe ne neritase siye taꞌame. Krais lo peri heneruwe ape Owane Sitewi lo kairefi nomo maꞌe au atuatusiya. Lu taune werese peri heneruwe ape wanu tote tawesi umasinamiyei su, Owane Sitewi lai lowe maꞌe marepi hepene heꞌi aꞌi aurowa. Peri heneruwe ape tu Juda lo lu taune maꞌe au teꞌe areiyeteye. Sosu moꞌo lu tewi tereꞌe tereꞌe faraꞌu peri heneruwe ape wanu tote tawesiteye.^g 17 Owane Sitewi lo peri heneruwe wisere aꞌi apou au atuatu areiyesiya. Lu taune werese Owane Sitewi ne tote tawesiyei su, Owane Sitewi lai lowe lu taune aseyaro aꞌi au teꞌerowa. Serai lowe tu le ne tote tawesirowawe, mi mi weriyei le ne tote tawesinamirowa. Owane Sitewi tu naifa weriyei one towe lo sahe apou eiye, “Lu taune werese ane ne tote tawesinamiyei ape, sosu ane lowe ne apou au teꞌesiya. Fene nihe ano se lowe lu taune aseyaro aꞌi ne. Lowe mi mi pasi pasi weriyei ironamitorowa.”^h

18 Lu taune werese Owane Sitewi maꞌe meꞌiyeni maꞌe atati arunamisiya ape, sosu yo seni luwaru aꞌi ironamisiya ape, Owane Sitewi lai lowe maꞌe ai marepi erasi aꞌi totenamisiya. Lu taune yo seni luwaru aꞌi eito eite ironamiyei su, lowe Owane Sitewi lo peri pefine aꞌi marepi towafi lowe lo se einamiye. 19 Lu taune werese omo werese sahe Owane Sitewi lo yo seni waraꞌi aꞌi siye soꞌoruwe tepaꞌasiye. Owane Sitewi lai marepi waraꞌi aꞌi lo lowe maꞌe au atuatuteye. Serai lu taune werese Owane Sitewi lo marepi siye soꞌoruwe tene.ⁱ 20 Lu taune werese Owane Sitewi lo marepi werese siyerowata. Ahowa, tu naifa weriyei weriyei Owane Sitewi lai awei lo etiri taꞌaneye su, nowe pereye eite se aiwawe aꞌi henerai su, lu taune werese awei lo etiri werese Owane Sitewi lai taꞌaneye ape, siyeye. Lu taune awei lo etiri werese siyeye su, Owane Sitewi lai kairefi erasi lo mi mi weriyei weriyei ironamitorowa ape, sosu yo seni waraꞌi aꞌi lowe maꞌe au atuatu areiyeye. Serai lowe apou teꞌerowata, “Ane yo seni luwaru se taꞌama. Ane Owane Sitewi Pefine soꞌoru taꞌama.” Wawero aꞌi tene! Lowe Owane Sitewi lo yo seni waraꞌi aꞌi siye tepaꞌasiye.^j 21 Lowe Owane Sitewi siye soꞌoruwe tepaꞌsiye. Ahowa, lowe Owane Sitewi Pefine aꞌi marepi erasi tote taꞌame. Lowe Owane Sitewi lo iyape ei ani aru taꞌame. Owane Sitewi maꞌe teꞌe nineꞌi taꞌame. Piyete. Toteyei lowe lo meremereyeyei aꞌi ironamiteye. Lowe soꞌoruwe toteyei wisereyete se taꞌama. Serai lowe Owane Sitewi lo yo seni siye umasirowata.^k 22 Lowe marepi luwaru aꞌi apou toteteye. “Nomo etiri werese ape mo soꞌoruwe tene!” Wawero aꞌi! Toteyei lowe lo meremereye aꞌi iroteye.^l 23 Lu taune ape mo Owane Sitewi weriyei weriyei ironamisiya ape, meꞌiyeni maꞌe atati aruwe. Lowe Owane Sitewi maꞌe au teꞌe nineꞌi wisereye te taꞌame. Lowe meni ta mi mi weriyei iro taꞌame ape, lo nihari hepene me se hawese taꞌane leseye. Lowe aiwawe aꞌi irowe, awiye, haru, lo hepene me se hawese taꞌane leseye.^m

24 Sosu aꞌi pe lu taune werese marepi luwaru aꞌi towafi lowe lo tote umasiteye. Sosu lowe yo seni luwaru aꞌi eito eite ironamiteye su, Owane Sitewi lai lowe meꞌiyeni maꞌe atati arunati. Serai lowe mi mi weriyei weriyei tafaꞌe yo seni luwaru aꞌi ironamitorowa. Lowe tafaꞌe yo seni luwaru aꞌi ironamiteye su, lowe tahe paꞌare towafi lowe lo au ani luwaruweteye. 25 Lowe Owane Sitewi lo peri pefine aꞌi wanu arisiteyewe, meꞌiyeni maꞌe atati aruwe. Sosu lowe peri wawero wanu umasinamiteye. Lowe etiri tamo, Owane Sitewi taꞌaneye ape, au wisereye nineꞌiteye. Sosu lowe Owane Sitewi pefine etiri werese taꞌaneye ape meꞌiyeni maꞌe atati aruwe. Owane Sitewi ape ne nomo le ne au wisereye nineꞌinamitorowa su, nomo yo seni wisere aꞌi irorowa.

26 Serai lu taune ape mo yo seni eito eite ironamiteye su, Owane Sitewi lai lowe maꞌe yo seni luwaru aꞌi ne apou eiye, “Faraꞌu aꞌi ne. Fene yo seni luwaru aꞌi ironamite.” Serai taune tamo lu tamo naituwe taꞌama. Ahowa, taune tamo taune tereꞌe naituwe. Serai lowe tahe paꞌare lowe lo au luwaruweteye. 27 Sosu aiwawe aꞌi lu wenei taune ta naituwei lo marepi aweraꞌiyenati su, lowe lu wenei tereꞌe marepi erasi aꞌi totenamiteye. Serai lowe lu tereꞌe naituwei ne toteye. Lowe tafaꞌe yo seni luwaru aꞌi lu tereꞌe maꞌe ironamiteye. Serai lowe yo seni eito eite ironamiteye su, Owane Sitewi lai yo seni luwaru aꞌi au hese ereiyewe, lowe maꞌe etiri luwaru aꞌi lowe maꞌe teꞌe naneiyei ape, itiyaꞌu au tepaꞌasiye.ⁿ

28 Sosu aꞌi pe lowe Owane Sitewi Pefine aꞌi meꞌiyeni maꞌe atati arunati su, Owane Sitewi lai lowe maꞌe apou teꞌeye, “Fene werese faraꞌu. Fene marepi luwaru aꞌi umasinamite. Sosu fene yo seni luwaru aꞌi ape mo, ane einamiye ape irote.” 29 Marepi hepene lowe lo marepi luwaru aꞌi apou ape temeꞌeriyeye. Yo seni unou aꞌi apou ape ironamiteye. Lowe yo seni luwaru aꞌi iroteye. Lowe etiri tomu neꞌese aniteye. Lowe lu taune maꞌe fofowei auwe. Lowe etiri tamo siye wisereyeteye. Lowe lu taune tiyati tamo aine teraꞌe temeniyeteye. Lowe ai atu tiyatiteye. Lowe peri wawero tamo teꞌe areareteye. Lowe lu taune maꞌe peri luwaru aꞌi au teꞌeteye. Lowe lu taune tereꞌe maꞌe peri wawero teꞌe fiyariteye. 30 Lowe lu taune maꞌe peri teꞌe naruteye. Lowe Owane Sitewi maꞌe ai marepi totenamiteye. Lowe peri luwaru yahowaꞌi au teꞌeteye. Lowe iyape towafi lo ei ani aruweteye. Lowe lu taune maꞌe apou teꞌeye, “Nomo lu taune maꞌe wisere aꞌi tene!” Ahowa, lowe marepi luwaru heꞌi aꞌi totenamiteyewe, yo seni apou ape ironamiteye. Lowe tai mai towafi lowe lo peri arisinamiteye. 31 Lowe yo seni meremereye aꞌi ironamiteye. Lowe peri teꞌe naneiye towafi lowe lo arisinamiteye. Lowe lu feni towafi lowe lo ai marepi totenamiteye. Lowe tiyati siye ewite taꞌame. 32 Lu taune werese yo seni luwaru eito eite ironamiteye ape, lowe Owane Sitewi lo peri waraꞌi werese aꞌi soꞌoruwe tene. Ahowa, lowe Owane Sitewi lo peri waraꞌi aꞌi wanu arisinamiteye. Owane Sitewi lo peri waraꞌi aꞌi apou teꞌeye, “Lu taune yo seni luwaru eito eite umasinamisiya ape, Owane Sitewi lai lowe yehe omo maꞌe eimawesawirowa.” Lowe peri ape soꞌoruwe tepaꞌasiye. Sosu lowe yo seni luwaru aꞌi ape ironamitorowa. Lu taune tereꞌe yo seni luwaru aꞌi irowei su, lowe lu taune apou ape mo maꞌe marepi wisere aꞌi totenamirowa.