Lu taune werese yo seni luwaru aꞌi ironamisiya.
3
Piyene Owane Sitewi lai Juda lo lu tewi ariariyeye awere? Serai lowe lu tewi tutawe henerai. Piyene Juda lo lu tewi tahe touwei yaru au leseye awere? 2 Owane Sitewi lowe au ariariyeye su, sosu lowe tahe touwei su, Owane Sitewi lo nihe se etiri ape mo lowe pati aniyei awere? Juda lo lu tewi ne, Owane Sitewi lo nihe se lowe lu tewi erasi aꞌi tene! Piyene awere? Tu naifa weriyei Owane Sitewi lai lu tewi lo yaꞌariyei maꞌe peri werese auwe. Serai Owane Sitewi lai lowe maꞌe wiyawi lo au teꞌe fiyari areiyeyei ne auwe. 3 Lu taune tamo Owane Sitewi lo peri arisinamiteye. Sosu lowe Owane Sitewi lo yo peri wanu tote tawesi umasi taꞌame su, lowe Owane Sitewi lo yo seni pefine aꞌi lowe maꞌe ironamisiya ape, au luwaruweye awere? 4 Opiyai! Lu taune werese omo pani werese sahe, lowe peri wawero au teꞌenamisiya. Ahowa, Owane Sitewi lai marepi yo seni werese lo farere waraꞌi aꞌi ironamitorowa. Meni ta Owane Sitewi lo one towe sahe apou leseye.“Ane yo seni luwaru aꞌi ironamiteye. Peri werese no, ne yo seni luwaru aꞌi ano ne au fu teꞌesiya ape, wiyeme pefine aꞌi ne. Ne ane etiyei su, yo seni werese no wiyeme pefine aꞌi ne.” Sng 51:4
5 Nomo werese yo seni luwaru aꞌi ironamisiya. Owane Sitewi lai aiwawe aꞌi yo seni waraꞌi aꞌi mi mi weriyei weriyei ironamisiya. Lu taune tamo yo seni nomo lo sosu Owane Sitewi lo yo seni siye eti areiyeyei. Lowe apou toterowa. Ei! Owane Sitewi lo yo seni werese ape wiyeme pefine aꞌi tene! Yo seni waraꞌi aꞌi lo yo seni luwaru aꞌi werese nomo lo fu ani ararorowa. Nomo yo seni luwaru aꞌi irowei su, Owane Sitewi lai ai marepi erasi nomo maꞌe toterowa. Sosu le nomo maꞌe fofowei erasi aurowa. Nomo peri ta eiwerou teꞌesiya awere? Owane Sitewi lai yo seni luwaru aꞌi nomo maꞌe irowei awere? Ane lu lo marepi wou au teꞌesiya. 6 Piyete. Owane Sitewi lai yo seni luwaru aꞌi irowei su, le lu taune werese werese lo yo seni au hese ereirowata. 7 Meni ta apou eiye, “Ane peri wawero ta au teꞌeyei su, ane lu taune werese maꞌe Owane Sitewi lo yo seni waraꞌi aꞌi au atuatu areiyerowa. Serai Owane Sitewi lo iyape erasi aꞌi ei ani arowerowa. Piyene Owane Sitewi lai ane, meni ta yo seni luwaru aꞌi ironamisiya ape, au hese ereisiya awere?” 8 Lu tamo lai ane maꞌe peri wawero ta apou au fu teꞌesiya, “Nomo yo seni luwaru aꞌi irowei su, serai Owane Sitewi lai wiyawi wisere aꞌi nomo maꞌe au taꞌanerowa.” Peri ape iyape ano ani ararosiya. Lu ape mo peri ape au teꞌeyei su, lowe peri wawero teꞌesiya. Serai Owane Sitewi yo seni lowe lo au hese ereirowawe, lowe maꞌe fofowei erasi aꞌi aurowa.
Owane Sitewi lo nihe se lu taune werese luwaru aꞌi ne.
9 Sosu eiwerou awere? Nomo lu taune Juda lo lu tewi maꞌe fai ape, nomo lu taune tewi tereꞌe ani fu ararosiya awere? Opiyai! Ane fene maꞌe au teꞌe tepaꞌasiye. Juda lo lu taune werese sosu aiwawe aꞌi lu taune tewi tereꞌe tereꞌe, nomo werese yo seni luwaru aꞌi ironamisiya.a 10 Tu naifa weriyei lu tamo Owane Sitewi lo yo peri one towe sahe apou leseye.
“Lu taune werese lo yo seni aseyaro waraꞌi aꞌi iro taꞌame.
Ei, lu taune werese yo seni luwaru aꞌi ironamisiya.
11 Lu taune werese werese Owane Sitewi lo marepi soꞌoru taꞌama. Lu taune werese Owane Sitewi pefine aꞌi ne nehiyei ne tote taꞌame.
12 Lowe werese Owane Sitewi meꞌiyeni maꞌe atati aruteye. Owane Sitewi lo nihe se Lowe werese lu taune oroꞌoru wou aꞌi iroteye. Lowe werese yo seni wisere aꞌi iro taꞌame. Ane tame au teꞌesiya. Lowe werese yo seni wisere aꞌi iro taꞌame.” Sng 14:1-3; 53:1-3
13 “Ahi lowe lo meni fisiye yo wou aꞌi ne. Heneri luwaru aꞌi ahi lowe lo maꞌe heneraisiya. Lowe lu taune maꞌe peri wawero au teꞌe arearesiya.” Sng 5:9
“Peri lowe lo lu taune maꞌe au luwaruwesiya. Peri lowe lo Haru aimesi lo saꞌi horuse wou aꞌi ne.” Sng 140:3
14 “Ahi lowe lo maꞌe peri luwaru aꞌi temeꞌeriyesiya. Aiwawe aꞌi lowe lu taune maꞌe ai marepi erasi aꞌi atati totenamisiya.” Sng 10:7
15 “Lowe lu taune tamo witane aꞌi aine teraꞌeyei ne totenamisiya.
16 Lowe omo tereꞌe tereꞌe maꞌe uweiyei su, lowe lu tiyati au luwaruwe teraꞌeyei ne totenamisiya. Lowe aiwawe aꞌi lu taune maꞌe fofowei erasi aunamisiya.
17 Lowe lu taune maꞌe marepi taꞌi tote taꞌame.” Ais 59:7-8
18 “Lowe Owane Sitewi Pefine ne toteyei su, lowe le ne atoweiye taꞌame. Owane Sitewi lai lowe maꞌe fofowei erasi itiyaꞌu aurowata.” Sng 36:1
19 Peri ano ape wiyeme aꞌi tene! Wanure! Fene Owane Sitewi lo yo peri umasiyei ne toteyei su, fene Owane Sitewi lo yo peri werese fu umasinamite. Fene Owane Sitewi lo yo peri wanu umasiyei ne toteyei su, fene Owane Sitewi maꞌe apou owe ape teꞌere. Owane Sitewi lai yo seni werese fene lo yo peri lo se au hese ereirowa. Lu taune werese omo omo werese irosiya ape, lowe Owane Sitewi lo nihari sahe teirowa. Serai Owane Sitewi lai yo seni luwaru werese aꞌi lowe lo au hese ereirowa. 20 Fene Owane Sitewi lo yo peri werese wanu umasiyei ne toteyei su, fene Owane Sitewi lo nihe sahe aseyaro aꞌi irotorowata. Ahowa, Owane Sitewi lai yo peri lo nomo maꞌe yo seni luwaru aꞌi au atuatu areiyesiya.b
Krais ne tote tawesisiya su, iyape lo meni farere aꞌi ne.
21 Sosu aꞌi pe Owane Sitewi lo marepi heꞌi aꞌi nomo maꞌe itorai. Marepi lo apou aꞌi totesiya. Le aꞌi lai lu taune werese lo yo seni luwaru aꞌi ani pamowe sasarirowa. Serai Owane Sitewi lo nihe se lowe werese aseyaro waraꞌi aꞌi henerirowa. Marepi heꞌi aꞌi lo Owane Sitewi lo yo peri pefine aꞌi aweraꞌiyenati. Owane Sitewi lai nomo maꞌe marepi heꞌi aꞌi lo au atuatuwe. Moses lo yo peri, sosu Owane Sitewi lo peri au teꞌe siye lu werese lowe marepi heꞌi aꞌi lo ne leseye. 22 Nomo Jisas Krais ne tote tawesiyei su, Owane Sitewi lai nomo maꞌe aseyaro waraꞌi aꞌi au eirowa. Lu taune werese Krais Jisas ne tote tawesisiya ape, lowe Owane Sitewi lo marepi heꞌi aꞌi fa tote tawesi umasite. Lu taune Owane Sitewi lo yo peri iroteye ape, sosu lu taune Owane Sitewi lo peri aiheiye aꞌi iroteye ape, lowe werese aiwawe aꞌi Owane Sitewi lo marepi heꞌi aꞌi fa tote tawesi umasite.c 23 Lu taune werese yo seni luwaru aꞌi ironamiteye. Serai lowe werese Owane Sitewi lo yo seni waraꞌi aꞌi henerairowata. Serai lu taune werese le ne fa tote tawesi umasite. 24 Sosu Owane Sitewi lai nomo maꞌe waraꞌi aꞌi ferafereiyei lo se au irowe. Le nomo maꞌe marepi aseyaro aꞌi neri aꞌi auwe. Owane Sitewi lai nomo Krais Jisas lo ereti se si ete hene aniye. Serai Owane Sitewi lo nihe se nomo aseyaro waraꞌi aꞌi henerai.d 25 Owane Sitewi lai meni eime lo hi awei maꞌe temeniyeyei ne eimawe arosai. Jisas me tapeꞌi sahe temeniyeye su, lu taune werese Jisas ne tote tawesiyei ape, fisaꞌi lo yo seni luwaru aꞌi lowe lo au hu pamowe sasariyei. Owane Sitewi lai Jisas lo fisaꞌi se nomo lo yo seni luwaru aꞌi irowe ape au hu pamowe sasariye su, le nomo maꞌe yo seni aseyaro waraꞌi aꞌi lo au atuatu areiyeye. Tu naifa weriyei lu taune werese yo seni luwaru aꞌi ironamiteye su, Owane Sitewi lai lowe ne ninawe ninaweteye. Le yo seni luwaru aꞌi lowe lo atati aweraꞌiyenatiyewe, lowe maꞌe fofowei erasi witane se itiyaꞌu au taꞌame. Owane Sitewi lai yo seni luwaru aꞌi lowe lo atati aweraꞌiyenati. 26 Sosu ane fene maꞌe eiwa. Pereye nowe eite se Owane Sitewi nomo werese maꞌe yo seni waraꞌi aꞌi lo au atuatu areiyesiya. Nomo werese Jisas ne tote tawesiyei su, le yo seni aseyaro waraꞌi aꞌi nomo maꞌe au ironamirowa. Le nomo maꞌe aseyaro waraꞌi aꞌi au irorowa su, yo seni waraꞌi aꞌi lo wiyeme pefine aꞌi ne.
27 Serai ane apou eirowata, “Ane Owane Sitewi lo yo peri werese wanu tote umasinamisiya. Serai Owane Sitewi lai ane ne meni aseyaro aꞌi eisiya.” Ahowa, ane peri ape au teꞌerowata. Lu taune werese werese Owane Sitewi lo marepi heꞌi aꞌi fu tote tawesi umasite. Sosu le lowe ne lu taune aseyaro aꞌi au eirowa. 28 Lu taune werese werese Owane Sitewi lo marepi heꞌi aꞌi wanu tote tawesi umasiyei su, Owane Sitewi lai lowe maꞌe yo seni aseyaro waraꞌi aꞌi au irowei. Lu taune Owane Sitewi lo yo peri, Moses one towe leseteye ape, umasinamisiya su, Owane Sitewi lai yo seni aseyaro waraꞌi aꞌi lowe maꞌe au irorowata. Ahowa, lowe werese yo seni luwaru aꞌi mi mi weriyei weriyei ironamirowa. 29 Owane Sitewi omo hire lo sahe onusiya ape, le aꞌi lai Juda lo Owane Sitewi pefine aꞌi awere? Ahowa, Owane Sitewi pefine aꞌi ne. Lu tewi tereꞌe lo Owane Sitewi aiwawe aꞌi awere? Ei, lu tewi tereꞌe tereꞌe lo Owane Sitewi aiwawe aꞌi tene.e 30 Owane Sitewi taꞌi aꞌi ironamisiya su, lu taune werese werese marepi heꞌi aꞌi lo fu wanu tote tawesi umasiyei. Le Juda lu taune werese tote tawesiyei su yo seni aseyaro waraꞌi aꞌi au irorowa. Aiwawe aꞌi le lu tewi tereꞌe aiheiye aꞌi tote tawesiyei se yo seni aseyaro waraꞌi aꞌi au irorowa.f 31 Nomo Owane Sitewi maꞌe marepi heꞌi aꞌi lo wanu tote tawesi umasiyei su, nomo Owane Sitewi lo yo peri eiwerou totesiya awere? Owane Sitewi lo yo peri luwaru aꞌi awere? Nomo Owane Sitewi lo yo peri werese fu arosawiyei awere? Opiyai! Fene apou owe ape totete. Nomo Owane Sitewi lo marepi heꞌi aꞌi ape wanu tote umasiyei su, nomo Owane Sitewi lo nihe se Owane Sitewi lo yo peri werese umasinamirowa.g