Owane Sitewi lai Juda lo yo seni au hese ereirowa.
2
Sosu aꞌi ape lu taune tamo lai lu taune tereꞌe maꞌe yo seni luwaru aꞌi au hese ereiyei su, fene taꞌi taꞌi aꞌi apou teꞌerowata. “Ane yo seni luwaru aꞌi se taꞌame.” Fene toteyei apou ape toteyei su, fene yo seni luwaru aꞌi towafi fene lo fene maꞌe au hese ereisiya. Piyene awere? Yo seni lowe iroteye ape, fene aiwawe aꞌi yo seni luwaru aꞌi ape ironamisiya.a 2 Lu taune yo seni luwaru aꞌi irosiya ape, Owane Sitewi lai fofowei erasi ta lowe maꞌe itiyaꞌu aurowa. Nomo etiri ta soꞌoruwesiya. Le yo seni au hese ereiyei su, Owane Sitewi lo yo seni pefine aꞌi tene! 3 Fene lu taune tamo lo yo seni luwaru aꞌi iroteye ape, au hese ereisiya su, sosu fene apou au teꞌeyei, “Owane Sitewi lai fofowei erasi aꞌi tamo lowe maꞌe itiyaꞌu aure.” Ahowa, fene yo seni luwaru aꞌi apou ape ironamisiya. Fene eiwerou totesiya awere? Owane Sitewi fofowei erasi fene maꞌe itiyaꞌu aurowa taꞌama awere? Piyete! Owane Sitewi lai fene maꞌe fofowei erasi aiwawe aꞌi aurowa! 4 Fene eiwerou totesiya awere? Owane Sitewi lai fene maꞌe yo seni waraꞌi aꞌi lo au atuatunamisiya. Le fene ne iyu menei tomu neꞌese ninawesiya. Sosu le fene maꞌe fofowei erasi witane se aꞌi itiyaꞌu au se taꞌame. Ahowa, le fene ne ninawenamisiya. Owane Sitewi lai yo seni waraꞌi aꞌi ironamisiya. Serai fene toteyei apou owe ape totere. “Owane Sitewi lai yo seni waraꞌi aꞌi ironamisiya su, le yo seni luwaru aꞌi ano fofowei erasi aꞌi ane maꞌe itiyaꞌu aurowata.” Ahowa, yo seni waraꞌi aꞌi nomo maꞌe omo hire iyei yo ape au atuatusiya. Serai nomo werese yo seni luwaru aꞌi nomo lo meꞌiyeni maꞌe atati arunatite! Sosu nomo Owane Sitewi lo peri werese tote umasinamite.b 5 Marepi fene lo kairefi aꞌi totenamisiya. Aiwawe aꞌi fene yo seni luwaru aꞌi meꞌiyeni maꞌe atati arunati se taꞌame. Serai nowe yeꞌewi se Owane Sitewi lai ai marepi erasi aꞌi fene maꞌe totenamitorowa. Sosu fene mi mi weriyei weriyei fofowei erasi aꞌi teritetorowa. Nowe yeꞌewi ape se Owane Sitewi lai yo seni waraꞌi aꞌi lo fene maꞌe au atuatu areiyerowa. Serai le yo seni luwaru aꞌi faraꞌu au hese ereirowa. Sosu le lowe maꞌe fofowei erasi aꞌi faraꞌu aurowa. 6 Owane Sitewi lai yo seni werese au hese ereirowa. Aiwawe aꞌi le faraꞌu etiri ape mo le lowe maꞌe au teꞌe naneiye ape, lowe maꞌe itiyaꞌu aurowa.c 7 Lu taune tamo yo seni aseyaro aꞌi ironamiyei ape, Owane Sitewi lai lowe maꞌe marepi hepene heꞌi aꞌi mi mi weriyei weriyei aurowa. Lowe lu taune tereꞌe maꞌe yo seni wisere aꞌi au irowei su, Owane Sitewi lai lowe maꞌe marepi wisere aꞌi lo aurowa. Sosu aiwawe aꞌi le lowe maꞌe iyape wisere aꞌi lo aurowa. Sosu le lowe maꞌe marepi hepene heꞌi aꞌi mi mi weriyei weriyei aunamitorowa. 8 Ahowa, lu taune tamo marepi towafi lowe lo tote umasinamiyei ne toteye su, sosu lowe Owane Sitewi lo peri pefine aꞌi arisinamisiya su, sosu lowe yo seni unou aꞌi wanu tote umasinamisiya su, Owane Sitewi lai lowe maꞌe ai peri erasi toterowa. Ei, le lowe maꞌe ai marepi erasi aꞌi totenamirowa.d 9 Lu taune tamo yo seni luwaru aꞌi irosiya su, Owane Sitewi lai lowe maꞌe fofowei erasi, sosu marepi orese aꞌi lowe maꞌe aurowa. Marepi orese aꞌi ape lu taune Juda sahe tu henerairowa. Sosu lu taune tewi tereꞌe maꞌe moꞌo henerairowa. 10 Lu taune tamo yo seni aseyaro aꞌi ironamisiya su, Owane Sitewi lai lowe maꞌe marepi wisere aꞌi lo aurowa. Sosu aiwawe aꞌi le iyape lowe lo ei ani arutorowa. Sosu le lowe maꞌe marepi fetane aꞌi lo aurowa. Le Juda lo lu taune maꞌe tu aurowa. Sosu le lu tewi tereꞌe maꞌe moꞌo aurowa. 11 Owane Sitewi lai lu taune werese werese yo seni luwaru aꞌi au hese ereirowa. Le lu tewi taꞌi taꞌi aꞌi au hese ereirowata. Ahowa, le lu tewi werese werese aiwawe aꞌi yo seni waraꞌi aꞌi lo se au hese ereirowa. 12 Lu taune tamo Owane Sitewi lo yo peri iro taꞌame su, Owane Sitewi lai lowe maꞌe yo seni waraꞌi aꞌi lo se au hese ereirowa. Sosu aiwawe aꞌi lu taune tamo Owane Sitewi lo yo peri wanu arisiyei su, Owane Sitewi lo yo peri pefine aꞌi se lowe maꞌe au hese ereirowa. Lu taune Owane Sitewi lo yo peri iro taꞌame ape, lowe yo seni luwaru aꞌi iroteye. Serai lowe werese mi mi weriyei weriyei temeniyerowa. 13 Lu taune tamo Owane Sitewi lo yo peri wanu tote arisiyei su, Owane Sitewi lo nihe se lowe aseyaro se taꞌama. Aiwawe aꞌi lu taune tamo Owane Sitewi lo peri wanu tote umasiyei su, Owane Sitewi lai lowe maꞌe marepi hepene heꞌi aꞌi aurowa. Owane Sitewi lo nihe se lowe werese yo seni aseyaro waraꞌi aꞌi ironamisiya. 14 Lu taune tewi tereꞌe, lowe Owane Sitewi lo yo peri iro taꞌame. Lowe Owane Sitewi lo yo peri aiheiye aꞌi irosiya. Aiwawe aꞌi lowe marepi towafi lowe lo se Owane Sitewi lo yo peri umasisiya su, lowe yo seni wisere aꞌi soꞌoruweye. Sosu aiwawe aꞌi lowe yo seni luwaru aꞌi soꞌoruweye. Lowe Owane Sitewi lo yo peri iro taꞌame su, marepi lowe lo papu, lowe yo peri ta irosiya.e 15 Owane Sitewi lai marepi lowe lo papu yo peri werese lo au lese areiyeye. Marepi towafi lowe lo yo seni aseyaro wisere aꞌi lowe maꞌe au atuatusiya. Marepi toteyei lowe lo, yo seni luwaru aꞌi lowe maꞌe au fu teꞌesiya. Marepi toteyei lowe lo aiwawe aꞌi Owane Sitewi lo yo seni waraꞌi aꞌi lirewawe lowe lo papu irosiya ape, amerame aꞌi au atuatusiya. 16 Ane fene maꞌe peri heneruwe ano au teꞌesiya, “Nowe yeꞌewi se Owane Sitewi lai lu taune werese lo yo seni fareyareyei ironamiteye ape, au hese erei ameramerowa. Le Jisas Krais lo ereti se yo seni lowe lo au hese ereirowa.”Moses lo yo peri lai lu taune werese au hese ereisiya.
17 Sosu aꞌi pe ane Juda lo lu taune maꞌe eisiya. Fene Juda lo yaꞌariyei lu feni maꞌe fai ape, fene apou totesiya, “Nomo Juda lo lu taune. Nomo Owane Sitewi lo yo peri werese aꞌi wanu umasinamisiya.” Owane Sitewi lai nomo werese ariariyeye. Serai nomo Owane Sitewi lo lu taune tewi pefine aꞌi tene. 18 Nomo Owane Sitewi lo marepi soꞌoruwe tepaꞌasiye. Owane Sitewi lo yo peri ape nomo maꞌe etiri werese au atuatuteye. Etiri wisere aꞌi aiwawe aꞌi etiri luwaru aꞌi Owane Sitewi lo yo peri nomo maꞌe au atuatuteye. 19 Fene apou totesiya, “Nomo Owane Sitewi lo yo peri au noweinoweinamisiya. Serai lu taune tamo Owane Sitewi lo yo seni aiheiye aꞌi iroteye ape, nomo lowe maꞌe au atuatusiya. Lu taune yo seni luwaru aꞌi ironamisiya ape, nomo lowe maꞌe au atuatu areiyesiya. Apou wou aꞌi nomo lu taune pasi aꞌi ironamiteye ape maꞌe, nomo mi erasi lowe maꞌe au atuatu areiyerowa.” 20 Lu taune marepi meremereye aꞌi totesiya ape, fene toteyei lowe lo au fareraiyeyei ne totesiya. Lu taune tamo soꞌoruwe taꞌame ape, fene lowe maꞌe Owane Sitewi lo yo peri pefine aꞌi au atuatusiya. Owane Sitewi lo yo peri ape nomo werese maꞌe Owane Sitewi lo marepi nomo ne au atuatusiya. Sosu aiwawe aꞌi Owane Sitewi lo yo peri ape lai Owane Sitewi lo yo seni pefine aꞌi nomo maꞌe au atuatunamisiya.f 21 Fene lu taune tereꞌe maꞌe Owane Sitewi lo peri au atuatusiya su, fene peri towafi fene lo tote umasirowata. Fene lu taune maꞌe au teꞌe areiyeteye, “Fene etiri tamo taꞌarei owe ape anire.” Ahowa, fene taꞌu etiri tamo taꞌarei aniteye.g 22 Fene lowe maꞌe apou au teꞌesiya, “Fene tafaꞌe yo seni luwaru aꞌi owe ape irote.” Ahowa, fene taꞌu tafaꞌe yo seni luwaru aꞌi aiwawe aꞌi ironamisiya. Fene marepi fene lo se apou totesiya, “Owane Sitewi wawero werese ani fu arosawire.” Ahowa, fene taꞌu naheyauwe yoꞌorei wesi papu wiyewe, etiri lowe lo taꞌarei anitesiya. 23 Fene lu taune werese maꞌe apou teꞌesiya, “Nomo werese Owane Sitewi lo yo peri pefine aꞌi wanu tote umasinamisiya. Owane Sitewi lai nomo ariariyeteye. Serai nomo Owane Sitewi lo lu tewi tutawe tene!” Ahowa, fene werese Owane Sitewi lo yo peri pefine ato araronamiteye. Fene Owane Sitewi lo yo peri ato araroteye su, fene Owane Sitewi lo iyape pefine aꞌi au luwaruwesiya. 24 Tu naifa weriyei weriyei meni ta Owane Sitewi lo peri one towe sahe apou leseye, “Fene yo seni luwaru aꞌi iroteye su, fene lu tewi tereꞌe maꞌe yo seni luwaru ape au atuatusiya. Serai lowe Owane Sitewi lo iyape pefine aꞌi teꞌe narunamisiya. Fene yo seni luwaru aꞌi ape lo sitewi aꞌi ne.”h
Juda lo tahe towei yaru leseye.
25 Fene Owane Sitewi lo yo peri wanu tote umasinamisiya su, fene tahe fene lo touwei yaru leseteye. Tahe fene lo touwei yaru ape lo sitewi apou aꞌi totesiya. “Nomo Owane Sitewi lo lu tewi aꞌi ne. Nomo tahe touwei su, nomo Owane Sitewi lo yo peri pefine aꞌi umasinamisiya. Serai lu taune werese nomo ne siye soꞌoruwesiya.” Ahowa, fene Owane Sitewi lo yo peri pefine aꞌi arisiteye su, tahe touwei fene lo ape yahowaꞌi henerai. 26 Lu taune tewi tereꞌe lai Owane Sitewi lo yo peri pefine aꞌi wanu tote umasinamisiya su, Owane Sitewi lai lowe ne apou aꞌi totesiya, “Lu taune tewi tereꞌe lai lowe lu tewi pefine aꞌi ano aiwawe aꞌi ne.”i 27 Meni ta tahe touwei yaru se taꞌama ape, meni ape Owane Sitewi lo yo peri wanu tote umasinamisiya su, le Juda lo lu taune au hese ereirowa. Lowe tahe touwei yaru irosiya, sosu Owane Sitewi lo peri irosiya. Ahowa, lowe Sitewi lo peri arisinamisiya. 28 Serai nomo fene maꞌe au teꞌesiya. Wanure! Owane Sitewi lo lu tewi pefine aꞌi ne, lowe Owane Sitewi lo yo peri wanu tote tawesi umasinamisiya. Lowe Owane Sitewi lo lu tewi ape pefine aꞌi tene! Juda lo lu taune tewi ape, tahe touwei su, peri lo arisiyei su, Owane Sitewi lowe ne apou totesiya. “Lowe lu tewi pefine aꞌi ano taꞌama.” 29 Juda lo meni ta tahe lo aꞌi touwei su, Owane Sitewi le ne au teꞌe taꞌame. “Meni ape aseyaro aꞌi ne.” Le mi mi weriyei yo seni luwaru aꞌi ironamisiya. Ahowa, meni tereꞌe ta Owane Sitewi ne tote tawesi umasinamiyei su, Owane Sitewi lo hepene waraꞌi aꞌi lai yo seni luwaru werese aꞌi lo au ani sasarisawirowa. Serai le Owane Sitewi lo nihe se meni ape Juda lo lu tewi pefine aꞌi ne. Lu taune tamo le ne au teꞌe wisereyesiya. Etiri ape yahowaꞌi ne. Ahowa, Owane Sitewi lai le maꞌe peri au teꞌe wisereyerowa. Etiri ape erasi pefine aꞌi ne.j